Exodo 18 - Tsimane

Muꞌ Jetro sóbete Moisés

¹ Muꞌ Jetro, muꞌ cọdaquity Jenꞌcheꞌ Madiánĉan bäꞌyity, judyeyaꞌ muꞌdye tyúñeꞌ Moiséstyiꞌ, seꞌve räj p̂eyacdyeꞌ in junꞌ chuc muꞌ Jenꞌ jañutyiti jiquej muꞌ Moisés judyeyaꞌ muꞌin Israeltyiꞌ vóshiꞌ in. Judyeyaꞌ junꞌ chuc muꞌ Jenꞌ jiꞌshupcacsi muꞌin Israeltyiꞌ vóshiꞌ in Egiptoĉan jiquej.

² Aty jutaĉanyaꞌ Moisés p̂en muꞌ chat qui mọꞌ caꞌñibunꞌ jenꞌsiꞌyaꞌ acaꞌ mọꞌ, Jetrosyaꞌ, muꞌdye tyúñeꞌ Moiséstyiꞌ. Chat qui muꞌ tyúñeꞌ muꞌ jajiꞌcaꞌñiyibun p̂en muꞌ tuyebajte,

³ yiriꞌyaꞌ muꞌintum in päräꞌ ạvaꞌ muꞌ. Yirity ạvaꞌ mọꞌ tịj muꞌ Gersón ĉaĉaij na yi muꞌ Moisés jiquej: —Jeñej úĉantyiꞌdye bäꞌyity yụ yocsiꞌĉan jac.

⁴ Judyeyaꞌ muꞌ yoctyiꞌ ạvaꞌ tịj muꞌ Eliezer ĉaĉaij na yi muꞌ Moisés jiquej: —Jenꞌ muꞌ tátaty yụ muꞌ ñútyin yụ, jiꞌc̣hoñin yụ faraónsiꞌyaꞌ chutidyes coc̣hino muꞌ.

⁵ Jetro, Moiséstyiꞌ tyúñeꞌ muꞌ, ạvaꞌ Moiséstyiꞌtum judyeyaꞌ p̂en muꞌ Moiséssiꞌ ĉọcte in cäjyasĉan jac yóyaꞌdyemꞌ dyäqui u muꞌ c̣hẹiꞌyaꞌ muꞌ Jenꞌtyiꞌ mụcuꞌ.

⁶ Aty juteyete p̂eyacdyeꞌ jiquej muꞌ Jetro yi muꞌ: —Yụ, tyúñeꞌ mi Jetro, ĉọcye raꞌ yụ p̂entum mi judyeyaꞌ muꞌintum päräꞌ ạvaꞌ mi.

⁷ Chat qui muꞌ Moisés sacti jiꞌrebete tyúñeꞌ muꞌ judyeyaꞌ dyụtsyi muꞌyaꞌ pụꞌsete. Vaj meij vorjitidyeij in chat qui siti muꞌin quịꞌsiꞌĉan acaꞌ muꞌ.

⁸ Moisés räj jéyaĉan tyúñeꞌ muꞌ junꞌ chuc muꞌ Jenꞌ meꞌjete muꞌ faraón jiquej judyeyaꞌ chimeꞌ muꞌin Egiptoĉantyiꞌ in. Muꞌ Jenꞌ meꞌjeyacsi jiquej muꞌindyes in Israeltyiꞌ vóshiꞌ muꞌ. Chimeꞌ muꞌ Moisés räj jéte junꞌ chuc mọꞌin carijsis jịꞌĉojtacsis majmiyaꞌ jiquej judyeyaꞌ junꞌ chuc muꞌ Jenꞌ jiꞌc̣honacsi muꞌin Israeltyiꞌ vóshiꞌ muꞌ carijsisyaꞌ jiquej.

⁹ Där seꞌyi muꞌ Jetro seꞌveꞌyaꞌ mọꞌ p̂eyacdyeꞌ junꞌ chuc muꞌ Jenꞌ jiꞌc̣honacsi muꞌin Israeltyiꞌ vóshiꞌ in judyeyaꞌ nọ́tacsi chimeꞌ.

