Hebreodyes 6 - Tsimane

¹ Mọꞌdyes yejĉojaꞌ raꞌ p̂anjaꞌ Jenꞌdyes tsun. Aty jam raꞌ camanꞌjebajshaꞌ tsun mọꞌ tashches jiꞌchäyitidyeꞌ Cristos muꞌ, yocsiꞌ qui mọjoꞌchas jiꞌchäyitidyeꞌ meꞌchujaꞌ q̂uinꞌ tsun, meꞌ buꞌjaꞌ p̂anjaꞌ Jenꞌdyes. Mọꞌdyes aty raꞌ jam camanꞌjebajshaꞌ mọꞌ yacchutis jiꞌchäyitidyeꞌ in: mọꞌ yiꞌsiꞌ junꞌ chuc farajjeyaĉaꞌ aꞌc̣his dyijyedyeꞌvun tsun, mọꞌ soꞌmisinꞌsiꞌ sänꞌdyeꞌ tsun, judyeyaꞌ mọꞌ anicyedyeꞌ Jenꞌcheꞌ tsun.

² Chimeꞌdye aty jam raꞌ camanꞌ dyijtubajshaꞌ mọꞌ jiꞌchojtidyeꞌvun tsun, judyeyaꞌ mọꞌ tocoꞌtidyeꞌ unyaꞌ joꞌnoꞌcheꞌ tsun, mọꞌ Jenꞌdyes jiquej, judyeyaꞌ mọꞌ vañinyedyeꞌ säñitysiꞌ in, judyeyaꞌ mọꞌ räjĉan buꞌyis vaꞌtacdyeꞌ chimeꞌ.

³ Mọꞌ meꞌ meꞌ tiyacchutis jiꞌchäyitidyeꞌ jiquej in, aty raꞌ jam mọꞌ mọmoꞌ dyijtubajshaꞌ, dadamꞌ jämꞌ q̂uinꞌ yocsiꞌ jiꞌchäyitidyeꞌ mọjoꞌchas jiꞌchäyitiĉaꞌ. Meꞌ raꞌ tsun Jenꞌ ñútyisinꞌ jụijyaꞌ.

⁴ Pạrej muꞌyaꞌ muntyiꞌ in vaꞌquecbite Jenꞌsiꞌ p̂eyacdyeꞌ in, muꞌin meꞌtyity in muꞌin raꞌ jam junꞌ caꞌñibun in. Jeshaꞌ muꞌ Jenꞌ mạijchucsebi tsanꞌ ĉojtyiꞌ muꞌin, méquiꞌyaꞌ tsanꞌ chị́yepte in ñịbeꞌjitidyes Jenꞌsiꞌ muꞌ, judyeyaꞌ Jenꞌsiꞌ Ạꞌedyeꞌ muꞌ jịꞌchiqueyacsiꞌ tsanꞌ,

⁵ méquiꞌyamꞌ seꞌvepte in Jenꞌsiꞌ p̂eyacdyeꞌ muꞌ, jämꞌ tsanꞌ ĉọpte tashcheꞌ in, judyeyaꞌ chị́yepte ferdyeꞌ in, mọꞌ raꞌ jịꞌcaveyacsis jadyiquisve tupudyeꞌ, meꞌ meꞌ pạrej jịꞌĉojtyeꞌ tsanꞌ in.

⁶ Meꞌ tsanꞌ meꞌ muꞌin in, vaꞌquequeꞌ qui namꞌ jụijyaꞌ in, mijam raꞌ junꞌ jịꞌcaꞌnac juban Jenꞌyaꞌ in, ĉaĉaij na aty vaꞌquecbite Jenꞌtyiꞌ Ạvaꞌ in, jeñej buꞌyi cuvij Cristo pacteyaꞌ croshcheꞌ in, meꞌ buꞌyi yụꞌbajte in, paj qui muntyiꞌ in dyisacbajte in, meꞌ buꞌyi shupqui in.

