Jäqui'ves Tesalonicaĉantyidyes 2 - Tsimane

Jiꞌcaviti raꞌ fạ́quetety Jenꞌ

¹ Vojity, q̂uinꞌ raꞌ tsun jéyac miꞌin junꞌ chuc raꞌ ayidyeꞌ Jesucristos muꞌ Ayoꞌ tsun, junꞌ chuc raꞌ vajmuꞌyaꞌjisinꞌ tsun muꞌsiꞌyaꞌ vej muꞌ. Vojity, tsun jäꞌmij jéyac miꞌin,

² jam raꞌ cavin yocve dyijyi miꞌin. Meꞌ raꞌ tsanꞌ seꞌvetiñeꞌ mọꞌ p̂eyacdyeꞌ miꞌin yiꞌsiꞌ: "Aty ayij jadyiquis tupudyeꞌ Ayoꞌsiꞌ muꞌ, yi muꞌ Pablo, jedac muꞌ jasoꞌmiti p̂eyacdyeꞌ Jenꞌ, areꞌ vatyquej sánacdyeꞌcheꞌ yi muꞌ," vatyquej raꞌ yi pạrej jụijyaꞌ in. Seꞌvetiñeꞌ jụijyaꞌ mọꞌ joꞌmes p̂eyacdyeꞌ, jam raꞌ cajotyiti miꞌin,

³ mijam raꞌ anicjeyacsebi väñädyeꞌ miꞌin, ĉaĉaij na jambiꞌ raꞌ mọꞌ ayij jadyiquis tupudyeꞌ Ayoꞌsiꞌ muꞌ, mọꞌ chum raꞌ tashiꞌ ayij mọꞌ yacchutidyeꞌ Jenꞌcheꞌ muntyiꞌ in, jiꞌcaviti raꞌ muꞌ fạ́quetety Jenꞌ muꞌ tsäquiꞌsisĉandyety, jäquiꞌve raꞌ mọꞌ ayij tupudyeꞌ.

⁴ Muꞌ raꞌ räj fạ́cacsebi jenꞌtuiꞌsiꞌ jedyeꞌ muntyiꞌ in, Jenꞌmun raꞌ chimeꞌ fạ́quete. Muꞌ raꞌ mạꞌjeꞌ paj qui mumꞌ timaꞌcac, judyeyaꞌ raꞌ cächyi Jenꞌsiꞌĉan acaꞌ bäꞌyi, "Yụ nash anictyity Jenꞌ", yi raꞌ muꞌ jéyacsi.

⁵ Meꞌdye jéyac yụ tacaꞌdyemꞌ miꞌintum jiquej yụ. ¿Jam dyijyeban u miꞌin?

⁶ Chimeꞌdye miꞌin aty chịj tyi chuc ñutschute muꞌ fạ́quetety Jenꞌ jambiꞌ chum raꞌ shupqui muꞌ ĉaĉaij na jambiꞌdyemꞌ ayijyaꞌ tupudyeꞌ muꞌ, aty jäquiꞌve chat q̂uinꞌdyemꞌ raꞌ jiꞌcaviti muꞌ.

⁷ Meꞌ tsanꞌ jambiꞌ jiꞌcaviti q̂uinꞌ muꞌ, mọꞌ qui namꞌ aꞌc̣his dyijyedyeꞌ muꞌ, aty mọꞌ caminve tashiꞌ carijtaquiꞌ muꞌ ọ́cheꞌ jacchemꞌ. A na raꞌ ayijyaꞌ tupudyeꞌ muꞌ, Jenꞌ raꞌ meijjeꞌ mọꞌ jañutschutis muꞌ fạ́quetety Jenꞌ,

⁸ chat qui raꞌ jiꞌcavibun muꞌ. A na raꞌ atsijbanyaꞌ muꞌ Jesús Ayoꞌ tsun, muꞌ raꞌ jaꞌijati p̂ujquedyeꞌyamꞌ, mọꞌyaꞌ raꞌ meꞌjajiti atsijbanyaꞌ muꞌ Ayoꞌ tsun mạijquedyeꞌtum muꞌ.

