Exodo 12 - Tsimane

Jenꞌ yụꞌtyeꞌ feshta Jiꞌc̣honacdyes

¹ Ayoꞌ jap̂iyiti muꞌ Moisés Aaróntum Egiptoĉan in, jéyacsi:

² —Uts q̂uinꞌ ịvaj yụꞌte yụ miꞌindyety paj qui muꞌ tashcheꞌ buꞌyi yómodyety.

³ Jéyacsejamꞌ räj Israeltyiꞌ vóshiꞌ in, soꞌmacsejamꞌ ọij p̂eyacdyeꞌ: "Mọꞌ mạyedyeꞌ yiriꞌtac tyitiꞌ uts ịvaj, paj cäts yirisisij tsimꞌtaqui oveca banꞌmuntyiꞌ in, meꞌ tsanꞌ chivo, muꞌin yirisyaty acaꞌ in, yiris raꞌ jịjcaiꞌ ijac mọꞌyaꞌ, mọꞌ raꞌ jebetiñeꞌ miꞌin.

⁴ Jam raꞌ tupuj tastetiñeꞌ jụijyaꞌ yirisyaty acaꞌ miꞌin, jemoñeꞌ qui c̣hẹiꞌyaty fayacsi miꞌin paj qui muꞌinmun säcsi in, paj qui tupuj räjjebitiñeꞌ cuꞌdyes shush mọꞌ.

⁵ Jemoñeꞌ sonꞌ tsimꞌtac, jam raꞌ jụꞌñity, yiris yómodyeꞌyity, paj tsanꞌ oveca banꞌtyity, paj tsanꞌ chivo banꞌtyity.

⁶ Meꞌchutinte chum raꞌ miꞌin junꞌ quiꞌ chuc chaꞌshetiñeꞌ mọꞌ mạyedyeꞌ yiriꞌtac vạjpedyeꞌ jiyiꞌ uts q̂uinꞌ ịvaj. A raꞌ shocamyejoiꞌ yojtumdye bu u miꞌin ujatinte raꞌ miꞌin muꞌ cuꞌdyeꞌ.

⁷ Chäsh raꞌ chimeꞌ jäcbitiñeꞌ miꞌin taiꞌtacdyes yócheꞌdyemꞌ tap buꞌyiꞌcheꞌ chụiꞌdyeꞌ o mọꞌ acaꞌ, yóĉandyemꞌ raꞌ jebetiñeꞌ u mọꞌ cuꞌdyeꞌ.

⁸ Mọꞌdye raꞌ yómos jebetiñeꞌ shush faratucsiꞌ, bịcuquistum shan judyeyaꞌ jam dujritytum pan.

⁹ Jam raꞌ méquiꞌ jebetiñeꞌ yạꞌsiꞌ shush, mijam raꞌ dyächtacsiꞌ. Räj raꞌ faratuc mọꞌ cuꞌdyeꞌ, räj joꞌnomꞌ, judyeyaꞌ yuj mọꞌ, judyeyaꞌ voꞌco chimeꞌ mọꞌ.

¹⁰ Mijam raꞌ méquiꞌ jiꞌshucbitiñeꞌ shush mọꞌ, jiꞌshuctiñeꞌ jụijyaꞌ, jiꞌcoꞌshayebitiñeꞌ qui raꞌ.

¹¹ Cavintum raꞌ jebetiñeꞌ mọꞌ shush, judyeyaꞌ chimeꞌ jämꞌ yụꞌtaĉamꞌ quịꞌsiꞌ judyeyaꞌ yujches miꞌin, chimeꞌdye raꞌ unĉan mutyudyeꞌ miꞌin, meꞌ buꞌyi raꞌ jäꞌmiiꞌtyi miꞌin jebetiñeꞌ. Ọij feshta Jiꞌc̣honacdyes yụ́dyes jämꞌtyiyitiĉamꞌ.

¹² Mọꞌdye raꞌ tsedyedyeꞌ yụ raꞌ räj ĉọcsecbi acaꞌ Egiptoĉansiꞌ muꞌin, ijacsi raij räj tashchety ạvaꞌ sonꞌ muꞌin Egiptoĉantyiꞌ in, judyeyaꞌ chimeꞌ räj tashchety cuꞌdyety ạvaꞌ mọꞌin. Chimeꞌdye yụ raꞌ räj soꞌmacsebi tsäquiꞌsis mọꞌ jenꞌtuiꞌsiꞌ muntyiꞌ in, meꞌ yi yụ ĉaĉaij nash yụ anictyity Ayoꞌ.

