Hebreodyes 12 - Tsimane

Dyijtuja muꞌ Jesucristo

¹ Mọꞌdyes q̂uinꞌ, daiꞌ muꞌyaꞌ jiquej in jịꞌcavaquity anicyedyeꞌ in, muꞌin ferdyeꞌtum cäc̣häꞌchutety Jenꞌ jiquej in. Muꞌin jemoñeꞌ cäc̣häꞌchucsejaꞌ in, jemoñeꞌ chimeꞌ yacchujaꞌ räj jedyeꞌ chuc ñutschusinꞌsiꞌ tsun, judyeyaꞌ mọꞌ juchaj tapchusinꞌsiꞌ tsun, jemoñeꞌ mọꞌ räj farajjejaꞌ paj qui dyichyedyeꞌtum jiꞌfercatiĉaꞌ carijtacdyeꞌyaꞌ tsun mọꞌ soꞌmisinꞌsiꞌ Jenꞌ.

² Dyijtuja muꞌ Jesús, muꞌ tashcheꞌ jiquej soꞌmisinꞌ anicyedyeꞌ, judyeyaꞌ muꞌ ñútyisinꞌ paj qui yejĉojaꞌ anicyejaꞌ junꞌ quiꞌ chuc jadyic. Jesús anic dyichchuti ijac croshcheꞌ, meꞌ tsanꞌ därsiꞌ tsị́cadyemꞌ shupquimꞌ ijac croshcheꞌ, jam mọꞌ dyijtuiꞌ, muꞌ dyijtuiꞌ junꞌ chuc raꞌ därsiꞌ maꞌjodyeꞌ shupquimꞌ. Anicdye meꞌ q̂uinꞌ, tacve buꞌban Jenꞌyaꞌ.

³ Dyijtubimac junꞌ chuc muꞌ dyichyaque, dyichjeyacsebi aꞌc̣his dyijyedyeꞌ muꞌin juchajtumtyis muntyis in, muꞌin fạ́quetety jiquej in. Meꞌdye raꞌ miꞌin chimeꞌ, paj qui jam yocve dyijyi ĉojtyiꞌĉan miꞌin, paj qui jam peñi miꞌin.

⁴ Jeshaꞌ miꞌin, meꞌ tsanꞌ miꞌin yejĉoij chuti paj qui juchaj jam jiꞌpennac, jambiꞌ qui namꞌ ijanac in, yódyemꞌ muꞌ jiquej u.

⁵ ¿Miꞌin aty yaquintuptinte ọij p̂eyacdyeꞌ Jenꞌsiꞌ muꞌ, mọꞌ soꞌminacsiꞌ miꞌin ạvaꞌ muꞌ? Yiꞌ sánacdyeꞌ: Ạvaꞌ yụ, jam raꞌ ĉụiꞌtuptem fạraꞌyedyemꞌ Ayos muꞌ, mijam raꞌ yoqui mi jiꞌchäyinyaꞌ vaꞌtacdyeꞌyaꞌ,

⁶ ĉaĉaij na muꞌ Ayoꞌ tsun fạraꞌjeĉunacsi mạꞌjeyactyiꞌ muꞌ judyeyaꞌ jịꞌchiyacsi vaꞌtacdyeꞌyaꞌ muꞌ yojyojdyemꞌ ạvaꞌ umꞌ, yiꞌ sánacdyeꞌ.

⁷ Muꞌ Jenꞌ vaꞌtacdyeꞌyaꞌ jiꞌchäyinac miꞌin, dyichchubitinte raꞌ mọmoꞌ, mọꞌyaꞌ raꞌ tupuj chịj miꞌin aty ạvatunac miꞌin. Jeshaꞌ úchety muntyity jenꞌ muꞌin räj vaꞌtacdyeꞌyaꞌ jịꞌchiyaqui ạvaꞌ muꞌin paj qui jämꞌ bäꞌyi in.

⁸ Meꞌdye muꞌ chimeꞌ Jenꞌ, räj damꞌjiyisinꞌ vaꞌtacdyeꞌ muꞌ, jam meꞌ vaꞌtacdyeꞌ soꞌminac jụijyaꞌ miꞌin, mọꞌyaꞌ chịj miꞌin jam anictyity ạvaꞌ muꞌ, jeñej buꞌyi muñejĉantyiꞌ ạvaꞌ miꞌin, meꞌ buꞌyi shupqui miꞌin.

