Génesis 11 - Tsimane

Moches cäꞌchacdyeꞌ Babelĉansiꞌ

¹ Tashcheꞌ jiquej yiris mọmoꞌ p̂eyacdyeꞌ muntyis muꞌin, itŝiꞌ damꞌdye yocsiꞌ jiquej.

² Urucyaꞌmuntyiꞌ in nati in, shupquive tsun jịjcaij in. Dạquiqueꞌ in mojij, Sinar tịj mọꞌ jacsiꞌ, muꞌĉan taĉan bäꞌyi in.

³ Yirisĉan mạyedyeꞌ dyijyi in yi jítidyeij in: —Jeshaꞌ jämꞌtyejaꞌ faratucsiꞌ jac, jämꞌ raꞌ ferojmun jiꞌmujaꞌ —yi jítidyeij in. Anicdye meꞌ muques faratucsiꞌ jac jämꞌtyeꞌ in, jam mij jämꞌte in, judyeyaꞌ tsinꞌcusyaꞌ qui peiꞌtaquis peiꞌquejĉoiꞌ jämꞌtyeꞌ in, mijam musactyiꞌyaꞌ mij.

⁴ Yi jítidyeij in: —Jụdyej jämꞌtyejaꞌ yiris bäꞌyedyeꞌ tsun, judyeyaꞌ raꞌ chimeꞌ jiꞌmocheyejaꞌ cäꞌcheꞌ cạjaꞌ acaꞌ, junꞌ quiꞌ chuc venjoiꞌ mạyedyeꞌcheꞌ paj qui meꞌquiꞌcheꞌ judyeyaꞌ paj qui jam yaquintusinꞌ muntyiꞌ in, paj qui jam paiꞌjojaꞌ úcheꞌ jaccheꞌ tsun —jítidyeij in.

⁵ Muꞌ qui Ayoꞌ chạij cạveteꞌ bäꞌyedyeꞌ judyeyaꞌ mọꞌ cäꞌchacsiꞌ acaꞌ jämꞌtyes muꞌin muntyiꞌ in.

⁶ Muꞌ Ayoꞌ yi: "Uts q̂uinꞌ muntyiꞌ in tupuj meꞌ carijtaqui in ĉaĉaij na yiriꞌyaꞌ bäꞌyity in judyeyaꞌ yiris mọmoꞌ p̂eyacdyeꞌ muꞌin. Mọꞌdyes jụꞌñis ĉụiꞌ mọmoꞌ dyijyedyeꞌ játŝuti jụijyaꞌ in, meꞌ ramꞌ jämꞌtaqui in, jam raꞌ tyi ñucjeyacsebi dyijyedyeꞌ muꞌin.

⁷ Damꞌdye jämꞌ chạbajshaꞌ, yoc yoc yụꞌtyeyacsejaꞌ p̂eyacdyeꞌ muntyidyes in, paj qui jam vaj meij chäquibuti p̂eyacdyeꞌ in," yi Jenꞌ.

⁸ Anicdye meꞌ Ayoꞌ yi meꞌdye muꞌin paiꞌ buꞌban qui úcheꞌ jaccheꞌ in, aty qui jam yiriꞌyaꞌ bäꞌyi in. Judyeꞌdye ijaij in mọꞌ bäꞌyedyeꞌ, yacchuqui in.

⁹ Muꞌyaꞌdye muꞌ Ayoꞌ yoc yoc yụꞌtyeyacsi p̂eyacdyeꞌ räj jacchety muntyiꞌ in, muꞌdye jiꞌpaiꞌcacsi muntyiꞌ in, räj buꞌyi vatyquej jaccheꞌ in. Mọꞌdyes mọꞌ bäꞌyedyeꞌ Babel tịj mọꞌ.

Semtyiꞌ vóshiꞌ muꞌ

¹⁰ Ọij sánacdyeꞌ p̂eijbite Semtyiꞌ vóshiꞌ muꞌ. Aty päräꞌ yómodyeꞌ jiyiꞌ mọꞌ bänedyeꞌ, chat muꞌ Sem aty yiriꞌ cien yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Arfaxad.

¹¹ Tacaꞌ men yejĉoij bäꞌyi muꞌ ĉanamꞌ qui cien yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Sem.