¹³ Mọꞌ cuꞌdyes chäsh yụꞌtiñeꞌ raꞌ chụiꞌdyeꞌyaꞌ jịꞌĉocdyes raꞌ mọꞌ acaꞌ junꞌĉan chuc miꞌin. Aty raꞌ ijacsetiyaꞌ yụ Egiptoĉantyiꞌ ạvaꞌ in, miꞌin na raꞌ jam yirity säñi, yụ raꞌ cạveꞌ mọꞌ chäsh ñụiꞌ raꞌ muꞌyaꞌ tyeij yụ.

¹⁴ Miꞌin räjĉan raꞌ dyijtutiñeꞌ mọꞌ mạyedyeꞌ, därsiꞌ raꞌ feshta jämꞌbajtiñeꞌ yụ́dyes ĉaĉaij nash yụ Ayoꞌ miꞌin. Jam raꞌ yaquintutiñeꞌ mọꞌ feshta Jiꞌc̣honacdyes miꞌin. Räjĉan raꞌ jämꞌtiñeꞌ miꞌin, judyeyaꞌ raꞌ vóshiꞌ miꞌin chimeꞌ.

Feshta jam dujrity pan

¹⁵ "Feshtaij jụijyaꞌ miꞌin jebetinte raꞌ pan jam dujrity, yävätidyeꞌ raꞌ mạyedyeꞌ meꞌquiꞌ raꞌ jam jebetinte dujrity pan. Tashcheꞌsiꞌ raꞌ mạyedyeꞌ feshtas tas raꞌ mọꞌ vaꞌquectiñeꞌ jiꞌdujraquis acaꞌĉansiꞌ. Tyi chuc jebete muꞌ dujrity pan mọꞌ mạyedyeꞌ in, muꞌ raꞌ vaꞌcac, aty raꞌ jam Israeltyiꞌ buꞌyi vóshiꞌ.

¹⁶ Mọꞌ tashches mạyedyeꞌ feshtas judyeyaꞌ mọꞌ yävätidyeꞌyis mạyedyeꞌ chimeꞌ tsudyujñitidyeꞌ raꞌ jämꞌtiñeꞌ yụ́dyes, jam raꞌ carijtaqui miꞌin, meꞌdye raꞌ säcsedyeꞌ mọmoꞌ tupuj jämꞌtaqui cäts yirity in.

¹⁷ Meꞌ raꞌ räjĉan dyijtutiñeꞌ miꞌin mọꞌ feshta jam dujrity pan, ĉaĉaij na mọꞌdye raꞌ mạyedyeꞌ yụ raꞌ jiꞌc̣honyac räj miꞌin jiꞌshupqueyac raꞌ úĉantyiꞌ Egiptoĉantyiꞌ miꞌin. Mọꞌdyes raꞌ räjĉan mọꞌ dyijtutiñeꞌ mạyedyeꞌ. Jemoñeꞌ chimeꞌ ạvaꞌ jịꞌchiqueyaqui miꞌin judyeyaꞌ vóshiꞌ miꞌin paj qui muꞌin yejĉoiꞌ dyijtujijcaiꞌ in.

¹⁸ Mọꞌ mạyedyeꞌ yiriꞌtac vạjpedyeꞌ jiyis tashchetyĉan ịvaj, yómoꞌ raꞌ meꞌquiꞌdye jebetinte muꞌ dujrity pan, junꞌ quiꞌ chuc chaꞌshetiñeꞌ mọꞌ mạyedyeꞌ päräꞌ quiꞌtac yiris jiyis yómoꞌ, q̂uinꞌdyemꞌ raꞌ cuvij jebebajtinte dujrity pan.

¹⁹ Räj mọꞌ yävätidyeꞌ mạyedyeꞌ feshtas mijam raꞌ méquiꞌ jiꞌdujraquis acaꞌĉan miꞌin. Tyi chuc jebetety dujrity pan jụijyaꞌ, muꞌ raꞌ vaꞌcac, paj tsanꞌ chätidyeꞌ miꞌin, paj tsanꞌ yoctyiꞌ jụijyaꞌ muꞌ, muꞌ raꞌ aty jam penꞌdyetunac Israeltyiꞌ vóshiꞌ miꞌin.

²⁰ Mọꞌdyes jam raꞌ jebetiñeꞌ dujris säcsedyeꞌ. Paj tsanꞌ junaꞌ ĉụiꞌ bäꞌyi jụijyaꞌ miꞌin jemoñeꞌ raꞌ jebetinte jam dujrity pan", jéyacseva muntyiꞌ in —Ayoꞌ jajiti Moisés judyeyaꞌ Aarón.

