Hebreodyes 9 - Tsimane

Jacches Jenꞌsiꞌ acaꞌ muꞌ jịꞌĉoiꞌ mạyedyeꞌches

¹ Tashches p̂eyacdyeꞌ Jenꞌsiꞌ muꞌ jísinꞌ mọꞌ junꞌ chuc raꞌ muntyiꞌ in jämꞌtyeyete raꞌ in timaꞌcacdyes acaꞌ ọ́ches muꞌ, judyeyaꞌ chimeꞌ mọꞌ p̂eyacdyeꞌ jéyacsiꞌ junꞌ chuc raꞌ timaꞌquete Jenꞌ muꞌĉan in.

² Meꞌ jämꞌtyeꞌ jiquej in Jenꞌsiꞌ acaꞌ muꞌ cäjyasĉansiꞌ jac jiquej: mọꞌ tashves vavdyeꞌ jeꞌ in: Tsäquiꞌsis Vavdyeꞌ, mọꞌĉan mọꞌ yụꞌtaquis vera, judyeyaꞌ mọꞌ mesa yócheꞌdyemꞌ yụꞌtac Jenꞌyadyety pan u.

³ Chimeꞌdye jäquiꞌve muꞌ päräꞌyity juñum buꞌyity mọꞌyaꞌ yocsiꞌ vavdyeꞌ, mọꞌ jeꞌ in: Mọjoꞌchaꞌ Tsäquiꞌsis Vavdyeꞌ.

⁴ Mọꞌĉan mọꞌ jiꞌcoꞌshayaquis jẹrejres oro mọꞌ, judyeyaꞌ mọꞌ cajón yụꞌtacdyeꞌtumsiꞌ, shamꞌtacsiꞌ oroyaꞌ. Cajónĉan yiris puñuj oro meꞌchuiꞌsiꞌ mạyedyeꞌches säcsedyeꞌ maná, chịmoꞌĉandye mutyudyeꞌ muꞌ Aarónsiꞌ, mọꞌ coꞌñeyebanꞌsiꞌ jiquej judyeyaꞌ muꞌin mij sánacdyeꞌtumtyiꞌ in Jenꞌsiꞌ muꞌ.

⁵ Fajcheꞌ cajón muꞌcheꞌ yụꞌtacsi querubin buꞌyity in, muꞌin jịꞌĉopte Jenꞌsiꞌ mạijquedyeꞌ muꞌ. Mọꞌ pavaj muꞌin juñumchubiꞌ änꞌtacdyeꞌ mọꞌsimꞌ, mọꞌ jịꞌcavacdyes vayacdyes juchaj muntyis muꞌin. Meꞌ meꞌ mọꞌĉan jämꞌtac Jenꞌsiꞌĉan acaꞌ muꞌ. Q̂uinꞌ qui namꞌ jam jemonac mọꞌ p̂eyeyac jedyeꞌ chuc mọꞌ cạiꞌ.

⁶ Aty meꞌ jämiiꞌtac räj, chat qui tiyacchuti carijtaqui muꞌin cudyitity Jenꞌcheꞌ in. Räjĉan mạyedyeꞌ tashves mọmoꞌ siteꞌ vavdyeꞌ in, muꞌĉan carijtaqui Jenꞌdyes in.

⁷ Yirity mọmoꞌ tupuj siteꞌ mọꞌ tätscäiꞌches vavdyeꞌ, mọꞌ Mọjoꞌchaꞌ Tsäquiꞌsis. Muꞌ tashcheꞌ cudyitity Jenꞌcheꞌ, mumꞌ tupuj muꞌĉan siti, yiriꞌ quimꞌ yiris yómodyeꞌ siteꞌ mọꞌ. Junꞌsiꞌ chuc siteꞌyaꞌ muꞌĉan, cạiꞌ cuꞌdyes chäsh juchadyes muꞌ, mọꞌ ĉụiꞌsidyes juchaj muꞌ judyeyaꞌ muntyidyes chimeꞌ juchaj in. Pạrej juchatute Jenꞌ in mijam chịj in junꞌ chuc juchaij in, mọꞌdyes yiꞌ mọꞌ chäsh chimeꞌ.

