Exodo 4 - Tsimane

Jenꞌ jasoꞌmiti ferdyeꞌ Moisés

¹ Moisés vorjete muꞌ Jenꞌ: —Muꞌin na raꞌ jam junꞌ anicjin yụ in, jam raꞌ junꞌ chäquibun p̂eyacdyeꞌ yụ in, yi raꞌ vatyquej in: "Junꞌdyemꞌ muꞌ Ayoꞌ jiꞌcaviti míyaꞌ", yi raꞌ in.

² Vorjajiti muꞌ Ayoꞌ: —¿Jedyeꞌ unĉan um? Vorjete Moisés: —Mutyudyeꞌ uij.

³ Jajiti Ayoꞌ: —Farajjeyaca mụijyaꞌ. Moisés farajjeyaqui mụijyaꞌ, nas muñiꞌ mọꞌ mutyudyemꞌ. Nas yédyeꞌĉan mọmomꞌ, muyaꞌ tŝọij ĉaꞌjoij Moisés.

⁴ Ayoꞌ jajiti: —Tapjeme cọ́dive muꞌ nas. Meꞌdye muꞌ Moisés muꞌve chute, mutyudyeꞌ yébanꞌ vatyquej muꞌ.

⁵ Chat qui muꞌ Ayoꞌ jajiti Moisés: —Meꞌ buꞌyi raꞌ jịꞌcaveyacsim Israeltyiꞌ vóshiꞌ in paj qui anicyi muꞌin in junꞌ chuc yụ jiꞌcaviti míyaꞌ, yụ nash Jenꞌ, Ayoꞌ vóshiꞌvuntyiꞌ mi Abrahamtyiꞌ, Isaactyiꞌ, judyeyaꞌ Jacobtyiꞌ.

⁶ Chimeꞌdye Ayoꞌ jajiti Moisés: —Q̂uefjeyaca eꞌfeyaꞌ un mi. Meꞌdye muꞌ Moisés eꞌfeyaꞌ q̂uefjeyaĉan un muꞌ. Aty meꞌsiꞌ meijjeyaĉan un muꞌ, bayiꞌyiiꞌ vatyquej shupquiꞌ un muꞌ anic aꞌc̣hiiꞌ muꞌ.

⁷ Chat qui jajiti Jenꞌ: —Quivij q̂uefjeyaca un eꞌfeyaꞌ mi. Meꞌdye muꞌ Moisés quefjeyaqui un muꞌ. Aty meꞌsiꞌ meijjeyaĉan un muꞌ, quivij chijoꞌmeiꞌ jam jụꞌñiiꞌ.

⁸ Jajiti muꞌ Ayoꞌ: —Meꞌ raꞌ mi aty jiꞌcavitiyaꞌ mi Israeltyiꞌyaꞌ vóshiꞌ in, mutyudyeꞌ chum raꞌ tashcheꞌ jịꞌcaveyacsim. Jam anicyiyaꞌ in unsiꞌ qui raꞌ japacjodyeꞌ jịꞌcaveyacsim, chat qui raꞌ q̂uinꞌdyemꞌ anicjin in.

⁹ Päräꞌ quiꞌ jịꞌcaveyacsi jụijyam, jam anicjin jụijyaꞌ in, mijam seꞌvin jụijyaꞌ in, yocsiꞌ qui raꞌ jịꞌcaveyacsim. Jäqueꞌ ram ojñiꞌ cojiro Nilos, chojjeꞌ raꞌ mụijyam, chäsh raꞌ tŝọiꞌ ojñiꞌ, meꞌ raꞌ jịꞌcaveyacsim paj qui anicjin in.

¹⁰ Yi muꞌ Moisés jéte muꞌ Ayoꞌ: —Junꞌ a vuꞌ, jam raꞌ jutitiꞌ mi Ayoꞌ, yụ jam chịj voroꞌtacsi muntyiꞌ in, tạꞌcatydye nash yụ meꞌtyity, anic yäcäj nem yụ jam junꞌ camanꞌyi p̂eyaquiyaꞌ yụ.

