Exodo 8 - Tsimane

¹ Jajiti: —Ĉọcme muꞌ ayoꞌ jéme: "Yi nash Jenꞌ jin mi: Farajjibut muntyiꞌ yụ paj qui timaꞌquin yụ in.

² Jam chäquibutiꞌ p̂eyacdyeꞌ jụijyam, areꞌĉam yụ raꞌ yocsiꞌ vaꞌtacdyeꞌ soꞌmebiye jac mi, shach raꞌ shupquiꞌ ococo in, räj buꞌyiꞌ raꞌ ọij jac.

³ Bänꞌ buꞌyiꞌ raꞌ ọ́ĉan cojiroĉan in, a raꞌ meꞌsiꞌ in chat qui raꞌ chanamꞌcheꞌ jịjcaiꞌ in, räj buꞌyiꞌ raꞌ acaꞌyam judyeyaꞌ ĉọshdyeꞌĉan mi, judyeyaꞌ jubijĉan mi. Räj buꞌyiꞌ raꞌ muntyisĉan acaꞌ mi, judyeyaꞌ nọ́taquitysiꞌĉan chimeꞌ in, meꞌ meꞌ raꞌ jịjcaiꞌ in. Chimeꞌdye raꞌ jornoĉan sitiꞌ in chimeꞌdye raꞌ tạꞌdyityĉan in.

⁴ Paj raꞌ tsanꞌ mi roiꞌjin raꞌ in judyeyaꞌ mítyiꞌ nọ́taquity in, judyeyaꞌ räj muntyiꞌ chimeꞌ in, meꞌ meꞌ raꞌ ococo p̂aiꞌtacsiꞌ, jam chäquibut p̂eyacdyeꞌ jụijyam", meꞌ raꞌ jéte ayomꞌ —jajiti Moisés muꞌ Jenꞌ.

⁵ Chat qui muꞌ Ayoꞌ jajiti Moisés: —Jéte ram muꞌ Aarón paj qui c̣họcoꞌjeyaqui mutyudyemꞌ ojñiꞌĉan, chat qui raꞌ shach ococo shupquiꞌ in, cojiroĉansiꞌ in, judyeyaꞌ jinacĉansiꞌ in judyeyaꞌ tsiqueꞌĉansiꞌ in, bänꞌ buꞌyiꞌ raꞌ tŝọiꞌ Egiptoĉan in —yi Jenꞌ jajiti Moisés.

⁶ Anicdye meꞌ muꞌ Aarón c̣họcoꞌjeyaqui mutyudyeꞌ muꞌ ojñiꞌĉan, shach vatyquej shupquiꞌ ococo in, bänꞌ buꞌyiꞌ tŝọiꞌ in.

⁷ Meꞌdye muꞌin chimeꞌ cọcojsiꞌ in chijiꞌshupcacsidye muꞌin in.

⁸ Muꞌ ayoꞌ fayacsi muꞌ Moisés judyeyaꞌ Aarón jéyacsi: —Cọdaca Ayoꞌcheꞌ yụ́dyes paj qui muꞌ meijjeyacseban yụ́yas in judyeyaꞌ muntyiꞌyas yụ ọij ococo in, chat qui raꞌ q̂uinꞌdyemꞌ farajjeyacseban yụ muntyiꞌ in paj qui cäjyaꞌ jiꞌcoꞌshayequeꞌ Ayodyes in.

⁹ Vorjete Moisés: —Jụdyej, ¿junꞌsiꞌ bu raꞌ cọdyete Jenꞌ yụ mídyes judyeyaꞌ nọ́taquitydyes mi judyeyaꞌ muntyidyes chimeꞌ in? ¿Junꞌsiꞌ bu raꞌ cọdyete yụ paj qui muꞌ meijjeyacseban ococo in paj cojiroĉan buꞌbanꞌ in?

¹⁰ Vorjete ayoꞌ: —Nojno raꞌ cọdaqui miꞌin Jenꞌcheꞌ tsundyesiꞌ. Moisés vorjete: —Meꞌ tyuꞌ u, meꞌ raꞌ yoj jitiꞌdyemꞌ bu um, meꞌ raꞌ chịj mi jam tyi cätste in muꞌ Jenꞌ, Ayoꞌ tsun.

¹¹ Muꞌ raꞌ meijjebanꞌ acaꞌĉansiꞌ ococo in, meꞌquiꞌdye raꞌ meꞌtyin mi, judyeyaꞌ nọ́taquity mi judyeyaꞌ muntyiꞌ chimeꞌ in, cojiroĉandyety raꞌ mọꞌyaꞌ in jiꞌyajcatiꞌ in.

