Jị'cavacdye' 19 - Tsimane

¹ Aty meꞌsiꞌ seꞌveꞌ yụ fersiꞌ p̂eyacdyeꞌ mạyedyeꞌches jeñej yiꞌ shachtyity muntyiꞌ in yi p̂eyaqui in: "¡Timaꞌqueja muꞌ Jenꞌ Ayoꞌ tsun! Mumꞌ yirity jiꞌc̣honsinꞌ tsun, mumꞌ yirity ferdyeꞌtumtyiꞌ judyeyaꞌ mạijquedyeꞌtumtyiꞌ.

² Anic rụijsisyaꞌ dyijyedyeꞌ muꞌ jịꞌcäts yụꞌtacsi muntyiꞌ in, jam méquiꞌ cäj cạqui dyijyedyeꞌ muꞌ. Rụijsisyaꞌ dyijyedyeꞌ muꞌ soꞌmeꞌ vaꞌtacdyeꞌ mọꞌ chị́yacdyes meꞌtaquis p̂en, mọꞌ ac̣hiꞌtyeꞌsiꞌ jac aꞌc̣hisyaꞌ dyijyedyeꞌ mọꞌ. Mọꞌdyes muꞌ Jenꞌ vaꞌtacdyeꞌ soꞌmeꞌ ĉaĉaij na mọꞌ jiꞌijapte úñity muꞌ, mọꞌ mọs juchaj."

³ Cuvij p̂eyaqui yi in: "Timaꞌqueja muꞌ Ayoꞌ tsun, ĉaĉaij na räjĉan raꞌ naꞌiꞌ jịꞌsaꞌ bäꞌyedyeꞌĉan."

⁴ Muꞌin päräꞌ quiꞌtac vạjpedyeꞌ jiyity muntyiꞌ in tashcheꞌ buꞌyity in mọꞌintumdye vạjpedyeꞌ tsạꞌ buꞌyis in dyụtsyiꞌ Jenꞌyaꞌ in bäꞌyaquischetyyaꞌ, muꞌ timaꞌquete in. Yi in: "Paj meꞌ, meꞌ raꞌ timaꞌqueja muꞌ Jenꞌ."

⁵ Seꞌveꞌ yụ p̂eyacdyeꞌ bäꞌyaquitysiꞌcheꞌ, yiꞌ: "Timaꞌqueja tsuntyiꞌ Jenꞌ, räj miꞌin úñity muꞌ chimeꞌ irijyity Jenꞌcheꞌ miꞌin, mujuꞌchaty miꞌin judyeyaꞌ uyaꞌyaty miꞌin, räj miꞌin timaꞌquemac muꞌ Jenꞌ."

Mọꞌ feshta vämedyedyes muꞌ Oveca buꞌyitysiꞌ

⁶ Seꞌveꞌ yụ anic fersiꞌ p̂eyacdyeꞌ, jeñej yiꞌ shachtyity muntyiꞌ in, judyeyaꞌ jeñej yiꞌ ojñiꞌ chabanꞌsiꞌ, judyeyaꞌ jeñej yi pururu fạ́coijtyiꞌ, meꞌquiꞌĉan yiꞌ seꞌveꞌ yụ. Yiꞌ mọꞌ p̂eyacdyeꞌ: "Timaꞌqueja tsuntyiꞌ Jenꞌ, muꞌ mujuꞌchaꞌ ferdyeꞌtumtyiꞌ Ayoꞌ tsun, ĉaĉaij na muꞌ aty ayoꞌbuꞌyi.

⁷ Mọꞌdyes jemoñeꞌ maꞌjojaꞌ tsun, jemoñeꞌ därsiꞌtum maꞌjodyeꞌ timaꞌqueja Jenꞌ, ĉaĉaij na aty ayij tupudyeꞌ vämedyedyes raꞌ muꞌ Oveca buꞌyitysiꞌ, chimeꞌdye p̂en muꞌ aty jäꞌmiiꞌtyiꞌ vämedyedyes mọꞌ.

