Exodo 10 - Tsimane

Vaꞌtacdyeꞌ shíñu

¹ Ayoꞌ jajiti muꞌ Moisés: —Quivij ĉọcme muꞌ ayoꞌ. Yụ nash jiꞌyäjquepte ĉojtyiꞌ muꞌ judyeyaꞌ nọ́taquitytyiꞌ chimeꞌ muꞌ paj qui yụ därsiꞌ jịꞌcaveyacsi ferdyeꞌ yụ.

² Mi qui raꞌ tupuj jéyaqui ạvaꞌ mi judyeyaꞌ vịyaꞌ mi junꞌ chuc yụ ĉụiꞌsiꞌyaꞌ ferdyeꞌ yụ vaꞌtacdyeꞌ soꞌmacsi Egiptoĉantyiꞌ in, jịꞌcaveyacsi yụ därsiꞌ ferdyeꞌ. Meꞌ raꞌ chat räj chäyitiĉaꞌ yụ miꞌin anictyity Ayoꞌ yụ —yi Ayoꞌ.

³ Anicdye meꞌ, muꞌ Moisés Aaróntum ĉọcte in muꞌ ayoꞌ jéte in: —Meꞌ nash yi muꞌ Jenꞌ Ayoꞌ hebreoty in, muꞌ jin mi: "¿Junꞌsiꞌ bu raꞌ farajjeꞌ vaꞌbunyedyeꞌ yụ́cheꞌ mi? Farajjibutiꞌ yụ́tyiꞌ muntyiꞌ in paj qui timaꞌquin yụ in.

⁴ Yejĉoij ñúbutiꞌ jụijyam, jam farajjibutiꞌ jụijyam, nojno raꞌ mạyedyeꞌ yụ raꞌ juteꞌ shíñu miꞌinyaꞌ,

⁵ anic raꞌ shach tŝọiꞌ ọ́ĉan, tyes raꞌ tyeiꞌ mụijyaꞌ, mijam raꞌ jorojĉan jac. Tasjeꞌ raꞌ cä́tidyeꞌ in jiꞌshuques jiquej tsafaꞌ, paj raꞌ tsanꞌ sonsiꞌ shan tas raꞌ tyejoiꞌ.

⁶ Sät raꞌ tŝọiꞌ acaꞌĉan mísĉan in judyeyaꞌ nọ́taquitysiꞌĉan mi, judyeyaꞌ räj Egiptoĉansiꞌ acaꞌ. Anic raꞌ mọjoꞌchaꞌ tsäquiꞌ in, jam raꞌ jeñej jiquej cạves jenꞌ jiquej miꞌin judyeyaꞌ vịyaꞌ miꞌin, jam jämꞌdyeyaꞌ meꞌ cạveꞌ jiquej in urucyaty vóshiꞌ miꞌin", meꞌ jin mi muꞌ Jenꞌ. Aty ijaij muꞌ p̂eyaqui Moisés chat shuban qui ayosĉantyiꞌ acaꞌ muꞌ.

⁷ Muꞌin nọ́taquity ayoꞌtyiꞌ muꞌ jéte in: —¿Junꞌsiꞌ buty raꞌ farajjeꞌ meꞌsinꞌ uts muntyiꞌ? Damꞌdye jämꞌ farajjeyacseva uts muntyiꞌ in paj qui muꞌin timaꞌquete in muꞌ Jenꞌ Ayoꞌ muꞌin. ¿Jämꞌ buty tacaꞌ ĉọiꞌ mi ọij jac tsun Egipto? ¿Jam adac chịj mi aty ac̣hiꞌjoiꞌ?

⁸ Muꞌ qui ayoꞌ pärenꞌdye jiꞌvorvacsi muꞌ Moisés judyeyaꞌ muꞌ Aarón jéyacsi: —Tupuj timaꞌquectinte muꞌ Jenꞌ Ayoꞌ miꞌin. Tashi raꞌ jítiĉaꞌ yụ miꞌin: ¿tyijtyi bu raꞌ miꞌin?

