Génesis 49 - Tsimane

Jacobsiꞌ jadyiquis p̂eyacdyeꞌ muꞌ

¹ Jacob fayacsi räj ạvaꞌ muꞌ jéyacsi: "Vajmuꞌyaꞌyejamꞌ, yụ raꞌ jéyac junꞌ chuc raꞌ yocsiꞌĉan mạyedyeꞌ.

² Uveyaꞌyevac ạvaꞌ, atsijamꞌ yụ́yaꞌ, yụ nash Jacob, jenꞌ miꞌin, seꞌvibutiĉamꞌ ọij p̂eyacdyeꞌ yụ, yụ nash Israel, jenꞌ miꞌin.

³ Mi Rubén, mi tashchety ạvaꞌ yụ, ĉụiꞌsiꞌyaꞌ ferdyeꞌ yụ tashi ạvaꞌjeye. Mi nash tsanꞌ mujuꞌchaty ạvaꞌ yụ ferdyeꞌtumtyiꞌ.

⁴ Jam qui namꞌ meꞌ, mijam qui namꞌ tyi dyäcjiĉunꞌbun dyijyedyeꞌ mi, jeñej majyity cojiro, meꞌ buꞌyim, ĉaĉaij na mi säsbutiꞌ yocsiꞌ p̂en yụ, mọꞌtum ĉọshi mi, meꞌ juchaj soꞌmitim.

⁵ Simeón judyeyaꞌ Leví vaj vojity miꞌin. Miꞌin coc̣hinoyaꞌ chucsity.

⁶ Yụ jam junꞌ mạꞌjeꞌ penꞌdyetuyac miꞌin, meꞌtyity p̂eyaqui jụijyaꞌ miꞌin junꞌ chuc mạꞌjetiñeꞌ miꞌin. Fạ́codyeꞌĉan meꞌtacsi miꞌin ijacsi muntyiꞌ miꞌin, judyeyaꞌ chimeꞌ fibimꞌ seiꞌjebitinte vóyes yuj muꞌ, jeñej majmaijtyiꞌ miꞌin.

⁷ Anic där aꞌc̣his fạ́codyeꞌ miꞌin, anic mọꞌ där aꞌc̣his dyijyedyeꞌ miꞌin, mọꞌdyes qui raꞌ cäts yirity yocvevej jịjicayac Israelĉan vóshiꞌ miꞌin.

⁸ Mi na Judá, vojitytyiꞌ vóshiꞌ mi timaꞌquibun raꞌ in vóshiꞌ mi. Muꞌin raꞌ tujĉan chucsi in fạ́cacsity in, meꞌ buꞌyi raꞌ jiꞌpenacsi in. Muꞌin raꞌ vojitytyiꞌ vóshiꞌ mi dyụtsyi raꞌ in mítyiꞌyaꞌ vóshiꞌ in.

⁹ Meꞌ raꞌ vóshiꞌ mi Judá, ạvaꞌ yụ, fer buꞌyi raꞌ in, jeñej yirity pupujriꞌ, meꞌ raꞌ. Aty bijoijyaꞌ jebaqui bijodyeꞌ muꞌ, chat qui chuburꞌ buꞌban jịꞌjutyibun, mijam tyi cạ̈näꞌñete, meꞌ raꞌ muntyiꞌ in irijyi in Judátycheꞌ vóshiꞌ in.

¹⁰ Judáty vóshiꞌ muꞌ ayoꞌbuꞌyi raꞌ pạrej in, muꞌin raꞌ jam farajjeꞌ ayoꞌbuꞌyedyeꞌ in junꞌ quiꞌ chuc atsijyaꞌ muꞌ anictyity Ayoꞌ, q̂uinꞌdyemꞌ raꞌ chiquete in jacchety muntyiꞌ in.

¹¹ Judáty raꞌ vóshiꞌ muꞌ jam raꞌ jedyeꞌ jayejjotaqui muꞌin in, mijam raꞌ otejjeyaqui ova in, mọꞌsiꞌdye raꞌ dacaꞌ mọꞌ, mọꞌyaꞌdye raꞌ saptaqui cuꞌdyeꞌ muꞌin. Chimeꞌ raꞌ maj jiꞌjubiꞌ fiꞌ mọꞌ ovas, mọꞌĉandye raꞌ puptaqui quịꞌsiꞌ muꞌin chimeꞌ.

