Exodo 33 - Tsimane

¹ Yacchuvac ọij dyäquedyeꞌ, mi judyeyaꞌ muꞌin tucsity mi jiquej Egiptoĉantyiꞌ in. Muꞌve jịjcabadac miꞌin yódyesdyemꞌ soꞌmacsis jiquej u yụ muꞌ Abraham, Isaac judyeyaꞌ Jacob. Fersiꞌyaꞌ p̂eyacdyeꞌ jiquej yụ jéyacsi, "Yụ raꞌ soꞌmacsi vóshiꞌ mi ọij jac."

² Yụ raꞌ jutete yirity anjer tashcheꞌ buꞌyi miꞌinyaꞌ. Muꞌ raꞌ meijjityinac muꞌin cananeo in, judyeyaꞌ amorreo in, judyeyaꞌ hitita in, judyeyaꞌ fereseo in, judyeyaꞌ heveo in, judyeyaꞌ jebuseo in.

³ Muꞌĉan jịjcavac mọꞌ jac jam jayejjoiꞌĉan reche mijam coroma. Yụ raꞌ jam penꞌdyetuyac ĉaĉaij na miꞌin anic yäcäty ĉojtyiꞌ. Vatyquej raꞌ yụ jịꞌmotsyac miꞌedyeꞌĉan penꞌdyetuyac jụijyaꞌ.

⁴ Seꞌvacdyeꞌyaꞌ muꞌin Israeltyiꞌ vóshiꞌ in junꞌ chuc muꞌ Jenꞌ jam mạꞌjeꞌ penꞌdyetucsi in, anic där tári muꞌin in, chat qui jam jämꞌtyiꞌĉan quịꞌsiꞌ cofjiti in, mijam sháshatuti muꞌin in.

⁵ Meꞌ ĉụiꞌ ĉúti in ĉaĉaij na muꞌ Jenꞌ aty jajiti jiquej muꞌ Moisés: —Jéyacseva muꞌin Israeltyiꞌ vóshiꞌ in: "Miꞌin nash yäcäty ĉojtyiꞌ muntyiꞌ. Yụ penꞌdyetuyac jụijyaꞌ paj tsanꞌ damꞌsisĉan tupudyeꞌ jụijyaꞌ vatyquej raꞌ yụ jịꞌmotsyac miꞌin. Meꞌdyes jam raꞌ cäti jämꞌtyiꞌĉan quịꞌsiꞌ miꞌin, mijam raꞌ sháshatuti miꞌin."

⁶ Chat qui muꞌin Israeltyiꞌ vóshiꞌ in jam yejĉoij jämꞌtyiꞌĉan quịꞌsiꞌ cofjiti in, mijam sháshatuti in jiquej jambiꞌdyemꞌ yacchubajteyaꞌ in muꞌ mụcuꞌ Horeb.

Mọꞌ quịꞌsiꞌ acaꞌ jiꞌrebacdyes muꞌ Jenꞌ

⁷ Moiséssiꞌ yicdyeꞌ jiquej muꞌ yụꞌtyeꞌ yiris quịꞌsiꞌ acaꞌ moch buꞌyiꞌ dyäquedyeꞌyaꞌ. Chimeꞌ muꞌ Moisés jịꞌtiꞌeꞌ mọꞌ quịꞌsiꞌ acaꞌ "Mọꞌ quịꞌsiꞌ acaꞌ jiꞌrebacdyes muꞌ Jenꞌ". Tyi ĉụiꞌ jiquej cọdaquity Jenꞌcheꞌ jụijyaꞌ in muꞌyaꞌ raꞌ jịjcaij in acaꞌyaꞌ jorojyaꞌ mọꞌ dyäquedyeꞌ.

⁸ Judyeyaꞌ jämꞌdyeyaꞌ muꞌ Moisés muꞌyaꞌ jịjcaij mọꞌ acaꞌ jemtucsebanyaꞌ muꞌin Israeltyiꞌ vóshiꞌ in dyäquedyeꞌyaty in, chat runꞌquenꞌyi sisdyeꞌyaꞌ ĉụiꞌsiꞌyaꞌ acaꞌ muꞌin junꞌ quiꞌ chuc muꞌ Moisés sisan mọꞌ quịꞌsiꞌĉan acaꞌ.

⁹ Sisanyaꞌ muꞌ chat q̂uinꞌdyemꞌ mọꞌ dyicbaꞌbadyeꞌ mọꞌve jịjcaiꞌ sisdyeꞌyaꞌ mọꞌ acaꞌ. Judyeyaꞌ mọꞌyaꞌ tacyaꞌ muꞌ na Jenꞌ p̂eyete muꞌ Moisés.

¹⁰ Jämꞌdyeyaꞌ muꞌin Israeltyiꞌ vóshiꞌ in cạveꞌyaꞌ in mọꞌ dyicbaꞌbadyeꞌ sisdyeꞌyaꞌ mọꞌ quịꞌsiꞌ acaꞌ jiꞌrebacdyes muꞌ Jenꞌ, muꞌin muntyiꞌ in timaꞌquete Jenꞌ in sisdyeꞌyaꞌ ĉụiꞌsiꞌ acaꞌyaꞌ muꞌin.

