Exodo 23 - Tsimane

Yụꞌtacdyeꞌ Rụij Yụꞌtacsis in

¹ Jam raꞌ jiꞌjiyacsim yoctyiꞌ muntyiꞌ in mọꞌ väñädyes p̂eyacdyeꞌ seꞌveꞌyaꞌ mi. Jam raꞌ nọ́tyetem yirity ac̣hiꞌyity muꞌ väñätucsiꞌyaꞌ yoctyiꞌ muntyiꞌ in muꞌdyes.

² Jam raꞌ cäc̣häꞌchucsim muꞌin ñurtyity in mạꞌjeꞌ ac̣hiꞌtity in. Mi jịꞌchicaqui jụijyaꞌ muꞌin jịꞌruij yụꞌtacsityyaꞌ in junꞌ chuc jiyi jiquej in jam raꞌ yoc jéyacsi väñätucsi mi yojdyemꞌ mạꞌjeꞌ muꞌin ñurtyity u in.

³ Chimeꞌ yirity ñịbety muntyiꞌ jiꞌcaviti jụijyaꞌ muꞌinyaꞌ in jịꞌruij yụꞌtacsityyaꞌ in, jam raꞌ mujuꞌchaꞌ äräjjetinte miꞌin ĉaĉaij na ñịbety muꞌ. Jemoñeꞌ miꞌin soꞌmetinte cätssis jịꞌruij yụꞌtacdyeꞌ mọꞌ.

⁴ Rébepte jụijyaꞌ mi moñis cuꞌdyeꞌ muꞌ vaca, jam jụijyaꞌ bórico, muꞌsiꞌ muꞌ fáquintyiꞌ mi, jemoñeꞌ mi cạyebajte cuꞌdyeꞌ muꞌ aꞌtumtyiꞌyaꞌ cuꞌdyeꞌ in.

⁵ Cạvebite jụijyaꞌ mi yirity bórico muꞌ fáquintyity mi jọꞌchaijtyiꞌ cạcdyeꞌtum, jam raꞌ farajjetacbite mi. Nọ́tyeme muꞌ fáquintyiꞌ mi sac jaꞌyebibajme bórico muꞌ.

⁶ Jiꞌmeꞌtac jụijyaꞌ ñịbety muntyiꞌ in muꞌinyaꞌ in jịꞌruij yụꞌtacsityyaꞌ in, jam raꞌ ticametyetacsi mi muꞌin ñịbetyyaꞌ in mọꞌ rụijsis dyijyedyeꞌ mọꞌ.

⁷ Jam raꞌ seꞌvacsebim p̂eyacdyeꞌ muꞌin väñäij p̂eyacsitysiꞌ in. Mijam raꞌ junꞌ sänꞌdyeꞌ soꞌmete mi muꞌ jam juchaijtyiꞌ, jam jụijyaꞌ muꞌ rụijtyity, ĉaĉaij na yụ raꞌ jam yaquintucsebi juchaj muꞌin meꞌtyitysiꞌ in.

⁸ Jam raꞌ tapjete mi muꞌ querec̣ha yocvejetyetacsedyetyiꞌ dyijyedyeꞌ ĉaĉaij na muꞌ querec̣ha yocvejetyetacsedyetyiꞌ dyijyedyeꞌ jiꞌtofeyacsi muꞌin naijtity in judyeyaꞌ biĉunꞌjeyacsebiꞌ p̂eyacdyeꞌ muꞌin rụijtyitysiꞌ in.

Mọꞌ Yụꞌtacdyeꞌ Jịꞌjutyitidyes

⁹ Jam raꞌ jịꞌñibeꞌcacsi mi muꞌin jam chätidyeꞌ mítyiꞌ in ĉaĉaij na mi chịj junꞌ chuc miꞌin bäꞌyi yoctyiꞌtum muntyiꞌ in jam chätidyeꞌ miꞌin in ĉaĉaij na meꞌ buꞌyi miꞌin Egiptoĉan jiquej.

¹⁰ Jäbän raꞌ yómodyeꞌ mi raꞌ cäti mọꞌĉan jac judyeyaꞌ mọꞌsiꞌ sicdyeꞌ jequeꞌ mi.

¹¹ Mọꞌ yävätidyeꞌyis yómodyeꞌ jịꞌjutyeꞌ raꞌ mọꞌ jac. Aty jam raꞌ cätiyeban jac mi. Meꞌdyes muꞌin ñịbety muntyiꞌ in tupuj qui jebeiꞌ in mọꞌ ĉụiꞌ väshansiꞌ mísĉan jac, chimeꞌdye mọꞌin chätis jebacdyeꞌ in tupuj jebeiꞌ jedyeꞌ ĉụiꞌ taĉansiꞌ säcsedyeꞌ in. Vaj meij raꞌ jịꞌjutyitidyeꞌ soꞌmacsi ovadyeꞌ mi judyeyaꞌ orivodyeꞌ mi.

