Hebreodyes 4 - Tsimane

Jam raꞌ vaꞌquecbija jịꞌjutyitidyes soꞌmisinꞌsiꞌ Jenꞌ

¹ Tsundyes chimeꞌ q̂uinꞌ p̂eyacdyeꞌ Jenꞌsiꞌ muꞌ, yiꞌ muꞌ jiꞌsässinꞌ raꞌ tsun chimeꞌ jịꞌjutyitidyesĉan muꞌ. Jemoñeꞌ irijyejaꞌ tsun, areꞌĉa jam tupuj pạrej siti muꞌĉan miꞌin.

² Q̂uinꞌ tsun chimeꞌ voroꞌtyisinꞌ in jämꞌsiꞌ Jenꞌsiꞌ p̂eyacdyeꞌ muꞌ, yojdyemꞌ urucyaty jiquej u in, muꞌin qui namꞌ jam nọ́tyetacsiꞌ in mọꞌ p̂eyacdyeꞌ, ĉaĉaij na jam junꞌ anicjeꞌ in, memꞌ seꞌveꞌ in.

³ Tsun qui namꞌ anicjejaꞌtyiꞌ jiꞌsitac ramꞌ muꞌĉan tsun jịꞌjutyitidyesĉan mọꞌ soꞌmisinꞌsiꞌ Jenꞌ. Ọij sánacdyeꞌ p̂eyeꞌ jịꞌjutyitidyes, yiꞌ sánacdyeꞌ: "Mọꞌjin jiꞌfajquiyin yụ in mọꞌdyes qui yụ fersiꞌ yụꞌtyeꞌ p̂eyacdyeꞌ muꞌindyes in, yi yụ: yụ raꞌ jam junꞌ jiꞌsitacsi muꞌĉan in yóĉandyemꞌ jịꞌjutyitidyes raꞌ tsanꞌ soꞌmacsis yụ", yiꞌ sánacdyeꞌ. Tupuj tsanꞌ muꞌ Jenꞌ soꞌmacsi jịꞌjutyitidyes, ĉaĉaij na yoquiꞌdyemꞌ ujaijyaꞌ carijtaqui muꞌ Jenꞌ jiquej u, jämꞌtyeꞌ ọij jac, chat q̂uinꞌdyemꞌ jịꞌjutyiti muꞌ.

⁴ Mọꞌyaꞌ sánacdyeꞌ p̂eyeꞌ yävätidyeꞌyis mạyedyeꞌ, yiꞌ: "Jenꞌ ijaij carijtaqui jiquej, chat qui yävätidyeꞌyis mạyedyeꞌ jịꞌjutyiti."

⁵ Chịmoꞌdye p̂eyeꞌ yocsiꞌ sánacdyeꞌ, yiꞌ: "Muꞌin raꞌ jam méquiꞌ siti muꞌĉan in jịꞌjutyitidyesĉan yódyesdyemꞌ soꞌmacsis tsanꞌ u yụ."

⁶ Anicdye meꞌ, muꞌin tashchety seꞌveptety in jämꞌsiꞌ Jenꞌsiꞌ p̂eyacdyeꞌ muꞌ jiquej, muꞌin jam junꞌ jiꞌsitac in muꞌĉan jịꞌjutyitidyesĉan soꞌmacsis tsanꞌ Jenꞌ, ĉaĉaij na jam anicjete in. Meꞌ tsanꞌ meꞌ tacaꞌ qui namꞌ muꞌyaꞌ q̂uinꞌ jiꞌsitac raꞌ in,

⁷ ĉaĉaij na muꞌ Jenꞌ q̂uinꞌ quivij yụꞌtyeꞌ tupudyeꞌ muꞌ, paj qui siti muntyiꞌ in, quivij jiꞌjäĉanꞌ mọꞌ p̂eyacdyeꞌ "q̂uinꞌ". Junꞌtum yómodyeꞌ aty jiyiꞌ, q̂uinꞌ chịmoꞌdye p̂eyeꞌ muꞌ Jenꞌ, jasoꞌmiti p̂eyacdyeꞌ muꞌ David jiquej, yi muꞌ: "Seꞌvebitinte q̂uinꞌ Jenꞌsiꞌ p̂eyacdyeꞌ jụijyaꞌ miꞌin, jam raꞌ yäcäjjetyetiñeꞌ ĉojtyiꞌ miꞌin."

