Exodo 2 - Tsimane

Naꞌedyeꞌ Moiséssiꞌ

¹ Muꞌyaꞌ jiquej yirity hebreo muꞌĉan, Levíty vóshiꞌ muꞌ. Mọꞌcheꞌdye vämeban Levísiꞌcheꞌ vóshiꞌ muꞌ.

² Mọꞌ qui ạvaꞌyiꞌ, sonꞌ ạvaꞌ mọꞌ. Anic jämꞌtyiꞌ ạvaꞌ mọꞌ cạvaquiꞌ, meꞌdyes qui quijaiꞌ otejjeyaquiꞌ judyeyaꞌ jijmuꞌsaquiꞌ. Aty chibin ịvaj ạvaꞌ mọꞌ,

³ aty jam junꞌ tupuj yejĉoiꞌ junꞌ buꞌyiꞌ, chat qui yirity jämꞌte canasto, taiꞌte peiꞌtaquisyaꞌ paj qui jam ñịtsive ojñiꞌĉan. Muꞌĉan qui yụꞌtaquiꞌ ạvaꞌ mọꞌ, chat qui ojñiꞌĉan jicajquiquiꞌ ạvaꞌ mọꞌ därtyiꞌĉan biruruc, Nilo tịj muꞌ cojiros.

⁴ Tseꞌ muꞌ jéyaquiꞌ ạvaꞌ mọꞌ vojiꞌ muꞌ joijnos paj qui tŝävcheꞌtute meij cạvejijcate muꞌ joijnoꞌ, vátyequej raꞌ jedyeij muꞌ.

⁵ Meꞌĉandye ayij mọꞌ ayoꞌsiꞌ ạvamꞌ, dyútiꞌ cojiroyaꞌ. Cäc̣häꞌ mọꞌin úñis mọꞌ, mọꞌ penꞌdyetuiꞌ in, nashvaꞌjoiꞌdyemꞌ mọꞌin in. Mọꞌ ayos ạvamꞌ nạijte canasto ojñiꞌĉan dujruꞌruij, judyeyaꞌ jeꞌ yiris úñis mọꞌ paj qui mọꞌ jäcte.

⁶ Aty vanchute mọꞌ canasto, muꞌĉan na jiquej joijnoꞌ, vátevaꞌjoij muꞌ muꞌĉan. Ñịbeꞌ mọꞌ ĉọ́te, chat qui mọꞌ ayos ạvamꞌ yiꞌ mọꞌ: —Uts yirity joijnoꞌ hebreo.

⁷ Chat qui p̂eyaquiꞌ joijnos vojiꞌ muꞌ, yiꞌ jeꞌ: —¿Jämꞌ buty yụ queviqueꞌ yiris ĉọjcaquis hebreo paj qui mọꞌcheꞌ tsiꞌyi? —yiꞌ mọꞌ nanas jeꞌ ayos ạvaꞌ muꞌ.

⁸ Vorjeꞌ mọꞌ: —Jeshaꞌ tạij quevicvaꞌ —yiꞌ mọꞌ ayoꞌsiꞌ ạvaꞌ. Chat qui mọꞌ nanas tubibajte ĉụiꞌsiꞌ tseꞌ muꞌ joijnos.

⁹ Aty mọꞌyaꞌ mọꞌ tseꞌ muꞌ, chat qui mọꞌ ayoꞌsiꞌ ạvaꞌ muꞌ yiꞌ jeꞌ: —Mi raꞌ jiꞌp̂anbutim uts joijnoꞌ yụ raꞌ yaꞌityeye. Jụjjebiꞌ p̂eyacdyeꞌ mọꞌ, chat qui jäcte muꞌ joijnoꞌ jiꞌp̂ante.

¹⁰ Aty utuꞌ muꞌ, mọꞌ tseꞌ muꞌ cạyebanꞌ ayoꞌsiꞌ ạvamꞌ, mọꞌ qui ạvatute jeñej ĉụiꞌtyiꞌ ạvaꞌ mọꞌ, meꞌ buꞌyi yụꞌte. Mọꞌ qui yụꞌtyeyete tịj Moisés jéte. Yiꞌ mọꞌ: —Yụ nash ojñiꞌĉantyiꞌ jäcte.

Moisés ĉaꞌjoyete muꞌ ayoꞌ

¹¹ Aty p̂uri muꞌ Moisés chat qui ĉọcsequi ĉụiꞌtyiꞌ chätidyeꞌ muꞌ hebreo in. Cạvacsi där ñịbeꞌ jịꞌcavacsi in, anic jiyi fer jiꞌunacsi in. Muꞌĉan muꞌ Moisés yirity cạvete Egiptoĉantyiꞌ siꞌbevaꞌte yirity hebreo, chätidyeꞌ Moiséstyiꞌ.

¹² Chat muꞌ qui Moisés tashi chum paiꞌ cạvi, itŝij cạvacsi muntyiꞌ in, chat qui muꞌ siscajcate judyeyaꞌ ijate muꞌ Egiptoĉantyiꞌ muntyiꞌ, jámanĉan rudyuꞌjete.