¹¹ Muꞌ Ayoꞌ jajiti muꞌ Moisés: —Jeshaꞌ, jítiꞌ, ¿tyi dash jämꞌbite muntyis chụꞌ muꞌ? ¿Tyi adac yi paj qui muꞌ jepepej muntyiꞌ naꞌi, judyeyaꞌ tyuctyity chun, judyeyaꞌ tofety, judyeyaꞌ naijtity in? Yụ nash mọmoꞌ meꞌ yụꞌtacsi.

¹² Tạij mọmoꞌ mi, yụ raꞌ nọ́tyeye p̂eyaquiyaꞌ mi, yụ raꞌ soꞌmeye p̂eyacdyedyes mi —yi Jenꞌ jajiti.

¹³ Moisés vorjete: —Junꞌ a ĉa yụ, Ayoꞌ, yụ cọdyeye yoctyiꞌ juteme yụ́dyes.

¹⁴ Chijämꞌ muꞌ Ayoꞌ jịꞌfajte muꞌ Moisés jajiti: —Jụdyej, muꞌyaꞌ nash muꞌ Aarón vojity mi, Levíty vóshiꞌ muꞌ chimeꞌ, muꞌ chat chịj voroꞌtacsi. Aty atsij muꞌ, jiꞌrebin raꞌ muꞌ, muꞌ raꞌ chat tiĉuñin mi.

¹⁵ Mi raꞌ soꞌmete p̂eyacdyeꞌ, jätäjyi chuc raꞌ muꞌ, yụ raꞌ nọ́tyeyac pärenꞌdye miꞌin, yụ raꞌ soꞌmeyac p̂eyacdyeꞌ miꞌindyes, chimeꞌ raꞌ jéyac junꞌ chuc raꞌ jämꞌtaqui miꞌin.

¹⁶ Meꞌ raꞌ mi soꞌmete muꞌ p̂eyacdyeꞌ Aarón, muꞌ raꞌ voroꞌtacsi mídyes, yụs qui na ramꞌ p̂eyacdyeꞌ shupquiꞌ mọꞌ.

¹⁷ Mọꞌdye raꞌ unĉansiꞌ mutyudyeꞌ cạqui mi, mọꞌtum raꞌ jịꞌcaveyacsi ferdyeꞌ mi —yi jajiti Moisés muꞌ Jenꞌ.

Moisés chimuꞌĉan Egiptoĉan jijtuban

¹⁸ Chat qui muꞌ Moisés acaꞌyaꞌ jịjcaban Jetrosyaꞌ tyúñesyaꞌ muꞌ, jéte: —Farajjitiꞌ, caꞌñibun nash raꞌ yụ, Egiptoĉan ĉọcseĉan chätidyeꞌ yụ, vatyquej raꞌ tacaꞌ tsạꞌ in. Vorjete muꞌ Jetro: —Jụdyej, ạnijyeban ĉam.

¹⁹ Moisés taĉandyemꞌ muꞌĉan Madiánĉan, muꞌ Ayoꞌ jap̂iyiti jajiti: —Caꞌñibuda Egiptoĉan jịjcabada, a nash muꞌin säñi in yódyetydyemꞌ mạꞌjeꞌ ijantyiꞌ jiquej u in.

²⁰ Chat qui muꞌ Moisés jiꞌfoquinꞌtaĉan bóricocheꞌ p̂en muꞌ judyeyaꞌ ạvaꞌ muꞌ chat sacjebanꞌ in, Egiptoĉan jịjcaban muꞌ Moisés. Jam mọꞌ faraj mutyudyemꞌ, mọꞌ jịꞌcavacdyes Jenꞌsiꞌ ferdyeꞌ muꞌ.

²¹ Chat qui muꞌ Ayoꞌ jajiti muꞌ Moisés: —Aty raꞌ Egiptoĉan shupqueĉan jụijyam, jämꞌ raꞌ jịꞌcaveyete ferdyeꞌ mi muꞌĉantyiꞌ ayoꞌ, mọꞌ soꞌmeyes jiquej. Yụ raꞌ jiꞌyäjquepte ĉojtyiꞌ muꞌ ayoty, chat qui raꞌ jam junꞌ farajjeyacsi Israeltyiꞌ vóshiꞌ muꞌ.

