Génesis 6 - Tsimane

Ac̣hiꞌyedyeꞌ muntyis in

¹ Jacchety muntyiꞌ in yejĉoij dayi in, chimeꞌdye pạrej p̂en ạvaꞌ muꞌin.

² Muꞌin Jenꞌtyiꞌ ạvaꞌ in cạvacsebi ạvaꞌ muꞌin jacchetysiꞌ muntyiꞌ in anic jämꞌ ĉọcsi in. Muꞌin qui tsimꞌtacsi in jụꞌñis ĉụiꞌ mọmoꞌ mạꞌjeꞌsiꞌ in mọꞌincheꞌ vämi in.

³ Chat qui muꞌ Ayoꞌ yi: "Yụ raꞌ jam yejĉoij tsạꞌchucsi uts muntyiꞌ in paj qui jam räjĉan tsạꞌ buꞌyi in, ĉaĉaij na sänꞌdyety mọmoꞌ in; mọꞌdyes yiriꞌ cien päräꞌ quiꞌtac raꞌ mọmoꞌ yómodyeꞌ säñi in."

⁴ Muꞌyaꞌ jiquej úcheꞌ jaccheꞌ in därmuntyiꞌ muntyiꞌ jiquej in. Muꞌin shupqui in yoquiꞌdyemꞌ muꞌin Jenꞌtyiꞌ ạvaꞌ jäcacsebiyaꞌ u in mọꞌin ạvaꞌ jacchetysiꞌ muntyiꞌ in, judyeyaꞌ ạvaꞌyiꞌ in mọꞌinĉan in. Ạvaꞌ muꞌin anic ferdyeꞌtumtyiꞌ shupqui jiquej in judyeyaꞌ chị́yactyiꞌ chimeꞌ in, meꞌ yejĉoij naꞌi vóshiꞌ muꞌin.

⁵ Jenꞌ cạvacsi anic där ac̣hiꞌ bäꞌyi in jacchety muntyiꞌ in, yedyej aꞌc̣his ĉojtyiꞌĉansiꞌ dyijyedyeꞌ meꞌchuiꞌ in.

⁶ Muꞌ Ayoꞌ táracsebi muntyis juchaj muꞌin, anic yoqui cạvacsi ĉaĉaij na ĉụiꞌtyiꞌ jämꞌtacdyeꞌ muntyiꞌ muꞌ.

⁷ Mọꞌdyes qui yi muꞌ Ayoꞌ: "Yụ raꞌ tasjeyacsi jịꞌmotsacsi jacchety muntyiꞌ in jämꞌtacsity jiquej yụ. Chimeꞌdye raꞌ jebacdyeꞌ in, tsemsiꞌ in judyeyaꞌ jam tsemsiꞌ in judyeyaꞌ jaijtyiꞌ chimeꞌ in, yụ raꞌ tas ijacsi, ĉaĉaij na yoqui cạvacsi jämꞌtacdyeꞌ yụ.

⁸ Muꞌ na Noé muꞌ Ayoꞌ ñịbeꞌjajiti.

Covamba Noéty

⁹ Ọij nash p̂eyacdyeꞌ p̂eijte Noé jiquej. Noé anic rụijtyity, mumꞌ yirity jämꞌ bäꞌyi, judyeyaꞌ cäc̣häꞌchute Jenꞌ.

¹⁰ Chibin ạvaꞌ muꞌ: Sem, Cam judyeyaꞌ Jafet.

¹¹ Jenꞌ cạvacsi räj ac̣hiꞌyity úcheꞌ jacchety muntyiꞌ in,

¹² yedyej aꞌc̣histumtyiꞌ dyijyedyeꞌ in, judyeyaꞌ chuchucsaty chimeꞌ in.

¹³ Chat qui yi Jenꞌ jéte Noé: —Aty dyijyi yụ, yụ raꞌ tasjeyacsi jịꞌmotsacsi uts muntyiꞌ in, ĉaĉaij na räj ọij jac yedyej ac̣hiꞌyity muntyiꞌ in, mọꞌdyes yụ raꞌ ac̣hiꞌtyeꞌ ọij jac judyeyaꞌ jịꞌmotsacsi yụ räj jajbuꞌyety in.

¹⁴ Mi raꞌ jämꞌte yirity covamba, jämꞌsiꞌ raꞌ son jämꞌtyeꞌ in, räj raꞌ ñuctacdyeꞌtum jämꞌte mi. Pärenꞌcheꞌ raꞌ peiꞌtac paj qui jam ñịtsi.

¹⁵ Meꞌquiꞌyaꞌ raꞌ jämꞌtem, yiriꞌ cien chibin quiꞌtac ĉanamꞌ jiyiꞌ raꞌ metro moc̣hadyemꞌ, judyeyaꞌ päräꞌ quiꞌtac päräꞌ jiyiꞌ raꞌ metro choc därvedyemꞌ judyeyaꞌ yiriꞌtac chibin jiyiꞌ raꞌ metro choc moc̣hedyemꞌ.

¹⁶ Chibin raꞌ cächtacdyemꞌ moc̣hedyemꞌ. Chimeꞌdye raꞌ jämꞌtyeꞌ mi cạvedyeꞌ c̣hẹiꞌyaꞌ p̂anacdyemꞌ choc metro. Chimeꞌ raꞌ jämꞌtyem yiris chụiꞌdyeꞌ covambas.

¹⁷ Yụ raꞌ juteꞌ bänedyeꞌ jaccheꞌ, räj raꞌ ọij jac jemonjoiꞌ tomiꞌ räjtumdye jajbuꞌyes in. Tas raꞌ jacches jụ́tyis in säñiꞌ raꞌ in.

¹⁸ Mi ramꞌ yụꞌtyeyeye p̂eyacdyeꞌ yụ paj qui jam mímun säñi chimeꞌ. Covambaĉan raꞌ siti mi, p̂entum mi judyeyaꞌ ạvaꞌ mi, judyeyaꞌ jäp mi, meꞌsiꞌ ramꞌ siti miꞌin.

¹⁹ Covambaĉan raꞌ chimeꞌ jiꞌsitacsim jebacdyeꞌ in, cäts raꞌ päräꞌ jịjcaiꞌ in, sonꞌ judyeyaꞌ p̂en, meꞌ meꞌ raꞌ jiꞌsitacsim räj jacches jebacdyeꞌ in, paj qui jam säñiꞌ in yódyemꞌ mi u.

²⁰ Cäts raꞌ päräꞌ jịjcaiꞌ jebacdyeꞌ in judyeyaꞌ jaijtyiꞌ in ayij raꞌ in, mítumdye raꞌ sitiꞌ in covambaĉan, yoyoquin raꞌ ọ́ches jacches jebacdyeꞌ in, meꞌ tsanꞌ tsemsiꞌ in, judyeyaꞌ jam tsemsiꞌ in, chipäräꞌdye raꞌ jịjcaiꞌ in, paj qui mi tsạꞌchucsi.

²¹ Jäꞌmij jämꞌ yụꞌtyevaꞌ yoc yoc säcsedyedyes mi judyeyaꞌ jebacdyedyes chimeꞌ in —yi jajiti Noé.

²² Meꞌdye muꞌ Noé räj chiquepte p̂eyacdyeꞌ jasoꞌmitis Jenꞌ.