Génesis 35 - Tsimane

Betelĉan muꞌ Jenꞌ yụꞌtyeyete p̂eyacdyeꞌ Jacobdyes

¹ Jenꞌ jajiti Jacob: —Betelĉan raꞌ jịjcaij mi, muꞌĉan raꞌ bäꞌyi mi, judyeyaꞌ raꞌ jämꞌbanꞌ mọꞌĉan mi yiris jiꞌcoꞌshayacdyeꞌ yụ́dyes, yụ jiꞌcavitity mídyes jiquej yoquiꞌdyemꞌ ĉaꞌjoyaquiyaꞌ vojity mi Esaú jiquej u.

² Chat qui muꞌ Jacob jéyacsi chätidyeꞌ muꞌ judyeyaꞌ penꞌdyetutety in, jéyacsi: —Farajjevac tas yoctyis cudyitidyes jämꞌtacdyeꞌ miꞌin, chat qui raꞌ dyuij miꞌin judyeyaꞌ chụiꞌbutyĉan qui raꞌ quịꞌsiꞌ cäbun miꞌin.

³ Q̂uinꞌ raꞌ Betelĉan jịjcajaꞌ tsun, muꞌĉan raꞌ yụ jämꞌbanꞌ yiris jiꞌcoꞌshayacdyeꞌ Jenꞌdyes, ĉaĉaij na muꞌ ñútyin yụ, yoquiꞌdyemꞌ ñịbeꞌ cạveꞌyaꞌ yụ jiquej. Muꞌ räjĉan penꞌdyetun yụ junaꞌ chuc jịjcaijyaꞌ yụ jiquej —jéyacsi Jacob.

⁴ Anicdye meꞌ muꞌin penꞌdyetutety in soꞌmete Jacob in räj cudyitidyes jämꞌtacdyeꞌ muꞌin judyeyaꞌ shaporo muꞌin. Muꞌ qui rudyuꞌjeꞌ sonyaꞌ, c̣hẹiꞌyaꞌ bäꞌyedyeꞌ Siquem.

⁵ Chat qui sacti muꞌ Jacob, räjtumdye chätidyeꞌ muꞌ. Jenꞌ na yi paj qui muꞌĉantyiꞌ in noiꞌyi in mọꞌdyes qui jam ñutsjeĉunacsi in.

⁶ Muꞌ Jacob räjtumdye penꞌdyetutety in venjoij Betelĉan in, Luz yocsiꞌ tịj mọꞌ bäꞌyedyes, Canaán tịj mọꞌ jacsiꞌ.

⁷ Mọꞌĉan jämꞌtyeꞌ jiꞌcoꞌshayacdyeꞌ Jenꞌdyes judyeyaꞌ jịꞌtiꞌeꞌ mọꞌ bäꞌyedyeꞌ: "El-Betel", ĉaĉaij na muꞌĉan muꞌ Jenꞌ jiꞌcaviti Jacobdyes jiquej, yoquiꞌdyemꞌ ĉaꞌjoyaqui vojity jiquej umꞌ.

⁸ Mọꞌĉan mọꞌ säñiꞌ Débora, mọꞌ jaĉujcataques jiquej mọꞌ Rebeca. Mọꞌyaꞌdye nạiꞌ in sonyaꞌ c̣hẹiꞌyaꞌ mọꞌ bäꞌyedyeꞌ Betel. Jacob yụꞌtyeyeꞌ tịj mọꞌ dyäquedyes, "Son táredyes", jeꞌ.

⁹ Meꞌdye muꞌ Jacob caꞌñibun Padan-aramvety, ĉụiꞌsiꞌĉan jac jijtuban. Quivij muꞌ Jenꞌ jiꞌcaviti muꞌdyes judyeyaꞌ yụꞌtyeyete jämꞌsiꞌ p̂eyacdyeꞌ.

¹⁰ Jajiti: —Jacob tsanꞌ tịj jiquej mi, q̂uinꞌ chat raꞌ aty jam meꞌ tịj mi, Israel qui raꞌ tịj yụꞌtyeyeye —jajiti Jenꞌ. Meꞌdye yoc yụꞌtac tịj muꞌ.

¹¹ Chimeꞌdye Jenꞌ yi jajiti: —Yụ nash Jenꞌ mujuꞌchaꞌ feryity, ạvaꞌyeva daiꞌ mi, chidaiꞌdye raꞌ vóshiꞌ mi, muꞌin raꞌ fer buꞌyi in, paiꞌ buꞌyi raꞌ in, pạrej raꞌ muꞌyaꞌ bäꞌyedyeꞌĉantyiꞌ ayoꞌ in.

¹² Jac soꞌmetes jiquej yụ Abraham judyeyaꞌ Isaac, chịmoꞌdye raꞌ yụ jac soꞌmeye räjtumdye vóshiꞌ mi —jajiti Jenꞌ.

