Jị'cavacdye' 18 - Tsimane

Meꞌjeyac mọꞌ bäꞌyedyeꞌ Babilonia

¹ Aty meꞌsiꞌ yoctyiꞌ qui nạijte yụ anjer, chạij mạyedyeꞌcheꞌ jijtuij, anic fer buꞌyity muꞌ anjer, mọꞌ mạijquedyeꞌ muꞌ mạijchuiꞌ räj ọij jac.

² Fer p̂eyaqui yi: "Mọꞌ därsiꞌ bäꞌyedyeꞌ Babilonia aty vaꞌtacdyeꞌ soꞌmac mụijyaꞌ jịꞌtŝoc mọꞌ, mọꞌdyes muꞌĉan bäꞌyity in aty itŝij in, mọꞌindyety sọyoꞌ mọꞌĉan in, yịjyi mọꞌĉan aꞌc̣his sọyoꞌ in, judyeyaꞌ aꞌc̣hisdyety jaijtyiꞌ in.

³ Muntyiꞌ räj in paiꞌ buꞌyity jiquej in cäc̣häꞌchubiꞌ jiquej in aꞌc̣his dyijyedyeꞌ Babiloniavunsiꞌ jiquej mọꞌ. Chimeꞌdye jacchety ayoꞌ in juchaij mọꞌtum jiquej in, mọꞌ jeñej buꞌyiꞌ voꞌvodyeꞌ shupquiꞌ muꞌin. Chimeꞌdye mọꞌ bäꞌyedyeꞌ anic jiꞌbijoyacsiꞌ muꞌin jiꞌmincaquity jiquej in, muꞌin jiꞌmincayacsi daiꞌ jedyeꞌ in, mọꞌ fer mạꞌjeꞌsiꞌ in", yi muꞌ anjer.

⁴ Seꞌveꞌ yụ yocsiꞌ mạyedyeꞌches p̂eyacdyeꞌ, yiꞌ: "Yụ jéyac miꞌin yụ́tyiꞌ muntyiꞌ miꞌin: Shupquejamꞌ mọꞌ bäꞌyedyeꞌ, jam raꞌ cäc̣häꞌchubitiñeꞌ juchaj mọꞌ paj qui jam miꞌinmun cạtiñeꞌ.

⁵ Mọꞌ bäꞌyedyeꞌ jam ọ́yaꞌ juchaj mọꞌ, mạyedyeꞌcheꞌ täj buꞌyim, muꞌ na Jenꞌ dyujtubiꞌ juchaj mọꞌ.

⁶ Paj därsiꞌ vaꞌtacdyeꞌ soꞌmac mọꞌ, junꞌ chuc ñịbeꞌtacsiꞌ yoctyiꞌ in, paj meꞌ buꞌyiꞌdyemꞌ soꞌmac vaꞌtacdyeꞌ chimeꞌ. Soꞌmevaꞌ vaꞌtacdyeꞌ juchadyes mọꞌ, dadamꞌ därsiꞌ vaꞌtacdyeꞌ jịꞌcayevaꞌ. Soꞌmevaꞌ päräꞌ quiꞌ vaꞌtacdyeꞌ juchadyes mọꞌ, junꞌ chuc mọꞌ ñịbeꞌtacsiꞌ yoctyiꞌ in, päräꞌ quiꞌdye jịꞌcayevaꞌ.

⁷ Anic där fibiꞌnaquiꞌ mọꞌ bäꞌyiꞌ jiquej där aꞌc̣his jämꞌtaquiꞌ. Cätsdye meꞌ därsiꞌ ñịbedyes soꞌmevaꞌ judyeyaꞌ därsiꞌ táredyes, ĉaĉaij na ĉojtyiꞌĉan yiꞌ mọꞌ: Yụ jeñej ayoꞌ bäꞌyiꞌ yụ, mijam yiris jedyeꞌ jayejjotaquiꞌ yụ. Yụ jam damꞌ jeñej mọꞌin p̂en säntaquis vämtyiꞌ in, mijam raꞌ cạveꞌ táredyeꞌ yụ, yiꞌ fibiꞌnaquis p̂eyacdyemꞌ.

⁸ Ĉụiꞌsiꞌ raꞌ fibiꞌnacdyeꞌ mọꞌ jajiꞌmeꞌtiꞌ, yiristum raꞌ soꞌmac ñịbedyes mọꞌ, judyeyaꞌ dáquis, judyeyaꞌ sänꞌdyeꞌ, judyeyaꞌ tŝij, meꞌ meꞌ raꞌ damꞌjeꞌ mọꞌ bäꞌyedyeꞌ, ĉaĉaij na muꞌ Jenꞌ Ayoꞌ tsun anic ferdyeꞌtumtyiꞌ, muꞌ jịꞌcäts yụꞌbity vaꞌtacdyeꞌ mọꞌ."