¹² Chat qui muꞌ Moisés Aaróntum shuban in yạjquibajte in muꞌ ayoꞌ. Chat qui muꞌ Moisés cọdaqui Jenꞌcheꞌ paj qui meijjebanꞌ ococo, jayuꞌtyiyitis ayoꞌ jiquej muꞌ Jenꞌ.

¹³ Jenꞌ jụjjepte Moiséssiꞌ cọdacdyeꞌ muꞌ, ĉụiꞌ mọmoꞌ säñiꞌ in acaꞌĉansiꞌ ococo in, judyeyaꞌ p̂ejyas in judyeyaꞌ quịjodyeꞌĉansiꞌ in chimeꞌ, tas säñiꞌ in.

¹⁴ Muꞌin qui muntyiꞌ in vajmuꞌyaꞌtacseban in säñis ococo in, tas buꞌyiꞌ mọꞌĉan jitac tŝọiꞌ Egiptoĉan p̂oquiꞌ in.

¹⁵ Muꞌ na ayoꞌ aty meꞌ cạvacsiyaꞌ säñiꞌ ococo in q̂uinꞌdyemꞌ pacaj, aty meꞌsiꞌ quivij yäjqueban ĉojtyiꞌ muꞌ, yoj yidyemꞌ Ayoꞌ jiquej u. Jam méquiꞌ chicacsebi p̂eyacdyeꞌ muꞌinsiꞌ in Moiséssiꞌ judyeyaꞌ Aarónsiꞌ muꞌ.

Vaꞌtacdyeꞌ ọtoꞌ

¹⁶ Ayoꞌ jajiti muꞌ Moisés: —Jéte ram muꞌ Aarón paj qui mutyudyeꞌyaꞌ pacjeꞌ mọꞌ p̂uijdas jacsimꞌ paj paiꞌ mọꞌ Egiptoĉansiꞌ p̂uijdas shupquiꞌ ọtoꞌ, paj buc tŝọiꞌ in räj buꞌyiꞌ Egiptoĉan in.

¹⁷ Anicdye meꞌ muꞌ Aarón mutyudyeꞌyaꞌ muꞌ pacjeꞌ mọꞌ p̂uijdas jac, chat qui mọꞌ Egiptoĉansiꞌ p̂uijdas ọtoꞌ muñiꞌ in. Sät tŝọiꞌ ọtoꞌ in, ọyaꞌquiꞌ bunaꞌnaiꞌ in, jämiꞌ siꞌc̣hacsiꞌ muntyiꞌ in judyeyaꞌ jebacdyeꞌ in.

¹⁸ Ayoty cọcojsiꞌ muꞌin mạꞌjeꞌ tsanꞌ muꞌin chimeꞌjeꞌdye in, jam qui namꞌ junꞌtyeꞌ in. Jämiꞌ mọꞌin muntyiꞌ siꞌc̣hacsiꞌ in judyeyaꞌ jebacdyeꞌ in.

¹⁹ Mọꞌdyes muꞌin cọcojsiꞌ yi in: —Jenꞌdye meꞌ yụꞌtyeꞌ ọij q̂uinꞌ —yi in. Muꞌ na ayoꞌ yejĉoij yäcäj ĉojtyiꞌ muꞌ, rụijdyemꞌ yi Jenꞌ jiquej, muꞌ jam junꞌ chicacsebi p̂eyacdyeꞌ muꞌin.

Vaꞌtacdyeꞌ mej

²⁰ Ayoꞌ jajiti Moisés: —Nojno raꞌ mạyedyeꞌ jadyiqui raꞌ cojiroyaꞌ muꞌ ayoꞌ. Pamꞌdye raꞌ ĉọcte mi, jéte ram: "Meꞌ nash yi jiquej muꞌ Ayoꞌ jin mi: Farajjibutiꞌ raꞌ mi yụ́tyiꞌ muntyiꞌ in paj qui timaꞌquin yụ in.

²¹ Jam raꞌ farajjeyacsi jụijyam, mọꞌyaꞌ raꞌ yocsiꞌ vaꞌtacdyem, mej raꞌ tŝọiꞌ mícheꞌ in judyeyaꞌ muntyiꞌcheꞌ in, räj raꞌ nọ́taquitycheꞌ buꞌyiꞌ mítycheꞌ in. Räj raꞌ sitiꞌ acaꞌĉan in sät raꞌ tŝọiꞌ in Egiptoĉan in, räj buꞌyiꞌ raꞌ mụijyaꞌ chimeꞌ in.

