Jị'cavacdye' 20 - Tsimane

Mir yómodyeꞌ

¹ Cạvete yụ yirity anjer mạyedyeꞌcheꞌ jijtuij. C̣hácaquis unĉan muꞌ mọꞌ mochĉansiꞌdyes toꞌ, judyeyaꞌ chäcdyis cadena chimeꞌ muꞌ.

^2-3 Muꞌ anjer tŝọ́tyete muꞌ c̣hovaj buꞌyity, muꞌ tạꞌcaty urucyatydye nas Sọyoꞌ, muꞌdyemꞌ Satanás, c̣họcoꞌjete chat qui vaꞌquecte mochĉansiꞌĉan toꞌ, muꞌĉan ĉärꞌtac, chat qui cac̣htacdyeꞌtum yụꞌtyeyeꞌ mọꞌ chụiꞌdyeꞌ toꞌsiꞌ. Mir raꞌ yómodyeꞌ muꞌĉan raꞌ meꞌ buꞌyi ĉärꞌ buꞌyi, jadyic raꞌ väñätucsi jacchety muntyiꞌ in, junꞌ quiꞌ chuc cạ̈tsetaqui mir yómodyeꞌ. A raꞌ meꞌsiꞌ jäquiꞌve, mensiꞌtuqui ramꞌ jiꞌshubac muꞌ muꞌĉantyiꞌ.

⁴ Cạvacsi yụ daiꞌ ayoꞌsiꞌ bäꞌyaquis in. Muꞌin muꞌcheꞌ bäꞌyity in soꞌmac in paj qui ayoꞌbuꞌyi in. Chimeꞌdye cạvacsebi yụ ạꞌedyeꞌ muꞌin ijactyiꞌ jiquej in, tätsactyiꞌ joꞌnoꞌ jiquej in cäc̣häꞌchucdyeꞌyaꞌ muꞌ Jesús judyeyaꞌ voroꞌyedyeꞌyaꞌ Jenꞌsiꞌ p̂eyacdyeꞌ muꞌ. Muꞌin jam timaꞌquisety in muꞌ vajedyedyeꞌ buꞌyity mijam jenꞌtuptety in jämꞌtacdyeꞌ muꞌ chimeꞌ, mijam cac̣htacdyeꞌtumtyiꞌ muꞌsiꞌ jáficheꞌ in mijam uncheꞌ. Yụ cạvacseban tsạꞌ buꞌban in, judyeyaꞌ Cristotum ayoꞌbuꞌyi in, mir raꞌ yómodyeꞌ meꞌquiꞌ raꞌ ayoꞌbuꞌyi in.

⁵ Mọꞌ tashches vañinyedyeꞌ shupquiꞌ, yoctyiꞌ na säñity in jambiꞌ raꞌ vañinyeban muꞌin in, junꞌ quiꞌ chuc cạ̈tsetaqui mir yómodyeꞌ in.

⁶ Anic raꞌ där maꞌjoij muꞌin in, tashchesyaꞌ vañinyedyeꞌ, muꞌin raꞌ Jenꞌdyety in, muꞌin raꞌ jam junꞌ cạveꞌ in jadyiquis sänꞌdyeꞌ tŝijĉansiꞌ. Chat qui raꞌ muꞌin yụꞌtac in cudyitity Jenꞌcheꞌ in judyeyaꞌ Cristocheꞌ, mir raꞌ yómodyeꞌ Cristotum ayoꞌbuꞌyi in.

Jiꞌpenac Sọyoꞌ

⁷ Cạ̈tsetaquiyaꞌ raꞌ mir yómodyeꞌ, chat q̂uinꞌdyemꞌ raꞌ jiꞌshubac muꞌ Satanás, yóĉandyemꞌ ĉäꞌräijĉan u.

⁸ Sacti raꞌ muꞌ väñätucsequi muntyiꞌ jacchety in, paiꞌ bäꞌyity in, muꞌin nash Gogvety in judyeyaꞌ Magogvety in, meꞌ jéyacsi in muꞌin fạ́quetety Jenꞌ in. Satanás raꞌ vajmuꞌyaꞌjeyacsi räj jacchety muntyiꞌ in, anic raꞌ daiꞌ jiꞌshupcacsi jeñejti marvety jáman. Meꞌtum raꞌ vajmuꞌyaij in paj qui chuti Jenꞌtum in.

