Exodo 19 - Tsimane

Muꞌin Israeltyiꞌ vóshiꞌ in venjoij Sinaíyaꞌ

^1-2 Chat qui muꞌin Israeltyiꞌ vóshiꞌ in dyäquedyeꞌyaty shupqui in, Refidimyaꞌ, quivij miꞌeban in. Aty päräꞌ ịvaj tyiti in, shupquiyaꞌ jiquej Egiptoĉan in, aty meꞌsiꞌ ventyequeꞌ in mọꞌ cäjyas jac Sinaí. Muꞌyaꞌ dyäqui in c̣hẹiꞌyaꞌ muꞌ mụcuꞌ Sinaí.

³ Muꞌcheꞌ muꞌ Moisés bojvi mụcuꞌcheꞌ, ĉọcte muꞌ Jenꞌ. Muꞌcheꞌ buꞌyi muꞌ Ayoꞌ jafaijdyi muꞌ Moisés jajiti: —Jéyacseva uts Jacobtyiꞌ vóshiꞌ in, Israel jiquej jäquiꞌves tịj muꞌ, soꞌmacsevaꞌ ọij p̂eyacdyeꞌ:

⁴ "Muꞌ Jenꞌ yi: Miꞌin aty cavibutiĉaꞌ ferdyeꞌ yụs miꞌin, junꞌjeyacsi chuc yụ jiquej Egiptoĉantyiꞌ in, judyeyaꞌ chimeꞌ ferdyeꞌyaꞌ yụ ĉọjcayac yódyemꞌ boñij cạqui ạvaꞌ u pavajcheꞌ, meꞌ tuyac yụ úyaꞌ paj qui yụ́dyety miꞌin.

⁵ Räjĉan seꞌvitiĉaꞌ jụijyaꞌ yụ miꞌin, judyeyaꞌ chäquibutiĉaꞌ jụijyaꞌ yụs p̂eyacdyeꞌ miꞌin, chat qui raꞌ ĉụiꞌtyiꞌ muntyiꞌ yụ yụꞌtyeyac, muꞌin na yoctyiꞌ jam meꞌ in. Meꞌ tsanꞌ ọij yụ́siꞌ jac räj muꞌchety in, miꞌin qui namꞌ tsimꞌtyeyac yụ́dyety miꞌin.

⁶ Yụ raꞌ yụꞌtyeyac paj qui yụ́cheꞌ cọdaquity buꞌyi miꞌin yoctyiꞌdyes muntyiꞌ in, ĉụiꞌtyiꞌ raꞌ muntyiꞌ yụ miꞌin, meꞌ raꞌ shupqui miꞌin", meꞌ raꞌ jéyacsi mi Israeltyiꞌ vóshiꞌ in —yi muꞌ Jenꞌ jajiti muꞌ Moisés.

⁷ Mụcuꞌchety chạban muꞌ Moisés chat qui vajmuꞌyaꞌjeyacseban muꞌin tashcheꞌ buꞌyity in, räj muꞌ jéyacsi mọꞌ p̂eyacdyeꞌ jasoꞌmitis muꞌ Ayoꞌ.

⁸ Muntyiꞌ in aty seꞌvepteyaꞌ in Jenꞌsiꞌ p̂eyacdyeꞌ muꞌ chat yiriꞌyaꞌ qui yi in: —Räj raꞌ mọꞌ p̂eyacdyeꞌ chiquepte tsun —yi in. Muꞌ qui Moisés jiꞌjiyete Ayoꞌ mọꞌdye p̂eyacdyeꞌ muꞌin.

⁹ Ayoꞌ jajiti Moisés: —Yụ raꞌ ĉọshye tyessiꞌĉan dyicbaꞌbadyeꞌ, muꞌĉan tuye raꞌ meij p̂eyeye mi paj qui muntyiꞌ räjenꞌdye seꞌve in, paj qui chịj räj in yụ́dye mọmoꞌ p̂eyaquity mítum, paj qui muꞌin räjĉan anicyi mícheꞌ in. Quivij muꞌ Moisés jiꞌjiyete Ayoꞌ muntyis p̂eyacdyeꞌ muꞌin.

¹⁰ Muꞌ Ayoꞌ jajiti: —Jéyacsequi raꞌ muntyim paj qui q̂uinꞌ judyeyaꞌ nojno paj jämꞌ yuꞌti in yụ́siꞌyaꞌ vej in. Jemoñeꞌ puptaqui quịꞌsiꞌ muꞌin

¹¹ paj qui nojnoĉanyaꞌ jämꞌ yuꞌti in, ĉaĉaij na muntyisyaꞌ vej muꞌin yụ raꞌ chạban úcheꞌ Sinaícheꞌ.

¹² Feiꞌte ram muꞌ mụcuꞌ jịꞌĉocdyes paj qui muꞌin muntyiꞌ in jam jiyive in, paj qui jam chimeꞌ yútyete in uts mụcuꞌ. Jéyacsi ram muntyiꞌ in: "Areꞌĉa miꞌin, jam raꞌ uts bojvetinte mụcuꞌ mijam raꞌ cạ̈näꞌñetinte", jéyacseva. Tyi chuc cạ̈näꞌñetety jụijyaꞌ, ijac raꞌ muꞌ.