¹² Arfaxad aty chibin quiꞌtac ĉanamꞌ jiyiꞌ yómodyeꞌ tyiti muꞌ chat q̂uinꞌdyemꞌ naꞌi ạvaꞌ muꞌ Sala.

¹³ Tacaꞌ yejĉoij men bäꞌyi muꞌ, vạjpedyeꞌ quiꞌ cien chibin jiyiꞌ yómodyeꞌ, judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Arfaxad.

¹⁴ Sala aty chibin quiꞌtac yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Eber.

¹⁵ Yejĉoij tacaꞌ men bäꞌyi muꞌ vạjpedyeꞌ quiꞌ cien chibin jiyiꞌ yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Sala.

¹⁶ Eber aty chibin quiꞌtac vạjpedyeꞌ jiyi yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Peleg.

¹⁷ Yejĉoij tacaꞌ men bäꞌyi muꞌ vạjpedyeꞌ quiꞌ cien chibin quiꞌtac yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Eber.

¹⁸ Peleg aty chibin quiꞌtac yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Reu.

¹⁹ Tacaꞌ yejĉoij men bäꞌyi päräꞌ quiꞌ cien arajtac jiyiꞌ yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Peleg.

²⁰ Reu aty chibin quiꞌtac päräꞌ jiyiꞌ yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Serug.

²¹ Tacaꞌ men yejĉoij bäꞌyi, päräꞌ quiꞌ cien yävätidyeꞌ jiyiꞌ yómodyeꞌ, judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Reu.

²² Serug aty chibin quiꞌtac yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Nacor.

²³ Tacaꞌ yejĉoij men bäꞌyi, päräꞌ quiꞌ cien yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Serug.

²⁴ Nacor aty päräꞌ quiꞌtac arajtac jiyiꞌ yómodyeꞌ tyiti muꞌ, chat q̂uinꞌdyem naꞌi ạvaꞌ muꞌ Taré.

²⁵ Tacaꞌ yejĉoij men bäꞌyi, yiriꞌ cien yiriꞌtac arajtac jiyiꞌ yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Nacor.

²⁶ Taré aty yävätidyeꞌ quiꞌtac yómodyeꞌ tyiti muꞌ chat q̂uinꞌdyemꞌ naꞌi in ạvaꞌ muꞌ, Abram, judyeyaꞌ Nacor judyeyaꞌ Harán, meꞌ meꞌ tịj muꞌin.

Naꞌi Abram

²⁷ Ọij sánacdyeꞌ p̂eijbite Tarétyiꞌ vóshiꞌ muꞌ. Taré ạvaꞌyi naꞌi muꞌ Abram judyeyaꞌ muꞌ Nacor judyeyaꞌ muꞌ Harán. Harán qui ạvaꞌyi naꞌi muꞌ Lot.

²⁸ Tacaꞌ tsạꞌ muꞌ Taré säñi ạvaꞌ muꞌ Harán, Caldeaĉansiꞌ bäꞌyedyeꞌ, Ur, muꞌĉan säñi muꞌ, yóĉandyemꞌ naꞌi jiquej u.

²⁹ Abram vämi Saraicheꞌ, muꞌ na Nacor vämi Milcacheꞌ, mọꞌ Haránsiꞌ ạvaꞌ muꞌ, judyeyaꞌ Iscas vojiꞌ muꞌ.

³⁰ Sarai na jam junꞌ ạvaꞌyis, ĉaĉaij na säräꞌ buꞌyis.

³¹ Taré yacchuiꞌ mọꞌ jac Caldeaĉansiꞌ, muꞌĉan bäꞌyi jiquej tịj mọꞌ bäꞌyedyeꞌ Ur, chat qui muꞌve tsanꞌ jịjcaij Canaánve. Cạqui ạvaꞌ muꞌ Abram, judyeyaꞌ vịyaꞌ muꞌ Lot, judyeyaꞌ jäp muꞌ, Sarai. Meꞌ tsanꞌ meꞌ, a qui namꞌ ventyequeꞌyaꞌ mọꞌ bäꞌyedyeꞌ Harán, muꞌĉan taĉantyiꞌ.

³² Muꞌĉan qui sänjan muꞌ Taré, aty päräꞌ quiꞌ cien ĉanamꞌ jiyiꞌ yómodyeꞌ tyiti muꞌ chat qui säñi.