Tashches feshta Jiꞌc̣honacdyes

²¹ Muꞌ Moisés jiꞌvorvacseban räj muꞌin tashcheꞌ buꞌyity in Israeltyiꞌ vóshiꞌ in, jéyacsi: —Tạij miꞌin tsimꞌtacac oveca banꞌtyity, paj tsanꞌ chivo jụijyaꞌ, ĉụiꞌtyidyety raꞌ chätidyeꞌ miꞌin. Ijatinte raꞌ Jiꞌc̣honacdyedyety feshta.

²² Yụꞌbitinte raꞌ chäsh jäꞌchäsĉan, chat qui raꞌ jäcbitiñeꞌ shan hisopos mọꞌ c̣hucjetiñeꞌ raꞌ chäshĉan judyeyaꞌ raꞌ taiꞌjetiñeꞌ chụiꞌdyeꞌ tap buꞌyiꞌcheꞌ. Mijam raꞌ shupqui acaꞌĉan miꞌin, junꞌ quiꞌ chuc nạijjoiꞌ.

²³ Atsijyaꞌ raꞌ muꞌ Ayoꞌ ijacseti Egiptoĉantyiꞌ muntyiꞌ in, cạveꞌ raꞌ muꞌ chäsh chụiꞌdyeꞌyas, ñụiꞌ raꞌ muꞌyaꞌ tyeij. Muꞌ raꞌ ñutsjeĉunꞌte muꞌ ijacsity anjer paj qui jam siti miꞌinsiꞌĉan acaꞌ.

²⁴ Ọij p̂eyacdyeꞌ miꞌindyes q̂uinꞌ judyeyaꞌ ạvadyes miꞌin judyeyaꞌ vóshidyes miꞌin, jam raꞌ junꞌ mọtsiꞌ ọij p̂eyacdyeꞌ miꞌin.

²⁵ Aty raꞌ muꞌĉan jụijyaꞌ jacĉan miꞌin, mọꞌ soꞌminacsiꞌ raꞌ Ayoꞌ yoj yidyemꞌ muꞌ jiquej u, jemoñeꞌ raꞌ räjĉan jämꞌtiñeꞌ ọij feshta.

²⁶ Jämꞌdyeyaꞌ raꞌ ạvaꞌ miꞌin jínac jụijyaꞌ miꞌin: ¿Jedyeꞌ buty cạiꞌ ọij feshta?"

²⁷ Chat qui raꞌ miꞌin jéyaqui ạvaꞌ miꞌin: "Räjĉan yómodyeꞌ ijajaꞌ mọꞌ cuꞌdyeꞌ Ayodyes paj qui dyijtujaꞌ mọꞌ tashches jiꞌc̣honacdyeꞌ jiquej, yoquiꞌdyemꞌ muꞌ Jenꞌ ijacsi Egiptoĉantyiꞌ jiquej in, judyeyaꞌ ñụiꞌ tyeij tsunsiꞌyaꞌ acaꞌ Israeltyisyaꞌ vóshiꞌ tsun Egiptoĉan, meꞌ muꞌ jiꞌc̣hoñin jiquej tsun", yi raꞌ jéyaqui ạvaꞌ miꞌin jịꞌchiqueyaqui miꞌin —jéyacsi muꞌ Moisés. Muꞌin Israeltyiꞌ vóshiꞌ muꞌ dyụtsyi muꞌin in timaꞌquete Jenꞌ in.

²⁸ Chat qui jọban in jämꞌtyeꞌ feshta in, yoj yidyemꞌ Ayoꞌ u jéyacsi muꞌ Moisés judyeyaꞌ Aarón.

Sänꞌdyeꞌ tashchety ạvaꞌsiꞌ in

²⁹ Tsedyedyeꞌ, menyaꞌ muꞌ Ayoꞌ ijacsi räj tashchety ạvaꞌ Egiptoĉantyiꞌ in, paj tsanꞌ ayoꞌtyiꞌ ạvaꞌ muꞌ, paj tsanꞌ ĉärꞌtactyiꞌ muntyity ạvaꞌ in, judyeyaꞌ chimeꞌ räj tashchety cuꞌdyety ạvaꞌ mọꞌ.