⁸ Jenꞌsiꞌ Ạꞌedyeꞌ muꞌ jísinꞌ jedyeꞌ chuc cạiꞌ mọꞌ, mọꞌ jiꞌchäquiyisinꞌ tacaꞌdyemꞌ fer buꞌyiꞌ mọꞌ tashches yụꞌtacdyeꞌ jiquej, mọꞌ yiꞌ junꞌ chuc raꞌ carijtaqui in mọꞌĉan tashchesĉan vavdyeꞌ jiquej, jambiꞌdyemꞌ tupuj sitac jiquej mọꞌ Mọjoꞌchaꞌ Tsäquiꞌsis vavdyeꞌ, mọꞌ jambiꞌdyemꞌ vanchuc muntyidyes jiquej.

⁹ Ọij jịꞌĉocdyes shupquiꞌ tsundyes q̂uinꞌ, mọꞌ jiꞌchäquiyisinꞌ junꞌ chuc mọꞌ tuyacdyeꞌ Jenꞌyaꞌ, räjtumdye jiꞌcoꞌshayacdyeꞌ muꞌdyes in, mọꞌ qui namꞌ jam tupuj c̣hiconꞌjeyacsebiꞌ ĉojtyiꞌ muꞌin tuyetety Jenꞌ in, yejĉoij jiꞌyoquiti juchajyaꞌ muꞌin.

¹⁰ Mọꞌ mọmoꞌ p̂eyeꞌ säcsedyeꞌ judyeyaꞌ tyédyeꞌ judyeyaꞌ yịjyi favacdyeꞌ chimeꞌ, meꞌ meꞌ cạiꞌ tashches jiꞌchäyitidyeꞌ. Mọꞌ aꞌdyes mọmoꞌ tsun, mọꞌ yaꞌiꞌ jiquej junꞌ quiꞌ chuc muꞌ Jenꞌ mụiꞌsis yụꞌtyeꞌ p̂eyacdyeꞌ muꞌ.

Cristos chäsh muꞌ mọꞌ jiꞌc̣honsinꞌ

^11-12 Anicdye meꞌ, atsij muꞌ Cristo, muꞌ qui yụꞌtac anic cudyitity Jenꞌcheꞌ tsundyes q̂uinꞌ, muꞌdye jiꞌchäquiyisinꞌ jämꞌyedyeꞌ soꞌmisinꞌsiꞌ muꞌ Jenꞌ. Mọꞌ qui namꞌ mạyedyeꞌches acaꞌ Jenꞌsiꞌ muꞌ, yóĉandyemꞌ carijtaqui q̂uinꞌ u muꞌ, mọꞌ mọjoꞌchaꞌ buꞌyimꞌ, ọyaꞌyaꞌ ọ́ches acaꞌ Jenꞌsiꞌ jiquej muꞌ, mọꞌ jämꞌtyes muntyiꞌ jiquej in ọ́cheꞌ jaccheꞌ. Muꞌĉan siti muꞌ Cristo Tsäquiꞌsisĉan Vavdyeꞌ Mọjoꞌchas, mọꞌ mạyedyeꞌches, muꞌ jam cạbiꞌ cuꞌdyes chäsh mọꞌ mijam chivos mijam vacas cạbiꞌ juchadyes tsun, ĉụiꞌsimꞌ chäsh yụꞌtaqui, mọꞌyaꞌ jiꞌc̣honsinꞌ tsun paj qui Jenꞌyadyety tsun, paj qui räjĉan muꞌyaꞌ bäꞌjaꞌ, mijam raꞌ quivij yụꞌtaqui chäsh muꞌ.

¹³ Anicdye meꞌ, mọꞌ toros chäsh muꞌ, judyeyaꞌ chivos muꞌ judyeyaꞌ vacas chim chimeꞌ mọꞌ, mọꞌ jiꞌcoꞌshayeꞌsiꞌ Jenꞌdyes jiquej in, mọꞌ tupuj jämꞌ yụꞌtacsebiꞌ muntyis aꞌ muꞌin, muꞌin ac̣hiꞌtity yụꞌtacdyedyes in.

