Jäqui'ves Tesalonicaĉantyidyes 1 - Tsimane

Tashches voryedyeꞌ Pablos

^1-2 Yụ Pablo, yiriꞌyaꞌ muꞌintum yụ Silvano judyeyaꞌ Timoteo, yụ sáñeꞌ miꞌindyes Tesalónicaĉan bäꞌyity miꞌin anicjetintety Jenꞌ miꞌin. Miꞌin aty Jesucristoty miꞌin muꞌ Ayoꞌ tsun, judyeyaꞌ Jenꞌtyiꞌ chimeꞌ miꞌin, muꞌ Ạvatusinꞌtyiꞌ tsun. Tsun cọdyete muꞌ Jenꞌ paj qui muꞌ soꞌminac ñịbeꞌjitidyes miꞌin, judyeyaꞌ paj qui chimeꞌ muꞌ soꞌminac maꞌjodyeꞌ ĉojtyiꞌĉandyes miꞌin.

Vaꞌtacdyeꞌ raꞌ tŝọcsiꞌ muntyiꞌ in atsijbanyaꞌ muꞌ Cristo

³ Vojity, räjĉan jemoñeꞌ tsun yoshoropaij jéte Jenꞌ miꞌindyes. Tupuj meꞌ tsun ĉaĉaij na miꞌin dadamꞌ mujuꞌchaꞌ yejĉoij anicjetinte Jenꞌ miꞌin judyeyaꞌ dadamꞌ vaj meij yejĉoij mạꞌjitidyeij chimeꞌ miꞌin.

⁴ Mọꞌdyes tsun timaꞌqueyac miꞌin, jéyacsi tsun muꞌin anicjetety Jenꞌ in paiꞌ bäꞌyity in junꞌ chuc miꞌin yejĉoij anicjetinte Jenꞌ. Meꞌ tsanꞌ där jịꞌñibeꞌcac miꞌin, judyeyaꞌ meꞌ tsanꞌ där ñịbedyes jịꞌĉojtiñeꞌ miꞌin, yejĉoij qui namꞌ dyichchuti miꞌin Jenꞌdyes, chimeꞌdye yejĉoij anicyi miꞌin.

⁵ Mọꞌ jiꞌĉuyisinꞌ tsun junꞌ chuc muꞌ Jenꞌ anic rụij dyijyity, rụijsisyaꞌ dyijyedyeꞌ muꞌ aty yuꞌnac Jenꞌyadyety miꞌin ayoꞌbuꞌyedyeꞌĉan muꞌ, ĉaĉaij na meꞌ tsanꞌ chäcdyis ñịbedyes jịꞌĉojtiñeꞌ miꞌin p̂eyacdyedyes, yejĉoij qui namꞌ anicjetinte Jenꞌ, mijam damꞌ farajjetiñeꞌ anicyedyeꞌ.

⁶ Anic rụijtyity muꞌ Jenꞌ, muꞌ raꞌ soꞌmacsi vaꞌtacdyeꞌ tyi chuc jịꞌñibeꞌcanactyiꞌ in,

⁷ pacaj raꞌ miꞌin yiriꞌyaꞌ tsuntum chimeꞌ, junꞌsiꞌ chuc atsijbanyaꞌ muꞌ mạyedyeꞌchety Ayoꞌ tsun Jesús, tuqui raꞌ ferdyeꞌtumtyiꞌ anjer muꞌ, yenamyistum raꞌ tŝij chạij muꞌ.

⁸ Muꞌ raꞌ vaꞌtyeyeyacsi jụꞌñity chuc vaꞌquectety Jenꞌ in, muꞌin jam chiquety in jämꞌsiꞌ p̂eyacdyeꞌ p̂eijtes muꞌ Jesús Ayoꞌ tsun.

⁹ Muꞌin raꞌ vaꞌcac tsäquiꞌsisĉan in, mijam raꞌ jụꞌñisĉan mạyedyeꞌ shupĉan muꞌĉantyiꞌ in, anic raꞌ moch buꞌyi Ayoꞌyaꞌ in, mijam raꞌ junꞌ cạvete in muꞌ mujuꞌchaty Ayoꞌ ferdyeꞌtumtyiꞌ, mijam raꞌ chimeꞌ cạvepte in mạijquedyeꞌ muꞌ.

¹⁰ Meꞌ raꞌ mọꞌ jiyiꞌ junꞌsiꞌ chuc atsijbanyaꞌ muꞌ jadyiquisĉan tupudyeꞌ. Ĉụiꞌtyiꞌ raꞌ muntyiꞌ muꞌ räj timaꞌquete in, jämꞌjete raꞌ in muꞌin anicjetety in. Miꞌinmun raꞌ chimeꞌ maꞌjotyetinte ĉaĉaij na anicjebitinte miꞌin Jenꞌsiꞌ p̂eyacdyeꞌ muꞌ, mọꞌ soꞌmeyacsiꞌ tsun jiquej.

¹¹ Mọꞌdyes tsun yejĉoij cọdyete Jenꞌ miꞌindyes. Tsun cọdyete Jenꞌ paj qui muꞌ ñútyinac miꞌin paj qui jam fibiꞌ shupqui miꞌin Jenꞌsiꞌyaꞌ vej muꞌ, muꞌ fayinactyiꞌ miꞌin. Chimeꞌdye tsun cọdyete Jenꞌ paj qui ĉụiꞌsiꞌyaꞌ ferdyeꞌ muꞌ ñútyinac paj qui miꞌin tupuj jịꞌcätsetiñeꞌ miꞌin mọꞌ jämꞌsiꞌ dyijyedyeꞌ miꞌin, junꞌ chuc raꞌ rụij bäꞌyi miꞌin judyeyaꞌ carijtaqui Jenꞌdyes miꞌin anicyedyeꞌyaꞌ miꞌin.

¹² Meꞌ jụijyaꞌ miꞌin, yoctyiꞌ qui raꞌ muntyiꞌ chimeꞌ in miꞌindyes raꞌ timaꞌquete Jesús in Ayoꞌ tsun. Muꞌ raꞌ chimeꞌ timaꞌquinac miꞌin, meꞌ raꞌ muꞌ Jenꞌ soꞌminac ñịbeꞌjitidyes muꞌ judyeyaꞌ Jesucristos Ayoꞌ tsun.