¹² Mọꞌsiꞌdye raꞌ fiꞌ vino tyeij chimeꞌ in, päijnenꞌ raꞌ tyeij vejyaꞌ in, judyeyaꞌ raꞌ jaijbaij modyin muꞌin. Yódyeiꞌdyemꞌ reche o, joꞌmeij raꞌ tyeij modyin muꞌin.

¹³ Zabulóntyiꞌ raꞌ vóshiꞌ muꞌ, muꞌin raꞌ sinve mar bäꞌyi in, mọꞌyaꞌ raꞌ muꞌinsiꞌ jämꞌsiꞌ sojquitidyedyes covambadyes marĉantyiꞌ. Mọꞌ na jac muꞌin arajdye chaꞌsheꞌ yocsiꞌ jac Sidón.

¹⁴ Isacartyiꞌ raꞌ vóshiꞌ muꞌ jeñej buꞌyi raꞌ in yirity cạquity cuꞌdyeꞌ, muꞌĉan jịꞌjutyiti cuꞌdyesĉan acaꞌ.

¹⁵ Muꞌin raꞌ anic jämꞌsiꞌ ĉọiꞌ mọꞌ jac in mọꞌdyes raꞌ jam ñutsjiti in, úñity ramꞌ yụꞌtac in, jam mọꞌ jedyeꞌ yi in.

¹⁶ Dantyiꞌ raꞌ vóshiꞌ muꞌ ĉụiꞌ raꞌ muꞌin ayoꞌbuꞌyi in, ĉụiꞌtyiꞌ raꞌ chätidyeꞌ muꞌ ayoꞌbuꞌyi muꞌindyes in, muꞌin raꞌ Israeltyiꞌ vóshiꞌ chimeꞌ in.

¹⁷ Dantyiꞌ raꞌ vóshiꞌ muꞌ jeñej buꞌyi raꞌ yirity majmiĉantyiꞌ nas jitsety cavayo yujve judyeyaꞌ jịvaꞌchate muꞌ foquiꞌtyity.

¹⁸ Chimeꞌ yi muꞌ Jacob: "Tsuntyiꞌ Ayoꞌ, yụ yejĉoij bisvaꞌqueye paj qui jiꞌc̣hondyim."

¹⁹ Ac̣hiꞌyity muntyiꞌ in muꞌintum raꞌ chuti in Gadtyiꞌtum vóshiꞌ muꞌ, muꞌin qui na ramꞌ feryi in cavꞌcacsi raꞌ in.

²⁰ Aserĉantyiꞌ vóshiꞌ muꞌ mijam raꞌ jayej cätidyeꞌ muꞌin, anic raꞌ jämꞌ shupquiꞌ sicdyeꞌ muꞌin, jämꞌsiꞌ raꞌ säcsedyeꞌ muꞌin, jeñej ayodyes säcsedyeꞌ, meꞌ raꞌ shupquiꞌ.

²¹ Neftalítyiꞌ raꞌ vóshiꞌ muꞌ yojdyemꞌ jebacdyeꞌ o chätis, ạvaꞌtumsiꞌ ñej o jämꞌsimꞌ, meꞌ buꞌyi raꞌ muꞌin vóshiꞌ muꞌ jam cạ̈näꞌnaqui in.

²² Joséty raꞌ vóshiꞌ muꞌ muꞌin raꞌ jeñej buꞌyi in jämꞌsiꞌ cätidyeꞌ ova, jijmoꞌmojyaꞌ quịcsiꞌ, anic chutaꞌ väshis judyeyaꞌ tuꞌiꞌ bojviꞌ baquits tyeiꞌ naꞌrucheꞌ.

²³ Muntyiꞌ fạ́codyeꞌtum chiꞌbacsi in, jam farajjeꞌ meꞌtacdyeꞌ in.

²⁴ Muꞌin na Josétyiꞌ vóshiꞌ in jämꞌtaqui cọiꞌdyeꞌ muꞌin, mijam jayej unsiꞌ ferdyeꞌ muꞌin, ĉaĉaij na muꞌ ferdyeꞌtumtyiꞌ Jenꞌ, yụ́tyiꞌ Ayoꞌ, muꞌdye soꞌmacsi ferdyeꞌ muꞌindyes in. Muꞌ nash anictyity ĉọjcacsity, muꞌ ñutschuntyiꞌ yụ, muꞌdye raꞌ ñútyibun vóshiꞌ mi José.

