Jị'cavacdye' 2 - Tsimane

Jịꞌchicacdyes Efesoĉantyidyes in

¹ —Sáñevaꞌ anjerdyes, muꞌ ĉọjcacsity ñuruꞌtyity yụ́tyiꞌ in muꞌin Efesoĉan bäꞌyitydyes in, jéme ọij p̂eyacdyeꞌ muꞌindyes in: "Yi muꞌ tapchucsity yävätidyeꞌ ọ́rotaꞌ in tacvesyaꞌ un muꞌ judyeyaꞌ dyeteꞌĉaĉan vera yụꞌtaquis muꞌĉaĉan tyeij miꞌity. Yi muꞌ jínac:

² Yụ anic chị́yeyac junꞌ chuc bäꞌyi miꞌin, fer carijtaqui yụ́dyes miꞌin, judyeyaꞌ tyumꞌchutidyeꞌtum jiꞌcajñetiñeꞌ ñịbedyes miꞌin, judyeyaꞌ chimeꞌ jam dyichchucsi miꞌin muꞌin ac̣hiꞌyity in. Chimeꞌdye miꞌin jịꞌĉojtacsi muꞌin väñädyeꞌyaꞌ yity in: Tsun jutactyiꞌ Jenꞌtyiꞌ muꞌ, miꞌin qui namꞌ chị́yacsi anic väväjñity in.

³ Miꞌin na tyumꞌchutidyeꞌtum bäꞌyi miꞌin, meꞌ tsanꞌ ñịbedyes jịꞌĉojtiñeꞌ yụ́dyes, jam qui namꞌ shọijtiñeꞌ miꞌin.

⁴ Meꞌ tsanꞌ meꞌ bäꞌyi miꞌin, mọꞌyaꞌ qui namꞌ yiris dyijyedyeꞌ miꞌin jam rụijsis, ĉaĉaij na aty jam mạꞌjitiĉaꞌ yụ miꞌin, jam jeñej jiquej miꞌin.

⁵ Mọꞌdyes dyijyebadac quivij, anic aty moch penjan miꞌin, chimeꞌdye dyijyebadac juchajcheꞌ miꞌin paj qui cuvij jiĉun miꞌin Jenꞌdyes, yojdyemꞌ tashcheꞌ jiquej u miꞌin. Jam dyijyebanꞌ juchajcheꞌ jụijyaꞌ miꞌin, yụ raꞌ meijjetyebadyeyac yụꞌtaquis vera.

⁶ Mọꞌyaꞌ qui namꞌ jämꞌsiꞌ dyijyedyeꞌ miꞌin, mọꞌ maꞌjotyebiyacsiꞌ yụ, junꞌ chuc miꞌin fạ́cacsebi jiꞌchäyitidyeꞌ muꞌin Nicolaitassiꞌ in, yụ chimeꞌ fạ́cacsebi dyijyedyeꞌ muꞌin.

⁷ Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ jätäjyiꞌ chuc mọꞌ Jenꞌsiꞌ Ạꞌedyeꞌ muꞌ, jéyacsiꞌ muꞌin ñuruꞌtyity yụ́tyiꞌ in. Tyi chuc jiꞌpeñeꞌtyiꞌ aꞌc̣his dyijyedyeꞌ in, yụ raꞌ yụꞌtyeyacsi paj qui muꞌin jebeiꞌ in mọꞌ tsạꞌchucsis sacacdyeꞌ, mọꞌ cätidyeꞌ chidyiꞌĉanyaꞌ buꞌyis jämꞌsiꞌcheꞌ bäꞌyedyeꞌ, mọꞌ jämꞌtyes Jenꞌ."

Jịꞌchicacdyes Esmirnaĉantyidyes in

⁸ —Sáñevaꞌ anjerdyes muꞌ ĉọjcacsity muꞌin ñuruꞌtyity yụ́tyiꞌ in muꞌin Esmirnaĉan bäꞌyitydyes in, jéme ọij p̂eyacdyeꞌ muꞌindyes in: "Yi muꞌ Tashchety judyeyaꞌ Jäquity, muꞌ säñity jiquej judyeyaꞌ tsạꞌebantyiꞌ.