¹³ Yocsiꞌ mạyedyeꞌ muꞌ Moisés quivij chimuꞌĉan jịjcaban ĉọcseĉan hebreo in chätidyeꞌ muꞌ, muꞌĉan cạvacsi päräꞌ hebreo in chuvaꞌti vaj muꞌin in. Muꞌ qui Moisés jéte muꞌ meꞌtacsity: —¿Junꞌ dash meꞌte ĉụiꞌtyiꞌ chätidyeꞌ mi?

¹⁴ Muꞌ muntyiꞌ vorjajiti: —¿Tyi dash meꞌ yuꞌtyin mi paj qui ayoꞌbuꞌyi tsundyes mi, paj qui jịꞌcäts yuꞌtiĉaꞌ tsun miꞌin? ¿Mi buty mạꞌjeꞌ ijatim yoj jetedyemꞌ jiquej um Egiptoĉantyiꞌ ijatem? —jajiti muꞌ Moisés. Aty seꞌvepteyaꞌ p̂eyacdyeꞌ muꞌ, jämꞌ itŝijyi ĉojtyiꞌĉan. "Q̂uinꞌ chat aty chäyin yụ in anicdye meꞌ ijate yụ", yi ĉụiꞌ Moisés.

¹⁵ Egiptoĉantyiꞌ ayoꞌ chị́qui muꞌ, jaquivti tsanꞌ muꞌ Moisés, naijjajiti ca raꞌ tsanꞌ. Muꞌ na Moisés jam muꞌ mụiꞌ ĉaꞌjoij, yocsiꞌve jịjcaij jac, Madiánve roiꞌjeꞌ, muꞌve qui raꞌ bäꞌyi. Aty muꞌĉan venjoij muꞌ Moisés chat noriayaꞌ p̂utsquenꞌ bäꞌyi.

¹⁶ Ayij mọꞌyaꞌ yävätidyeꞌ nanamunsiꞌ in, yudyej Reuelsiꞌ ạvaꞌ muꞌ, muꞌ Madiánĉantyiꞌ cọdaquity Jenꞌcheꞌ. Mọꞌin ayij in jenꞌsiꞌ oveca tuquiꞌ in, mạꞌjeꞌ tsanꞌ bänꞌjeꞌ in tyeiꞌĉan oveca in jiꞌtyecsiꞌ in.

¹⁷ Muꞌin qui namꞌ ĉọjcacsity oveca in meꞌtaqui in, ishajjeyacsi Reuelsiꞌ ạvaꞌ in, muꞌyatydye muꞌ sacyi Moisés ñutsjeĉunacsi judyeyaꞌ jiꞌtyecsebi oveca mọꞌin in,

¹⁸ chat acaꞌyaꞌ jịjcabanꞌ in. Jenꞌ mọꞌin jéyaqui ạvaꞌ muꞌ: —¿Junꞌ caꞌ meꞌyequiꞌ miꞌin cavin ayijbanꞌ miꞌin?

¹⁹ Jéte in: —Yirity muntyiꞌ Egiptoĉantyiꞌ ñutsjin tsun paj qui muꞌin ĉọjcacsity oveca in jam cavꞌquin tsun in. Dadamꞌ muꞌ jäqueꞌ ojñiꞌ judyeyaꞌ jiꞌtyebun oveca tsun.

²⁰ Jéyacsi Reuel: —¿Junaꞌ caꞌ muꞌyaꞌ? ¿Junꞌ dash farajjetactinte muꞌyaꞌ? Tạij jäĉajmac, paj tsuntum säcsi —jéyaqui ạvaꞌ muꞌ.

²¹ Anicdye meꞌ muꞌ Moisés muꞌyaꞌ dyäqui Reuelsiꞌĉan acaꞌ. Yiris soꞌmete ạvaꞌ p̂endyes muꞌ Moisésdyes, jajiꞌvämiti, Séfora tịj mọꞌ p̂ensiꞌ.

²² Ạvaꞌyi, Gersón yụꞌtyeyete tịj muꞌ Moisés. Yi muꞌ Moisés: "Jeñej úĉantyiꞌdye bäꞌyity yụ yocsiꞌĉan jac.

²³ Men, daiꞌ yómodyeꞌ taĉan muꞌĉan, ĉụiꞌdye säñi muꞌ Egiptoĉantyiꞌ ayoꞌ. Yejĉoij qui namꞌ muꞌin Israeltyiꞌ vóshiꞌ in ñịbeꞌ cạveꞌ in, fer jiꞌunacsi in jịꞌñibeꞌcacsi in. Cọdyete Jenꞌ in paj qui muꞌ jiꞌc̣honacsi.

²⁴ Jenꞌ seꞌvacsebi táredyeꞌ muꞌin, ñịbedyesyaꞌ muꞌin. Dyijtuĉan ĉụiꞌsiꞌ p̂eyacdyeꞌ muꞌ jayuꞌtyiyitis jiquej Abraham, judyeyaꞌ Isaac judyeyaꞌ Jacob.

²⁵ Meꞌ muꞌ Jenꞌ cạvacsi Israeltyiꞌ vóshiꞌ muꞌ, anic dyijtucsi, chimeꞌdye ñịbedyes dyijtucsebi.