²² Gosénĉandyety raꞌ itŝiꞌ in, yóĉandyemꞌ yụ́tyiꞌ muntyiꞌ u in, mijam raꞌ yiris mej mọꞌĉan. Meꞌ raꞌ chäyitim yụ anictyity Ayoꞌ muꞌyaꞌ úĉan yụ ọijĉan jac.

²³ Yụ raꞌ soꞌmebiye vaꞌtacdyeꞌ muntyiꞌ mi, ĉụiꞌtyiꞌ qui na ramꞌ muntyiꞌ yụ, yụ raꞌ nọ́tyetacsi. Nojno raꞌ mạyedyeꞌ yụ raꞌ juteꞌ mej, shach raꞌ tyeiꞌ in", jéte ram.

²⁴ Anicdye meꞌ muꞌ Ayoꞌ shach jiꞌshupqueꞌ mej, paiꞌ buꞌyiꞌ in, räj buꞌyiꞌ ayosĉan acaꞌ muꞌ sät tŝọiꞌ mọꞌĉan in judyeyaꞌ nọ́taquitytyisĉan in chimeꞌ, räj buꞌyiꞌ Egiptoĉan tŝọ́tacsiꞌ, anic ac̣hiꞌtacsiꞌ muntyiꞌ in muꞌĉan bäꞌyity in.

²⁵ Chat qui muꞌ ayoꞌ jiꞌvorvacsi Moisés judyeyaꞌ Aarón, jéyacsi: —Tạij miꞌin jiꞌcoꞌshayecac cuꞌdyeꞌ Jenꞌdyes miꞌin, jam qui na ramꞌ yocve jịjcaij miꞌin, úĉandye raꞌ mọmoꞌ jiꞌcoꞌshayetiñeꞌ Egiptoĉan —yi jéyacsi.

²⁶ Jéte muꞌ Moisés: —Jam raꞌ junꞌ meꞌ, ĉaĉaij na útsi Egiptoĉantyiꞌ in ĉúti cuꞌdyeꞌcheꞌ in jiꞌcoꞌshayescheꞌ Jenꞌdyes Ayoꞌ tsun. Cavin raꞌ jụijyaꞌ tsun in jiꞌcoꞌshayeꞌ cuꞌdyeꞌ tsun, muꞌin raꞌ anic fạ́coij in, vatyquej raꞌ farajñin mijyaꞌ tsun in, vatyquej raꞌ ijan tsun in.

²⁷ Mọꞌdyes jemoñeꞌ moch jịjcaij tsun cäjyaꞌ, chibin raꞌ mạyedyeꞌ miꞌi tsun, muꞌve raꞌ jiꞌcoꞌshayequeꞌ Jenꞌdyes tsun, yoj jindyeꞌ Jenꞌ ayoꞌ u tsun jiquej.

²⁸ Vorjajiti muꞌ ayoꞌ: —Jụdyej, yụ raꞌ farajjeyac paj qui cäjyaꞌ jịjcaij miꞌin jiꞌcoꞌshayectiñeꞌ Jenꞌdyes Ayoꞌ miꞌin, jam qui na ramꞌ anic jiyi moch jịjcaij miꞌin. Chimeꞌdye cọdyemac Jenꞌ yụ́dyes chimeꞌ.

²⁹ Moisés vorjete: —A raꞌ shubanyaꞌ yụ, chat qui raꞌ yụ cọdyete Ayoꞌ paj qui nojno muꞌ juteban mej räj in. Mijam raꞌ yiris jiꞌyajcabunꞌ míyaꞌ, mijam nọ́taquityyaꞌ mi, mijam muntyiꞌyaꞌ mi chimeꞌ, tas raꞌ mọtsiꞌ in. Jam qui na ramꞌ yejĉoij mi väñätuvaꞌtiĉaꞌ tsun miꞌin mijam raꞌ ñúvaꞌtiĉaꞌ tsun miꞌin, jiꞌcoꞌshayequeꞌ nash raꞌ Ayodyes tsun —Moisés jétacte ayoꞌ.

³⁰ Shuban ayosĉantyiꞌ acaꞌ, judyeyaꞌ qui cọdaqui Ayoꞌcheꞌ.

³¹ Muꞌ Ayoꞌ jụjjajibuti cọdacdyeꞌ muꞌ, chat q̂uinꞌdyemꞌ räj jọbanꞌ mej in, meꞌquiꞌdye meꞌte ayoꞌ in, judyeyaꞌ nọ́taquity muꞌ judyeyaꞌ muntyiꞌ in.

³² Quivij muꞌ ayoꞌ yäcäjyejoij ĉojtyimꞌ, aty jam farajjeyacsi Israeltyiꞌ vóshiꞌ muꞌ.