⁷ Jeshaꞌ muꞌin anicjetety Jenꞌ in jeñej buꞌyiꞌ quịjodyeꞌĉansiꞌ jac in. Añej samaꞌchuiꞌ, mọꞌdyes jämiꞌ mọꞌ cätidyeꞌ, jämꞌ väshiꞌ, muꞌ mạꞌjeꞌ quịiꞌtyiꞌ, joꞌmes jac jamaꞌjotyibuti muꞌ Jenꞌ.

⁸ Muꞌin na vaꞌquectety Jenꞌ in, jeñej buꞌyiꞌ aꞌc̣his jac in. Meꞌ tsanꞌ samaꞌ buꞌyis, chịbiꞌ qui namꞌ aꞌc̣his däräꞌ mọꞌĉan, mọꞌ jam jamaꞌjotyibuti Jenꞌ, mọꞌ raꞌ vaꞌquequeꞌ judyeyaꞌ raꞌ jiꞌcoꞌshayeꞌ, meꞌ buꞌyi muꞌin vaꞌquectety in.

Bisacdyeꞌ Jenꞌdyes soꞌmisinꞌ ferdyeꞌ

⁹ Vojity, mạꞌjeyacdyety yụ, meꞌ tsanꞌ meꞌ yi yụ q̂uinꞌ, p̂eijbite yụ Jenꞌsiꞌ vaꞌtacdyeꞌ muꞌ, jam qui namꞌ miꞌin jiꞌjäcyac yụ. Chị́yebiyac yụ dyijyedyeꞌ miꞌin jam meꞌ dyijyi miꞌin, jämꞌsimꞌ meꞌchutiñeꞌ dyijyedyeꞌ c̣honꞌdyedyes.

¹⁰ Jenꞌ rụij dyijyity, muꞌ raꞌ jam yaquintubunac carijtacdyeꞌ miꞌin muꞌdyes, mijam raꞌ yaquin muꞌ junꞌ chuc mạꞌjetinte miꞌin. Meꞌ miꞌin jịꞌcaveyetinte mạꞌjitidyes miꞌin junꞌsiꞌ chuc miꞌin nọ́tacsi muꞌin anicjetety in, meꞌdye q̂uinꞌ tacaꞌ yejĉoij nọ́tyetacsi miꞌin.

¹¹ Tsun mạꞌjeꞌ paj qui miꞌin räj yejĉoij ferdyeꞌyaꞌ dyijtutiñeꞌ Jenꞌdyes carijtaqui miꞌin, meꞌ raꞌ chat jämꞌ chịj miꞌin junꞌ chuc raꞌ Ayoꞌtum bäꞌyi miꞌin, muꞌ bisvaꞌtintety miꞌin.

¹² Tsun jam mạꞌjeꞌ paj qui toꞌoty bäꞌyi miꞌin, cäc̣häꞌchucsebijamꞌ dyijyedyeꞌ muꞌinsiꞌ in tyumꞌchutidyeꞌtum bäꞌyity in, muꞌin anicyedyeꞌtumtyiꞌ in, muꞌin aty soꞌmactyiꞌ in räj junꞌ chuc yiꞌ Jenꞌsiꞌ p̂eyacdyeꞌ muꞌ.

Fer buꞌyis p̂eyacdyeꞌ Jenꞌsiꞌ muꞌ

¹³ Jenꞌ jasoꞌmitiyaꞌ p̂eyacdyeꞌ muꞌ Abraham jiquej, ĉụiꞌsiꞌcheꞌ tịj jiꞌjäcdyi paj qui fer buꞌyiꞌ shupquiꞌ mọꞌ p̂eyacdyeꞌ. Itŝij yoctyiꞌ muꞌyaꞌ mujuꞌchaꞌ buꞌyity paj muꞌsiꞌ tịj jiꞌjäcbite, jam. Mọꞌdyes muꞌ ĉụiꞌsiꞌcheꞌ tịj jiꞌjäcdyi.