⁸ Jịꞌjutyitidyes p̂eyes Jenꞌ, jam jiꞌjäqueꞌ mọꞌ jac yódyesdyemꞌ muꞌ Josué jịyuꞌtyeyacsis jiquej u, yóĉandyemꞌ jịꞌjutyitiĉan u in. Mọꞌ p̂iijse jụijyaꞌ, a vuty jam yụꞌtyeꞌ yocsiꞌ tupudyeꞌ u paj qui sisjaꞌ jịꞌjutyitidyesĉan.

⁹ Tacaꞌ qui namꞌ mọꞌyaꞌ jịꞌjutyitidyes tsundyes Jenꞌtyidyes muntyiꞌ tsun, tacaꞌ tupuj sisjaꞌ tsun.

¹⁰ Tyi chuc siti in jịꞌjutyitidyesĉan soꞌmacsis Jenꞌ, muꞌin aty jịꞌjutyiti in carijtacdyeꞌyaꞌ muꞌin, yojdyemꞌ muꞌ Jenꞌ jiquej u jịꞌjutyiti carijtacdyeꞌyaꞌ jiquej muꞌ.

¹¹ Mọꞌdyes q̂uinꞌ tsun jemoñeꞌ fercheꞌ dyijyejaꞌ paj qui tupuj sisjaꞌ muꞌĉan jịꞌjutyitidyesĉan mọꞌ soꞌmisinꞌsiꞌ muꞌ. Jam raꞌ cäc̣häꞌchucsebijaꞌ dyijyedyeꞌ muꞌin jam anicjetetysiꞌ Jenꞌ jiquej in, areꞌĉa jam sisjaꞌ pạrej, yojdyemꞌ muꞌin urucyaty jiquej u in.

¹² Jenꞌsiꞌ p̂eyacdyeꞌ muꞌ anic ferdyeꞌtum muꞌ, mọꞌ tsạꞌchucsiꞌ, chimeꞌ anic mọjoꞌchaꞌ toꞌcacsis, jam jeñej mọꞌ coc̣hino pärenꞌve toꞌcacsis. Mọꞌ tupuj chaꞌshibusinꞌ ĉojtyiꞌ tsun, mọꞌ seiꞌbusinꞌ ạꞌedyeꞌ tsun judyeyaꞌ aꞌsiꞌ dyijyedyeꞌ tsun, meꞌ buꞌyiꞌ mọꞌ jorojĉanjibusinꞌ räj ĉojtyiꞌĉansiꞌ dyijyedyeꞌ tsun.

¹³ Mijam méquiꞌ mọꞌyaꞌ jumĉan Jenꞌdyes, räj chuñem cạveꞌ jämꞌtacdyeꞌ muꞌ, tsunmun chimeꞌ cavisinꞌ, muꞌdye raꞌ cudyityisinꞌ p̂eyacdyeꞌ tsun, junꞌ chuc bäꞌjaꞌ jiquej úcheꞌ tsun.

Jesús cudyitity Jenꞌcheꞌ tsundyes

¹⁴ Yejĉojaꞌ tsun mijam raꞌ méquiꞌ farajjejaꞌ mọꞌ p̂eyacdyeꞌ cäc̣häꞌchujaꞌsiꞌ tsun, ĉaĉaij na muꞌ Jesús, Jenꞌtyiꞌ Ạvaꞌ muꞌ, muꞌ mạyedyeꞌcheꞌ jịjcabantyiꞌ, muꞌ nash cudyitity Jenꞌcheꞌ tsundyes.

¹⁵ Muꞌ chäyibusinꞌ dyijyedyeꞌ tsun, itŝiꞌ ferdyeꞌ tsun. Muꞌ chimeꞌ jịꞌĉojtac jiquej, junꞌ junꞌ chuc jịꞌĉojtac q̂uinꞌ tsun, meꞌ meꞌdye muꞌ jịꞌĉojtac chimeꞌ jiquej, muꞌsiꞌ qui namꞌ itŝiꞌ méquis juchaj muꞌ, mijam méquiꞌ peñi muꞌ.

¹⁶ Mọꞌdyes jam raꞌ quijnacdyeꞌtum c̣hẹiꞌyaꞌjeja Jenꞌ mạyedyeꞌchety cọdacdyeꞌĉan tsun, yócheꞌdyemꞌ ñịbeꞌjitidyesyaꞌ ayoꞌbuꞌyi u, tupuj cọdyeja jedyeꞌ chuc jemonjaꞌ. Muꞌ ñịbeꞌ ĉúsinꞌ judyeyaꞌ ñịbeꞌjisinꞌ ñútyisinꞌ junꞌsiꞌ chuc ĉụiꞌ jemonjaꞌyaꞌ tsun.