⁹ Miquiꞌdyemꞌ jiquej tsun, ĉụiꞌtyiꞌ jenꞌ tsun soꞌmisinꞌ vaꞌtacdyeꞌ. Meꞌ tsanꞌ meꞌjisinꞌ, ạ̈räjjeyaĉaꞌ qui namꞌ jenꞌ tsun. Dadamꞌ muꞌ mạyedyeꞌchety mujuꞌchaꞌ raꞌ irijjeja, muꞌ raꞌ tsạꞌchusinꞌ tsun, yócheꞌdyemꞌ raꞌ bäꞌjaꞌ u.

¹⁰ Miquiꞌdyemꞌ jiquej tsun, meꞌ tsanꞌ jam men muꞌtum tsun, ĉụiꞌtyiꞌ jenꞌ tsun soꞌmisinꞌ vaꞌtacdyeꞌ, ĉụiꞌsiꞌyaꞌ dyijyedyeꞌ muꞌ damꞌjiyisinꞌ junꞌ chuc jämꞌ muꞌ ĉọiꞌ. Muꞌ na Jenꞌ dadamꞌ mus mọjoꞌchaꞌ dyijyedyeꞌ, muꞌ soꞌmisinꞌyaꞌ vaꞌtacdyeꞌ paj qui jämꞌjojaꞌve tsun. Muꞌ mạꞌjeꞌ paj qui jam jụꞌñijaꞌ shupquejaꞌ yojdyemꞌ muꞌ u.

¹¹ Anicdye meꞌ yiris vaꞌtacdyeꞌ jam jämꞌ ĉọ́jaꞌ tsun, areꞌyiꞌ tsundyes. Meꞌ tsanꞌ meꞌ chiquejaꞌ tsun, dyijtujaꞌ qui namꞌ jụijyaꞌ tsun junꞌ buty meꞌ soꞌmac vaꞌtacdyeꞌ tsun, mọꞌyaꞌ dạcjaꞌ rụijsis dyijyedyeꞌ jụijyaꞌ tsun, jäquiꞌve qui raꞌ rụij bäꞌbajshaꞌ tsun, maꞌjodyeꞌtum bäꞌbajshaꞌ tsun.

Där tsäquiꞌsisyaꞌ soꞌmac yụꞌtacdyeꞌ jiquej

¹² Jiĉudac Jenꞌdyes, itŝity ferdyeꞌ miꞌin. Atyuꞌ raꞌ peñiꞌ un miꞌin judyeyaꞌ cas miꞌin, atyuꞌ meꞌ buꞌyi miꞌin. Jiĉujshamꞌ quivij Jenꞌdyes miꞌin,

¹³ rụijsis majmi cäc̣häꞌchubadac. Meꞌ jụijyaꞌ bäꞌban miꞌin, muꞌin itŝity ferdyeꞌ in cäc̣häꞌchunactyiꞌ jụijyaꞌ in jam raꞌ penjan in, jiĉun raꞌ mọmoꞌ Jenꞌdyes in.

¹⁴ Yụꞌtacac ferdyeꞌ miꞌin paj qui jämꞌjiti bäꞌyi miꞌin räjtum muntyiꞌ miꞌin, yụꞌtyevac chimeꞌ ferdyeꞌ miꞌin paj qui jam jụꞌñiij Jenꞌsiꞌyaꞌ vej miꞌin. Tyi chuc jam meꞌ jụijyaꞌ in, muꞌin raꞌ jam junꞌ cạvete Ayoꞌ in.

¹⁵ Areꞌĉa vaꞌquecbitinte Jenꞌsiꞌ ñịbeꞌjitidyes muꞌ, mọꞌ mạꞌjeꞌ soꞌmisinꞌsiꞌ, mijam raꞌ meꞌchutiñeꞌ aꞌc̣his dyijyedyeꞌ, mọꞌ jeñej buꞌyiꞌ aꞌc̣his däräꞌ chịbiꞌsiꞌ venenotumsiꞌ, meꞌ buꞌyiꞌdye mọmoꞌ chimeꞌ aꞌc̣his dyijyedyeꞌ miꞌin, mọꞌ ac̣hiꞌtacsiꞌ daiꞌ muntyiꞌ in.

