Filemóndyes 1 - Tsimane

Tashches voryedyeꞌ Pablos

¹ Yụ Pablo ĉäꞌräij yụ Jesucristodyes, yụ yiriꞌyaꞌ Timoteotum, muꞌ vojity tsun, sáñeꞌ ọij mídyes Filemón, mạꞌjeyacdyety tsun, vaj meꞌ carijtaĉaty Jenꞌdyes tsun.

² Ọij sánacdyeꞌ q̂uinꞌ muꞌindyes chimeꞌ in Cristoty ñuruꞌtyity in, vajmuꞌyaijtyiꞌ in mísĉan acaꞌ in, mọꞌ vojiꞌ tsun Apia chimeꞌ judyeyaꞌ muꞌ Arquipo, muꞌ jeñej buꞌyi väc̣häꞌtyity Jenꞌtyiꞌ muꞌ, yojdyemꞌ tsun u.

³ Yụ cọdyete Jenꞌ muꞌ Ạvatusinꞌtyiꞌ tsun judyeyaꞌ muꞌ Jesucristo Ayoꞌ tsun paj qui muꞌ soꞌmin mi ñịbeꞌjitidyes judyeyaꞌ maꞌjodyeꞌ ĉojtyiꞌĉandyes mi.

Filemónsiꞌ mạꞌjitidyes judyeyaꞌ anicyedyeꞌ muꞌ

⁴ Filemón, jämꞌdyeyaꞌ cọdaqui yụ Jenꞌcheꞌ mídyes, yụ räjĉan yoshoropaij jéte tsuntyiꞌ Jenꞌ,

⁵ ĉaĉaij na yụ seꞌvaqui junꞌ chuc mi mạꞌjeyacsi muꞌin anicjetety Jenꞌ in, judyeyaꞌ chimeꞌ yejĉoij anicjete mi muꞌ Jesús Ayoꞌ tsun.

⁶ Tsun vaj meꞌ anicjejaty Jenꞌ mọꞌdyes yụ cọdyete Jenꞌ paj qui mi tupuj jämꞌ chị́yepte räj mọꞌin ñịbeꞌyedyes Jenꞌsiꞌ muꞌ, mọꞌ soꞌmisinꞌsiꞌ tsun muꞌ Cristo Jesús.

⁷ Vojity, anic mạꞌjeyacsity bäꞌyi mi, mọꞌ anic jiꞌmaꞌjotyin yụ ĉojtyiꞌĉan yụ judyeyaꞌ chimeꞌ mọꞌ jiĉun yuꞌbun yụ. Chimeꞌdye mídye jiĉun yụꞌtacsebi ĉojtyiꞌ muꞌin anicjetetytyiꞌ Jenꞌ in.

Pablo cọdaqui Filemóncheꞌ Onésimodyes

⁸ Yụ jutactyiꞌ Cristoty muꞌ, tupuj tsanꞌ yụ ferdyeꞌtum jéye mi paj qui chäquibutiꞌ p̂eyacdyeꞌ mi.

⁹ Jam qui namꞌ mạꞌjeꞌ meꞌ jéye, damꞌdye jämꞌ cọdyeye mạꞌjitidyestum yụ. Yụ Pablo, aty ishoꞌ atsvun yụ, ñịbeꞌ cạveꞌ yụ ĉäꞌräij yụ Jesucristodyes,

¹⁰ mọꞌdyes yụ cọdyeye utsdyes Onésimodyes, muꞌ aty jeñej buꞌyi ạvaꞌ yụ, yụ jụj jaꞌyete Jenꞌdyes úĉan ĉärꞌtaquisĉan.

¹¹ Anicdye meꞌ, tashcheꞌ jiquej uts Onésimo jam jämꞌtyiꞌ nọ́taquity míyaꞌ jiquej, q̂uinꞌ qui namꞌ aty jämꞌtyiꞌ nọ́taquity shupqui muꞌ, míyaꞌ judyeyaꞌ yụ́yaꞌ.

¹² Q̂uinꞌ qui namꞌ yụ juteyebadyeye paj qui caꞌñibun míyaꞌ, yụꞌte ramꞌ jeñej ĉụiꞌtyiꞌ vojity mi, ĉaĉaij na muꞌ anic mạꞌjeyacdyety yụ.

¹³ Yụ mạꞌjeꞌ tsanꞌ paj qui muꞌ taĉan úĉan paj qui ñútyin yụ úĉan ĉärꞌtaquisĉan yóĉandyemꞌ ĉäꞌräij u yụ p̂eyacdyedyes Jenꞌsiꞌ muꞌ, paj qui muꞌ ñútyin yụ jeñej buꞌyi mi úĉan ĉärꞌtaquisĉan.