³⁰ Nạijjoquiꞌve sacyi muꞌ ayoꞌ, judyeyaꞌ nọ́taquity muꞌ, judyeyaꞌ räjtumdye muꞌĉan bäꞌyity in, anic därsiꞌ táredyeꞌ muꞌin, anic fer táraqui ạvaꞌvun muꞌin, uyaꞌquiꞌdyi shaviviiꞌtyiꞌ in. Yósiꞌdyemꞌ acaꞌ o, meꞌsiꞌdye chụchujduduꞌ säñity in, mijam yiris acaꞌ ñụiꞌ.

³¹ Junꞌ quiꞌ ĉụiꞌ mọmoꞌ nạijjoquiꞌve tsedyedyeꞌ, muꞌ ayoꞌ pärenꞌdye jiꞌvorvacsi Moisés judyeyaꞌ Aarón, jéyacsi: —Tạij jọbadac miꞌin räjtumdye raꞌ miꞌin Israeltyiꞌtum vóshiꞌ miꞌin, yajquibadac ọij bäꞌyedyeꞌ tsunsiꞌ judyeyaꞌ muntyiꞌ yụ, tạij miꞌin timaꞌquecmac muꞌ Ayoꞌ yoj jitiĉaꞌdyemꞌ jiquej u miꞌin.

³² Cuꞌdyeꞌtum miꞌin oveca miꞌin judyeyaꞌ vaca miꞌin, junꞌ chuc mạꞌjetiñeꞌ jiquej. Chimeꞌdye cọdyemac muꞌ Jenꞌ yụ́dyes paj qui muꞌ Jenꞌ ñútyin yụ —jéyacsi muꞌ ayoꞌ.

³³ Egiptoĉantyiꞌ muntyiꞌ in cavin jiꞌcavintacsi in Israeltyiꞌ vóshiꞌ in paj qui cavintum yacchucsebi bäꞌyedyeꞌ in, ĉaĉaij na muꞌin anic noiꞌyi in, jeñej raꞌ räjtum meꞌjeyac ĉúti in.

³⁴ Muꞌin Israeltyiꞌ vóshiꞌ in jäcaqui in jämꞌtactyiꞌ pan jambiꞌ bijtyeyactyiꞌ jiꞌdujraquis chat qui cacaĉan in, mọꞌtumdye yóĉandyemꞌ yụꞌtacĉan u. Comomonꞌ quịꞌsiꞌĉan yụꞌte in bijbicheꞌ vememeꞌ cạqui in.

³⁵ Chimeꞌdye cọdyetacsi in Egiptoĉantyiꞌ in, oro muꞌin judyeyaꞌ plata muꞌin judyeyaꞌ quịꞌsiꞌ chimeꞌ muꞌin, yoj jeyacsidyemꞌ Moisés jiquej u.

³⁶ Muꞌ Ayoꞌ yi paj qui muꞌin Egiptoĉantyiꞌ in irijyi muꞌincheꞌ in, mọꞌdyes qui muꞌin ñịbeꞌjeyacsi Israeltyiꞌ vóshiꞌ in jedyeꞌ chuc cọdyetaqui in. Meꞌ muꞌin Israeltyiꞌ vóshiꞌ in c̣hiconꞌjeyacsebi in Egiptoĉantyis jedyeꞌ muꞌin.

Israeltyiꞌ vóshiꞌ in shuban Egiptoĉantyiꞌ in

³⁷ Israeltyiꞌ vóshiꞌ muꞌ sacti in, Ramsésĉantyiꞌ shuban in, Sucotve chum jịjcaij in. Jäbän quiꞌ cien mir ishoꞌmuntyiꞌ sonꞌ in, jam p̂entum tsicsi in mijam miquiꞌmuntyiꞌ in.

³⁸ Daiꞌmun cạqui cuꞌdyeꞌ muꞌin, oveca muꞌin judyeyaꞌ vaca muꞌin, ọyaꞌquiꞌ ñuruꞌjijcatiꞌ muꞌin. Uts na yoctyiꞌ muntyiꞌ daiꞌ cäc̣häꞌchucsi chimeꞌ in, jam Israeltyiꞌ vóshiꞌ in.

³⁹ Yóyaꞌdyemꞌ dyäqui u in, muꞌyaꞌ faratuqui in jam jiꞌdujraquistumtyiꞌ pan, ĉaĉaij na cajotyitidyeꞌtum in sacti jiquej in, itŝiꞌ qui tupudyeꞌ jämꞌte in jiquej.

⁴⁰ Meꞌdye muꞌin Israeltyiꞌ vóshiꞌ in men Egiptoĉan bäꞌyi in, vạjpedyeꞌ quiꞌ cien, chibin quiꞌtac yómodyeꞌ meꞌquiꞌ muꞌĉan bäꞌyi in.