¹⁶ Mijam raꞌ voꞌvoij miꞌin, mijam raꞌ äcäijjeptinte Jenꞌsiꞌ dyijyedyeꞌ muꞌ, jam raꞌ jeñej Esaú miꞌin, yojdyemꞌ muꞌ u äcäijjeyaqui ĉụiꞌsiꞌ naꞌedyedyes muꞌ tashchetydyety ạvaꞌ muꞌ, jam otejjeyaqui, jiꞌmincaiꞌ mọmoꞌ yiris pijiꞌ säcsedyeꞌ.

¹⁷ Chịj miꞌin aty cọdaquiyaꞌ ĉụiꞌtyiꞌcheꞌ jenꞌ muꞌ, aty mạꞌjeꞌ qui tsanꞌ paj qui soꞌmac muꞌ ñịbeꞌjitidyes p̂eyacdyeꞌ, aty qui jam junꞌ tupuj soꞌmac. Meꞌ qui tsanꞌ muꞌ fer tári otejjeyaqui, aty qui namꞌ jam junꞌ jụjjepte cọdacdyeꞌ muꞌ.

¹⁸ Jeshaꞌ miꞌin q̂uinꞌ dyijtutiñes q̂uinꞌ miꞌin jam ọ́ches jacches mọꞌ, mijam jorojĉansiꞌ, jam jeñej Israeltyiꞌ vóshiꞌ jiquej in. Muꞌin c̣hẹiꞌyaꞌjise jiquej in muꞌ mụcuꞌ Sinaí, yoquiꞌdyemꞌ soꞌmacyaꞌ yụꞌtacdyeꞌ u in. Cạveꞌ in mọꞌcheꞌ mụcuꞌcheꞌ tŝij, tomaj tŝọiꞌ jịꞌsamꞌ judyeyaꞌ cächyi tyiꞌmu tsäquiꞌtyity.

¹⁹ Chimeꞌdye tujyedyeꞌ därsiꞌ seꞌveꞌ in, chimeꞌdye seꞌvete Jenꞌ in p̂eyaqui, anic där tsäquiꞌ mọꞌ cạveꞌ in. Aty seꞌvepteyaꞌ p̂eyacdyeꞌ in anic itŝijyacñi noiꞌyi in, cavin cọdaqui in paj qui jam meꞌ yejĉoij p̂eyaqui muꞌ Jenꞌ muꞌintum in.

²⁰ Anic där tsäquiꞌyis ĉọpte in p̂eyacdyeꞌ muꞌ, yi muꞌ: "Jam raꞌ täjtinte muꞌ mụcuꞌ, tyi chuc täjtety jụijyaꞌ, paj tsanꞌ cuꞌdyeꞌ jụijyaꞌ, jemoñeꞌ yiristum ijac ijmeyaꞌ, jam jụijyaꞌ farajnac mijyaꞌ", yi muꞌ Jenꞌ yụꞌtyeꞌ p̂eyacdyeꞌ.

²¹ Anic där mọꞌ tsäquiꞌ cạves in. Muꞌdye Moisés yi: "Där noiꞌyi yụ, noc̣hoꞌc̣hoij yụ", yi muꞌ.

²² Miꞌin na q̂uinꞌ jam meꞌ miꞌin, miꞌin jeñej buꞌyi yoctyiꞌ c̣hẹiꞌyaꞌjetinte mụcuꞌ muꞌ Sión, mọꞌ mạyedyeꞌches bäꞌyedyeꞌ Jerusalén yócheꞌdyemꞌ bäꞌyi tsạꞌtyiꞌ Jenꞌ u, mọꞌ c̣hẹiꞌyaꞌjetiñeꞌ miꞌin. Muꞌcheꞌ vajmuꞌyaij in muꞌin shachtyity anjer in, muꞌin timaꞌquetety Jenꞌ in.