⁸ Mọꞌ soꞌmac paj qui jämꞌtyiꞌĉan quịꞌsiꞌ juiꞌbutyĉan pashyityĉan. (Muꞌ juiꞌbuty quịꞌsiꞌ cạiꞌ jeñej rụijsis dyijyedyeꞌ muꞌin anicjetetysiꞌ Jenꞌ in, meꞌ buꞌyi muꞌ.)

⁹ Muꞌ anjer jin yụ: —Sáñevaꞌ q̂uinꞌ räj ọij: "Anic där muꞌin maꞌjoij muꞌin fayactyiꞌ in paj qui ĉọ́queꞌ in mọꞌ vämedyeꞌ feshta Oveca buꞌyitysiꞌ muꞌ, muꞌtum raꞌ yiriꞌyaꞌ säcsi in." Muꞌ jin yụ chimeꞌ: —Ọij nash anicsis p̂eyacdyeꞌ Jenꞌsiꞌ muꞌ.

¹⁰ Dyụtsyi tsanꞌ yụ anjersiꞌyaꞌ vej muꞌ, timaꞌquete tsanꞌ raꞌ ĉúti yụ. Muꞌ qui yi jin yụ: —Jam raꞌ dyụtsyim ĉaĉaij nash yụ chimeꞌ Jenꞌtyiꞌ úñity muꞌ, yojdyemꞌ mi u judyeyaꞌ vojity mi, muꞌin rụij cäc̣häꞌchuptety p̂eyacdyeꞌ in, mọꞌ p̂eyes muꞌ Jesús. Jenꞌ ram timaꞌquetem. Anicdye meꞌ, muꞌin jasoꞌmitity p̂eyacdyeꞌ Jenꞌ in mọꞌdyemꞌ muꞌin voroꞌtacsi in mọꞌ rụijsis p̂eyacdyeꞌ p̂eyes Jesús.

Muꞌ foquiꞌtyity jaiꞌbascheꞌ cavayo

¹¹ Cạvi yụ vanacyiꞌ mạyedyeꞌcheꞌ, mọꞌcheꞌ jiꞌnaijtiꞌ yiris jaiꞌbas cavayo. Muꞌ foquiꞌtyity muꞌcheꞌ jéte in: Rụij Dyijyity, judyeyaꞌ Jịꞌcätseꞌtyiꞌ P̂eyacdyeꞌ, meꞌ jéte in, ĉaĉaij na rụijsisyaꞌ dyijyedyeꞌ chuti judyeyaꞌ jịꞌcäts yụꞌtacsi muntyiꞌ in.

¹² Vej na muꞌ p̂údyeiꞌ jeꞌñeiꞌ adyeꞌ, joꞌnoꞌcheꞌ namꞌ daiꞌ meꞌchuiꞌ ĉästacdyeꞌ muꞌ. Chimeꞌ aꞌcheꞌ muꞌ sánac tịj muꞌ, mijam tyi chị́yepte mọꞌcheꞌ in, ĉụiꞌ mọmoꞌ chị́yaqui.

¹³ Coftyity na muꞌ c̣huctac chäshĉan. Tịj na muꞌ: P̂eyacdyeꞌ buꞌyity.

¹⁴ Muꞌin mạyedyeꞌchety väc̣häꞌtyity shachtyity in cäc̣häꞌchute in jaiꞌbaschecheꞌ cavayo in, juiꞌbuty quịꞌsiꞌ pashyity muꞌin.

¹⁵ Muꞌ P̂eyacdyeꞌ buꞌyity toꞌcacsis coc̣hino chutidyedyes shupquiꞌ chụꞌĉan muꞌ, meꞌ buꞌyiꞌ p̂eyacdyeꞌ muꞌ, mọꞌyaꞌ raꞌ muꞌ jiꞌpenacsi räj jacchety muntyiꞌ in. Chat qui raꞌ ayoꞌbuꞌyi muꞌindyes in, ferdyeꞌtum raꞌ ayoꞌbuꞌyi, yojdyemꞌ mutyudyeꞌ fiyero o. Muꞌdye raꞌ jịꞌcaveyacsi muntyiꞌ in därsiꞌ fạ́codyeꞌ muꞌ mujuꞌchaꞌ ferdyeꞌtumtyiꞌ Jenꞌ, jeñej yirity muntyiꞌ yútyevaꞌquety ova meꞌ buꞌyi raꞌ vaꞌtacdyeꞌ soꞌmacsi.