⁹ Muꞌin väc̣häꞌtyity in paiꞌ raꞌ jịjcaij in muꞌinsiꞌcheꞌ jac muꞌin anicjetety Jenꞌ in, cọijtacsebi raꞌ bäꞌyedyeꞌ in mọꞌ Jerusalén, mọꞌ mạꞌjeꞌsiꞌ Jenꞌ, muꞌincheꞌ raꞌ tŝọij in. Vátyequejdye raꞌ mạyedyeꞌches tŝij tŝọcsiꞌ, mọꞌ raꞌ tasteyacsiꞌ jiꞌcoꞌshayacsiꞌ.

¹⁰ Mọꞌ Sọyoꞌ, väñätucsis jiquej, mọꞌ vaꞌcac tŝijĉan yóĉandyemꞌ coꞌshaiꞌĉan azufretum o, yóĉandyemꞌ vajedyedyeꞌ buꞌyity u judyeyaꞌ chimeꞌ muꞌ väñädyeꞌyaꞌ p̂eyaquity, muꞌ p̂eyaqui vajedyedyeꞌ buꞌyitydyes. Muꞌĉan raꞌ räjĉan ñịbedyes cạveꞌ in, mạij judyeyaꞌ tsedyedyeꞌ, mijam raꞌ jụꞌñisĉan mạyedyeꞌ shuban muꞌĉantyiꞌ in.

Jadyiquis raꞌ jịꞌcäts yụꞌtacdyeꞌ muntyis in

¹¹ Cạveꞌ yụ yiris därsiꞌ ayos bäꞌyaquis muꞌ jaiꞌbas, cạvete yụ muꞌcheꞌ bäꞌyity chimeꞌ. Jac judyeyaꞌ mạyedyeꞌches jedyeꞌ räj mọꞌ mọtsiꞌ in Jenꞌsiꞌyaꞌ vej muꞌ, aty jam quivij jiꞌcavibunꞌ in.

¹² Chimeꞌdye cạvacseban yụ räj muꞌin säñity jiquej in, mujuꞌchaty in judyeyaꞌ uyaꞌyaty in, muꞌyaꞌ muꞌin in Jenꞌsiꞌyaꞌ vej in. Chat qui vanchuc mọꞌ quirca in judyeyaꞌ yocsiꞌ quirca chimeꞌ vanchuc, mọꞌ jiꞌjäcacsebiꞌ tịj Jenꞌyaꞌ raꞌ bäꞌyity in. Chat qui muꞌ Jenꞌ jịꞌcäts yụꞌtacsi muꞌin säñity in junꞌ junꞌ chuc sánac quircacheꞌ in, junꞌ junꞌ chuc bäꞌyaque jaccheꞌ jiquej in.

¹³ Jenꞌ jiꞌshupcacseban muꞌin marĉantyiꞌ p̂utity in, judyeyaꞌ muꞌin ruꞌdyeiꞌyaty in, judyeyaꞌ muꞌin säñitysiꞌĉantyiꞌ ĉärꞌtacdyeꞌ in, räj mọꞌ shubanꞌ Jenꞌyaꞌ. Jenꞌ räj jịꞌcäts yụꞌtacsi junꞌ chuc bäꞌyaque jaccheꞌ jiquej in.

¹⁴ Muꞌin ruꞌdyeiꞌyaty in judyeyaꞌ muꞌin säñitysiꞌ ĉärꞌtacdyeꞌ muꞌin, muꞌin aty vaꞌcac tŝijĉan in. Mọꞌ jadyiquis sänꞌdyeꞌ päräꞌyis mọꞌ shupquiꞌ.

¹⁵ Tyi chuc jam sánactyiꞌ tịj in Jenꞌsiꞌcheꞌ quirca muꞌ, muꞌin meꞌtyity in vaꞌcac tŝijĉan in.