Jị'cavacdye' 1 - Tsimane

Tashches p̂eyacdyeꞌ

¹ Ọij q̂uinꞌ sánacdyeꞌ Juansiꞌ muꞌ, mọꞌ p̂eyeꞌ jịꞌcavacdyeꞌ Jesucristos muꞌ. Muꞌ Jenꞌ mọꞌ jajiꞌcaviyiti Jesucristo junꞌ chuc raꞌ jiyiꞌ cavintum yocsiꞌĉan mạyedyeꞌ, paj qui muꞌ jiꞌjiyeyacsi muntyiꞌ muꞌ. Mọꞌdyes qui muꞌ Jesucristo jutete yirity anjer muꞌ paj qui mọꞌ jajiꞌchäquiyiti muꞌ Juan úñity muꞌ.

² Anicdye meꞌ, muꞌ Juan rụij muꞌ jịꞌchiqueyacsi Jenꞌsiꞌ p̂eyacdyeꞌ muꞌ, junꞌ chuc cạveꞌ muꞌ, mọꞌ p̂eyes Jesucristo.

³ Anic där raꞌ maꞌjoij muꞌin p̂eyeꞌtyiꞌ in ọij sánacdyeꞌ, judyeyaꞌ muꞌin chimeꞌ seꞌvaquity in mọꞌ p̂eyacdyeꞌ, judyeyaꞌ chiqueꞌtyiꞌ chimeꞌ mi, ĉaĉaij na aty c̣hẹiꞌyaꞌ mọꞌ tupudyeꞌ cạ̈tsiꞌ raꞌ ọij sánacdyeꞌ.

Juan sáñeyeyacsi muꞌin yävätidyeꞌ ñuruꞌtyity Cristoyaꞌ in

^4-5 Yụ Juan, yụ sáñeꞌ ọij miꞌindyes yävätidyeꞌ ñuruꞌtyity miꞌin Cristoty, Asiaĉansiꞌ bäꞌyedyeꞌ bäꞌyity miꞌin. Yụ cọdyete Jenꞌ, muꞌ tạꞌcaty, muꞌ muꞌyaty q̂uinꞌ, muꞌdye ramꞌ yejĉoijtyiꞌ, muꞌ cọdyete yụ judyeyaꞌ Ạꞌedyeꞌ muꞌ judyeyaꞌ muꞌ Jesucristo paj qui soꞌminac ñịbeꞌjitidyes muꞌ judyeyaꞌ maꞌjodyeꞌ ĉojtyiꞌĉandyes miꞌin. Mọꞌ Ạꞌedyeꞌ muꞌ yävätidyeꞌ buꞌyis shupquis ĉụiꞌsiꞌyaꞌ vej muꞌ, yócheꞌdyemꞌ bäꞌyi u ayoꞌbuꞌyicheꞌ. Muꞌ Jesucristo rụij jịꞌchiqueyacsity p̂eyacdyeꞌ muꞌ. Muꞌ nash tashi vañinyeban, muꞌdye q̂uinꞌ tashcheꞌ buꞌyi ayoꞌbuꞌyi räjdyes jacchety ayoꞌ in. Muꞌ mạꞌjisinꞌtyiꞌ tsun, ĉụiꞌsiꞌyaꞌ chäsh muꞌ jiꞌc̣honsinꞌ tsun juchajĉantyiꞌ jiquej tsun.

⁶ Muꞌdye yuꞌsinꞌ tsun paj qui ayoꞌbuꞌjaꞌ muꞌtum judyeyaꞌ yuꞌsinꞌ chimeꞌ paj qui cudyitiĉaty buꞌjaꞌ Jenꞌcheꞌ, muꞌ Jesucristoty Jenꞌ muꞌ. ¡Paj jam mọtsiꞌ timaꞌcacdyeꞌ muꞌ, muꞌsiꞌ ayoꞌbuꞌyedyeꞌ jam raꞌ jụꞌñisĉan mạyedyeꞌ mọtsiꞌ muꞌ! Paj meꞌ.

⁷ Anicdye meꞌ, dyicbaꞌbadyeꞌĉan raꞌ atsijban muꞌ, räj raꞌ taquenꞌ jịꞌĉojtuyeĉunꞌbajte in. Muꞌin p̂oꞌc̣hetety jiquej in, chimeꞌ raꞌ muꞌin jịꞌĉojtuyeĉunꞌbajte in atsijbanyaꞌ muꞌ. Räj raꞌ jacchety muntyiꞌ in, yịjyi p̂eyaquity in, meꞌ meꞌ raꞌ tári in atsijbanyaꞌ muꞌ. Paj meꞌ.

⁸ "Yụ nash Tashchety judyeyaꞌ Jäquity," yi muꞌ Ayoꞌ tsun, muꞌ mujuꞌchaꞌ ferdyeꞌtumtyiꞌ Jenꞌ, muꞌ tạꞌcaty, muꞌ muꞌyaty q̂uinꞌ, muꞌdye ramꞌ yejĉoijtyiꞌ.

Cristo jiꞌcaviti Juanyaꞌ

⁹ Yụ Juan vojity miꞌin, muꞌ Jesucristo vaj cäts ayoꞌbuꞌyi tsundyes, vaj cäts chimeꞌ tyumꞌchutiĉaꞌ ñịbedyesyaꞌ, mọꞌ jịꞌĉojtyejaꞌsiꞌ Jesucristodyesiꞌ tsun. Jeshaꞌ, yụ vaꞌcac marĉansiꞌcheꞌ poc̣hoꞌ muꞌcheꞌ ĉäꞌräij yụ voroꞌyedyes Jenꞌsiꞌ p̂eyacdyeꞌ muꞌ, mọꞌ p̂eyes Jesucristo. Mọꞌ poc̣hoꞌ Patmos tịj mọꞌ.

