Hebreodyes 2 - Tsimane

Jam raꞌ äcäijjejaꞌ c̣honꞌdyedyes tsun

¹ Mọꞌdyes yejĉojaꞌ raꞌ mọmoꞌ fer dyijtujaꞌ ọij jiꞌchäyitidyeꞌ yódyesdyemꞌ seꞌvejas u, vatyquej raꞌ farajjejaꞌ tsun, yojdyemꞌ cashtity covamba u, vatyquej raꞌ meꞌ tsun.

² Yụꞌtacdyeꞌ Jenꞌsiꞌ muꞌ, mọꞌ p̂eyeptes anjer jiquej in, anic mọꞌ tsäquiꞌ buꞌyis, jụꞌñity chuc juchatuptety in, jam chiqueptety in, muꞌin jam junꞌ c̣honchuc jiquej in, vaꞌtacdyeꞌ soꞌmac in.

³ Dadamꞌ tsun q̂uinꞌ, mijam raꞌ méquiꞌ c̣honchusinꞌ muꞌ Jenꞌ, jam dyijtupjaꞌyaꞌ mọꞌ p̂eyacdyeꞌ p̂eyeꞌsiꞌ mọꞌ därsiꞌ c̣honꞌdyedyes. Muꞌdye Ayoꞌ tsun muꞌ tashi voroꞌyi ọij p̂eyacdyeꞌ, chat qui muꞌin seꞌveptety p̂eyacdyeꞌ in muꞌin qui rụij jiꞌchäquiyibusinꞌ in mọꞌ p̂eyacdyeꞌ, judyeyaꞌ jiꞌĉuyisinꞌ in anic rụijsis mọꞌ.

⁴ Jenꞌdye nọ́tacsi jiquej, soꞌmacsi ferdyeꞌ, daiꞌ quiꞌ jịꞌcaveyacsi ferdyeꞌ muꞌ paj qui anic jorojĉan rụijsis p̂eyacdyeꞌ tuiꞌsiꞌ in. Chimeꞌdye muꞌ Jenꞌ soꞌmacsi carijtacdyedyes muꞌin, Ạꞌedyeꞌ muꞌ soꞌmacsiꞌ junꞌ junꞌ chuc mạꞌjeꞌ muꞌ, meꞌ meꞌ soꞌmacsiꞌ.

Jesucristo vojity buꞌyi tsun

⁵ Muꞌ Jenꞌ jam yụꞌtacsi anjer in paj qui muꞌin raꞌ ayoꞌbuꞌyi in mụiꞌsischedyes jac, mọꞌ p̂eijjas q̂uinꞌ.

⁶ Sánacdyeꞌ yiꞌ muntyiꞌ qui ca raꞌ yụꞌtac in, yiꞌ sánacdyeꞌ: "¿Jedyedyetydyemꞌ jacchety muntyiꞌ in? ¿Junꞌ adac dyijtucsi mi Jenꞌ? ¿Junꞌ adac ĉọjcacsi mi?

⁷ Mi jiquej jämꞌte muntyiꞌ, tashcheꞌ chum uyaꞌyaꞌ buꞌyi anjeryaꞌ, jäquiꞌve qui namꞌ mujuꞌchaꞌ yụꞌtem, soꞌmete ferdyemꞌ judyeyaꞌ timaꞌcacdyeꞌ chimeꞌ.

⁸ Mọꞌdyes qui yụꞌte paj qui räjdyes ayoꞌbuꞌyi", yiꞌ sánacdyeꞌ. Ọij p̂eyacdyeꞌ yiꞌ junꞌ chuc muꞌ Jenꞌ jayuꞌti muntyiꞌ paj qui räjdyes ayoꞌbuꞌyi. Ọij jorojĉan yiꞌ mijam yiris jedyeꞌ mọꞌyaꞌ jiꞌshupqueꞌ, tasdyes ayoꞌbuꞌyi. Jambiꞌ qui namꞌ cạ̈tsiꞌ sánacdyeꞌ muꞌ, jambiꞌ tasdyes ayoꞌbuꞌyi.

⁹ Meꞌ tsanꞌ meꞌ, Jesús qui namꞌ dyijtuja tsun, tashcheꞌ chum uyaꞌyaꞌ buꞌyi anjeryaꞌ, meꞌ buꞌyi yuꞌti jiquej muꞌ, junꞌ quiꞌ chuc ijac räjdyes muntyiꞌ in. Meꞌ muꞌ Jenꞌ ñịbeꞌjisinꞌ tsun, muꞌ Jenꞌ jayuꞌti paj qui muꞌ ijac tsundyes, mọꞌdyes qui jäquiꞌve muꞌ Jenꞌ jayuꞌti paj qui fer buꞌyi judyeyaꞌ timaꞌcacdyeꞌ soꞌmac chimeꞌ.