²² Jéte ram muꞌ ayoꞌ: "Yi nash Jenꞌ: Muꞌin Israeltyiꞌ vóshiꞌ muꞌ jeñej buꞌyi tashchety ạvaꞌ yụ, meꞌ buꞌyi in.

²³ Meꞌ tsanꞌ yụ jéye jiquej paj qui farajjibutiꞌ mi ạvaꞌ yụ paj qui timaꞌquin yụ in, mi qui namꞌ jam junꞌ chäquibutiꞌ p̂eyacdyeꞌ yụs mi, mọꞌdyes raꞌ yụ ijabiye tashchety ạvaꞌ mi", meꞌ raꞌ jéte mi muꞌ Egiptoĉantyiꞌ ayoꞌ —yi muꞌ Jenꞌ jajiti Moisés.

²⁴ Aty majmiyaꞌ tyiti in Egiptoĉan jịjcaij in, dyäquedyeꞌyaꞌ muꞌin muꞌ Ayoꞌ jiꞌcaviti Moisésyaꞌ. Jenꞌ mạꞌjeꞌ tsanꞌ jaꞌijati muꞌyaꞌ muꞌ Moisés.

²⁵ Mọꞌ qui p̂en muꞌ, Séfora, tapjeꞌ mọꞌ mij coc̣hino mọꞌyaꞌ seiꞌtaquiꞌ damꞌ shoꞌpaꞌ ạvaꞌsimꞌ judyeyaꞌ qui täjbite yuj Moiséssiꞌ shoꞌpaꞌyamꞌ, ĉaĉaij na jambiꞌdyemꞌ seiꞌtaquiꞌ ạvaꞌ mọꞌ. Mọꞌ Séfora yiꞌ jéyaquiꞌ tsanꞌ vämtyimꞌ Moisés: —Mi nash chäsh cọdaquity vämtyiꞌ.

²⁶ Seiꞌtacdyedyes p̂eijtyeꞌ jéyaquiꞌ vämtyiꞌ mọꞌ. Aty muꞌ seiꞌtac ạvaꞌ muꞌ c̣honꞌ muꞌ Moisés.

²⁷ Ayoꞌ jajiti muꞌ Aarón: —Tạij cäjyaꞌ jịjcava, jiꞌrebeme muꞌ Moisés. Meꞌdye qui muꞌ sacti Aarón, muꞌyaꞌ muꞌ täjjete Jenꞌtyiꞌyaꞌ mụcuꞌ, vorjete judyeyaꞌ pụꞌsete.

²⁸ Chat qui muꞌ Moisés räj jébajte p̂eyacdyeꞌ yụꞌtyeyetes Ayoꞌ jiquej, junꞌ chuc raꞌ jéyacsi Egiptoĉantyiꞌ in, junꞌ chuc raꞌ jịꞌcaveyacsi ferdyeꞌ jasoꞌmitis Jenꞌ.

²⁹ Chat qui muꞌ Moisés yejĉoij muꞌtum qui miꞌeban Aaróntum, Egiptoĉan venjoij in. Aty muꞌĉan buꞌban in vajmuꞌyaꞌjeyacsi tashcheꞌ buꞌyity in Israeltyiꞌ vóshiꞌ muꞌ.

³⁰ Räj muꞌ jéyacseban Aarón mọꞌ p̂eyacdyeꞌ Ayoꞌsiꞌ jasoꞌmitis Moisés jiquej. Moisés räj jịꞌcaveyacsi ferdyeꞌ jasoꞌmitis Ayoꞌ jiquej.

³¹ Anicjeyacsebi p̂eyacdyeꞌ muꞌin. Aty seꞌveꞌyaꞌ in junꞌ chuc muꞌ Ayoꞌ aty dyijtucsi, judyeyaꞌ cạvacsebi därsiꞌ ñịbedyes jịꞌĉojtyes in, chat qui muꞌin vụduiꞌyi in timaꞌquete Jenꞌ ĉojtyiꞌĉan muꞌin.