¹⁰ Meꞌ jiyiꞌ Ayoꞌsiꞌĉan mạyedyeꞌ tsun, Jenꞌsiꞌ Ạꞌedyeꞌ muꞌ tŝútyin yụ. Ĉụiꞌdye murujrucheꞌ yụ fersiꞌ p̂eyacdyeꞌ seꞌveꞌ yụ, fer mạꞌiꞌ, jeñej yiꞌ boñedyeꞌ.

¹¹ Mọꞌ jin yụ: —Mọꞌ raꞌ cạves q̂uinꞌ mi, mọꞌ raꞌ räj sáñem papercheꞌ, chat qui raꞌ juteyeyacsim muꞌin ñuruꞌtyity yụ́tyiꞌ in, muꞌin yävätidyeꞌyity Asiaĉansiꞌ bäꞌyedyeꞌ bäꞌyity in. Juteyeyacseva Efesoĉan bäꞌyity in, judyeyaꞌ Esmirnaĉantyiꞌ in, judyeyaꞌ Pérgamoĉantyiꞌ in, judyeyaꞌ Tiatiraĉantyiꞌ in, judyeyaꞌ Sardisĉantyiꞌ in, judyeyaꞌ Filadelfiaĉantyiꞌ in, judyeyaꞌ Laodiceaĉantyiꞌ in, meꞌ meꞌ raꞌ juteyeyacsim sánacdyeꞌ sáñeꞌsiꞌ raꞌ mi —yi muꞌ jin yụ.

¹² Cạvi yụ tyi buty meꞌ jin yụ. Cạvacsi yụ yävätidyeꞌ yụꞌtaquis vera, oro in.

¹³ Muꞌyaꞌ c̣hac jeꞌñeij anictyity muntyiꞌ, meꞌ cạvete yụ. Moc̣haty quịꞌsiꞌ muꞌ tyuj buꞌyi yujvemꞌ, mọꞌ na eꞌfeyaꞌ pan buꞌyis muꞌ, oro muꞌ.

¹⁴ Fin muꞌ anic mọjoꞌchaꞌ jaiꞌbas jeꞌñeiꞌ ovecas fin mọꞌ, vej namꞌ anic p̂údyeiꞌ muꞌ jeꞌñeiꞌ adyeꞌ.

¹⁵ Yuj namꞌ anic pịshyimꞌ jeñej yaꞌiꞌsiꞌ fiyero túnes, judyeyaꞌ fer mạꞌiꞌ vatyquej p̂eyacdyeꞌ seꞌveꞌ yụ, jeñej yiꞌ ojñiꞌ chabanꞌsiꞌ.

¹⁶ Tacvesyaꞌ un muꞌ tapchucsi yävätidyeꞌ ọ́rotaꞌ in, chụꞌĉan na muꞌ yiris shupquiꞌ chutidyes coc̣hino, päräꞌve toꞌcacsis vejyaꞌ na jeñej pashquedyemꞌ tsunsimꞌ.

¹⁷ Nạijtacdyeꞌĉan mọmoꞌ säñej tŝọij mụijyaꞌ yụ, jeñej yirity säñity muntyiꞌ, meꞌ tŝọij yụ. Tocoꞌjin yụ tacvesyaꞌ un muꞌ, yi jin yụ: —Jam raꞌ noiꞌyi mi, yụ nash Tashchety judyeyaꞌ Jäquity.

¹⁸ Meꞌ tsanꞌ säñi jiquej yụ, tsạꞌ buꞌban qui namꞌ q̂uinꞌ yụ, yejĉoij qui ramꞌ tsạꞌ buꞌyi yụ, aty jam raꞌ quivij säñi yụ. Yụ nash bächäiꞌ mọꞌ sänꞌdyeꞌ, meꞌchuiꞌ yụ mọꞌ c̣hácaquis säñitysiꞌĉan ĉärꞌtacdyeꞌ in.

¹⁹ Sáñeꞌ raꞌ mi junꞌ chuc aty cạveꞌ mi, judyeyaꞌ junꞌ chuc jiyiꞌ q̂uinꞌ, judyeyaꞌ junꞌ chuc raꞌ jiyiꞌ jäquiꞌve yocsiꞌĉan mạyedyeꞌ, meꞌ meꞌ raꞌ sáñeꞌ mi.

²⁰ Jeshaꞌ, yụ raꞌ jéye jedyeꞌ buty cạiꞌ in muꞌin yävätidyeꞌ ọ́rotaꞌ in, cạvacsity mi tacvesĉan un yụ, judyeyaꞌ mọꞌin yävätidyeꞌ yụꞌtaquis vera oro in. Mọꞌin yävätidyeꞌ yụꞌtaquis vera mọꞌ cạiꞌ in yụ́tyiꞌ ñuruꞌtyity in yävätidyeꞌ bäꞌyedyeꞌ bäꞌyity in, judyeyaꞌ muꞌin yävätidyeꞌ ọ́rotaꞌ in mọꞌ cạiꞌ muꞌin yävätidyeꞌ anjer in muꞌin ĉọjcacsity in —yi Ayoꞌ tsun jin yụ.