Exodo 20 - Tsimane

Yiriꞌtac yụꞌtacdyeꞌ Jenꞌsiꞌ muꞌ

¹ Ọij nash p̂eyacdyeꞌ Jenꞌsiꞌ muꞌ, yi muꞌ:

² —Yụ nash Jenꞌ Ayoꞌ miꞌin, yụ jiꞌshupyac Egiptoĉantyiꞌ jiquej, yóĉandyemꞌ ñịbeꞌ cạvetiñeꞌ úñedyeꞌĉan jiquej u miꞌin.

³ Jam raꞌ jenꞌtutiñeꞌ yocsiꞌ jedyeꞌ pạrejve, yụmꞌ yirity Jenꞌ miꞌin.

⁴ Jam raꞌ yiris jämꞌtacdyeꞌ jämꞌtiñeꞌ miꞌin, mijam raꞌ jeꞌñes mạyedyeꞌches, mijam raꞌ jeꞌñes jacches jedyeꞌ, mijam raꞌ jeꞌñes ojñiꞌĉansiꞌ jedyeꞌ chimeꞌ.

⁵ Jam raꞌ dyụꞌtseyetiñeꞌ joꞌmes miꞌin, mijam raꞌ timaꞌquetiñeꞌ, yụ nash mọmoꞌ yirity Jenꞌ Ayoꞌ miꞌin. Chịj nash yụ meꞌjeyacsi muꞌin yoctyiꞌcheꞌ irijyity in. Yụ raꞌ vaꞌtacdyeꞌ soꞌmacsi muꞌin fáquintyiꞌ yụ in, chimeꞌdye raꞌ ạvaꞌ muꞌin, paj tsanꞌ vịyaꞌ muꞌin, paj tsanꞌ vóshiꞌ chimeꞌ muꞌin.

⁶ Muꞌin na mạꞌjintyiꞌ yụ in, chäquibuntyiꞌ p̂eyacdyeꞌ yụ in, muꞌin chat yụ mạꞌjeyacsi räjĉan, paj tsanꞌ junꞌtum ĉụiꞌ mir in, räjtumdye vóshiꞌ muꞌin.

⁷ Jam raꞌ cäjsisyaꞌ dyijyedyeꞌ jiꞌjäcbutiĉaꞌ yụs tịj miꞌin, muꞌin meꞌ aꞌc̣hisyaꞌ tịj jiꞌjäcbuntyiꞌ yụ in, muꞌin raꞌ vaꞌtacdyeꞌ soꞌmacsi yụ.

⁸ Ạ̈räjjetiñeꞌ raꞌ mọꞌ jịꞌjutyitidyes mạyedyeꞌ, yụꞌtyevac yụ́dyes.

⁹ Jäbän raꞌ mạyedyeꞌ carijtaqui miꞌin,

¹⁰ mọꞌ qui namꞌ yävätidyeꞌyis mạyedyeꞌ, ạ̈räjjetiñeꞌ raꞌ mọꞌ, paj qui jịꞌjutyiti miꞌin. Yụ́dyes yụꞌtyevac mọꞌ, ĉaĉaij nash yụ Jenꞌ Ayoꞌ miꞌin. Mọꞌdyes jam raꞌ carijtaqui miꞌin mọꞌ mạyedyeꞌ, mijam raꞌ ạvaꞌ miꞌin, mijam raꞌ úñity miꞌin, mijam raꞌ úñis miꞌin, mijam raꞌ cuꞌdyeꞌ miꞌin, mijam raꞌ yoctyiꞌ muntyiꞌ chimeꞌ in, muꞌin jajbuꞌyinactyiꞌ in.

¹¹ Meꞌdye nash yụ chimeꞌ jiquej, jäbän mạyedyeꞌ carijtaqui yụ jiquej, yoquiꞌdyemꞌ jämꞌtyeꞌyaꞌ u yụ mọꞌ mạyedyeꞌ, judyeyaꞌ ọij jac, judyeyaꞌ ojñiꞌ judyeyaꞌ räjtumdye q̂uinꞌ jajbuꞌyes in, chat qui mọꞌ yävätidyeꞌyis mạyedyeꞌ jịꞌjutyiti yụ jiquej. Mọꞌdyes yụ meꞌ buꞌyiꞌ yụꞌtyeꞌ mọꞌ yävätidyeꞌyis mạyedyeꞌ, paj qui jịꞌjutyitidyes mọꞌyaꞌ muꞌin muntyis in.

¹² Jämꞌjeyaqui raꞌ ĉụiꞌtyiꞌ jenꞌ miꞌin judyeyaꞌ tseꞌ miꞌin, paj qui anic men muꞌĉan bäꞌyi miꞌin jacĉan, mọꞌ soꞌmeyacsiꞌ raꞌ yụ, yụ nash Jenꞌ Ayoꞌ miꞌin.

¹³ Jam raꞌ ijatinte muntyiꞌ miꞌin.

¹⁴ Jam raꞌ voꞌvoij miꞌin.

