Efesoĉantyidyes 2 - Tsimane

Jenꞌ vañinjibusinꞌ tsun sänꞌdyeꞌĉan bäꞌjaty jiquej

¹ Miꞌin jiquej sänꞌdyeꞌĉan bäꞌyi ĉaĉaij na juchaj jiꞌsännac miꞌin jiquej, mijam chiquetinte Jenꞌ jiquej.

² Meꞌ jiquej bäꞌyi miꞌin cäc̣häꞌchucsebi miꞌin aꞌc̣his dyijyedyeꞌ muꞌin jacchetysiꞌ muntyiꞌ in, mọmꞌ cäc̣häꞌchubitinte dyijyedyeꞌ sọyotysiꞌ ayos mọꞌin, mọꞌin taiꞌyaꞌ bäꞌyis in, mọꞌin bächäcsis in jam chiquetety Jenꞌ in.

³ Tasdye jiquej meꞌ bäꞌjaꞌ tsun, junꞌ chuc mạꞌjeꞌ aꞌ tsun jämꞌtaquiꞌ, mọmꞌ cạjaꞌ tsun, ĉụiꞌsiꞌyaꞌ dyijyedyeꞌ aꞌc̣his cạjaꞌ tsun. Anic tsäquiꞌsisĉandyety jiquej tsun vaj meꞌ yoctyiꞌtum úchety muntyiꞌ in, ĉaĉaij na juchajtum naꞌejaꞌ tsun.

⁴ Muꞌ na Jenꞌ där ñịbeꞌ ĉọcsity, anic fer mạꞌjisinꞌ tsun.

⁵ Meꞌ tsanꞌ sänꞌdyeꞌĉan bäꞌjaꞌ jiquej tsun, muꞌ qui namꞌ Jenꞌ vañinjibusinꞌ tsun, yiriꞌyaꞌdye Cristotum vañinjibusinꞌ jiquej, meꞌ muꞌ Jenꞌ ñịbeꞌjitidyesyaꞌ muꞌ jiꞌc̣honnac miꞌin.

⁶ Jesucristotum muꞌ vañinjibusinꞌ, judyeyaꞌ mạyedyeꞌcheꞌ jiꞌbäꞌyisinꞌ q̂uinꞌ, meꞌ buꞌjaꞌ tsun, aty Cristotum tsun räj Cristoty tsun.

⁷ Mọꞌ yuꞌtyiyisinꞌ meꞌ raꞌ muꞌ yejĉoij jorojĉanjeyacsi junꞌ chuc muꞌ där mạꞌjisinꞌ tsun, anic där ñịbeꞌjisinꞌ Cristoyaꞌ. Räjĉan raꞌ muꞌ meꞌ yejĉoij jorojĉan jịꞌĉoyacsi mọꞌ därsiꞌ mạꞌjitidyes muꞌ tsundyes.

⁸ Jenꞌ ñịbeꞌjitidyesyaꞌ muꞌ jiꞌc̣honnac miꞌin anicyedyeꞌyaꞌ miꞌin, mijam junꞌ buꞌyi tupuj ĉụiꞌ jiꞌc̣honti miꞌin, ñịbeꞌjitidyesyaꞌ muꞌ jiꞌc̣honnac miꞌin.

⁹ Tsun jam ĉụiꞌ tupuj jiꞌc̣hontiĉaꞌ tsun junꞌ chuc rụij bäꞌjaꞌ, mọꞌdyes jam junꞌ tupuj ĉụiꞌ vaꞌbunyejaꞌ tsun junꞌ chuc mọꞌ c̣honꞌdyedyes tsun.

¹⁰ Aty jiꞌc̣honsinꞌyaꞌ tsun, muꞌ Jenꞌ yuꞌsinꞌ tsun Jesucristoty tsun paj qui rụij bäꞌjaꞌ Jenꞌdyes judyeyaꞌ nọ́tacsejaꞌ bäꞌjaꞌ chimeꞌ tsun, ĉaĉaij na muꞌ Jenꞌ meꞌ jäꞌmij dyijyi paj qui meꞌ bäꞌjaꞌ tsun.

Vaj meꞌ yiriꞌyaꞌ Cristoyaꞌ tsun

¹¹ Miꞌin jam judío naꞌi, meꞌdyes qui muꞌin judío in äcäijjinac in, jínac in: "Jam seiꞌtactyiꞌ aꞌ in", meꞌ jínac in. "Tsun nash anic seiꞌtactyiꞌ aꞌ tsun," yi in. Mọꞌ na seiꞌtacdyeꞌ aꞌsiꞌ aꞌdyes mọmoꞌ shupquiꞌ.

¹² Dyijtuĉamꞌ miꞌin jam judío miꞌin, moch buꞌyimꞌ Cristoyaꞌ jiquej miꞌin, jam Israeltyiꞌ vóshiꞌ miꞌin, anic yocvety miꞌin, mijam damꞌ miꞌindyes mọꞌ Jenꞌsiꞌ p̂eyacdyeꞌ muꞌ, muꞌ yụꞌtyeyacsis vóshiꞌvun tsun jiquej, mijam yiris jedyeꞌ jämꞌsiꞌ bistiñeꞌ miꞌin mijam Jenꞌtyiꞌ chimeꞌ miꞌin, mọꞌdyes qui ñịbeꞌ bäꞌyi jiquej miꞌin.

¹³ Q̂uinꞌ qui namꞌ aty Jesucristoty miꞌin, Cristosyaꞌ chäsh muꞌ mọꞌ c̣hẹiꞌyaꞌjinac Jenꞌyaꞌ miꞌin, meꞌ q̂uinꞌ miꞌin moch bäꞌyity jiquej miꞌin.

