Exodo 24 - Tsimane

Jụjyi in Israeltyiꞌ vóshiꞌ in Jenꞌsiꞌ Yụꞌtacdyeꞌ

¹ Muꞌ Jenꞌ jajiti muꞌ Moisés: —Bojvi raꞌ mi mụcuꞌcheꞌ yóyaꞌdyemꞌ yụ u, muꞌintum in Aarón, Nadab, Abihu judyeyaꞌ muꞌin yävätidyeꞌ quiꞌtac tashcheꞌ buꞌyity in Israeltyiꞌ vóshiꞌ in. Räj miꞌin raꞌ timaꞌquitiĉamꞌ yụ mujuꞌveyaꞌ.

² Muꞌdye Moisés yirity raꞌ dadamꞌ c̣hẹiꞌyaꞌjete muꞌ Jenꞌ. Muꞌin na yoctyiꞌ in jam raꞌ c̣hẹiꞌyaꞌjete in. Chimeꞌdye muꞌin yoctyiꞌ Israeltyiꞌ vóshiꞌ in jam raꞌ bojvi muꞌtum in.

³ Chat qui muꞌ Moisés jéyacsi jiquej räj muꞌin Israeltyiꞌ vóshiꞌ in Jenꞌsiꞌ p̂eyacdyeꞌ muꞌ judyeyaꞌ yụꞌtacdyeꞌ muꞌ, muꞌin muntyiꞌ in yi jiquej in: —Tas Jenꞌsiꞌ p̂eyacdyeꞌ muꞌ jịꞌcätsepja raꞌ tsun.

⁴ Chat qui muꞌ Moisés sáñepte räj Jenꞌsiꞌ p̂eyacdyeꞌ muꞌ jasoꞌmitis jiquej. Nojno mạyedyeꞌ pamꞌ tsạꞌi muꞌ Moisés chat jämꞌtyeꞌ muꞌ yiris jiꞌcoꞌshayacdyedyes yujve muꞌ mụcuꞌ, judyeyaꞌ muꞌ runꞌquenꞌjeyacsi yiriꞌtac päräꞌ mij in jịꞌĉocdyety muꞌin yiriꞌtac päräꞌ ñuruꞌtyity Israeltyiꞌ vóshiꞌ in.

⁵ Chat qui muꞌ jutacsi nanaty in judyeyaꞌ muꞌin jiꞌcoꞌshayaqui Jenꞌdyes in judyeyaꞌ chimeꞌ ijacsi banꞌtyity toro in jämꞌjitidyedyes Jenꞌdyes in.

⁶ Moisés yụꞌtyeꞌ chocyaꞌ quiꞌ mọꞌ chäsh jäꞌchäsĉan judyeyaꞌ mọꞌ yocsiꞌ chocyaꞌ quiꞌ chäsh muꞌ fatsujjeꞌ mọꞌcheꞌ jiꞌcoꞌshayaquis Jenꞌdyes.

⁷ Muꞌ jequeꞌ mọꞌ ribro p̂eyeꞌsiꞌ Jenꞌsiꞌ yụꞌtacdyeꞌ muꞌ judyeyaꞌ mọꞌ bijodyeꞌ muꞌindyes in jịꞌcätseptety yụꞌtacdyeꞌ Jenꞌsiꞌ muꞌ chat qui muꞌ tas p̂eyeyacsi muꞌin Israeltyiꞌ vóshiꞌ in. Yi muꞌin Israeltyiꞌ vóshiꞌ in: —Tsun raꞌ jịꞌcätsepja räj Jenꞌsiꞌ p̂eyacdyeꞌ muꞌ, tsun raꞌ chiquepja.

⁸ Moisés tapjeꞌ mọꞌ chäsh chat qui fatsujjeyacsi muntyiꞌ in. Yi muꞌ: —Ọij nash chäsh jịꞌĉoiꞌ junꞌ chuc aty fer buꞌyiꞌ yụꞌtac Jenꞌsiꞌ p̂eyacdyeꞌ miꞌindyes. Muꞌsiꞌ yụꞌtacdyeꞌ judyeyaꞌ muꞌsiꞌ bijodyeꞌ muꞌindyes in jịꞌcätseptety yụꞌtacdyeꞌ muꞌ.