¹⁴ Mọꞌ na chäsh muꞌ Cristos anic mọjoꞌchaꞌ fer buꞌyimꞌ, mọꞌ chat räj c̣hiconꞌtibusinꞌ ĉojtyiꞌ tsun. Ĉụiꞌsiꞌyaꞌ Ạꞌedyeꞌ muꞌ, mọꞌ jam jụꞌñisĉan mạyedyeꞌ mọtsis, mọꞌyaꞌ muꞌ Cristo ĉụiꞌ yuꞌti yojdyemꞌ jam jụꞌñis oveca o jiꞌcoꞌshayacdyes, meꞌ buꞌyi yuꞌti muꞌ paj qui tupuj jiꞌc̣honsinꞌ tsun juchajĉantyiꞌ tsun, mọꞌ soꞌmisinꞌsiꞌ sänꞌdyeꞌ, paj qui cäc̣häꞌchuja muꞌ tsạꞌtyiꞌ Jenꞌ.

¹⁵ Mọꞌdyes muꞌ Jesucristo ujacdyeꞌyaꞌ muꞌ yuꞌsinꞌ tsun paj qui jämꞌjitiĉaꞌ Jenꞌtum judyeyaꞌ chimeꞌ muꞌ yuꞌtyiyisinꞌ tsun mụiꞌsis p̂eyacdyeꞌ Jenꞌsiꞌ muꞌ, mọꞌ p̂eijtes ñịbeꞌyedyes mọꞌ soꞌmacsis Jenꞌ muꞌin fayactyiꞌ in. Mọꞌ ñịbeꞌyedyes mạyedyeꞌches in, mọꞌ jam raꞌ jụꞌñisĉan mạyedyeꞌ mọtsis raꞌ muꞌin. Meꞌ raꞌ soꞌmacsi ĉaĉaij na muꞌ jiꞌijati paj qui muꞌ vayacjeyacsebi juchaj muꞌin juchatuptety in mọꞌ tashches p̂eyacdyeꞌ Jenꞌsiꞌ muꞌ.

^16-17 Jeshaꞌ, mọꞌyaꞌ muntyis sánacdyeꞌ muꞌin mọꞌ jịꞌchicaquiꞌ tyi chuc raꞌ soꞌmac muntyis jedyeꞌ muꞌ aty säñiyaꞌ muꞌ aꞌtumtyiꞌ. Meꞌ tsanꞌ sánac, jambiꞌ qui namꞌ yaꞌiꞌ mọꞌ p̂eyacdyeꞌ, aty muꞌ säñiyaꞌ muꞌ yụꞌtyety jiquej, chat q̂uinꞌdyemꞌ mọꞌ ferdyeꞌtum shupquiꞌ p̂eyacdyeꞌ yụꞌtyes sánacdyeꞌcheꞌ, chat qui q̂uinꞌdyemꞌ soꞌmac in jedyeꞌ muꞌ.

¹⁸ Meꞌdye mọꞌ chimeꞌ jiquej, mọꞌ chäsh soꞌmeꞌ ferdyeꞌ mọꞌ tashches yụꞌtacdyeꞌ Jenꞌsiꞌ muꞌ, tupuj ijac cuꞌdyeꞌ in.

¹⁹ Anicdye meꞌ, muꞌ Moisés jiquej, yoquiꞌdyemꞌ soꞌmacsiyaꞌ p̂eyacdyeꞌ jiquej u, aty meꞌsiꞌ jéyacsiyaꞌ muntyiꞌ in, Moisés tapjeꞌ mọꞌ ovecas fin mọꞌ, c̣huctyeꞌsiꞌ jäijnäsĉan, mọꞌtumdye tapjeꞌ shan hisopos mọꞌ, jeñej buꞌyiꞌ sinaquity meꞌ buꞌyiꞌ yụꞌtyeꞌ. Mọꞌĉan muꞌ c̣hucjeꞌ vacasĉan chäsh mọꞌ judyeyaꞌ chivos muꞌ cafonꞌtacsiꞌ ojñiꞌtum, chat qui fatsujjeꞌ mọꞌ sánacdyeꞌ yụꞌtacdyeꞌ judyeyaꞌ muntyiꞌ chimeꞌ fatsujnacsi.

²⁰ Yi qui jéyacsi: "Ọij chäsh soꞌmeꞌ ferdyeꞌ mọꞌ p̂eyacdyeꞌ yuꞌtyiyinacsiꞌ muꞌ Jenꞌ paj qui chiquetiñeꞌ miꞌin", jéyacsi.