²³ Chimeꞌdye miꞌin aty c̣hẹiꞌyaꞌjeyacsi muꞌin anicjetety Jenꞌ in, muꞌin jeñej buꞌyity tashchety Jenꞌtyiꞌ ạvaꞌ muꞌ, muꞌin sánactyiꞌ tịj in mạyedyeꞌcheꞌ. Muꞌdye Jenꞌ c̣hẹiꞌyaꞌjetinte miꞌin, muꞌ Jịꞌcäts yụꞌtacsity juchadyeꞌyaꞌ muntyiꞌ in, judyeyaꞌ chimeꞌ c̣hẹiꞌyaꞌjeyacsebi säñitysiꞌ ạꞌedyeꞌ in, muꞌin rụijtyitysiꞌ in, q̂uinꞌ aty jiꞌc̣honac in.

²⁴ Muꞌdye Jesús c̣hẹiꞌyaꞌjetinte miꞌin, muꞌ yuꞌtyiyisinꞌtyiꞌ mụiꞌsis p̂eyacdyeꞌ Jenꞌsiꞌ muꞌ, judyeyaꞌ chäsh muꞌ, mọꞌ c̣hiconꞌjisinꞌsiꞌ tsun. Mọꞌ chäsh muꞌ Jesucristos anic mọjoꞌchas jämꞌsiꞌ p̂eyacdyeꞌ soꞌmisinꞌ tsun, jam jeñej Abelsiꞌ chäsh muꞌ jiquej, ọyaꞌyaꞌ muꞌ, mọꞌ cọdaquiꞌ vaꞌtacdyeꞌ ijatidyes.

²⁵ Areꞌĉa jam ĉa vaꞌquecbitinte p̂eyacdyeꞌ muꞌ p̂eyaquitysiꞌ q̂uinꞌ. Jeshaꞌ muꞌin vaꞌquecbitety Jenꞌsiꞌ p̂eyacdyeꞌ jiquej in, mọꞌ jéyacsi jiquej úcheꞌ jaccheꞌ, muꞌin jam junꞌ c̣honchuc jiquej in. Dadamꞌ q̂uinꞌ tsun mijam raꞌ méquiꞌ c̣honchuc tsun ĉụiꞌ vaꞌquecbijayaꞌ p̂eyacdyeꞌ muꞌsiꞌ mạyedyeꞌchety p̂eyaquitysiꞌ q̂uinꞌ.

²⁶ Tashcheꞌ jiquej p̂eyaquiyaꞌ muꞌ Jenꞌ, aty soꞌmacsiyaꞌ yụꞌtacdyeꞌ muꞌ, p̂eyacdyeꞌyaꞌ muꞌ jiꞌbubaque ọij jac. Q̂uinꞌ aty yocsiꞌ p̂eyacdyeꞌ jiꞌshupqueꞌ yiꞌ: "Yiriꞌdyety raꞌ yụ jiꞌbubaque ọij jac, jam raꞌ jac mọmoꞌ, mạyedyeꞌmun raꞌ chimeꞌ."

²⁷ Yi muꞌ "yiriꞌdyety raꞌ", yi, mọꞌ jiꞌchäquiyisinꞌ räj raꞌ jịꞌmotseꞌ mọꞌ jorojĉansiꞌ jämꞌtacdyeꞌ muꞌ, mọꞌindyety raꞌ jam mọtsis in, mọꞌin räjĉan buꞌyis in, mọꞌindyety raꞌ tacyaꞌ in.

²⁸ Mọꞌ ayoꞌbuꞌyedyeꞌ Jenꞌsiꞌ muꞌ, muꞌĉan raꞌ yuꞌsinꞌ, mijam raꞌ p̂ucush mọꞌ mọtsiꞌ. Mọꞌdyes q̂uinꞌ jemoñeꞌ yoshoropaij jéja Jenꞌ, judyeyaꞌ timaꞌqueja muꞌ, mọꞌ muꞌ maꞌjotyeꞌ. Irijyedyeꞌtum ạ̈räjjeja muꞌ Jenꞌ,

²⁹ ĉaĉaij na tsuntyiꞌ Jenꞌ anic där tsäquiꞌ buꞌyi, jeñej yiris tŝij furquevaꞌjoiꞌsiꞌ, meꞌ buꞌyi muꞌ.