⁹ Moisés, Aarón, Nadab, Abihu judyeyaꞌ muꞌin yävätidyeꞌ quiꞌtac tashcheꞌ buꞌyity Israeltyiꞌ vóshiꞌ in bojvete in muꞌ mụcuꞌ.

¹⁰ Judyeyaꞌ muꞌin ĉụiꞌsiꞌyaꞌ vej cạvete in muꞌ Jenꞌ Ayoꞌ muꞌin Israeltyiꞌ vóshiꞌ muꞌ. Yujĉan muꞌ mụijyaꞌ jeñej buꞌyi mij in yụꞌtactyiꞌ pisodyety judyeyaꞌ jiꞌcaviti in jeñej mạyedyes color yushñus chuñemtyity.

¹¹ Paj tsanꞌ muꞌin tashcheꞌ buꞌyity Israeltyiꞌ vóshiꞌ in cạvete Jenꞌ in, muꞌ Jenꞌ jam vaꞌtacdyeꞌ soꞌmacsi. Muꞌyaꞌdye tyeij in judyeyaꞌ säcsi mụcuꞌcheꞌ in.

Moisés bojvete muꞌ mụcuꞌ Sinaí

¹² Ayoꞌ jajiti muꞌ Moisés: —Atsiva úcheꞌ mụcuꞌcheꞌ ĉushdyiꞌ yụ, úcheꞌ chum raꞌ taccheꞌ mi, yụ raꞌ soꞌmeye jaiꞌdactyiꞌ mij in sánacdyeꞌtumtyiꞌ in. Mọꞌcheꞌ aty sáñeꞌ yụ yụꞌtacdyeꞌ yụ, judyeyaꞌ mọꞌcheꞌ jiꞌchäyitidyeꞌ yụ muntyidyes in.

¹³ Anicdye meꞌ muꞌ Moisés sacti mụcuꞌcheꞌ jịjcaij Jenꞌtyiꞌcheꞌ, muꞌ cạte nọ́taquity muꞌ, Josué.

¹⁴ Muꞌ jéyacsetaqui muꞌin tashcheꞌ buꞌyity in: —Bistiĉaꞌ raꞌ miꞌin úyaꞌ junꞌ quiꞌ chuc atsijban tsun. Aarón raꞌ tacyaꞌ miꞌintum judyeyaꞌ muꞌ Hur, mọꞌyaꞌ carijsis jụijyaꞌ miꞌin, jéyacsi raꞌ miꞌin muꞌin in paj qui muꞌin jịꞌcäts yụꞌbanꞌ in —jéyacsi Moisés.

¹⁵ Chat qui muꞌ Moisés sacti, muꞌcheꞌ jịjcaij Sinaícheꞌ. Muꞌ na mụcuꞌ dyicbaꞌbadyeꞌĉan buꞌyi.

^16-17 Mọꞌ ferdyeꞌ Ayoꞌsimꞌ mụcuꞌcheꞌ chạiꞌ muꞌ, anic fer mạijyiꞌ mụcuꞌcheꞌ, jeñej yenamquis tŝij jadyicches mụcuꞌ, meꞌ buꞌyiꞌ muꞌin cạveꞌ in muꞌin Israeltyiꞌ vóshiꞌ in. Jäbän mạyedyeꞌ meꞌquiꞌ meꞌ buꞌyiꞌ mọꞌ dyicbaꞌbadyeꞌ mọꞌcheꞌ. Mọꞌ na yävätidyeꞌyis mạyedyeꞌ muꞌ Jenꞌ dyicbaꞌbadyeꞌ muꞌ tuiꞌ jafaijdyi muꞌ Moisés.

¹⁸ Muꞌ qui muꞌcheꞌ jịjcaij, úĉan jịjcaij dyicbaꞌbadyeꞌĉan, muꞌĉan jịjcaij siti. Vạjpedyeꞌ quiꞌtac mạyedyeꞌ meꞌ buꞌyequi mụcuꞌcheꞌ muꞌ Moisés.