Génesis 23 - Tsimane

Sänꞌdyeꞌ mọꞌ Saras

¹ Sara aty yiriꞌ cien päräꞌ quiꞌtac yävätidyeꞌ jiyiꞌ yómodyeꞌ tyitiꞌ mọꞌ,

² chat q̂uinꞌdyemꞌ säñiꞌ mọꞌ. Hebrónĉan sänjanꞌ mọꞌ Canaánĉansiꞌ jac, yocsiꞌ tịj mọꞌ bäꞌyedyes: Quiriat-arba. Muꞌ Abraham táraqui p̂envun muꞌ.

³ Abraham farajjetaque chum Saravun, ĉọcsequi hitita in muꞌĉan bäꞌyity in, jéyacsi:

⁴ —Meꞌ tsanꞌ yocve bäꞌyity yụ, yụ qui namꞌ cọdyeyac miꞌin paj qui jiꞌmincayitiĉaꞌ miꞌin miquiꞌve jac paj qui mọꞌĉan nạ́qui p̂envun yụ —jéyacsi.

⁵ Vorjete hitita in:

⁶ —Jeshaꞌ, seꞌvibutiĉamꞌ chum damꞌ p̂eyacdyeꞌ, mi nash fer buꞌyity tsunsiꞌyaꞌ vej, muꞌ Jenꞌ yuꞌtyin. Tsimꞌtyevaꞌ mọmoꞌ jụꞌñis chuc ĉụiꞌ mọjoꞌchas jämꞌsiꞌ ruꞌdyeiꞌyas mạꞌjes mi, mọꞌĉan raꞌ nạ́qui p̂envun mi, tsun raꞌ jam jéyac, tupuj mọmoꞌ nạ́quim.

⁷ Meꞌdye qui muꞌ Abraham sacyi vụduiꞌtuqui muꞌinsiꞌyaꞌ vej muꞌin,

⁸ jéyacsi: —Tupuj paj qui ọ́ĉan nạ́qui p̂envun yụ, jémac muꞌ Efrón, Zohartyiꞌ ạvaꞌ muꞌ

⁹ paj qui muꞌ jiꞌmincayin yụ toꞌ, Macpela tịj mọꞌ, tajaꞌves jac. Yụ raꞌ jämꞌ yaꞌityete chat qui raꞌ yụ́siꞌ mọꞌ ruꞌdyeiꞌyas jac.

¹⁰ Efrón hitita chimeꞌ, bäꞌvaꞌjoij bäꞌyedyesyaꞌ chụiꞌdyeꞌ mọꞌ, muꞌ qui vorjete Abraham. Räj muꞌyaꞌ chätidyeꞌ muꞌ seꞌvepte in p̂eyacdyeꞌ muꞌ. Yi Efrón jéte:

¹¹ —Jam nash meꞌ, yụ raꞌ ñịbeꞌjeye mọꞌ jac, räjtumdye mọꞌĉansiꞌ toꞌ, utssiꞌyaꞌ raꞌ vej muꞌin chätidyesyaꞌ yụ, yụ raꞌ ñịbeꞌjeye, nạ́qui raꞌ mọmoꞌ p̂envun mi —yi jajiti.

¹² Cuvij muꞌ vụduiꞌtuqui muꞌ Abraham muntyisyaꞌ vej muꞌin,

¹³ vorjete Efrón muꞌinsiꞌyaꞌ vej, jéte: —Jeshaꞌ, ọij damꞌ seꞌvibutiꞌ p̂eyacdyeꞌ. Yụ jéye paj qui jụjjibutiꞌ mi querec̣ha yụ jacyadyety, chat qui raꞌ q̂uinꞌdyemꞌ mọꞌĉan nạ́qui p̂envun yụ.

¹⁴ Yi Efrón vorjete:

¹⁵ —Yụ jéye, seꞌvitiꞌ ram, mọꞌ jac yaꞌiꞌ vạjpedyeꞌ quiꞌ cien anictyity plata mọmoꞌ, paj mọꞌyaꞌ mọꞌ yaꞌidyeꞌ, mọꞌ jam raꞌ p̂eijjaꞌ, nạ́vamꞌ p̂envun mi —yi Efrón jajiti.

¹⁶ Abraham chị́yepte Efrónsiꞌ dyijyedyeꞌ muꞌ junꞌ chuc yi muꞌ, jéte Abraham muꞌinsiꞌyaꞌ vej muꞌin chätidyesyaꞌ muꞌ hitita in. Meꞌdye qui muꞌ Abraham yaꞌityeꞌ, anic ñäp jiyaꞌdyeyeꞌ platayaꞌ.

¹⁷ Meꞌ Abraham yaꞌij Efrónsiꞌ jac jiquej, mọꞌ jac jiquej, mọꞌ jac Macpelaĉansiꞌ mọꞌ, pamꞌve buꞌyis Mamre, Abraham yaꞌij jac räjtumdye toꞌ judyeyaꞌ son in.

¹⁸ Hitita in räj muꞌin bäꞌyedyesyaꞌ chụiꞌdyeꞌ in, räj chịj in aty Abrahamsiꞌ mọꞌ jac.

¹⁹ Chat qui q̂uinꞌdyemꞌ muꞌ Abraham nạ́qui p̂envun muꞌ, toꞌĉan yụꞌtyeꞌ Macpelaĉansiꞌ, pamꞌve buꞌyis Mamre. (Yocsiꞌ tịj Mamres, Hebrón jeꞌ qui namꞌ in Canaánĉansiꞌ jac.)

²⁰ Meꞌ aty meꞌchuiꞌ Abraham mọꞌ toꞌtumsiꞌ jac ĉaĉaij na muꞌin Hitita in muꞌin jiꞌmincayete in ruꞌdyeiꞌyas jac.