¹⁶ Coftyitycheꞌ muꞌ judyeyaꞌ jäñäcyaꞌ, sánac yiꞌ: "Muꞌ ayoꞌbuꞌyi räjdyes ayoꞌ in, muꞌ nash ayoꞌ, muꞌin ayoty in", yiꞌ sánacdyeꞌ.

¹⁷ Nạijte yụ anjer tsuncheꞌ buꞌyi, rụiꞌcujcuij muꞌcheꞌ. Fer p̂eyaqui muꞌ yi jéyacsi mọꞌin jaijtyiꞌ in mọꞌin cheꞌve tyeiꞌsiꞌ in, jéyacsi: —Ayijamꞌ miꞌin jaijtyiꞌ, vajmọꞌyaꞌyejamꞌ, c̣hụcmun raꞌ yuꞌtiꞌ miꞌin, muꞌ nash Jenꞌ soꞌminac.

¹⁸ Mọꞌ raꞌ jebacsebiꞌ miꞌin, ayos shush muꞌin judyeyaꞌ väc̣häꞌtyitysiꞌ muꞌin judyeyaꞌ ayotysiꞌ muꞌin judyeyaꞌ cavayos mọꞌin judyeyaꞌ foquiꞌtyitysiꞌ chimeꞌ muꞌin. Jebacsebiꞌ raꞌ miꞌin muntyis shush muꞌin, judyeyaꞌ úñitysiꞌ muꞌin judyeyaꞌ jam úñitysiꞌ muꞌin, mujuꞌchatysiꞌ in, judyeyaꞌ uyaꞌyatysiꞌ chimeꞌ in, meꞌ meꞌ raꞌ jebacsebiꞌ shush miꞌin jaijtyiꞌ miꞌin —jéyacsi muꞌ anjer mọꞌin jaijtyiꞌ in.

¹⁹ Chat qui cạvete yụ muꞌ vajedyedyeꞌ buꞌyity judyeyaꞌ jacchety ayoꞌ in, räjtumdye väc̣häꞌtyity muꞌin. Räj muꞌin vajmuꞌyaij in paj qui vaj cäts chuti muꞌtum in cavayochety in, räjtumdye väc̣häꞌtyitytum muꞌ.

²⁰ Chat qui tapteyac muꞌ vajedyedyeꞌ buꞌyity, muꞌtumdye väñädyeꞌyaꞌ p̂eyaquity, muꞌ p̂eyaqui vajedyedyeꞌ buꞌyitydyes, muꞌ jịꞌcaveyacsity ferdyeꞌ jiquej muꞌsiꞌyaꞌ vej vajedyedyeꞌ buꞌyitysiꞌyaꞌ. Ferdyeꞌyaꞌ jịꞌcaveyacsis muꞌ väñädyeꞌyaꞌ p̂eyaquity seꞌ jaꞌyacsi väñätucsi muꞌin cac̣htacdyeꞌtumtyiꞌ in vajedyedyeꞌ buꞌyitysiꞌyaꞌ judyeyaꞌ muꞌin jenꞌtuptety jämꞌtacdyeꞌ in, anicjeptety väñädyeꞌ in, muꞌin chimeꞌ seꞌ jaꞌyacsi muꞌ väñädyeꞌyaꞌ p̂eyaquity. Pärenꞌdye muꞌin tsạꞌ vaꞌcac tŝijĉan in, yóĉandyemꞌ coꞌshaiꞌĉan azufretumsiꞌ o.

²¹ Muꞌin na väc̣häꞌtyity muꞌin päräꞌtyity in tas ijac in. Muꞌ cavayochety räj ijacsi väc̣häꞌtyity muꞌin toꞌcacsisyaꞌ coc̣hino chutidyedyes, mọꞌ shupquis chụꞌĉan muꞌ, mọꞌyaꞌ ijacsi muꞌ. Mọꞌin qui jaijtyiꞌ in jebacsebiꞌ shush muꞌin junꞌ quiꞌ chuc c̣hụcmun yuꞌtiꞌ in.