²¹ Muꞌdye Moisés chäshyaꞌ fatsujjepte Jenꞌsiꞌ acaꞌ muꞌ, mọꞌ tinates, chimeꞌ mọꞌĉansiꞌ jedyeꞌ fatsujtacsi.

²² Yiꞌ mọꞌ tashches yụꞌtacdyeꞌ arajdye räj jämꞌ yụꞌtac chäshyaꞌ in, itŝiꞌ joꞌmes chäsh jụijyaꞌ, a vuty jam vayac juchaj o muntyis muꞌin.

Ijacdyeꞌ muꞌ Cristos mọꞌ vayacjibusinꞌ juchaj tsun

²³ Anicdye meꞌ, jemoñeꞌ mọꞌ cuꞌdyes chäsh jiꞌcoꞌshayeꞌsiꞌ Jenꞌdyes jiquej in, mọꞌ qui jämꞌ yụꞌtyeꞌ mọꞌ acaꞌ tinates, räjtumdye jedyeꞌ mọꞌ. Ọij q̂uinꞌ jacches jedyeꞌ jiquej in mọꞌ jeñej buꞌyiꞌ onomꞌsiꞌ, mọꞌ jiꞌyetyeꞌ mạyedyeꞌches jedyeꞌ anicsis. Tyi chuc mạyedyeꞌchedyety jụijyaꞌ in jemonac mọjoꞌchas jämꞌsiꞌ chäsh, mọꞌ qui raꞌ jämꞌ yụꞌtacsiꞌ.

²⁴ Cristo jam siteꞌ ọ́ches acaꞌ, mọꞌ jeñej buꞌyis onomꞌsiꞌ mạyedyeꞌches, mijam muꞌĉan cudyiti Jenꞌcheꞌ tsundyes, mạyedyeꞌches mọmoꞌ siteꞌ muꞌ q̂uinꞌ, muꞌcheꞌ jiꞌcaviti Jenꞌyaꞌ judyeyaꞌ cudyiti tsundyes muꞌcheꞌ.

²⁵ Tashcheꞌ cudyitity Jenꞌcheꞌ jiquej räjĉan yómodyeꞌ jịjcaij siteꞌ mọꞌ Mọjoꞌchaꞌ Tsäquiꞌsis Vavdyeꞌ, jam qui namꞌ ĉụiꞌsiꞌ chäsh cạqui, cuꞌdyes chäsh cạbiꞌ muꞌ juchadyes muntyidyes muꞌin. Muꞌ na Cristo yocdye muꞌ, jam räjĉan ĉụiꞌ yuꞌtyivaꞌti säñi tsundyes.

²⁶ Meꞌ jụijyaꞌ muꞌ Cristo, a vuty daiꞌ quiꞌ muꞌ säñi chimeꞌ u, a vuty cäts yómodyeꞌ jịjcaij säñi u, yoquiꞌdyemꞌ jämꞌtyeꞌyaꞌ jac jiquej u meꞌdye q̂uinꞌ. Jam qui namꞌ daiꞌ quiꞌ säñi muꞌ Cristo. Aty c̣hẹiꞌyaꞌ jiquej mọꞌ jadyiquis tupudyeꞌ, yiriꞌ quimꞌ atsij jiꞌcaviti muꞌ, judyeyaꞌ ĉụiꞌ yuꞌti paj qui vayacjeyacsebi muntyis juchaj muꞌin, mijam raꞌ cuvij jemonac ijac.

²⁷ Meꞌdye q̂uinꞌ räj muntyiꞌ in yiriꞌ quimꞌ säñi in, chat qui raꞌ muꞌ Jenꞌ jịꞌcäts yụꞌtacsi juchadyeꞌyaꞌ muꞌin.

²⁸ Muꞌ na Cristo yiriꞌ quimꞌ meꞌ ĉụiꞌ yuꞌti ijac paj qui vayacjeyacsebi juchaj muntyis muꞌin, muꞌin daiꞌtyis in. Jábiyaꞌ raꞌ quivij muꞌ jiꞌcaviti, aty raꞌ jam quivij atsijban muꞌ jiꞌijabun juchadyes muꞌin, atsij raꞌ muꞌ jiꞌc̣honacseshan tyi chuc bisvaꞌtety in.