Exodo 1 - Tsimane

Israeltyiꞌ vóshiꞌ muꞌ Egiptoĉan in

¹ Ọij nash tịj muꞌin Jacobtyiꞌ chätidyeꞌ muꞌ, yocsiꞌ tịj muꞌ Israel jasoꞌmitis Jenꞌ jiquej, Egiptoĉan cạcsity jiquej muꞌ, ạvaꞌ muꞌ judyeyaꞌ p̂en muꞌin judyeyaꞌ ạvaꞌ muꞌin chimeꞌ.

² Meꞌ meꞌ tịj muꞌin: Rubén, Simeón, Leví, Judá,

³ Isacar, Zabulón, Benjamín,

⁴ Dan, Naftalí, Gad judyeyaꞌ Aser, meꞌ meꞌ in Israeltyiꞌ ạvaꞌ muꞌ.

⁵ Räjdye uts in Jacobtyiꞌ chätidyeꞌ muꞌ Egiptoĉan jịjcaijtyiꞌ in, yävätidyeꞌ quiꞌtac rụiꞌcuꞌ in. Muꞌ na José aty muꞌ tạꞌcaty muꞌĉan Egiptoĉan.

⁶ Aty daiꞌ yómodyeꞌ säñi muꞌ José, chat qui vojity muꞌ räj sänjan in, jäquiꞌve sänjan ạvaꞌ muꞌin chimeꞌ.

⁷ Muꞌin qui namꞌ Israeltyiꞌ vóshiꞌ muꞌ yejĉoij dayi in, judyeyaꞌ yejĉoij ạvaꞌyi in, mọꞌdyes qui fer buꞌyi in ĉaĉaij na jiyi daiꞌ muꞌin in Egiptoĉan in, bänꞌ buꞌyi muꞌĉan in.

Ñịbedyes jịꞌĉojtyeꞌ in Israeltyiꞌ vóshiꞌ muꞌ

⁸ Aty men chat qui yoctyiꞌ siti ayoꞌ Egiptoĉan, jam muꞌ dyijtubajte Josévun jiquej.

⁹ Muꞌ ayoꞌ jéyacsi nọ́taquity muꞌ: —Muꞌin Israeltyiꞌ vóshiꞌ muꞌ meij mọmoꞌ dayi in, tsun na jam meꞌ. Anic tsäquiꞌ buꞌyiꞌ tsundyes q̂uinꞌ.

¹⁰ Damꞌdye jämꞌ dyäcjeyacsejaꞌ uts in paj qui jam yejĉoij dayi in. Areꞌĉa atsij vatyquej in yocsiꞌvety bäꞌyedyeꞌ in, vatyquej raꞌ uts nọ́tacsi in, chusinꞌ tsun in, vatyquej raꞌ ĉaꞌjoban in —yi muꞌ Egiptoĉantyiꞌ ayoꞌ.

¹¹ Chat qui muꞌin ayoꞌ in dyijyi in, mọꞌdyes qui úñity yụꞌtacsi in muꞌin Israeltyiꞌ vóshiꞌ in. Anic ĉọjcacĉan yụꞌtacsi in, anic fer jiꞌunacsi in. Päräꞌ bäꞌyedyeꞌ jämꞌtyeꞌ in muꞌĉantyidyes ayoꞌ, tịj mọꞌin Pitón judyeyaꞌ Ramsés. Mọꞌĉan muꞌ ayoꞌ jämꞌjeꞌ säcsedyeꞌ jiquej.

¹² Dadamꞌ fer meꞌtacsi in Israeltyiꞌ vóshiꞌ muꞌ, dadamꞌ mujuꞌchaꞌ dayi in, meꞌdyes qui muꞌin Egiptoĉantyiꞌ in damꞌdye mujuꞌchaꞌ quijnacsi in.

¹³ Chat qui muꞌin Egiptoĉantyiꞌ in dadamꞌ jiꞌunacsi in muꞌin Israeltyiꞌ vóshiꞌ muꞌ,

¹⁴ anic ñịbeꞌ jịꞌcavacsi in, radriyocheꞌ vaꞌcacsequi in judyeyaꞌ quịjodyeꞌĉan, chimeꞌ jam damꞌ ñịbeꞌ ĉọcsi in.

¹⁵ Chimeꞌdye muꞌ ayoꞌ soꞌmacsi p̂eyacdyeꞌ mọꞌinsiꞌ ayoꞌ mọꞌin jiꞌbasacsis hebreo in, tịj mọꞌin Sifra judyeyaꞌ Fúa. Jéyacsi:

¹⁶ —Jiꞌbasacsiꞌ hebreo jụijyaꞌ miꞌin cạvacsi raꞌ miꞌin, p̂en raꞌ naꞌiꞌ jụijyaꞌ, jam raꞌ ijatiñeꞌ, sonꞌ na raꞌ naꞌi jụijyaꞌ ijatinte raꞌ.

¹⁷ Mọꞌin qui namꞌ jiꞌbasacsis in jam mọꞌin chiquepte p̂eyacdyeꞌ ayos in, irijyiꞌ mọꞌin Jenꞌcheꞌ in, jam ijate sonꞌ naꞌiyaꞌ in.

¹⁸ Muꞌ qui ayoꞌ fayacseban jiꞌbasacsis in, jéyacsi: —¿Junꞌ dash jam ijatinte joijnoꞌ sonꞌ naꞌity?

¹⁹ Jiꞌbasacsis vorjete in: —Ĉaĉaij na p̂en hebreo in anic cavintum basdyiꞌ in, jam jeñej Egiptoĉansiꞌ p̂en in, jambiꞌdyemꞌ ventacsequiꞌ tsun aty mọꞌin ĉụiꞌ basdyiꞌ in —jéte in.

^20-21 Meꞌdyes qui yejĉoij dayi in Israeltyiꞌ vóshiꞌ muꞌ, dadamꞌ yejĉoij fer buꞌyi in. Chimeꞌdye muꞌ Jenꞌ anic nọ́tacsi mọꞌin jiꞌbasacsis in, muꞌ soꞌmacsi ạvaꞌ daiꞌ, ĉaĉaij na mọꞌin irijyiꞌ muꞌcheꞌ in.

²² Muꞌ ayoꞌ yụꞌtyeꞌ p̂eyacdyeꞌ räjdyes muntyiꞌ in, yiꞌ: —Yụ raꞌ jéyac: Vaꞌcacsequi raꞌ miꞌin cojiroĉan räj hebreoty ạvaꞌ mọꞌin sonꞌ naꞌity in, p̂en na raꞌ naꞌiꞌ jụijyaꞌ paj mọꞌyaꞌ jam raꞌ vaꞌcacsequi miꞌin —yi jéyacsi.