Exodo 17 - Tsimane

Ojñiꞌ shupquis mijĉansiꞌ

¹ Israeltyiꞌ vóshiꞌ in räj muꞌin shupqui in, Sin tịj mọꞌ cäjyas jac. Jäjämꞌ meꞌquejĉoij in dyädyäquejoij in, ĉaĉaij na muꞌdye Ayoꞌ meꞌ jéyacsi. Chijämꞌ mọꞌ chaꞌsheꞌ in Refidim, muꞌyaꞌ qui dyäqui in, mijam ojñiꞌ mọꞌyaꞌ tyédyes.

² Muꞌĉan qui fạ́quete in muꞌ Moisés, cọdyete in, jéte in: —Soꞌmitiĉamꞌ ojñiꞌ paj qui tyeij tsun, atyuꞌ raꞌ jajris ijan tsun. Vorjeyacsi muꞌ Moisés: —¿Junꞌ dash meꞌ yụ cudyitiĉaꞌ miꞌin? ¿Junꞌ dash meꞌ jịꞌĉojtinte Ayoꞌ, jeñej aty itŝiꞌ ferdyeꞌ ĉọbitinte u?

³ Muꞌin na jämꞌ jajracñi in, yejĉoij fạraꞌñete in, jéte in: —¿Junꞌ dash ĉaĉaij jiꞌshuptiĉaꞌ jiquej Egiptoĉantyiꞌ tsun miꞌin? ¿Jajrisyaꞌ buty raꞌ ijatiĉaꞌ tsun miꞌin, räjtumdye ạvaꞌ tsun judyeyaꞌ cuꞌdyeꞌ tsun?

⁴ Muꞌ qui Moisés cọdaqui Ayoꞌcheꞌ, jéte: —¿Junꞌjeyacsi bu raij uts muntyiꞌ in? Atyuꞌ u mạꞌjeꞌ farajñin mijyaꞌ yụ in.

⁵ Vorjajiti Ayoꞌ: —Muꞌcheꞌ raꞌ mi, pạrej cạcsi mi muꞌin tashcheꞌ buꞌyity muntyiꞌ in, muꞌintum raꞌ tashi yuꞌti mi unĉan raꞌ chimeꞌ mutyudyeꞌ mi, yódyesyaꞌdyemꞌ pacte cojiro jiquej um. Muꞌcheꞌ raꞌ jịjcaij mi

⁶ mụcuꞌcheꞌ Horebcheꞌ. Muꞌcheꞌ raꞌ yụ bisye mijcheꞌ. Mij raꞌ pacjete mi chat qui raꞌ ojñiꞌ shupquiꞌ mọꞌĉansiꞌ, paj qui tyeij muntyiꞌ räj in. Moisés chiquepte p̂eyacdyeꞌ muꞌ, meꞌdye mọꞌ shupqui ojñiꞌ, vaj mọꞌcheꞌ vej muꞌin cạvi in muꞌin tashcheꞌ buꞌyity in.

⁷ Chat qui muꞌ Moisés jịꞌtiꞌeꞌ mọꞌ jac Masah judyeyaꞌ Meriba jeꞌ ĉaĉaij na muꞌin Israeltyiꞌ vóshiꞌ in jịꞌfajquiyitidyeij in Jenꞌtum judyeyaꞌ jịꞌĉojte in. Yíyaꞌ muꞌin: —¿Junaꞌ buty muꞌ Jenꞌ? ¿Areꞌ tsuntum, areꞌ jam?

Chutidyeꞌ Amalectyiꞌtum vóshiꞌ in

⁸ Atsij muꞌin Amalectyiꞌ vóshiꞌ in judyeyaꞌ chucsi muꞌin Israeltyiꞌ vóshiꞌ in Refidimyaꞌ.

⁹ Moisés jéte Josué: —Tsimꞌtacseva pạrej muntyiꞌ in paj qui chucsi muꞌin Amalectyiꞌ vóshiꞌ in. Nojno yụ raꞌ jumijcheꞌ mụcuꞌ runꞌquenꞌyi yụ mọꞌtum mutyudyeꞌ Jenꞌsiꞌ muꞌ unĉan yụ.

¹⁰ Nojno mạyedyeꞌ muꞌ Josué jịꞌcätsepte Moiséssiꞌ jutacdyeꞌ judyeyaꞌ chucsi muꞌin Amalectyiꞌ vóshiꞌ in. Muꞌ Moisés, Aarón judyeyaꞌ Hur bojvete muꞌ mụcuꞌ in.

¹¹ Aty mụcuꞌcheꞌyaꞌ muꞌ Moisés jatŝenꞌjeyaqui un muꞌ chat qui muꞌin Israeltyiꞌ vóshiꞌ in jiꞌpenacsi in Amalectyiꞌ vóshiꞌ in. Aty na shunjeyaĉanyaꞌ un muꞌ chat qui muꞌin Amalectyiꞌ vóshiꞌ in feryeban in jiꞌpenacseban muꞌin Israeltyiꞌ vóshiꞌ in.

¹² Aty noꞌbiꞌyaꞌ un Moiséssiꞌ chat yụꞌte yirity mij in paj qui muꞌcheꞌ p̂utsquenꞌyi muꞌ. Aarón judyeyaꞌ Hur tapjebite un muꞌ yirity tacvesve, yoctyiꞌ q̂uimvesve un muꞌ jam qui chạban muꞌ junꞌ quiꞌ chuc shocamjoij muꞌ tsun.

¹³ Muꞌ qui Josué jiꞌpenacsi muꞌin Amalectyiꞌ vóshiꞌ in chutidyeꞌyaꞌ.

¹⁴ Muꞌ Jenꞌ jajiti Moisés: —Sáñevaꞌ mi ọij p̂eyacdyeꞌ ribroĉan paj qui jam yaquintuc mọꞌ. Jéte ram paj qui mọꞌ seꞌveꞌ muꞌ Josué ĉaĉaij na yụ raꞌ jịꞌmotsacsi itŝij raꞌ tyi dyijtucseban muꞌin Amalectyiꞌ vóshiꞌ in. Aty raꞌ jam tyi chị́yacseban in.

¹⁵ Chat qui muꞌ Moisés jämꞌtyeꞌ yiris jiꞌcoꞌshayacdyedyes judyeyaꞌ jịꞌtiꞌeꞌ mọꞌ "Muꞌ Jenꞌ yụ́tyiꞌ vandera".

¹⁶ Yi muꞌ: —Unyaꞌ jiꞌcheꞌyac mọꞌ bandera Jenꞌsidyes bäꞌyedyeꞌ; Meꞌdyes muꞌ Jenꞌ raꞌ chucsi muꞌin Amalectyiꞌ vóshiꞌ in räjĉan.