¹⁴ Yi muꞌ Jenꞌ jajiti Abraham: "Yụ raꞌ anic ñịbeꞌjeye, yụ raꞌ jiꞌdayepye vóshiꞌ mi."

¹⁵ Abraham tyumꞌchutidyeꞌtum bisaqui junꞌ quiꞌ chuc cạ̈tsiꞌ mọꞌ p̂eyacdyeꞌ jasoꞌmitis Jenꞌ jiquej.

¹⁶ Yirity muntyiꞌ mạꞌjeꞌ soꞌmeꞌ ferdyeꞌ muꞌ ĉụiꞌsiꞌ p̂eyacdyeꞌ muꞌ jụijyaꞌ, muꞌ jiꞌjäcbite tịj muꞌ mujuꞌchaꞌ buꞌyitysiꞌ. Mọꞌ p̂eyacdyeꞌ meꞌ buꞌyiꞌ yụꞌtacsiꞌ, fer buꞌyiꞌ shupquiꞌ, aty jam tupuj yoc buꞌyiꞌ yụꞌtac.

¹⁷ Meꞌdye chimeꞌ muꞌ Jenꞌ, ĉụiꞌsiꞌcheꞌ tịj jiꞌjäcdyiꞌ yoquiꞌdyemꞌ soꞌmacsiyaꞌ p̂eyacdyeꞌ muntyiꞌ jiquej in. Yi qui muꞌ Jenꞌ paj qui fer buꞌyiꞌ shupquiꞌ mọꞌ, aty raꞌ jam junꞌ yoc yụꞌtac dyijyedyeꞌ muꞌ, cạ̈tsiꞌ raꞌ mọꞌ p̂eyes p̂eyacdyeꞌ muꞌ.

¹⁸ Mọꞌdyes qui muꞌ Jenꞌ soꞌmisinꞌ päräꞌ räjĉan buꞌyis jedyeꞌ, ĉụiꞌsiꞌ p̂eyacdyeꞌ muꞌ judyeyaꞌ ĉụiꞌsiꞌ tịj muꞌ. Ọij päräꞌ jedyeꞌ Jenꞌsiꞌ muꞌ jiꞌĉuyisinꞌ junꞌ chuc aty jam junꞌ yoc yụꞌtac dyijyedyeꞌ muꞌ, ĉaĉaij na muꞌ jam chịj väñäij, räjĉan rụij p̂eyaqui judyeyaꞌ jịꞌcätsaqui. P̂eyacdyeꞌyaꞌ muꞌ soꞌmisinꞌ sóñiꞌyedyes tsun yódyetycheꞌdyemꞌ ĉútiĉaꞌcheꞌ u, paj qui muꞌ ñutsjityisinꞌ, mijam farajjejaꞌ bisacdyeꞌ Jenꞌdyes.

¹⁹ Bisacdyeꞌ tsun anic fer buꞌyiꞌ yuꞌbusinꞌ ĉojtyiꞌ tsun, mọꞌ jeñej buꞌyiꞌ minacdyeꞌ därsiꞌ tapchutes covamba, meꞌ buꞌjaꞌ shupquejaꞌ tsun bisaĉaty Jenꞌcheꞌ tsun. Muꞌdyemꞌ Jesús tapchusinꞌ tsun, muvej buꞌyi muꞌ fajve juñumchuquityve, muꞌĉantyiꞌ Jenꞌsiꞌĉantyiꞌ acaꞌ mạyedyeꞌches.

²⁰ Tashcheꞌ jäꞌmij muꞌcheꞌ buꞌban, tsun qui jäquiꞌdye jiꞌsässinꞌ. Muꞌcheꞌ muꞌ Jenꞌ meꞌ jayuꞌti paj qui muꞌ anictyity cudyitity Jenꞌcheꞌ muntyidyes in, mijam raꞌ jụꞌñisĉan mạyedyeꞌ mọtsiꞌ cudyitidyeꞌ muꞌ, yojdyemꞌ muꞌsiꞌ Melquisedecsiꞌ jiquej u muꞌ.