⁴¹ Cạ̈tsiꞌ mọmoꞌ mọꞌ meꞌsiꞌ mạyedyeꞌ mọꞌdye mạyedyeꞌ shupqui in Jenꞌtyiꞌ muntyiꞌ muꞌ, cäts ñuruꞌ jịjcaij in Israeltyiꞌ vóshiꞌ in, yacchuiꞌ in mọꞌ bäꞌyedyeꞌ Egipto.

⁴² Tsedyedyeꞌ muꞌ Ayoꞌ jämꞌ ĉọjcacsi muꞌin paj qui shuban in Egiptoĉantyiꞌ in. Mọꞌdyes räjĉan yómodyeꞌ aty chaꞌsheꞌyaꞌ in mọꞌdye tsedyedyeꞌ, jemoñeꞌ muꞌin Israeltyiꞌ vóshiꞌ in veꞌi Ayoꞌcheꞌ in, dyijtuban in jiꞌc̣honacdyeꞌ in Egiptoĉansiꞌ jiquej, mijam raꞌ junꞌ mọtsiꞌ mọꞌ dyijtucdyeꞌ muꞌin, räjĉan buꞌyiꞌ raꞌ.

Yụꞌtacdyeꞌ feshtadyesiꞌ Jiꞌc̣honacdyes

⁴³ Ayoꞌ jajiti muꞌ Moisés judyeyaꞌ Aarón: —Ọij p̂eyacdyeꞌ q̂uinꞌ p̂eyeꞌ mọꞌ feshtadyes yụꞌtacdyeꞌ Jiꞌc̣honacdyes: Muꞌin yoctyiꞌdye muntyiꞌ in jam Israeltyiꞌ vóshiꞌ in muꞌin raꞌ jam jebeiꞌ in mọꞌ shush feshtadyes.

⁴⁴ Muꞌin na úñity yaꞌijtyiꞌ miꞌin, meꞌ tsanꞌ yoctyiꞌdye muꞌin in aty seiꞌtactyiꞌ aꞌ jụijyaꞌ muꞌin in, muꞌin tupuj jebetacsi muꞌin in mọꞌ shush jebeiꞌsiꞌ in.

⁴⁵ Muꞌin na yocve jijtuijtyiꞌ in judyeyaꞌ muꞌin yoctyiꞌdye yaꞌitactyiꞌ úñity mọmoꞌ in muꞌin raꞌ jam junꞌ jebetacsi in.

⁴⁶ Yirisĉan raꞌ mọmoꞌ acaꞌ tas jebetiñeꞌ mọꞌ shush, jam raꞌ méquiꞌ jiꞌshuptiñeꞌ jorojyaꞌ. Mijam raꞌ tocjeyac jin mọꞌ chimeꞌ.

⁴⁷ Ọij feshtadyes p̂eyacdyeꞌ q̂uinꞌ räjdyes muꞌin Israeltyidyes vóshiꞌ in, räj raꞌ chiqueꞌ muꞌin in.

⁴⁸ Muꞌyaꞌ yoctyiꞌdye muntyiꞌ jụijyaꞌ in mạꞌjeꞌ muꞌinmun feshtaij jụijyaꞌ in Jiꞌc̣honacdyes, jemoñeꞌ tashcheꞌ chum seiꞌtac aꞌ muꞌin, räjtumdye chätidyeꞌ muꞌin, chat q̂uinꞌdyemꞌ raꞌ jebetacsi in. Tyi chuc jam seiꞌtactyiꞌ aꞌ jụijyaꞌ in muꞌin raꞌ jam junꞌ jiꞌcäc̣häꞌñiti muꞌyaꞌ in jebetacsi in.

⁴⁹ Ọij p̂eyacdyeꞌ räjdyes in, paj tsanꞌ Israeltyiꞌ vóshiꞌ in, paj tsanꞌ yoctyidyes muntyiꞌ in jajbuꞌyinactyiꞌ in.

⁵⁰ Anicdye meꞌ muꞌin Israeltyiꞌ vóshiꞌ in, seꞌvepte Ayoꞌsiꞌ p̂eyacdyeꞌ in, yụꞌtyeyeyacsis jiquej muꞌ Moisés Aaróntum.

⁵¹ Mọꞌdye mạyedyeꞌ muꞌ Ayoꞌ jiꞌshupcacseban Egiptoĉantyiꞌ muꞌin Israeltyiꞌ vóshiꞌ in, cäts ñuruꞌ jịjcaij in Jenꞌtyiꞌ muntyiꞌ muꞌ.