Exodo 5 - Tsimane

Moisés judyeyaꞌ Aarón ĉọcte ayoꞌ in

¹ Aty meꞌsiꞌ jéyacsi muntyiꞌ in, muꞌ Moisés judyeyaꞌ muꞌ Aarón chat qui q̂uinꞌdyemꞌ ĉọcte in Egiptoĉantyiꞌ ayoꞌ, jéte in: —Yi nash muꞌ Jenꞌ Ayoꞌ Israeltyiꞌ vóshiꞌ muꞌ: "Farajjibutiꞌ ram yụ́tyiꞌ muntyiꞌ in paj qui cäjyaꞌ jịjcaij in, muꞌĉan qui raꞌ jämꞌtyeꞌ feshta yụ́dyes in."

² Vorjeyacsi muꞌ ayoꞌ: —¿Jụꞌñity dash Ayoꞌ paj qui yụ chiquepte p̂eyacdyeꞌ muꞌ? Yụ jam méquiꞌ chị́yete, mọꞌdyes raꞌ jam damꞌ farajjeyacsi yụ uts Israeltyiꞌ vóshiꞌ in —yi muꞌ ayoꞌ jéyacsi.

³ Jéte in: —Muꞌ Jenꞌ Ayoꞌ tsun hebreoty, muꞌ jiꞌcaviti tsunyaꞌ, mọꞌdyes qui tsun jéyac mi: "Farajjitiĉamꞌ tsun paj qui cäjyaꞌ jịjcaij tsun, chibin raꞌ mạyedyeꞌ miꞌi tsun. Mọꞌĉan raꞌ jiꞌcoꞌshayeꞌ cuꞌdyeꞌ tsun tsuntyidyes Jenꞌ, muꞌ nash Ayoꞌ tsun. Jam meꞌ jụijyaꞌ farajjitiĉaꞌ tsun mi vátyequej raꞌ muꞌ Jenꞌ soꞌmin tsun yịjyi fersiꞌ japacjodyeꞌ in, jam jụijyaꞌ vatyquej muꞌ Jenꞌ raꞌ jutacsi muꞌin chuntyiꞌ tsun in mạꞌjeꞌ ujan tsun."

⁴ Muꞌ Egiptoĉantyiꞌ ayoꞌ vorjeyacsi: —Moisés judyeyaꞌ Aarón ¿junꞌ buty meꞌ miꞌin ñucjeĉunacsi muntyiꞌ in jam qui carijtaqui muꞌin? Paj q̂uinꞌdyemꞌ caꞌñibun muꞌin úñedyeꞌĉan in.

⁵ Yejĉoij p̂eyaqui muꞌ faraón yi: —Jeshaꞌ, muꞌin muntyiꞌ in aty daiꞌ muꞌyaꞌ in judyeyaꞌ miꞌin dyäcjeĉunacsebi carijtacdyeꞌ muꞌin —yi jéyacsi.

⁶ Mọꞌdye mạyedyeꞌ muꞌ faraón jéyacsi muꞌin Egiptoĉantyiꞌ ĉọjcacsity in judyeyaꞌ muꞌin tashcheꞌ buꞌyity in Israeltyiꞌ vóshiꞌ in, muꞌin bächäcsity muꞌin úñity in. Yi jéyacsi faraón:

⁷ —Aty jam raꞌ yejĉoij miꞌin soꞌmacsi muntyiꞌ in trivos pech muꞌ radriyodyes. Paj ĉụiꞌ qui jecte in.

⁸ Meꞌsiꞌdye raꞌ cọdacsi miꞌin cäts tsicdyeꞌ radriyos in yósiꞌdyemꞌ jiquej u. Jam raꞌ yiris ọyaꞌyas tsicdyeꞌ radriyo cọdyetacseban miꞌin. Anic toꞌomuntyiꞌ in, meꞌ meꞌ qui yi muꞌin: "Mạꞌjeꞌ jọban tsun. Mạꞌjeꞌ jiꞌcoꞌshayaqui Jenꞌdyes tsun."

⁹ Dadamꞌ fer raꞌ jiꞌunacsi miꞌin paj qui jam seꞌyi in seꞌvacdyeꞌyaꞌ väñädyes p̂eyacdyeꞌ in —yi jéyacsi muꞌ faraón.

¹⁰ Chat qui muꞌin Egiptoĉantyiꞌ ĉọjcacsity in judyeyaꞌ muꞌin tashcheꞌ buꞌyity in jéyacsi muꞌin muntyiꞌ in: —Muꞌ faraón yi: "Aty jam raꞌ damꞌdye soꞌmeyac trivos pech muꞌ.

¹¹ Ĉụiꞌ qui raꞌ miꞌin quevtinte junanaj ĉụiꞌ tupuj dạctinte. Paj tsanꞌ meꞌ mijam raꞌ damꞌ ọyaꞌyaꞌyejoiꞌ mọꞌ tsicdyeꞌ radriyos mọꞌ jämꞌtiñes miꞌin mọꞌ cäts mạyedyeꞌ jịjcaiꞌsiꞌ." Yi faraón, jéyacsi muꞌin in.