¹⁴ Meꞌ tsanꞌ yụ meꞌ mạꞌjeꞌ paj qui muꞌ penꞌdyetun yụ úyaꞌ, jam qui na ramꞌ mạꞌjeꞌ ferdyeꞌyaꞌ jéye paj qui soꞌmitim, vatyquej jam jụjtim. Dadamꞌ yụ mạꞌjeꞌ tsanꞌ ĉụiꞌsiꞌyaꞌ dyijyedyeꞌ soꞌmitim paj qui penꞌdyetun yụ.

¹⁵ Jeshaꞌ uts Onésimo ĉaꞌjoyinyaꞌ jiquej mi, jedac meꞌ dyijyedyeꞌ Jenꞌsiꞌ muꞌ, paj qui damꞌ itŝij tuqui míyaꞌ, q̂uinꞌ raꞌ chat räjĉan penꞌdyetubun mi, aty jam qui raꞌ yacchun.

¹⁶ Q̂uinꞌ aty jam úñity buꞌyi mọmoꞌ, dadamꞌ qui mujuꞌchaꞌ buꞌyi q̂uinꞌ aty vojity buꞌyi mítyiꞌ. Yụ fer mạꞌjete muꞌ, dadamꞌ raꞌ mi fer mujuꞌchaꞌ mạꞌjete ĉaĉaij na muꞌ ĉụiꞌtyiꞌ úñity mi, judyeyaꞌ chimeꞌ aty vojity buꞌyi mi Ayoꞌyaꞌ tsun.

¹⁷ Yụ jụijyaꞌ penꞌdyeꞌ mi Ayoꞌyaꞌ, yụ jéye: tiĉunꞌme maꞌjodyeꞌtum uts Onésimo, yojdyemꞌ yụ u tiĉunꞌtim, meꞌdye raꞌ muꞌ chimeꞌ tiĉunꞌtem.

¹⁸ Meꞌtyin jụijyaꞌ muꞌ jedyeꞌyaꞌ jiquej mi, vatyquej déveij jụijyaꞌ míĉan, yụ raꞌ cudyitim, yụ raꞌ räj jiyaꞌdyeyepte déve muꞌ.

¹⁹ Yụ Pablo ọij q̂uinꞌ sánacdyeꞌ sáñeꞌ yụ ĉụiꞌsiꞌyaꞌ un yụ: "Yụ raꞌ jiyaꞌdyeyepte." Meꞌ tsanꞌ meꞌ yi yụ, yụ qui na ramꞌ jéye: mi qui namꞌ mujuꞌchaꞌ déveij yụ́ĉan ĉaĉaij na yụ́dye jụj jaꞌyeye Jenꞌdyes paj qui Jenꞌyadyety mi.

²⁰ Vojity, tsun vaj yiriꞌyaꞌ Ayoꞌtyiꞌ tsun, mọꞌdyes yụ jéye Cristosyaꞌ vej muꞌ, paj qui meꞌ ñútyitim tiĉunꞌteyam muꞌ Onésimo, meꞌ raꞌ chat maꞌjoij yuꞌtim ĉojtyiꞌĉan yụ.

²¹ Ọij q̂uinꞌ sáñeꞌ yụ mídyes ĉaĉaij na yụ chị́yeye mi raꞌ chäquibutim ọij p̂eyacdyeꞌ yụ, junꞌ chuc yụ cọdyeye, meꞌ raꞌ mi, chimeꞌdye chị́yeye mi raꞌ dadamꞌ mọjoꞌchaꞌ cächjeꞌ yódyesdyemꞌ jam cọdyeyes yụ u.

²² Chimeꞌdye raꞌ yụ cọdyeye, mi raꞌ yuꞌtyiyitim junꞌĉan chuc raꞌ dyäqui yụ, ĉaĉaij na yụ ĉúti Jenꞌcheꞌ, muꞌ raꞌ jụjjibunac cọdacdyeꞌ miꞌin, chat qui raꞌ jiꞌc̣hoñin yụ in úĉantyiꞌ yụ, judyeyaꞌ qui raꞌ ĉọcyac miꞌin.

Jadyiquis voryetacdyeꞌ Pablos

²³ Chimeꞌ vorjin mi Epafras, penꞌdyeꞌ yụ ĉärꞌtaquisĉantyiꞌ, tsun ĉäꞌräij Jesucristodyes.

²⁴ Chimeꞌdye vorjin mi muꞌ Marcos, judyeyaꞌ muꞌ Aristarco, judyeyaꞌ Demas judyeyaꞌ Lucas, muꞌin carijtaquity yiriꞌyaꞌ yụ́tum in Jenꞌdyes.

²⁵ Yụ cọdyete muꞌ Jesucristo Ayoꞌ tsun paj qui muꞌ räjĉan soꞌminac ñịbeꞌjitidyes muꞌ.