⁹ Chimeꞌdye muꞌin jacchety ayoꞌ in juchaij mọꞌtum in, jeñej buꞌyiꞌ voꞌvodyeꞌ, meꞌ buꞌyiꞌ shupquiꞌ muntyiꞌtum in, ĉụiꞌ ac̣hiꞌti in. Muꞌin raꞌ där yoqui in, táreꞌ raꞌ in mọꞌ bäꞌyedyeꞌ aty nạijbiꞌyaꞌ jịꞌsaꞌ in mọꞌ bäꞌyedyes.

¹⁰ Meijtubiꞌ raꞌ in cạvebiꞌ jịꞌsaꞌ in, mijam raꞌ damꞌ c̣hẹiꞌyaꞌyi in ĉaĉaij na noiꞌyi raꞌ in, yi raꞌ in: "Vatyquej raꞌ tsuncheꞌ tŝọiꞌ mọꞌ vaꞌtacdyeꞌ mọꞌ." Chimeꞌdye yi raꞌ in: "Anic där otej därsiꞌ bäꞌyedyeꞌ, mọꞌ fer buꞌyis jiquej, där ñịbeꞌ cạveꞌ, vátyequejdye mọꞌcheꞌ tŝọiꞌ vaꞌtacdyeꞌ."

¹¹ Jacchety jiꞌmincaquity in anic raꞌ där yoqui tyeij in, táreꞌ raꞌ in mọꞌ bäꞌyedyeꞌ, ĉaĉaij na raꞌ aty itŝij méquity jäctyeyacsity jedyeꞌ muꞌin.

¹² Daiꞌ mọꞌyaꞌ jedyeꞌ jiꞌmincacdyes muꞌin: oro muꞌin judyeyaꞌ plata muꞌin, judyeyaꞌ yaꞌijtyiꞌ mij muꞌin, judyeyaꞌ yaꞌijtyiꞌ quịꞌsiꞌ muꞌin, mujuꞌchaꞌ jämꞌtyiꞌ muꞌin, pạrej cạꞌijdyeijtyiꞌ muꞌin pạrej jäijnäty muꞌin. Chimeꞌdye jiꞌmincaiꞌ in yịjyi jẹrejres son yaꞌiꞌsiꞌ, judyeyaꞌ yịjyi yocsiꞌ jämiꞌ son in, judyeyaꞌ marfil in, judyeyaꞌ bronce in judyeyaꞌ fiyero in judyeyaꞌ jämꞌtyiꞌ mij marmol in, joꞌmemes jämiꞌ in jiꞌmincacdyes muꞌin.

¹³ Chimeꞌdye jiꞌmincaiꞌ in säcsedyedyes jẹrejres judyeyaꞌ taꞌyacdyes jẹrejres in, judyeyaꞌ jiꞌcoꞌshayacdyes jẹrejres in, judyeyaꞌ vino, aseijte, jaꞌsha, trivo judyeyaꞌ cuꞌdyeꞌ in, oveca in judyeyaꞌ cavayo in judyeyaꞌ careto chimeꞌ in. Chimeꞌdye úñity in jiꞌmincacsi in, meꞌ tsanꞌ ạꞌedyeꞌtumtyiꞌ muntyiꞌ, jiꞌmincate mọmoꞌ in, meꞌ meꞌ jiꞌmincaiꞌ jedyeꞌ in joꞌmesyaꞌ querec̣haij in.

¹⁴ Muꞌin jiꞌmincaquity in táreꞌ raꞌ in mọꞌ bäꞌyedyeꞌ jeꞌ raꞌ in: "Aty mọtsiꞌ räj jedyeꞌ mi fer mạꞌjeꞌsiꞌ jiquej mi, aty räj mọtsiꞌ yaꞌiꞌsiꞌ säcsedyeꞌ mạꞌjes mi, aty itŝiꞌ jäjämunsiꞌ jedyeꞌ mi judyeyaꞌ räj querec̣ha mi, räj mọꞌ mọtsim, mijam raꞌ jụꞌñisĉan mạyedyeꞌ quivij caꞌñibunꞌ mi", jeꞌ in.

¹⁵ Muꞌin jiꞌmincaquity joꞌmes muꞌĉan jiquej in, muꞌin querec̣haijtyiꞌ muꞌĉan jiquej in, muꞌin raꞌ meijtubanꞌ cạveban in mọꞌ bäꞌyedyeꞌ, yoqui in judyeyaꞌ táreꞌ in äjyedyeꞌtum in jam qui na ramꞌ c̣hẹiꞌyaꞌyi in ĉaĉaij na noiꞌyi quijñeꞌ in, vatyquej raꞌ muꞌincheꞌ muñiꞌ mọꞌ vaꞌtacdyeꞌ.