¹² Jäbän raꞌ mạyedyeꞌ carijtaqui mi. Mọꞌ qui namꞌ yävätidyeꞌyis mạyedyeꞌ jịꞌjutyiti ram. Chat qui vaca mi judyeyaꞌ bórico mi tupuj chimeꞌ jịꞌjutyiti in. Judyeyaꞌ muꞌ ạvaꞌ úñistyiꞌ mi judyeyaꞌ muꞌ jam chätidyeꞌ mítum bäꞌyity tupuj qui pacajyi chimeꞌ muꞌin.

¹³ Areꞌĉa, anic raꞌ jịꞌcätseꞌ mi räj yoj jeyedyemꞌ yụ u. Jam raꞌ cọdaqui mi yoctyiꞌcheꞌ jenꞌ buꞌyity in. Mijam raꞌ jiꞌjäcacsebi mi tịj muꞌin.

Mọꞌin Chibin Feshta in

¹⁴ Chibin quiꞌ yirisĉan yómodyeꞌ jemoñeꞌ miꞌin atsij judyeyaꞌ feshta jämꞌtiñeꞌ yụ́dyes.

¹⁵ Jämꞌtiñeꞌ ramꞌ mọꞌ feshta jam dujrity pan: yävätidyeꞌ mạyedyeꞌ jebetinte muꞌ pan jam jiꞌduraquistum jämꞌtactyiꞌ yoj jeyacdyemꞌ jiquej u yụ. Meꞌjetiñeꞌ ramꞌ mọꞌ feshta muꞌĉan ịvaj Abib ĉaĉaij na muꞌĉandye ịvaj jiquej shuban miꞌin Egiptoĉan jiquej. Jam raꞌ dạ̈räꞌ jiꞌcaviti miꞌin yụ́syaꞌ vej.

¹⁶ Jämꞌtiñeꞌ raꞌ miꞌin mọꞌ feshta tashchedyes vädacdyeꞌ aty mọꞌyaꞌ mọꞌ tashches sicdyeꞌ intsiiꞌ mọꞌ. Chimeꞌ raꞌ jämꞌtiñeꞌ miꞌin mọꞌ feshta jadyicvedyes vädacdyeꞌ aty ijaijyaꞌ miꞌin mọꞌ tupudyeꞌ vädacdyedyes judyeyaꞌ aty jämꞌjeyaquiyaꞌ sicdyeꞌ miꞌin.

¹⁷ Chibin quiꞌ yirisĉan yómodyeꞌ räj sonꞌ Israeltyiꞌ vóshiꞌ jemoñeꞌ atsij in judyeyaꞌ jämꞌtyeꞌ in feshta yụ́dyes.

¹⁸ Jam raꞌ soꞌmitiĉaꞌ miꞌin mọꞌ chäsh jiꞌcoꞌshayacdyedyes mọꞌdye tupudyeꞌ miꞌin soꞌmitiĉaꞌ yiris tucdyeꞌ jiꞌdujraquistumsiꞌ. Chimeꞌ mọꞌ cuꞌdyeꞌ ijatiñes miꞌin mọꞌdyes jämꞌjitidyedyes feshta, jemoñeꞌ miꞌin räj jiꞌcoꞌshayebitiñeꞌ chädyeꞌ mọꞌ mọꞌdye mạyedyeꞌ. Jam raꞌ jämꞌjebitiñeꞌ chädyeꞌ nojnodyes.

¹⁹ Tuiꞌ ram mọꞌ mọjoꞌchas mísiꞌ tashis vädacdyeꞌ Jenꞌsiꞌyaꞌ acaꞌ muꞌ. Jam raꞌ dyächtac muꞌ banꞌtyity chivo tseꞌsiꞌĉan reche.

Jenꞌtyiꞌ Anjer Muꞌ

²⁰ Jeshaꞌ, yụ raꞌ jutaqui anjer paj qui muꞌ tashi ñutschunac miꞌin carijsisyaꞌ miꞌedyeꞌĉansiꞌ judyeyaꞌ paj qui muꞌ tunac miꞌin yóyaꞌdyemꞌ mọꞌ jac jämꞌ yụꞌtyeꞌsiꞌ yụ u.

²¹ Jụjtyebitinte raꞌ muꞌ judyeyaꞌ chiqueptinte p̂eyacdyeꞌ muꞌ. Jam raꞌ jịꞌfajqueyetinte miꞌin ĉaĉaij na muꞌ raꞌ jam damꞌ vayacjibibunac juchaj miꞌinsiꞌ, ĉaĉaij na yụs tịj yụꞌtac mọꞌĉan.

²² Jämꞌ seꞌvetinte jụijyaꞌ miꞌin judyeyaꞌ meꞌjetiñeꞌ jụijyaꞌ miꞌin yoj yidyemꞌ yụ u, chat qui yụ raꞌ fạ́cacsi muꞌin fáquinactyiꞌ miꞌin judyeyaꞌ yụ raꞌ chucsi muꞌin chunactyiꞌ miꞌin.