¹³ Farajñetinte raꞌ mijyaꞌ miꞌin, paj tsanꞌ chiꞌbetinte, jam raꞌ méquiꞌ tocoꞌjetinte unyaꞌ miꞌin. Paj tsanꞌ muntyiꞌ jụijyaꞌ, paj tsanꞌ jebacdyeꞌ, ijac ramꞌ mọꞌ, mijam raꞌ junꞌ c̣hoñiꞌ in. A qui na ramꞌ pejtac boñedyeꞌ jụijyaꞌ, chat q̂uinꞌdyemꞌ raꞌ tupuj bojvete in muꞌ mụcuꞌ muntyiꞌ in —yi muꞌ Jenꞌ.

¹⁴ Chat qui muꞌ Moisés chạban mụcuꞌchety, jéyacsi paj qui jämꞌ yuꞌti in Jenꞌsiꞌyaꞌ vej muꞌ. Meꞌdye qui muꞌin räj puptaqui quịꞌsiꞌ in.

¹⁵ Yi muꞌ Moisés jéyacsi muntyiꞌ in: —Jäꞌmiiꞌtyejamꞌ räj miꞌin nojnoĉanyadyes mạyedyeꞌ, jambiꞌ chum raꞌ ạꞌyayeban p̂entum miꞌin.

¹⁶ Meꞌdye in aty chaꞌsheꞌ in mọꞌ mạyedyeꞌ pamꞌ, anic fer venaꞌyaqui pururu, judyeyaꞌ yiris dyicbaꞌbadyeꞌ tyessiꞌ juñumjete muꞌ mụcuꞌ. Fer vatyquej mạꞌiꞌ mọꞌĉan boñedyeꞌ. Muꞌyaty dyäquedyeꞌyaty in räj muꞌin noiꞌyi in noc̣hoꞌc̣hoyequi in quijñeꞌ in.

¹⁷ Muꞌ Moisés jiꞌshupcacsi muꞌin muntyiꞌ dyäquedyeꞌyaty in, muꞌin ĉọcte Jenꞌ in. Aty chaꞌshete in muꞌ mụcuꞌ chat dyäcyi in.

¹⁸ Muꞌ mụcuꞌ juñumjajiti jịꞌsaꞌ, ĉaĉaij na muꞌ Ayoꞌ tŝijcheꞌ chạij. Anic quivꞌdyeiꞌ jịꞌtŝoiꞌ jịꞌsaꞌ, jeñej därsiꞌ jorno, meꞌ shupquiꞌ, judyeyaꞌ fer muꞌ bubaqui mụcuꞌ.

¹⁹ Anic men mạꞌiꞌ boñedyeꞌ mọꞌĉan, feferjoiꞌ mạꞌi. Chat qui p̂eyaqui muꞌ Moisés vorjajiti vatyquej Jenꞌ, yojdyemꞌ pururus mic umꞌ, meꞌ tŝọiꞌ p̂eyacdyemꞌ.

²⁰ Jadyiccheꞌ mụcuꞌ chạban Ayoꞌ, jafaijdyi Moisés paj qui muꞌ chimuꞌcheꞌdye jịjcaij, chat qui muꞌ bojvi Moisés.

²¹ Aty muꞌcheꞌ muꞌ, jajiti Ayoꞌ: —Chạbada mi, jéyacsebada muntyiꞌ in paj qui jam cajñeꞌ in mọꞌ feiꞌtacdyeꞌ mụcuꞌyas paj qui jam muntyiꞌ cavitin yụ in, vatyquej raꞌ jämꞌsiꞌ daiꞌ cạiꞌ in ijac in.

²² Muꞌin na cọdaquity yụ́cheꞌ in, meꞌ tsanꞌ c̣hẹiꞌyaꞌtyintyiꞌ yụ in, jemoñeꞌ qui namꞌ muꞌin chimeꞌ jämꞌ yuꞌti in, areꞌĉa tsäquiꞌsis muꞌincheꞌ tŝọiꞌ yụ́siꞌ.

²³ Moisés vorjete muꞌ Ayoꞌ: —Jam raꞌ junꞌ uts bojvi muntyiꞌ in ĉaĉaij na mídye jiquej tsäquiꞌ uts yụꞌte mụcuꞌ judyeyaꞌ jítiĉaꞌ miꞌin paj qui tsun fec buꞌyi mụcuꞌyaꞌ, yi jítiĉaꞌ tsun miꞌin.

²⁴ Jajiti Ayoꞌ muꞌ Moisés: —Chạbada, jäĉajme muꞌ Aarón. Muꞌin na muntyiꞌ in judyeyaꞌ muꞌin cọdaquity yụ́cheꞌ in, muꞌin raꞌ jam junꞌ muꞌyaꞌ cajñeꞌ in mọꞌ feiꞌtacdyeꞌ in, paj qui jam cavitin yụ in, areꞌĉa muꞌincheꞌ tsäquiꞌsis tŝọiꞌ yụ.

²⁵ Meꞌdye muꞌ Moisés chạban, jéyacseshan muntyiꞌ in mọꞌ p̂eyacdyeꞌ jätäjjajiti chuc muꞌ Jenꞌ.