⁹ Yi muꞌ jínac: Yụ nash chị́yeyac junꞌ chuc bäꞌyi miꞌin, junꞌ chuc ñịbedyes jịꞌĉojtiñeꞌ yụ́dyes miꞌin, judyeyaꞌ junꞌ chuc miꞌin anic ñịbety. Meꞌ tsanꞌ meꞌ miꞌin, Jenꞌsiꞌyaꞌ qui namꞌ vej muꞌ anic jedyeꞌtumtyiꞌ miꞌin. Chimeꞌdye yụ chịj junꞌ chuc pạrej judío in fer ñäñinac in. Muꞌin meꞌtyinactyiꞌ in, meꞌ tsanꞌ judío naꞌi in, jam qui namꞌ anictyity judío shupqui in, Satanástyiꞌ shupqui in.

¹⁰ Ñịbedyes jụijyaꞌ jịꞌĉojtiñeꞌ miꞌin, jam raꞌ noiꞌyi miꞌin. Pạrej raꞌ Sọyoꞌ jiꞌĉujtyinac miꞌin, mọꞌ raꞌ yiꞌ paj qui ĉärꞌtac miꞌin, yiriꞌtac raꞌ mạyedyeꞌ meꞌ ñịbeꞌ cạvetiñeꞌ miꞌin. Yejĉojamꞌ cäc̣häꞌchutiĉamꞌ yụ paj raꞌ tsanꞌ ijanacyaꞌ in cäc̣häꞌchucdyeꞌyaꞌ yụ, jam raꞌ yocve dyijyi miꞌin, chat qui raꞌ yụ soꞌmeyac bijodyeꞌ, paj qui Jenꞌyaꞌ räjĉan bäꞌyi miꞌin.

¹¹ Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ jätäjyiꞌ chuc Jenꞌsiꞌ Ạꞌedyeꞌ muꞌ, jéyacsiꞌ muꞌin ñuruꞌtyity yụ́tyiꞌ in. Tyi chuc jiꞌpeñeꞌtyiꞌ aꞌc̣his dyijyedyeꞌ, muꞌ raꞌ jam jịꞌĉojtyeꞌ jäquiꞌves sänꞌdyeꞌ."

Jịꞌchicacdyes Pérgamoĉantyidyes in

¹² —Sáñevaꞌ anjerdyes, muꞌ ĉọjcacsity muꞌin ñuruꞌtyity yụ́tyiꞌ in Pérgamoĉan bäꞌyity in, jéme ọij p̂eyacdyeꞌ muꞌindyes in: "Yi muꞌ meꞌchuiꞌtyiꞌ mọꞌ chutidyes coc̣hino, mọꞌ pärenꞌve toꞌcacsis, yi muꞌ jínac:

¹³ Yụ chị́yeyac junꞌ chuc bäꞌyi miꞌin, chịj chimeꞌ yụ muꞌĉan bäꞌyi miꞌin yóĉandyemꞌ ayoꞌbuꞌyi Satanás u. Meꞌ tsanꞌ meꞌ miꞌin, yejĉoij qui namꞌ cäc̣häꞌchutiĉaꞌ yụ miꞌin, mijam farajjetiñeꞌ anicyedyeꞌ yụ́cheꞌ miꞌin. Miꞌinĉan ijate in muꞌ Antipas, muꞌ jịꞌcäts yuꞌbuntyiꞌ p̂eyacdyeꞌ yụ, muꞌĉan ijate in yóĉandyemꞌ bäꞌyi Satanás u. Meꞌ tsanꞌ muꞌĉan bäꞌyi miꞌin, yoquiꞌdyemꞌ ijate u jiquej in muꞌ Antipas, jam qui namꞌ peñi miꞌin.