¹⁶ Yi raꞌ in táredyeꞌĉan muꞌin: "Anic där otej mọꞌ därsiꞌ bäꞌyedyeꞌ. Meꞌchute jiquej muꞌ mujuꞌchaꞌ yaꞌijtyiꞌ quịꞌsiꞌ, cạꞌijdyeijtyiꞌ judyeyaꞌ jäijnäty. Oro shásha mọꞌ jiquej judyeyaꞌ yaꞌijtyiꞌ mij in.

¹⁷ Q̂uinꞌ qui namꞌ yiristum mọmoꞌ räj mọtsiꞌ", yi raꞌ in. Räj muꞌin bächätety marĉantyiꞌ covamba in judyeyaꞌ muꞌin covambacheꞌ carijtaquity in, räjtumdye muꞌin jịjcatety in, muꞌin covambacheꞌ carijtaquity in meꞌ querec̣haveij in, räj muꞌin meijtuiꞌdye chimeꞌ cạveꞌ in mọꞌ bäꞌyedyeꞌ.

¹⁸ Aty nạijbiꞌyaꞌ jịꞌsaꞌ in fer raꞌ p̂eyaqui yi in táredyeꞌĉan muꞌin: —Anic där jämꞌsiꞌ jiquej mọꞌ bäꞌyedyeꞌ, mijam cätstyeꞌ yocsiꞌ bäꞌyedyeꞌ in —yi raꞌ in.

¹⁹ Anic där táreꞌ muꞌin in, p̂uijdasyaꞌ bucjiti in joꞌnoꞌcheꞌ muꞌin. Tárisdyeꞌtum yi in: "Där otej mọꞌ därsiꞌ bäꞌyedyeꞌvun, mọꞌ jedyeꞌtum yuꞌsinꞌsiꞌ jiquej räj tsun marĉantyiꞌ covambacheꞌ carijtaĉaty tsun, yiristum mọmoꞌ tas mọtsiꞌ", yi in.

²⁰ Miꞌin na mạyedyeꞌcheꞌ bäꞌyity miꞌin maꞌjojamꞌ, räjtumdye miꞌin anicjetintety Jenꞌ miꞌin judyeyaꞌ miꞌin soꞌminactyiꞌ p̂eyacdyeꞌ Jenꞌ, judyeyaꞌ miꞌin chimeꞌ jutactyiꞌ Jenꞌtyiꞌ muꞌ, maꞌjojamꞌ räj miꞌin. Maꞌjotyebivac vaꞌtacdyeꞌ mọꞌ, atyuꞌ u muꞌ Jenꞌ ñịbeꞌtyeꞌ mọꞌ bäꞌyedyeꞌ mọꞌ jịꞌñibeꞌcanacsiꞌ jiquej miꞌin.

²¹ Yirity qui ferdyeꞌtumtyiꞌ anjer cheꞌjete yirity chäcdyity mij, jeꞌñety musaquity joꞌmety. Muꞌdye vaꞌquecte pusaijsijte marĉan. Yi jeꞌ mọꞌ bäꞌyedyeꞌ: "Meꞌ raꞌ mi chimeꞌ Babilonia, ferdyeꞌtum meꞌjeyac mi, aty raꞌ jam jụꞌñisĉan mạyedyeꞌ quivij naꞌebanꞌ mi, meij ramꞌ jịjcaiꞌ mọtsiꞌ mi.

²² Meꞌquiꞌdye raꞌ jadyic dujdujdyi seꞌvac cayeĉan in judyeyaꞌ jimaquity in, jadyic raꞌ vịvaꞌqueꞌ in judyeyaꞌ boñity in. Meꞌquiꞌdye raꞌ carijtacvaꞌjoij carijtaquity in judyeyaꞌ acaijtyiꞌ in, meꞌquiꞌdye raꞌ musaquiꞌ in.

²³ Meꞌquiꞌdye raꞌ jäꞌñiꞌ mạijyis mọꞌĉan, jadyic raꞌ chimeꞌ vämedyes feshta mọꞌĉan. Anic chị́yacdyety muꞌĉantyiꞌ jiꞌmincaquity jiquej in, paiꞌ bäꞌyedyeꞌ ĉọ́quety in, chimeꞌ cọcojsiꞌnacdyeꞌyaꞌ mi seꞌ jaꞌyacsiꞌ jiquej jacchety muntyiꞌ mi paiꞌ buꞌyity in, joꞌmesyaꞌ väñätucsim", yi muꞌ anjer jeꞌ mọꞌ Babilonia.

²⁴ Mọꞌsiꞌdye juchaj mọꞌ jiꞌijacsiꞌ muꞌin jasoꞌmitity p̂eyacdyeꞌ Jenꞌ in judyeyaꞌ muꞌin anicjetety Jenꞌ in, mọꞌ jiꞌijacsiꞌ räj muꞌin paiꞌ bäꞌyity jacchety in ijactyiꞌ jiquej in, meꞌ buꞌyiꞌ juchaj shupquiꞌ mọꞌsimꞌ, mọꞌdyes qui vaꞌtacdyeꞌ mọꞌcheꞌ tŝọiꞌ.