⁹ Jambiꞌdyemꞌ ijacyaꞌ muꞌ fạ́quetety Jenꞌ, muꞌ raꞌ meꞌchupte Satanássiꞌ ferdyeꞌ, yoc yoc raꞌ jịꞌcaveyacsi ferdyeꞌ muntyiꞌ in paj qui joꞌmesyaꞌ seꞌ jaꞌyacsi muntyiꞌ in paj qui anicjepte in väñädyeꞌ muꞌ.

¹⁰ Yedyej raꞌ aꞌc̣his jịꞌcaveyacsi, meꞌ buꞌyi raꞌ väñätucsi muntyiꞌ in tsäquiꞌsisĉandyety in. Muꞌin raꞌ vaꞌcac in ĉaĉaij na meꞌ tsanꞌ seꞌveꞌ tsanꞌ jiquej in mọꞌ rụijsis p̂eyacdyeꞌ, jam qui namꞌ tiĉuñeꞌ in mijam anicjeꞌ in, meij mọmoꞌ fạ́queꞌ jiquej in, mọꞌdyes qui raꞌ jam junꞌ c̣hoñi in.

¹¹ Muꞌdye raꞌ Jenꞌ yụꞌtyeyacsi cäjsis dyijyedyedyes muꞌin, paj qui damꞌdye anicjejcacaiꞌ väñädyeꞌ in.

¹² Meꞌ buꞌyi raꞌ räj in, muꞌin jam mạꞌjeꞌ anicjety in rụijsis p̂eyacdyeꞌ, mọꞌ mọmoꞌ maꞌjotyety in aꞌc̣his juchaj, muꞌin raꞌ tsäquiꞌsisĉandyety in.

Jenꞌ tsimꞌsinꞌ tsun c̣honꞌdyedyety tsun

¹³ Vojity, mạꞌjeyacdyety Ayoty tsun, tsun yoshoropaij jéte Jenꞌ räjĉan miꞌindyes, ĉaĉaij na tạꞌcaty jiquej muꞌ Jenꞌ tsimꞌtyinac paj qui miꞌin c̣honꞌdyety. Ĉụiꞌsiꞌyaꞌ Ạꞌedyeꞌ muꞌ yuꞌnac paj qui muꞌtyiꞌ miꞌin, anicyedyeꞌyaꞌ miꞌin rụijsisyaꞌ p̂eyacdyeꞌ Jenꞌsiꞌ muꞌ.

¹⁴ Meꞌ muꞌ fayinac miꞌin paj qui meꞌ yụꞌtac miꞌin, yoquiꞌdyemꞌ seꞌvebitinteyaꞌ jiquej u Jenꞌsiꞌ p̂eyacdyeꞌ muꞌ, mọꞌ voroꞌtyeyacsiꞌ tsun jiquej. Meꞌ muꞌ yuꞌnac paj qui Jenꞌyadyety miꞌin mạijquedyeꞌĉan bäꞌyi miꞌin Jesucristos, Ayos tsun.

¹⁵ Mọꞌdyes vojity, fer buꞌjamꞌ bäꞌjamꞌ, jämꞌ raꞌ cäc̣häꞌchutiñeꞌ miꞌin mọꞌ jiꞌchäyitidyeꞌ jéyacsiꞌ tsun jiquej, mọꞌ voroꞌyedyeꞌĉansiꞌ tsun judyeyaꞌ sánacdyeꞌches tsun chimeꞌ.

¹⁶ Yụ cọdaqui Jesucristocheꞌ Ayoꞌ tsun judyeyaꞌ Jenꞌcheꞌ chimeꞌ, muꞌ Ạvatusinꞌtyiꞌ, muꞌ mạꞌjisinꞌtyiꞌ tsun, judyeyaꞌ ñịbeꞌjitidyesyaꞌ muꞌ soꞌmisinꞌ sóñiꞌyedyes ĉojtyiꞌĉan tsun, paj qui yejĉojaꞌ bisaĉaꞌ Jenꞌdyes tsun, junꞌ chuc raꞌ soꞌmisinꞌ muꞌ.

¹⁷ Meꞌ cọdyete yụ paj qui räjĉan soꞌminac sóñiꞌyedyeꞌ ĉojtyiꞌĉandyes miꞌin, paj qui fer buꞌyi bäꞌyi miꞌin, meꞌ raꞌ yejĉoij rụij bäꞌyi miꞌin judyeyaꞌ rụij p̂eyaqui chimeꞌ miꞌin.