^13-14 Chat qui jayacchuti Jenꞌ. Muꞌyaꞌdyemꞌ jap̂iyiti Jenꞌ, muꞌ Jacob jäcte yirity mij quichjete, chat qui aseijte vinotumsiꞌ chojjeyete, meꞌ Jenꞌdyety yụꞌte muꞌ mij.

¹⁵ Jacob Betel jịꞌtiꞌeꞌ dyäquedyeꞌ muꞌ.

Sänꞌdyeꞌ mọꞌ Raquelsiꞌ

¹⁶ Chat qui yacchuiꞌ in mọꞌ Betel, miꞌeban in Efrataĉan qui raꞌ jịjcaij in. Jambiꞌ ventyequeꞌ in, majmiyaꞌ mọꞌ Raquel basdyiꞌ. Sät tŝọij ạvaꞌ mọꞌ, ñịbeꞌ cạveꞌ mọꞌ.

¹⁷ Aty jajipenꞌdyiꞌ mọꞌ basdyidyeꞌ chat yiꞌ mọꞌ jiꞌbasacsis jajitiꞌ: "Jam raꞌ noiꞌyiꞌ mi, a nash jorojyaꞌ ạvaꞌ mi, aty q̂uinꞌ päräꞌ sonꞌ ạvaꞌ mi", jeꞌ mọꞌ.

¹⁸ Raquel na aty mạꞌjeꞌ säñiꞌ. Aty jụ́tyejdyiꞌdyety mọꞌ, tịj yụꞌtyeyetacte ạvaꞌ mọꞌ: Benoni jéte. Jacob yocsiꞌ tịj yụꞌtyeyete, Benjamín jéte.

¹⁹ Meꞌ sänaque mọꞌ Raquel, majmiyaꞌ nạiꞌ in, Efrataves majmi, q̂uinꞌ na aty yocsiꞌ tịj yụꞌtyeyeꞌ in bäꞌyedyes, Belén q̂uinꞌ tịj mọꞌ.

²⁰ Jacob quichjete yirity jịꞌĉocdyety mij ruꞌdyeiꞌyaꞌ mọꞌ. Tacamꞌ yejĉoij mij ruꞌdyeiꞌyaꞌ Raquelvunyaꞌ.

²¹ Israel sacjebanꞌ quivij miꞌi. Mujuꞌveyaꞌ quivij dyäqui in damꞌ cajñeꞌ in mọꞌ acaꞌ moches cạvaquis tịj mọꞌ Edar.

²² Tacyaꞌdyemꞌ in, muꞌ Rubén ĉọshi Bilhatum, yocsiꞌtum p̂en jenꞌsiꞌ muꞌ. Chị́qui jenꞌ muꞌ, Jacob, fer muꞌ fạ́coij, fạ́caqui ạvaꞌ muꞌ. Yiriꞌtac päräꞌ jiyi Jacobtyiꞌ ạvaꞌ muꞌ.

Jacobtyiꞌ ạvaꞌ muꞌ

²³ Leaĉantyiꞌ ạvaꞌ muꞌ: Rubén, tashity ạvaꞌ muꞌ, judyeyaꞌ Simeón, Leví, Judá, Isacar judyeyaꞌ Zabulón.

²⁴ Raquelĉantyiꞌ na ạvaꞌ muꞌ: José judyeyaꞌ Benjamín.

²⁵ Bilhaĉantyiꞌ na ạvaꞌ muꞌ, úñis mọꞌ Raquelsiꞌ: Dan judyeyaꞌ Neftali.

²⁶ Zilpaĉantyiꞌ ạvaꞌ muꞌ, úñis mọꞌ Leas: Gad judyeyaꞌ Aser. Räjenꞌdye in Jacobtyiꞌ ạvaꞌ muꞌ, Padan-aramĉan naꞌi in.

Sänꞌdyeꞌ Isaacsiꞌ

²⁷ Jacob cạveĉajte jenꞌ muꞌ Isaac, Mamreĉan muꞌ bäꞌyi. Mọꞌ bäꞌyedyeꞌ chimeꞌdye yocsiꞌ tịj soꞌmac, Arba judyeyaꞌ Hebrón jeꞌ in. Muꞌĉan bäꞌyi jiquej muꞌin in Abraham judyeyaꞌ Isaac.

²⁸ Anic jiyi ishoꞌ muꞌ Isaac, yiriꞌ cien q̂uenꞌĉan quiꞌtac yómodyeꞌ tyiti muꞌ

²⁹ q̂uinꞌdyemꞌ säñi muꞌ, judyeyaꞌ vóshiꞌvunyaꞌ yụꞌtac. Ạvaꞌ muꞌ, Esaú judyeyaꞌ Jacob nạ́te in.