Hebreodyes 5 - Tsimane

¹ Räj muꞌin tashcheꞌ cudyitity Jenꞌcheꞌ in, muntyiꞌĉantyiꞌ tsimꞌtac in, muꞌin yụꞌtac in paj qui muntyidyes úñi in Jenꞌsiꞌyaꞌ vej muꞌ. Muꞌin soꞌmete Jenꞌ in tucdyeꞌ muntyis muꞌin, judyeyaꞌ chimeꞌ Jenꞌdyes jiꞌcoꞌshayeꞌ juchadyes muꞌin.

² Muꞌ cudyitity Jenꞌcheꞌ tupuj ñịbeꞌ cạvacsi muꞌin juchajtumtyiꞌ muntyiꞌ in, muꞌin vatyquej juchajĉan tŝọijtyiꞌ in, judyeyaꞌ muꞌin chimeꞌ jam chị́yeptety in Jenꞌsiꞌ p̂eyacdyeꞌ in, ĉaĉaij na muꞌ muntyiꞌ chimeꞌ, itŝiꞌ ferdyeꞌ muꞌ.

³ Jam muntyidyes mọmoꞌ juchaj jiꞌcoꞌshayeꞌ Jenꞌdyes, ĉụiꞌsiꞌmundyes chimemꞌ juchaj jiꞌcoꞌshayeꞌ, ĉaĉaij na muꞌ chimeꞌ juchajtumtyiꞌ muntyiꞌ.

⁴ Jeshaꞌ yirity muntyiꞌ jam ĉụiꞌ cheꞌ yuꞌti paj qui cudyitity Jenꞌcheꞌ, meꞌdye Jenꞌ mọmoꞌ jafaijti paj qui muꞌ cudyitity Jenꞌcheꞌ, yojdyemꞌ muꞌ Jenꞌ u jafaijti Aarón jiquej.

⁵ Anicdye meꞌ muꞌ Cristo jam ĉụiꞌ yuꞌti paj qui cudyitity Jenꞌcheꞌ, muꞌdye Jenꞌ meꞌ jayuꞌti jiquej, yoj yiꞌdyemꞌ sánacdyeꞌ o: "Mi nash Ạvaꞌ yụ, q̂uinꞌ aty ạvatuye."

⁶ Yocsiꞌ sánacdyeꞌ yiꞌ: "Räjĉan raꞌ mi cudyitity Jenꞌcheꞌ, mijam raꞌ jụꞌñisĉan mạyedyeꞌ mọtsiꞌ cudyitidyeꞌ mi yojdyemꞌ Melquisedecsiꞌ u muꞌ", yiꞌ sánacdyeꞌ.

⁷ Úcheꞌdyemꞌ rụiꞌcuꞌĉandyemꞌ jiquej, muꞌ Cristo cọdyete Jenꞌ, cọdacdyeꞌĉan muꞌ fer p̂eyaqui tárisdyeꞌtum cọdyete muꞌ ĉaĉaij na muꞌ Jenꞌ fer buꞌyi, muꞌ tupuj jajiꞌc̣hondyi sänꞌdyeꞌĉan. Jenꞌ jụjbite cọdacdyeꞌ Cristos muꞌ ĉaĉaij na muꞌ chiquete.

⁸ Meꞌ tsanꞌ Jenꞌtyiꞌ Ạvaꞌ muꞌ, ñịbedyesyaꞌ qui namꞌ muꞌ jiꞌchäyiti chiquete Jenꞌ.

⁹ Meꞌ buꞌyi aty räj jịꞌcätseꞌ Jesús, meꞌdyes qui räj jiꞌc̣honacsi muꞌin chiquetety in, mijam raꞌ jụꞌñisĉan mạyedyeꞌ vaꞌcac in muꞌin jiꞌc̣honactyiꞌ in.

¹⁰ Mọꞌdyes qui muꞌ Jenꞌ jayuꞌti muꞌ Cristo paj qui muꞌ cudyitity muꞌcheꞌ muntyidyes in, muꞌ yụꞌtac yojdyemꞌ Melquisedec jiquej u.

Tsäquiꞌ farajjeyac Jenꞌsiꞌ p̂eyacdyeꞌ muꞌ

¹¹ Tacaꞌ tsanꞌ daiꞌ joꞌmes jiꞌchäyitidyeꞌ, mạꞌjeꞌ tsanꞌ yụ jịꞌchiyeyac, carij qui namꞌ shupquiꞌ jịꞌchiyeyac ĉaĉaij na miꞌin yäcäjjetyetiñeꞌ ĉojtyiꞌ miꞌin, jam junꞌ jiꞌsistiñeꞌ ĉojtyiꞌĉan p̂eyacdyeꞌ.

¹² Aty tsanꞌ men anicjetinte Jenꞌ, tupuj tsanꞌ jịꞌchiyacsity shupqui miꞌin. Jam qui namꞌ meꞌ miꞌin, yejĉoij qui namꞌ meꞌ miꞌin yojdyemꞌ jiquej u miꞌin, jemoñeꞌ paj qui quivijjebadyeyac mọꞌ tashches jiꞌchäyitidyeꞌ. Miꞌin jeñej buꞌyi joijnoꞌ, jambiꞌ tupuj säcsity, tsiꞌyitydyemꞌ mọmoꞌ, meꞌ buꞌyi miꞌin, uyaꞌyamꞌ chị́yetiñeꞌ mọꞌ jiꞌchäyitidyeꞌ.

¹³ Tyi chuc meꞌtyity in, jeñej tsiꞌyitydyemꞌ joijnoꞌ in, uyaꞌyamꞌ chị́yeptety in rụijsis jiꞌchäyitidyeꞌ Jenꞌsiꞌ muꞌ, mijam chị́yety in jụꞌñis chuc rụijsis, jụꞌñis chuc jam rụijsis.

¹⁴ Muꞌin na mujuꞌchaꞌ chị́yeꞌtyiꞌ in mọꞌ jiꞌchäyitidyeꞌ, muꞌin jeñej ishoꞌ shupqui in, tupuj aty jebeiꞌtyiꞌ shush in, ĉaĉaij na muꞌin jịꞌchiyactyiꞌ in, chị́yeꞌ jämꞌ in jụꞌñis chuc rụijsis, jụꞌñis chuc aꞌc̣his.