²⁵ Muꞌ Jenꞌ jenꞌtyiꞌ Ayoꞌ mi, muꞌ raꞌ ñútyiyibun vóshiꞌ mi José, muꞌ mujuꞌchaꞌ ferdyeꞌtumtyiꞌ jämꞌyedyestum raꞌ ñútyibun vóshiꞌ mi. Muꞌ raꞌ soꞌmacsi mạyedyeꞌches añej judyeyaꞌ jacches ojñiꞌ chimeꞌ, judyeyaꞌ raꞌ ạvaꞌ soꞌmacsi daiꞌ chimeꞌ, meꞌ raꞌ nọ́tacsi Jenꞌ.

²⁶ Meꞌ nash yụ jenꞌ mi, yụ mujuꞌchaꞌ cọdyete Jenꞌ paj qui räjĉan ñútyin mi, uyaꞌyaꞌ vóshiꞌvunsiꞌ yụ cọdacdyeꞌ muꞌin jiquej. Jam raꞌ junꞌ mọtsiꞌ ọij nọ́tacdyeꞌ Jenꞌsimꞌ jam jeñej mụcuꞌ in, meꞌ tsanꞌ mọtsi in, mọꞌ qui namꞌ p̂eyacdyeꞌ yejĉoiꞌ, cạ̈tsiꞌ raꞌ Josédyes ọij p̂eyacdyeꞌ q̂uinꞌ, muꞌ tsimꞌtactyiꞌ vojityyaꞌ.

²⁷ Muꞌin Benjamíntyiꞌ vóshiꞌ muꞌ jeñej fạ́coiꞌsiꞌ vajedyedyeꞌ, pamꞌ jebeiꞌ mọꞌ ijaiꞌsiꞌ, yómoꞌ qui namꞌ mọꞌ jiꞌshucdyidyemꞌ jiꞌcheteyacsiꞌ."

²⁸ Meꞌ muꞌ Israel yụꞌtyeyeyacsi p̂eyacdyeꞌ muꞌindyes in, cäts yirityityij jịjcaij ạvaꞌ muꞌ, yụꞌtyeyacsi p̂eyacdyeꞌ muꞌ, yiriꞌtac päräꞌ jiyity in. Muꞌinĉandye shupqui in yiriꞌtac päräꞌ jiyi ñuruꞌ in Israeltyiꞌ vóshiꞌ muꞌ.

Sänꞌdyeꞌ Jacobsiꞌ

²⁹ Yirisĉan mạyedyeꞌ muꞌ Jacob jéyacsi ạvaꞌ muꞌ: "Aty c̣hẹiꞌyaꞌ sänꞌdyeꞌ yụ, penꞌdyetucseban raꞌ vóshiꞌvun yụ. Muꞌĉan raꞌ toꞌĉan rudyuꞌjiĉudyiĉaꞌ yụ miꞌin, Efrónsiꞌĉan jac hititas, yóĉandyemꞌ jịjcaij chätidyeꞌvun u yụ in.

³⁰ Canaánĉan mọꞌ toꞌ, Macpela tịj mọꞌ miquis jac, mọꞌ toꞌtumsiꞌ, Mamreve buꞌyiꞌ mọꞌ. Abrahamsiꞌ jiquej yaꞌidyeꞌvun muꞌ, yoquiꞌdyemꞌ mọꞌ o miquis jac, Efrón jäctyete jiquej säñitydyes chätidyedyes muꞌ.

³¹ Muꞌĉan nạc jiquej Abrahamvun, p̂entumdye muꞌ Saravuntum muꞌ, judyeyaꞌ ạvaꞌ muꞌ Isaacvun judyeyaꞌ Rebecavun chimeꞌ. Chịmoꞌĉandye nạiꞌ yụ mọꞌ Leavun jiquej.

³² Muꞌ Abraham jäctyetacsis jac jiquej hititas muꞌin", yi Jacob jéyacsi ạvaꞌ muꞌ.

³³ Jacob ijaij jéyacsi ạvaꞌ muꞌ, chat qui chudenꞌyeban jubijĉan, chat tyumꞌyetac säñi.