⁹ Vorjete Moisés: —Räjdye raꞌ muꞌve jịjcaij tsun, vajru miquity in, judyeyaꞌ ishoꞌ in judyeyaꞌ ạvaꞌ tsuntyiꞌ chimeꞌ, cạqui raꞌ cuꞌdyeꞌ tsun chimeꞌ, därsiꞌ raꞌ feshta jämꞌtyeꞌ tsun Ayodyes.

¹⁰ Muꞌ ayoꞌ jéyacsi: —Anic jorojĉan aꞌc̣his dyijyedyeꞌ miꞌin jam jämꞌsiꞌ, jeñej aty Ayoꞌ penꞌdyetunac ĉúti u miꞌin. Yụ raꞌ jam junꞌ farajjebiyac p̂en miꞌin judyeyaꞌ ạvaꞌ miꞌin,

¹¹ jam raꞌ junꞌ meꞌ. Mạꞌjeꞌ timaꞌquectinte muꞌ Ayoꞌ jụijyaꞌ miꞌin, yedyety ramꞌ son miꞌin, yojdyemꞌ cudyityitiĉaꞌ yụ u miꞌin —yi muꞌ ayoꞌ jéyacsi. Chat qui muꞌ ayoꞌ fạ́codyeꞌtum jutacsi paj qui jiꞌshupcacsi in muꞌsiꞌyaty vej in.

¹² Jenꞌ jajiti Moisés: —C̣họcoꞌjeyaca un mi Egiptoĉan paj qui ayij shach shíñu in, mọꞌin raꞌ tasjeꞌ in Egiptoĉansiꞌ cä́tidyeꞌ muꞌin mọꞌ jiꞌshuques tsafaꞌ jiquej.

¹³ Meꞌdye c̣họcoꞌjeyaqui un muꞌ Egiptoĉan. Ayoꞌ yụꞌte pamꞌvety tyiꞌmu, dyutsenꞌ mạyedyeꞌ dyutsenꞌ tsedyedyeꞌ, meꞌquiꞌ fujvaꞌti tyiꞌmu, tuiꞌtyiꞌ shíñu. Nojnodye mạyedyeꞌ nạijjoiꞌ shach shíñu in,

¹⁴ räj buꞌyiꞌ Egiptoĉan in, anic mọjoꞌchaꞌ sät tŝọiꞌ, jam jämꞌdyeyaꞌ meꞌ jiquej cạveꞌ in, mijam raꞌ cuvij joꞌmes cạvebanꞌ in.

¹⁵ Anic tyes tyeiꞌ mụijyaꞌ, mijam jorojĉan jac. Tas vatyquej jiꞌtyeꞌ jebeiꞌ cä́tidyeꞌ in judyeyaꞌ räj sacacdyeꞌ in jiꞌshuques tsafaꞌ jiquej. Mọꞌ mọꞌin tasjebanꞌ in Egiptoĉansiꞌ cä́tidyeꞌ in, räj sonsiꞌ shan tyejoiꞌ, jam méquiꞌ jiꞌshuqueꞌ in.

¹⁶ Meꞌĉandye muꞌ ayoꞌ pärenꞌdye jiꞌvorvacsi muꞌ Moisés Aaróntumdye, jéyacsi: —Yụ juchaj soꞌmete Jenꞌ Ayoꞌ miꞌin judyeyaꞌ miꞌin chimeꞌ juchatuyac.

¹⁷ Mọꞌdyes qui yụ yiriꞌdyety raꞌ cọdyetyeyac paj qui aty jam miꞌin dyijtubutiĉaꞌ juchaj yụs miꞌin. Yụ́dyes cọdaĉamꞌ Jenꞌcheꞌ Ayoꞌcheꞌ miꞌin paj qui muꞌ meijjebanꞌ ọij vaꞌtacdyeꞌ shíñu in paj qui jam säñi yụ.