¹⁰ Yi Jetro: —Timaꞌcac buꞌyi muꞌ Jenꞌ, yódyetydyemꞌ jiꞌc̣hoñin u mi muꞌinyaꞌ in Egiptoĉantyiꞌyaꞌ jiquej in judyeyaꞌ faraónyaꞌ. Chimeꞌ muꞌ jiꞌc̣honacsi muꞌin Israeltyiꞌ vóshiꞌ in muꞌinyaꞌ Egiptoĉantyiꞌyaꞌ jiquej in.

¹¹ Q̂uinꞌ chat yụ chịj junꞌ chuc muꞌ Jenꞌ mujuꞌchaty judyeyaꞌ räj muꞌin jenꞌ buꞌyity in uyaꞌyaty in ĉaĉaij na muꞌ Jenꞌ jiꞌc̣honacsi muꞌin Israeltyiꞌ vóshiꞌ in muꞌinyaꞌ in meꞌyityyaꞌ in ac̣hiꞌyityyaꞌ in.

¹² Judyeyaꞌ Jetro, Moiséstyiꞌ tyúñeꞌ muꞌ, jiꞌcoꞌshayaqui Jenꞌdyes judyeyaꞌ yocsiꞌ tucdyeꞌ soꞌmete Jenꞌ chimeꞌ. Muꞌ Aarón muꞌintum in räj tashcheꞌ buꞌyity Israeltyiꞌ vóshiꞌ in atsij in yiriꞌyaꞌ pan jebetyete in Moiséstyiꞌ tyúñeꞌ muꞌ. Jenꞌsiꞌyaꞌ vej muꞌin meꞌjeꞌ in.

Moisés yụꞌtacsi muꞌin jịꞌruij yụꞌtacsity in

¹³ Nojno mạyedyeꞌ muꞌ Moisés p̂utsquenꞌyi chat jịꞌruij yụꞌtacsebi muntyis jiꞌmeꞌtyiyitidyeꞌ muꞌin. Chat muꞌin muntyiꞌ in runꞌquenꞌyi c̣hẹiꞌyaꞌ muꞌ Moisés in tiyacchuti in pamꞌdye meꞌdye yómoꞌ.

¹⁴ Ĉụiꞌdye tyúñeꞌ muꞌ cạvebite carijtacdyeꞌ Moiséssiꞌ muntyidyes in jiquej. Yi muꞌ tyúñeꞌ muꞌ, jajiti: —¿Junꞌ buty ọij carijtacdyeꞌ shupquiꞌ meꞌjeꞌsiꞌ mi muntyidyes in? ¿Junꞌ buty mi mọmoꞌ jịꞌruij yụꞌtacsity uts muntyiꞌ in runꞌquenꞌyi míyaꞌ in tiyacchutiꞌ pamꞌdye meꞌdye yómoꞌ?

¹⁵ Moisés jéte: —Ĉaĉaij na muꞌin ĉúquin yụ in paj qui tupuj chịj in jedyeꞌ chuc mạꞌjeꞌ muꞌ Jenꞌ.

¹⁶ Jämꞌdyeyaꞌ mọꞌyaꞌ jiꞌmeꞌtyiyitidyeꞌ muꞌin jụijyaꞌ chat qui muꞌin ĉúquin yụ in, yụ qui jéyacsi tyi chuc rụijtyity muꞌinyaꞌ in. Chimeꞌ yụ jéyacseban junꞌ chuc Jenꞌsiꞌ p̂eyacdyeꞌ muꞌ judyeyaꞌ junꞌ chuc Jenꞌsiꞌ yụꞌtacdyeꞌ.

¹⁷ Moiséstyiꞌ tyúñeꞌ vorjete: —Ọij nash jam jämꞌ.

¹⁸ Mi judyeyaꞌ muꞌin ĉúquintyiꞌ in jiꞌräꞌibun raꞌ mọmoꞌ in ferdyeꞌ. Ọij carijtacdyeꞌ jiyiꞌ carij mídyes shupquiꞌ. Mi jam raꞌ tupuj yirity mọmoꞌ meꞌjem.