¹¹ Muꞌ Jenꞌ p̂eyete muꞌ Moisés vejyaꞌ yojdyemꞌ yirity muntyiꞌ p̂eyaqui penꞌdyeꞌtum muꞌ. Chat qui muꞌ Moisés caꞌñibun dyäquedyeꞌyaꞌ. Muꞌ qui namꞌ nọ́taquity Moiséstyiꞌ tịj muꞌ Josué, Nuntyiꞌ ạvaꞌ muꞌ, muꞌ taĉan muꞌĉan mọꞌ quịꞌsiꞌ acaꞌ jiꞌrebacdyesĉan muꞌ Jenꞌ.

Muꞌ Jenꞌ jajiꞌcaviyiti jämꞌyedyeꞌ mus Moisésyaꞌ

¹² Muꞌ Moisés jajiti muꞌ Ayoꞌ: —Mi nash räjĉan jítim: "Bächäcseva uts muntyiꞌ in." Paj tsanꞌ meꞌ mi jam damꞌ jítim tyi raꞌ jutaqui mi penꞌdyetuntyiꞌ yụ. Mi nash jítim, "Yụ nash chị́yebiye tịj mi judyeyaꞌ yụ maꞌjotyeye."

¹³ Mi mạꞌjiti jụijyaꞌ jiꞌchäyiti junꞌ chuc dyijyedyeꞌ mi paj qui tupuj yụ chị́yeye judyeyaꞌ yejĉoij yụ mísĉan mạꞌjitidyes. Dyijtucseva, mi Jenꞌ, uts muntyiꞌ in junꞌ chuc muꞌin anic mity muntyiꞌ in.

¹⁴ Muꞌ Jenꞌ jajiti: —Yụ́dye raꞌ penꞌdyetuyac judyeyaꞌ yụ raꞌ soꞌmeyac jịꞌjutyitidyeꞌ miꞌin.

¹⁵ Muꞌ Moisés jéte muꞌ Jenꞌ: —Mi jam penꞌdyetutiĉaꞌ jụijyaꞌ tsun paj taĉan mọmoꞌ úĉan tsun, jam raꞌ jutitiĉaꞌ mi.

¹⁶ ¿Junꞌ buty raꞌ chịj yoctyiꞌ muntyiꞌ in junꞌ chuc mạꞌjiti yụ mi judyeyaꞌ junꞌ chuc mi mạꞌjeyacsi muꞌin Israeltyiꞌ vóshiꞌ in jam penꞌdyetutiĉaꞌ tsun jụijyaꞌ mi? Chimeꞌ ¿junꞌ buty raꞌ chịj muꞌin yoctyiꞌ muntyiꞌ in junꞌ chuc mi aty pạrej buꞌyi yuꞌtim judyeyaꞌ mi aty pạrej buꞌyi yụꞌtacsi muꞌin Israeltyiꞌ vóshiꞌ in jam penꞌdyetutiĉaꞌ tsun jụijyaꞌ mi?

¹⁷ Judyeyaꞌ muꞌ Jenꞌ jajiti muꞌ Moisés: —Yụ raꞌ yi yojdyemꞌ mạꞌjeꞌ u mi ĉaĉaij na yụ mạꞌjeye judyeyaꞌ yụ chị́yeye tịjyaꞌ mi.

¹⁸ Muꞌ Moisés yi: —Jiꞌcaviyiti pashquedyeꞌ mi.

¹⁹ Muꞌ Jenꞌ jajiti: —Yụ raꞌ yi paj qui räj yụ́siꞌ jämꞌyedyeꞌ jịꞌcaꞌñeye mi. Chimeꞌ yụs tịj Jehová äjjeyac raꞌ mísyaꞌ vej. Yụ raꞌ ñịbeꞌ ĉọcsi tyi chuc yụ ñịbeꞌ ĉọcsi judyeyaꞌ yụ raꞌ ñịbeꞌjeyacsi tyi chuc yụ ñịbeꞌjeyacsi.

²⁰ Paj tsanꞌ meꞌ —yi muꞌ Jenꞌ —mi jam raꞌ tupuj cavibutim vej yụ ĉaĉaij na itŝij tyi tupuj cavibun vej yụ judyeyaꞌ yejĉoij tsạꞌ buꞌyi muꞌ.

²¹ Yi muꞌ Jenꞌ: —Mọꞌyaꞌ yiris vav c̣hẹiꞌyaꞌ yụ yóyaꞌdyemꞌ raꞌ tupuj u mi runꞌquenꞌyi yiritycheꞌ mij.

²² Aty jiꞌcaveye yụs jämꞌyedyeꞌ, yụ raꞌ mijĉan tŝuptyityĉan yụꞌtyeye chat busjeye unyaꞌ yụ junꞌ quiꞌ chuc aty jiyi yụ.

²³ Aty jecaĉanyaꞌ un yụ chat q̂uinꞌdyemꞌ raꞌ cạvitim murujrucheꞌ yụ. Yụs qui namꞌ vej, jam raꞌ junꞌ cạvac mọꞌ.