¹⁴ Muꞌdye Cristo yuꞌsinꞌ paj qui vaj meij jämꞌjitiĉaꞌ muntyiꞌ tsun, judío tsun judyeyaꞌ jam judío in, aty jam vaj meij fáquitiĉaꞌ bäꞌjaꞌ tsun. Fáquitidyeꞌ muntyis jiquej in, mọꞌ jeñej buꞌyiꞌ juñumchuquis, meꞌ buꞌyiꞌ mọꞌ shupquiꞌ. Muꞌ qui Cristo jiꞌijatidyeꞌyaꞌ muꞌ tyumꞌteyacsebi mọꞌ, sänꞌdyeꞌyaꞌ muꞌ itŝiꞌ tyeiꞌ mọꞌ juñumchuquis, jämꞌjiti vatyquej in judío in judyeyaꞌ jam judío in.

¹⁵ Muꞌsiꞌyaꞌ sänꞌdyemꞌ tasteꞌ mọꞌ tashches yụꞌtacdyeꞌ, mọꞌsiꞌ jiꞌchäyitidyeꞌ mọꞌ aty jam mọꞌ bächäsinꞌ tsun. Mọꞌdyes q̂uinꞌ aty jam päräꞌ ñuruꞌ tsun, yirity quimꞌ ñuruꞌ tsun shupquejaꞌ tsun, judío tsun judyeyaꞌ jam judío in, mụiꞌtyity qui ñuruꞌtyity tsun, vaj meꞌ qui Cristoty tsun, jämꞌjitidyeꞌtum bäꞌjaꞌ räj tsun.

¹⁶ Muꞌsiꞌyaꞌ sänꞌdyemꞌ croshches tyumꞌteyacsebi fáquitidyeꞌ muꞌin päräꞌ ñuruꞌtyity in, judyeyaꞌ yụꞌtacsi paj qui vaj yiriꞌyaꞌ jämꞌjiti Jenꞌtum in, yirity mọmoꞌ q̂uinꞌ ñuruꞌ in.

¹⁷ Meꞌdyes qui muꞌ Cristo atsij, jämꞌsiꞌ p̂eyacdyeꞌ tuiꞌ muꞌ räjdyes muntyiꞌ in, miꞌindyes jam judío miꞌin, miꞌin moch buꞌyity Jenꞌyaꞌ jiquej miꞌin, judyeyaꞌ muꞌindyes chimeꞌ judíodyes in, muꞌin c̣hẹiꞌyaꞌ buꞌyity in. Mọꞌdyemꞌ p̂eyacdyeꞌ tuiꞌ muꞌ Cristo muꞌindyes in, mọꞌ yụꞌtacsiꞌ paj qui jämꞌjiti Jenꞌyaꞌ in.

¹⁸ Päräꞌtyity ñuruꞌ jiquej tsun, Cristo qui yuꞌsinꞌ paj qui vaj meꞌ c̣hẹiꞌyaꞌjeja Jenꞌ muꞌ Ạvatusinꞌtyiꞌ tsun, mọꞌdye Jenꞌsiꞌ Ạꞌedyeꞌ muꞌ mọꞌ ñútyisinꞌ paj qui muꞌ c̣hẹiꞌyaꞌjeja tsun.

¹⁹ Mọꞌdyes q̂uinꞌ miꞌin jam judío miꞌin aty jam yocve buꞌyi miꞌin aty jam moch miꞌin. Q̂uinꞌ aty chätidyeꞌtum buꞌyi Jenꞌtyiꞌtum muntyiꞌ miꞌin, aty Jenꞌtyiꞌ ạvaꞌ miꞌin.

²⁰ Miꞌin nash jeñej yiris acaꞌ jämꞌtacsiꞌ jämꞌchuquistum, muꞌin jutactyiꞌ Jenꞌtyiꞌ muꞌ judyeyaꞌ jasoꞌmitity p̂eyacdyeꞌ Jenꞌ in, muꞌin in jeñej buꞌyi jämꞌchuquis acas mọꞌ, muꞌ na Jesucristo jeñej buꞌyi mujuꞌchaty mij acadyety.

²¹ Anicdye meꞌ tsun anicjejaty Jenꞌ jeñej buꞌjaꞌ Jenꞌsiꞌ acaꞌ muꞌ. Muꞌ na Cristo räj tsun tapchusinꞌ judyeyaꞌ fer buꞌjaꞌ yuꞌsinꞌ paj qui vaj meij ñútyitiĉaꞌ bäꞌjaꞌ tsun, yódyemꞌ acas jedyeꞌ o mọꞌ, meꞌ buꞌjaꞌ tsun chimeꞌ. Meꞌ yejĉoij dayi in muꞌin anicjetety Jenꞌ in, yódyemꞌ yiris acaꞌ cächquejĉoiꞌsiꞌ o, meꞌ buꞌjaꞌ shupquejaꞌ tsun, Jenꞌsiꞌ buꞌjaꞌ acaꞌ tsun, mumꞌ yirity meꞌchusinꞌ tsun.

²² Miꞌin chimeꞌ jam judío miꞌin, aty Cristoty miꞌin, miꞌinmun chimeꞌ acaꞌ buꞌyi Jenꞌsiꞌ muꞌ, mọꞌ jämꞌtyejijcaiꞌsiꞌ muꞌ Cristo yoctyiꞌtum anicjetety Jenꞌ in, mọꞌĉan bäꞌyiꞌ Jenꞌsiꞌ Ạꞌedyeꞌ muꞌ.