¹⁹ Seꞌvitiꞌ ramꞌ judyeyaꞌ yụ raꞌ soꞌmeye yiris dyijyedyeꞌ judyeyaꞌ paj muꞌ Jenꞌ mítum yoj yidyemꞌ jiquej u mi, jemoñeꞌ mi jiꞌjiyete muꞌ Jenꞌ muꞌinsiꞌ cọdacdyeꞌ in muntyidyes in. Cạcsebi mi muꞌinsiꞌ jiꞌmeꞌtyiyitidyeꞌ Jenꞌyaꞌ.

²⁰ Jịꞌchiyacseva mi Jenꞌsiꞌ p̂eyacdyeꞌ muꞌ judyeyaꞌ Jenꞌsiꞌ yụꞌtacdyeꞌ muꞌ. Chimeꞌ jịꞌcaveyacseva mi junꞌ chuc muꞌin tupuj rụij bäꞌyi in judyeyaꞌ junꞌ chuc raꞌ muꞌinsiꞌ carijtacdyeꞌ in.

²¹ Q̂uinꞌ qui namꞌ jemoñeꞌ mi cächjeꞌ yocsiꞌ dyijyedyeꞌ chimeꞌ. Dyimꞌtacseva dyijyedyeꞌtumtyiꞌ muntyiꞌ in. Muꞌindye in timaꞌquetety Jenꞌ in, rụij bäꞌyity in, jam väñädyeꞌyaꞌ bijoijtyiꞌ in. Yụꞌtacseva mi uts in paj qui ayoꞌbuꞌyi in muntyiꞌcheꞌ in. Pạrej raꞌ ayoꞌbuꞌyi in yiriꞌ mircheꞌ muntyiꞌ in. Pạrej raꞌ ciencheꞌ ayoꞌbuꞌyi in. Pạrej ĉanamꞌ quiꞌtaccheꞌ in. Pạrej yiriꞌtaccheꞌ in.

²² Muꞌin raꞌ räjĉan jịꞌruij yụꞌtacsi muntyiꞌ in. Jämꞌdyeyaꞌ jụijyaꞌ muꞌin jam tupuj dạqueꞌ mọꞌ rụijsis dyijyedyeꞌ in chat muꞌin raꞌ jiꞌjiyin in. Paj tsanꞌ meꞌ jämꞌdyeyaꞌ jụijyaꞌ mọꞌyaꞌ jorojĉan mọꞌ rụijsis dyijyedyeꞌ muꞌindye mọmoꞌ raꞌ jịꞌruij yụꞌtacsebiban muntyis jiꞌmeꞌtyiyitidyeꞌ muꞌin.

²³ Mi cäc̣häꞌchubutiꞌ jụijyam yụs dyijyedyeꞌ judyeyaꞌ muꞌ Jenꞌ chimeꞌ mọꞌ maꞌjotyibun jụijyaꞌ, mi raꞌ tupuj dyichyi judyeyaꞌ muꞌin muntyiꞌ in joꞌmesyaꞌ raꞌ tupuj pacaj caꞌñibun acaꞌyaꞌ muꞌin.

²⁴ Muꞌ Moisés seꞌvebite tyúñes p̂eyacdyeꞌ muꞌ judyeyaꞌ jịꞌcätsepte yoj yidyemꞌ muꞌ u.

²⁵ Muꞌ dyimꞌtacsi dyijyedyeꞌtumtyiꞌ muntyiꞌ in muꞌinyaꞌ räj in Israeltyiꞌyaꞌ vóshiꞌ in chat yụꞌtacsi paj qui ayoꞌbuꞌyi in pạrej mircheꞌ in, pạrej ciencheꞌ in, pạrej ĉanamꞌ quiꞌtaccheꞌ in, pạrej yiriꞌtaccheꞌ in.

²⁶ Muꞌin jịꞌruij yụꞌtacsi muntyiꞌ in räjĉan. Mọꞌin jiꞌmeꞌtyiyitidyeꞌ mọjoꞌchaꞌ carijsis joꞌmes jiꞌjiyete Moisés in. Mọꞌin ọyaꞌyas in jam carijsis in muꞌindyes mọmoꞌ ĉụiꞌ jịꞌruij yụꞌtacsi muꞌin in.

²⁷ Jábiyaꞌ muꞌ Moisés vorjajitacdyi tyúñeꞌ muꞌ chat qui muꞌ Jetro caꞌñibun ĉụiꞌsiꞌĉan jac muꞌ.