¹⁸ Muꞌ Moisés shuban ayosĉantyiꞌ acaꞌ muꞌ cọdaqui qui Jenꞌcheꞌ.

¹⁹ Muꞌ qui Jenꞌ camanꞌjebajte tyiꞌmu, siticheꞌ tsun muꞌcheꞌ qui jijtuban, vaꞌcacseĉan räj shíñu in Mar Jäijnäsĉan jịꞌtŝocsi, mijam yiris méquiꞌ jiꞌyajcatiꞌ in.

²⁰ Muꞌ na Jenꞌ quivij jiꞌyäjquepte ĉojtyiꞌ muꞌ ayoty, mijam muꞌ méquiꞌ farajjeyacseban Israeltyiꞌ vóshiꞌ muꞌ.

Vaꞌtacdyeꞌ tojmas

²¹ Chat qui muꞌ Ayoꞌ jajiti Moisés: —C̣họcoꞌjeyaca un mi paj qui tojmas ayij räj buꞌyiꞌ Egiptoĉan paj quivꞌdyeiꞌ tyeiꞌ mọꞌ tojmas.

²² Meꞌdye muꞌ Moisés mạyedyeꞌcheꞌ c̣họcoꞌjeꞌ un muꞌ, tojmas qui ayij räj buꞌyiꞌ Egiptoĉan, anic quivꞌdyeiꞌ tyeiꞌ mọꞌ.

²³ Chibin mạyedyeꞌ meꞌ buꞌyiꞌ, mijam méquiꞌ jorojĉan Egiptoĉantyiꞌ in, mijam junꞌ naijtidyeij in mijam junꞌ shupqui acaꞌĉan in. Muꞌinsiꞌ na bäꞌyedyeꞌ muꞌin Israeltyis vóshiꞌ in itŝiꞌ méquis mọꞌĉan joꞌmes.

²⁴ Chat qui muꞌ ayoꞌ jiꞌvorvebajte muꞌ Moisés, jéte: —Tạij miꞌin timaꞌquecmac Ayoꞌ, cạqui raꞌ ạvaꞌ miꞌin yoj jitiĉaꞌdyemꞌ jiquej u miꞌin, paj tacyaꞌ cuꞌdyeꞌ miꞌin.

²⁵ Vorjete muꞌ Moisés: —Meꞌ jụijyaꞌ tsun, mi bu raꞌ soꞌmitiĉaꞌ tsun miꞌin cuꞌdyeꞌ jiꞌcoꞌshayacdyedyes Jenꞌdyes Ayoꞌ tsun.

²⁶ Jam raꞌ junꞌ meꞌ, ĉụiꞌsiꞌ raꞌ räj cạqui tsun mijam raꞌ yiris vodoꞌ jiꞌyajcatiꞌ. Tsundye raꞌ tsimꞌtacsi pạrej yụꞌtacsi jiꞌcoꞌshayacdyedyes Jenꞌdyes Ayoꞌ tsun. Jambiꞌdyemꞌ chịj q̂uinꞌ tsun jụꞌñis chuc raꞌ tsimꞌtacsiꞌ tsun. A na raꞌ venjoijyaꞌ tsun, q̂uinꞌdyemꞌ raꞌ chịj tsun jụꞌñis chuc raꞌ jiꞌcoꞌshayac in Ayodyes.

²⁷ Muꞌ na Jenꞌ jiꞌyäjquepte ĉojtyiꞌ muꞌ ayoty, mijam méquiꞌ farajjeyacsi.

²⁸ Yi mọmoꞌ muꞌ ayoꞌ jéte Moisés: —Tạij shubada mi, jam raꞌ damꞌ tänꞌjishunꞌ mi, mọꞌ mạyedyeꞌ caꞌñibun jụijyaꞌ mi, mọꞌdye raꞌ mạyedyeꞌ ijac mi.

²⁹ Moisés vorjete: —Anic raꞌ meꞌ, aty raꞌ jam junꞌ quivij tänꞌjeshadyeye mi.