¹² Meꞌdyes qui muꞌin muntyiꞌ in paiꞌ paiꞌ jịjcaij quevjajte in Egiptoĉan tubajte in jụꞌñity ĉụiꞌ taĉantyiꞌ pech trivos muꞌ, yacchuctyiꞌ vädacdyeꞌves jac jiquej.

¹³ Jábiyaꞌ muꞌin Egiptoĉantyiꞌ ĉọjcacsity in fercheꞌ jéyacsi in: —Jịꞌcätsebadac mọꞌ carijtacdyeꞌ cäts mạyedyeꞌ jịjcaiꞌsiꞌ yódyesdyemꞌ soꞌmeyacsiꞌ u trivos pech tsanꞌ jiquej miꞌin.

¹⁴ Chat qui siꞌbac muꞌin tashcheꞌ buꞌyity in Israeltyiꞌ vóshiꞌ in muꞌin yụꞌtactyiꞌ jiquej muꞌinyaꞌ Egiptoĉantyiꞌyaꞌ ĉọjcacsity in. Chat fercheꞌ cọdacsi in: —¿Junꞌ caꞌ meꞌ miꞌin jam cäts tsicdyeꞌ radriyo jämꞌtacsi miꞌin yojdyemꞌ jiquej u? Mijam ọij q̂uinꞌsis mạyedyeꞌ cäts jämꞌtacsi miꞌin, mijam munjas mạyedyeꞌ cäts jämꞌtacsi chimeꞌ miꞌin —yi in.

¹⁵ Chat qui muꞌin tashcheꞌ buꞌyity Israeltyiꞌ vóshiꞌ in ĉọcte in muꞌ faraón, jéte in: —¿Junꞌ meꞌ mi jịꞌñibeꞌtacsi mítyiꞌ úñity in?

¹⁶ Mity úñity in aty jam soꞌmac trivos pech muꞌ, yejĉoij qui namꞌ tsanꞌ muꞌin yi in: "Jämꞌtyevac radriyo." Meꞌdyes qui aty siꞌbac mítyiꞌ úñity in. Jam qui namꞌ tsunsiꞌ juchaj mọꞌ, muꞌinsiꞌ juchaj in mity chätidyeꞌ Egiptoĉantyiꞌ muntyiꞌ in —yi jéte in.

¹⁷ Muꞌ faraón vorjeyacsi: —¡Anic toꞌomuntyiꞌ miꞌin! ¡Anic meꞌ buꞌyi miꞌin! Meꞌdyes qui yenꞌtyi miꞌin: "Jiꞌcoꞌshayaĉaꞌ Ayodyes tsun." Vaj meij yi miꞌin. Q̂uinꞌ yụ jéyac:

¹⁸ Tạij miꞌin caꞌñibudac carijtacdyeꞌyaꞌ miꞌin. Jam raꞌ damꞌ mọꞌyaꞌ trivos pech muꞌ soꞌmac miꞌin. Paj tsanꞌ meꞌ jam raꞌ yiris jayejyi radriyo jämꞌtinte miꞌin cäts mạyedyeꞌ jịjcaiꞌsiꞌ in.

¹⁹ Q̂uinꞌdye muꞌin tashcheꞌ buꞌyity judío in chiqueꞌ in junꞌ chuc aty ac̣hisĉan atsvun muꞌin ĉaĉaij na aty seꞌvepte ayos p̂eyacdyeꞌ in yiꞌsiꞌ: —Jam raꞌ ọyaꞌyas tsicdyeꞌ radriyos jämꞌtinte miꞌin.

²⁰ Yacchuteyaꞌ faraón in muꞌin jorojyaꞌ rébacsi muꞌ Moisés judyeyaꞌ muꞌ Aarón bisacsevaꞌjoban in.

²¹ Muꞌin jéyacsi in Moisés judyeyaꞌ Aarón yi in: —Paj muꞌ Ayoꞌ dyijtubibunac juchaj miꞌin ĉaĉaij na miꞌin aty jämꞌtyiyitiĉaꞌ tsun miꞌin yiris aꞌc̣his p̂oquedyeꞌ faraónsiꞌyaꞌ vej muꞌ judyeyaꞌ nọ́taquitysiꞌyaꞌ chimeꞌ muꞌ. Miꞌin aty soꞌmacsi muꞌin chutidyes coc̣hino in paj qui ujan tsun in —yi ca jéyacsi in.

Moisés cọdaqui Jenꞌcheꞌ

²² Moisés cọdaqui Ayoꞌcheꞌ jéte: —Ayoꞌ tsun, ¿junꞌ dash meꞌ mi ñịbeꞌ jịꞌcavacsi mi uts muntyiꞌ in? Ĉụiꞌ tutiꞌ úyaꞌ mi.

²³ Meꞌdyes p̂eyeshte ayoꞌ yụ míscheꞌ tịj, chat qui q̂uinꞌ mujuꞌchaꞌ jịꞌñibeꞌcabun muntyiꞌ mi, mi qui namꞌ jam damꞌ ñutsjeyacsi uts in, memꞌ jịꞌñibeꞌcacsi mọmoꞌ in.