¹⁴ Meꞌ tsanꞌ meꞌ miꞌin, mọꞌyaꞌ qui namꞌ dyijyedyeꞌ miꞌin jam maꞌjotyebiyacsiꞌ, ĉaĉaij na pạrej miꞌin cäc̣häꞌchubitinte jiꞌchäyitidyeꞌ Balaamsiꞌ jiquej muꞌ. Muꞌ jasoꞌmiti dyijyedyeꞌ muꞌ Balac jiquej paj qui muꞌ jiꞌseꞌ jaꞌyacsi Israeltyiꞌ vóshiꞌ in. Muꞌ jéyacsi paj qui jebeiꞌ in mọꞌ säcsedyeꞌ jämꞌtacdyeꞌyaꞌ jadyiquis, jéyacsi chimeꞌ paj qui voꞌvoij in, meꞌ buꞌyiꞌ shupquiꞌ jiꞌchäyitidyeꞌ muꞌ.

¹⁵ Chimeꞌdye pạrej muꞌyaꞌ miꞌinĉantyiꞌ in cäc̣häꞌchucsebi in jiꞌchäyitidyeꞌ muꞌin Nicolaitas in, mọꞌ nash yụ fạ́cacsebi dyijyedyeꞌ muꞌin.

¹⁶ Dyijyebadac juchajcheꞌ miꞌin, jam jụijyaꞌ meꞌ miꞌin, yụ raꞌ yiristum ĉọcyac, chuti raꞌ yụ meꞌtyitytum in chutidyesyaꞌ coc̣hino, mọꞌ shupquis chụꞌĉan yụ, p̂eyacdyeꞌyaꞌ raꞌ yụ vaꞌtacdyeꞌ soꞌmacsi.

¹⁷ Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ mọꞌ Jenꞌsiꞌ Ạꞌedyeꞌ muꞌ, jéyacsis muꞌin ñuruꞌtyity yụ́tyiꞌ in. Tyi chuc jiꞌpeñeꞌtyiꞌ aꞌc̣his dyijyedyeꞌ in yụ raꞌ muꞌin soꞌmacsi paj qui jebeiꞌ in mọꞌ mạyedyeꞌches säcsedyeꞌ maná, mọꞌ jam cạves muntyiꞌ in. Chimeꞌdye yụ raꞌ soꞌmacsi yirity jaiꞌbaty mij, mọꞌcheꞌ raꞌ sánac mụiꞌsis tịj muꞌin, mọꞌ jam chị́yacsebis yoctyiꞌ muntyiꞌ in. Muꞌ ramꞌ soꞌmactyiꞌ mij, muꞌ ramꞌ chị́yaqui mụiꞌsis tịj ĉụiꞌsiꞌ muꞌ."

Jịꞌchicacdyes Tiatiraĉantyidyes in

¹⁸ —Sáñevaꞌ anjerdyes, muꞌ ĉọjcacsity muꞌin ñuruꞌtyity yụ́tyiꞌ in Tiatiraĉan bäꞌyity in, jéme ọij p̂eyacdyeꞌ muꞌindyes in: "Yi muꞌ Jenꞌtyiꞌ Ạvaꞌ muꞌ, muꞌ p̂údyety vej jeꞌñety adyeꞌ judyeyaꞌ pịshyity yuj jeꞌñety yaꞌiꞌsiꞌ fiyero túnes.

¹⁹ Yi muꞌ jínac: Yụ nash chị́yeyac junꞌ chuc bäꞌyi miꞌin, chimeꞌdye chị́yebiyac mạꞌjitidyes miꞌin, judyeyaꞌ carijtacdyeꞌ miꞌin judyeyaꞌ anicyedyeꞌ miꞌin judyeyaꞌ tyumꞌchutidyeꞌ miꞌin, meꞌ úñi yụ́dyes miꞌin, jam jeñej jiquej.