²³ Yụty anjer tashi raꞌ judyeyaꞌ muꞌ raꞌ tunac miꞌin yóyaꞌdyemꞌ bäꞌyi muꞌin amorreo in, hitita in, fereseo in, cananeo in, heveo in, judyeyaꞌ jebuseo u in, judyeyaꞌ yụ raꞌ jịꞌmotsacsi in.

²⁴ Jam raꞌ dyụtsyi miꞌin muꞌintyiꞌyaꞌ jenꞌ buꞌyityyaꞌ in, mijam raꞌ timaꞌcacsibi miꞌin, mijam raꞌ cäc̣häꞌchucsebi yicdyeꞌ muꞌinsiꞌ miꞌin. Jemoñeꞌ tasjeyacsibi miꞌin muꞌintyiꞌ jenꞌ buꞌyity jämꞌtacdyeꞌ muꞌin judyeyaꞌ p̂etaijjeyacsebi miꞌin muꞌintyiꞌ mij yụꞌtactyiꞌ in muꞌindyety jenꞌ buꞌyitydyety muꞌin.

²⁵ Timaꞌquemac Jenꞌ Ayoꞌ miꞌin judyeyaꞌ muꞌ raꞌ ñútyinac säcsedyeꞌyaꞌ judyeyaꞌ ojñiꞌyaꞌ. Yụ raꞌ meijjetyeyac japacjodyeꞌ miꞌinyaꞌ.

²⁶ Judyeyaꞌ miꞌinsiꞌ p̂en jam raꞌ jojoiꞌ naꞌiꞌ ạvaꞌ mọꞌin, mijam raꞌ säräꞌ buꞌyis mọꞌyaꞌ in. Yụ raꞌ soꞌmeyac ferdyeꞌ paj qui men tsạꞌ buꞌyi miꞌin daiꞌ yómodyeꞌ jaccheꞌ raꞌ bäꞌyi miꞌin.

²⁷ Yụ raꞌ jịꞌcaveyacsi jiquijnacdyes yụ́siꞌ. Shican raꞌ tyeiꞌ dyijyedyeꞌ muꞌin in, muꞌĉan bäꞌyitysiꞌ in yóyaꞌdyemꞌ raꞌ siti u miꞌin. Muꞌin fáquinactyiꞌ miꞌin yụ raꞌ jiꞌcavꞌcacsi. Chat qui raꞌ ĉaꞌjoij muꞌin in.

²⁸ Yụ raꞌ juteyeyacsi mọꞌ jeꞌñes bibijoij tashiꞌ raꞌ mọꞌ, meijjeyacsiꞌ raꞌ heveo in, cananeo in judyeyaꞌ hitita in. Chat qui miꞌin raꞌ ĉụiꞌsiꞌtutiñeꞌ mọꞌ jac.

²⁹ Yụ raꞌ jam meijjeyacsi yiristum mọmoꞌ yirisĉan yómodyeꞌ, meꞌ jụijyaꞌ a vuty mọꞌ jac tsäquiꞌ raꞌ mọꞌ judyeyaꞌ mọꞌin vajedyedyeꞌ in jiyiꞌ raꞌ shashdyiꞌ in.

³⁰ Jäjämꞌtum yụ raꞌ meijjeyacsi junꞌ quiꞌ chuc dayi miꞌin muꞌĉan chat qui raꞌ tupuj miꞌin ĉụiꞌsiꞌtutiñeꞌ räj mọꞌ jac.

³¹ Yụ raꞌ soꞌmeyac mọꞌ jac tiyacchutiꞌyaꞌ mọꞌ Mar Jäijnäs rocve jịjcaij meꞌdye mọꞌ chaꞌsheꞌ Mar Mediterraneo judyeyaꞌ tiyacchutiꞌyaꞌ mọꞌ cäjyas jac meꞌdye muꞌ chaꞌshete cojiro. Yụ raꞌ soꞌmeyac ferdyeꞌ miꞌin paj qui tupuj miꞌin meijjeyacsi muꞌin muꞌĉan bäꞌyity in.

³² Jam raꞌ jụjjeyacsi miꞌin. Mijam raꞌ jụjjeyacsebi miꞌin jenꞌ buꞌyity muꞌin.

³³ Jam raꞌ yi miꞌin paj qui muꞌin yejĉoij tacaꞌ bäꞌyi miꞌinsiꞌĉan jac. Meꞌ jụijyaꞌ jiꞌjuchayibunac raꞌ in, meꞌdyes juchaj raꞌ soꞌmibutiĉaꞌ yụ miꞌin ĉaĉaij na mọꞌ timaꞌcacdyeꞌ muꞌinsiꞌ jenꞌ buꞌyitysiꞌ muꞌin joꞌmesyaꞌ raꞌ jiꞌpenjunac miꞌin.