¹⁵ Jam raꞌ shuꞌaij miꞌin.

¹⁶ Jam raꞌ väñädyeꞌyaꞌ jiꞌmeꞌtinte chätidyeꞌ miꞌin.

¹⁷ Jam raꞌ mạꞌjeyacsebi miꞌin chätidyes jedyeꞌ muꞌin, paj tsanꞌ acaꞌ muꞌin, paj tsanꞌ p̂en muꞌin, paj tsanꞌ úñity muꞌin, paj tsanꞌ úñis muꞌin, paj tsanꞌ cuꞌdyeꞌ muꞌin, jam raꞌ joꞌmes mạꞌjeyacsebi miꞌin —yi muꞌ Jenꞌ.

Israeltyiꞌ vóshiꞌ in quijñete in muꞌ Jenꞌ

¹⁸ Chat qui muntyiꞌ seꞌveꞌ in jeñejyiꞌ pururu, judyeyaꞌ boñedyeꞌ chimeꞌ, cạveꞌ in venaiꞌyi, judyeyaꞌ mụcuꞌcheꞌ jịꞌsaꞌ tŝọiꞌ, mọꞌdyes qui noiꞌyi in noc̣hoꞌc̣hoyequi in, moch tsanꞌ tacaꞌ in.

¹⁹ Jéte Moisés in: —Mídye raꞌ jíbutiĉaꞌ tsun miꞌin jätäjyi chuc muꞌ Jenꞌ jin mi, tsun qui raꞌ chiqueyac, paj qui jam Jenꞌ chụiꞌ buꞌyi p̂iyiyin tsun, areꞌĉa säñi tsun.

²⁰ Vorjeyacsi Moisés jéyacsi: —Jam raꞌ noiꞌyi miꞌin, mọꞌdyes nash atsij muꞌ Jenꞌ paj qui jiꞌĉujtyinac miꞌin jätäjyi chuc raꞌ ĉojtyiꞌĉan miꞌin. Muꞌ mạꞌjeꞌ paj qui räjĉan irijyi muꞌcheꞌ miꞌin, paj qui jam juchaij miꞌin.

²¹ Aty muꞌyaꞌ muꞌin muntyiꞌ in moch buꞌyi mụcuꞌyaꞌ runꞌquenꞌyi in, Muꞌ na Moisés c̣hẹiꞌyaꞌjeꞌ mọꞌ tojmadyeꞌ tyimꞌdyeiꞌsiꞌ yóĉandyemꞌ muꞌ Jenꞌ u.

Soꞌmac yụꞌtacdyeꞌ Israeltyiꞌ vóshiꞌ in

²² Muꞌ Jenꞌ jajiti muꞌ Moisés: —Jéyacseva mi yụs p̂eyacdyeꞌ muꞌin Israeltyiꞌ vóshiꞌ in: "Aty ĉụiꞌ cạvi miꞌin junꞌ chuc yụ mạyedyeꞌcheꞌ p̂eyeyac.

²³ Jam raꞌ jämꞌtiñeꞌ miꞌin jụꞌñity ĉụiꞌ jenꞌ buꞌyity in paj qui jam cätsbun yụ in. Mijam raꞌ jämꞌtacsi muꞌin jenꞌ buꞌyity in platayaꞌ, mijam jenꞌ buꞌyity in oroyaꞌ.

²⁴ Jämꞌtyevac mọꞌ jiꞌcoꞌshayaquis Jenꞌdyes jacyaꞌ mọmoꞌ, chat mọꞌcheꞌ jiꞌcoꞌshayaqui raꞌ miꞌin mọꞌin jiꞌcoꞌshayacdyeꞌ Jenꞌdyes in judyeyaꞌ mọꞌin jämꞌjitidyedyes in; miꞌinsiꞌ oveca, chivo judyeyaꞌ toro in. Junanaj ĉụiꞌ raꞌ mọꞌyaꞌ jiꞌdyijvitidyes yụ́dyes mọꞌyaꞌdye raꞌ yụ ñịbeꞌjeyac.

²⁵ Jämꞌtiñeꞌ jụijyaꞌ miꞌin yiris jiꞌcoꞌshayaquis Jenꞌdyes mijyaꞌ jụijyaꞌ miꞌin, jam raꞌ jaiꞌdactyiꞌ mij yụꞌtinte miꞌin jaiꞌdyetinte miꞌin. Jaiꞌdyetinte jụijyaꞌ miꞌin muꞌ mij jiꞌcoꞌshayaquis Jenꞌdyes joꞌmesyaꞌ raꞌ ac̣hiꞌtiñeꞌ mọꞌ jiꞌcoꞌshayaquis Jenꞌdyes.

²⁶ Jam raꞌ cheꞌve yụꞌtiñeꞌ miꞌin mọꞌ jiꞌcoꞌshayaquis Jenꞌdyes paj qui mọꞌcheꞌ bojvi bojvaquischeꞌ miꞌin. Jam qui joꞌmescheꞌ muꞌin muntyiꞌ in cädäty cạvinac miꞌin."