²⁰ Meꞌ tsanꞌ meꞌ miꞌin, juñucsiꞌdyety qui namꞌ jayej miꞌin, ĉaĉaij na jam jedyeꞌjetiñeꞌ mọꞌ ac̣hiꞌyis p̂en Jezabel. Mọꞌ ĉụiꞌ yiꞌsiꞌ: Yụ nash soꞌmacsiꞌ p̂eyacdyeꞌ Jenꞌsiꞌ muꞌ, yiꞌ. Jam nash meꞌ, ĉaĉaij na väñädyeꞌyaꞌ mọꞌ seꞌ jaꞌyacsiꞌ úñity yụ paj qui mọꞌdyes voꞌvoij in judyeyaꞌ paj qui jebeiꞌ chimeꞌ säcsedyeꞌ in, mọꞌ jämꞌtacdyeꞌyaꞌ jadyiquis.

²¹ Yụ tsanꞌ biseꞌ paj qui dyijyebanꞌ juchajcheꞌ mọꞌ, jam qui namꞌ mọꞌ mạꞌjeꞌ farajjeꞌ shapudyemꞌ.

^22-23 Mọꞌdyes yụ raꞌ fersiꞌ soꞌmeꞌ japacjodyeꞌ mọꞌ p̂en, yụ raꞌ ijabiꞌ ạvaꞌ mọꞌ, chimeꞌdye yụ raꞌ soꞌmacsi anic därsiꞌ ñịbedyes muꞌin voꞌvoijtyiꞌ mọꞌtum in, jam dyijyeban juchajcheꞌ jụijyaꞌ in. Meꞌ raꞌ muꞌin ñuruꞌtyity yụ́tyiꞌ in, räj raꞌ chịj in junꞌ buty yụ chị́yacsebi ĉojtyiꞌ muꞌin judyeyaꞌ dyijyedyeꞌ muꞌin. Meꞌ raꞌ yụ soꞌmeyac vaꞌtacdyeꞌ cäts yirityityij miꞌin junꞌ chuc bäꞌyi jiquej miꞌin.

²⁴ Miꞌin na yoctyiꞌ Tiatiraĉan bäꞌyity miꞌin, miꞌin jam cäc̣häꞌchubitiñeꞌ mọꞌ aꞌc̣his jiꞌchäyitidyeꞌ Jezabelsiꞌ mọꞌ, mọꞌ jeꞌsiꞌ in caminsis jiꞌchäyitidyeꞌ Satanássiꞌ, jeꞌsiꞌ in, jam mọꞌ jiꞌchäyiti miꞌin. Mọꞌdyes yụ jam yocsiꞌ p̂eyacdyeꞌ soꞌmeyac miꞌin,

²⁵ meꞌdye yiris mọmoꞌ jéyac miꞌin paj qui jẹjcaiꞌ cäc̣häꞌchutiñeꞌ mọꞌ rụijsis p̂eyacdyeꞌ, mọꞌ meꞌchutiñes q̂uinꞌ miꞌin, meꞌ raꞌ miꞌin junꞌ quiꞌ chuc atsijbanyaꞌ yụ.

²⁶ Muꞌin na jiꞌpeñeꞌtyiꞌ aꞌc̣his dyijyedyeꞌ in judyeyaꞌ chäquintyiꞌ yụ in junꞌ quiꞌ chuc jadyic in, muꞌin meꞌ bäꞌyity in yụ raꞌ yụꞌtacsi paj qui ayoꞌbuꞌyi muntyidyes in, paiꞌ buꞌyity in,

²⁷ yojdyemꞌ muꞌ Jenꞌ u yụ yuꞌtyin yụ paj qui ayoꞌbuꞌyi yụ. Meꞌdye raꞌ muꞌin chimeꞌ ayoꞌbuꞌyi in, ferdyeꞌtum raꞌ ayoꞌbuꞌyi in, jeñej yäcäs fiyero tupuj p̂etaijjeꞌ puñuj, meꞌ buꞌyiꞌ shupquiꞌ raꞌ ayoꞌbuꞌyedyeꞌ muꞌin.

²⁸ Chimeꞌdye yụ raꞌ soꞌmacsi muꞌ ọ́rotaꞌ tuiꞌtyiꞌ nạijjodyeꞌ.

²⁹ Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ mọꞌ Jenꞌsiꞌ Ạꞌedyeꞌ muꞌ jéyacsis muꞌin ñuruꞌtyity yụ́tyiꞌ in."