Jị'cavacdye' 15 - Tsimane

Yävätidyeꞌ vaꞌtacdyeꞌ in tuiꞌsiꞌ anjer in

¹ Nạijtyeꞌ yụ yiris jiꞌcavitidyes mạyedyeꞌches, anic jiquijnacdyes. Muꞌyaꞌ yävätidyeꞌ anjer cạiꞌtyiꞌ in jadyiquis yävätidyeꞌyis vaꞌtacdyeꞌ, mọꞌyaꞌ raꞌ jadyic fạ́codyeꞌtumsiꞌ vaꞌtacdyeꞌ soꞌmacsis muntyiꞌ in muꞌ Jenꞌ.

² Chimeꞌdye cạveꞌ yụ yiris choñemsiꞌ jeñej därsiꞌ ojñiꞌ cafon buꞌyis tŝijtum, meꞌ buꞌyiꞌ nạijtyeꞌ yụ. Muꞌcheꞌ muꞌin in jam jiꞌpenactyiꞌ in muꞌsiꞌyaꞌ vej muꞌ vajedyedyeꞌ buꞌyitysiꞌyaꞌ judyeyaꞌ muꞌsiꞌyaꞌ vej jämꞌtacdyesyaꞌ in, muꞌin jam jụjbitety tịj in muꞌsiꞌ vajedyedyeꞌ buꞌyitysiꞌ, mọꞌ nómeroches tịj muꞌ. Sinve mọꞌ choñemsiꞌ, muꞌve rụiꞌcujcuquen in muꞌin jam jiꞌpenactyiꞌ in, cäts vịcdyestutum in, mọꞌ soꞌmacsis Jenꞌ.

³ Muꞌin jimeyete Jenꞌ in, Moiséssiꞌ jimacdyeꞌ jimbite in judyeyaꞌ Oveca buꞌyitysiꞌ chimeꞌ muꞌ. Muꞌ Moisésvun Jenꞌtyiꞌ úñity jiquej muꞌ. Yi in: "Tsuntyiꞌ Jenꞌ Ayoꞌ tsun, mi nash mujuꞌchaꞌ ferdyeꞌtumtyiꞌ, där jämꞌsiꞌ räj carijtacdyeꞌ mi judyeyaꞌ jämꞌtacdyeꞌ mi, anic jämꞌ äjyedyes in. Anic rụijsis dyijyedyeꞌ mi, mijam damꞌ cäj buꞌyiꞌ, mi nash ayoꞌbuꞌyi räjdyes jacchety muntyiꞌ in.

⁴ Jam jụꞌñity ĉụiꞌtun in, räj raꞌ irijyi mícheꞌ in, räj raꞌ timaꞌquibun ferdyeꞌ in. Mimꞌ yirity rụijtyity, itŝij yoctyiꞌ meꞌ. Räj muntyiꞌ úchety in räj buꞌyiꞌ ọij jac atsij raꞌ in dyụtsyi míyaꞌ in, timaꞌquitin raꞌ in, ĉaĉaij na cavibun in anic rụijsis dyijyedyeꞌ mi."

⁵ Aty meꞌsiꞌ nạijbite yụ Jenꞌsiꞌ acaꞌ muꞌ mạyedyeꞌches, mọꞌdye vavdyeꞌ mọꞌ Mọjoꞌchaꞌ Tsäquiꞌsis, mọꞌ vanacyiꞌ nạijbite yụ.

⁶ Acaꞌĉantyiꞌ shupqui in yävätidyeꞌ anjer in, muꞌin cạiꞌtyiꞌ in yävätidyeꞌ vaꞌtacdyeꞌ in. Anic jiyi juiꞌbubuty quịꞌsiꞌ muꞌin, judyeyaꞌ pashyi chimeꞌ muꞌin, mọꞌ na eꞌfeyaꞌ pan buꞌyis muꞌin, oro mọꞌ muꞌin.

⁷ Yiris mọꞌ vạjpedyeꞌyis tsạꞌ buꞌyis in soꞌmacsi muꞌin yävätidyeꞌ anjer in, cäts yiris jịjcaiꞌ pijiꞌ oro in, bänänäj mọꞌĉan Jenꞌsiꞌ fạ́codyeꞌ muꞌ, muꞌ räjĉan tsạꞌtyiꞌ Jenꞌ.

⁸ Mọꞌ na Jenꞌsiꞌ acaꞌ muꞌ sät tŝọiꞌ jịꞌsaꞌ mọꞌĉan, mọꞌ shupquis Jenꞌsiꞌyaꞌ ferdyeꞌ muꞌ judyeyaꞌ mạijquedyeꞌyaꞌ muꞌ. Jam tyi tupuj sisbite Jenꞌsiꞌ acaꞌ muꞌ, junꞌ quiꞌ chuc cạ̈tsiꞌ mọꞌ yävätidyeꞌ vaꞌtacdyeꞌ in, mọꞌ cạiꞌsiꞌ in muꞌin yävätidyeꞌyity anjer in.