¹⁰ Jenꞌ räj jämꞌtyety jedyeꞌ in judyeyaꞌ räjdyes ayoꞌbuꞌyity, muꞌdye dyijyi paj qui muꞌ Jesucristo Jiꞌc̣honacsity Muntyiꞌ ñịbedyesyaꞌ muꞌ jịꞌcätsepte räj Jenꞌsiꞌ dyijyedyeꞌ muꞌdyes. Q̂uinꞌdyemꞌ muꞌ tupuj jiꞌc̣honacsi muꞌin daiꞌtyiꞌ Jenꞌtyiꞌ ạvaꞌ muꞌ, muꞌin qui raꞌ penꞌdyetute mạyedyeꞌcheꞌ in.

¹¹ Jesús c̣hiconꞌjeyacsity judyeyaꞌ muꞌin c̣hiconꞌtactyiꞌ chimeꞌ in yirity mọmoꞌ Jenꞌ muꞌin, mọꞌdyes muꞌ Jesús jam junꞌ tsị́catacsi, jéyacsi mọmoꞌ: "Miꞌin nash ĉụiꞌtyiꞌ vojity yụ", jéyacsi.

¹² Mọꞌdye nash yiꞌ sánacdyeꞌ: "Yụ raꞌ jéyacsi vojity yụ junꞌ chuc mi Jenꞌ, judyeyaꞌ raꞌ timaꞌqueye chidyiꞌĉanyaꞌ vajmuꞌyadyeꞌĉan."

¹³ Chiyiꞌdye mọꞌ yocsiꞌ sánacdyeꞌ: "Yụ raꞌ ĉúti muꞌcheꞌ Jenꞌcheꞌ." Yocsiꞌ chimeꞌdye yiꞌ: "Utsdye u yụ, penꞌdyetucsi yụ ạvaꞌ in soꞌmintyiꞌ yụ muꞌ Jenꞌ."

¹⁴ Jeshaꞌ muꞌin ạvaꞌ in anic aꞌ meꞌchuiꞌ in, meꞌdye muꞌ chimeꞌ Jesús yụꞌtaqui sänꞌdyedyes ĉụiꞌsiꞌ aꞌ muꞌ paj qui mọꞌyaꞌ sänꞌdyeꞌyaꞌ muꞌ jiꞌpeñeꞌ Sọyoꞌ, mọꞌ meꞌchuiꞌsiꞌ sänꞌdyeꞌ jiquej.

¹⁵ Meꞌ buꞌyi muꞌ jiꞌc̣honsinꞌ muntyiꞌ tsun paj qui jam quijñejaꞌ sänꞌdyeꞌ tsun, ĉaĉaij na räjĉan noiꞌyedyeꞌtum dyijtujaꞌ mọꞌ sänꞌdyeꞌ, meꞌ bäꞌjaꞌ jiquej tsun.

¹⁶ Muꞌ atsij jiquej jam nọ́tacseti anjer in, muꞌ atsij paj qui nọ́tacseti muꞌin Abrahamtyiꞌ vóshiꞌ in.

¹⁷ Mọꞌdyes qui muꞌ yojdyemꞌ úchety vojity u, meꞌ buꞌyi yụꞌtac, junꞌ junꞌ chuc jịꞌĉojtyejaꞌ tsun q̂uinꞌ, meꞌ meꞌdye muꞌ jịꞌĉojtyeꞌ jiquej, tupuj qui meꞌ muꞌ ñịbeꞌ ĉúsinꞌ muntyiꞌ tsun. Muꞌ yejĉoij cudyiti Jenꞌcheꞌ tsundyes, muꞌ jịꞌcätseꞌtyiꞌ p̂eyacdyeꞌ. Muꞌ anic tashchety cudyitity Jenꞌcheꞌ yụꞌtac, muꞌdye vayacjibusinꞌ juchaj tsun.

¹⁸ Q̂uinꞌ aty tupuj ñútyisinꞌ tsun, jedyeꞌ chuc jịꞌĉojtacdyeꞌ jụijyaꞌ tsun, ĉaĉaij na meꞌdye muꞌ chimeꞌ jiquej jịꞌĉojtyeꞌ tsanꞌ mọꞌ jiꞌpenacdyeꞌ jiquej, anic ñịbeꞌ cạveꞌ muꞌ chimeꞌ.