Jäqui'ves Corintoĉantyidyes 9 - Tsimane

Dyimacdyeꞌ anicjetetydyes Jenꞌ in

¹ Yụ aty jam jemoñeꞌ yejĉoij jéyac miꞌin sánacdyeꞌcheꞌ paj qui miꞌin dyimaqui vojitydyes tsun Judeaĉantyidyes in,

² ĉaĉaij na yụ aty chị́yebiyac dyijyedyeꞌ miꞌin, miꞌin aty mạꞌjeꞌ dyimaqui muꞌindyes in. Mọꞌdyes yụ timaꞌqueyac muꞌinsiꞌyaꞌ vej muꞌin Macedoniaĉantyisyaꞌ in, yụ jéyacsi junꞌ chuc miꞌin mạꞌjeꞌ dyimaqui. Yụ jéyacsi: "Jiyiꞌsiꞌ yómodyeꞌ jiquej muꞌin Acayaĉantyiꞌ vojity tsun aty jäꞌmiiꞌtyiꞌ mạꞌjeꞌ dyimaqui in", jéyacsi yụ. Mọꞌyaꞌ dyijyedyeꞌyaꞌ miꞌin jiꞌmaꞌyacsi miꞌin muꞌin Macedoniaĉantyiꞌ in paj qui muꞌin chimeꞌ dyimaqui muꞌindyes in.

³ Yụ raꞌ jäꞌmij jutacsi uts chibinyity vojity tsun paj qui muꞌin jäꞌmij vajmuꞌyaꞌte in dyimacdyeꞌ miꞌin. Mọꞌdyes jemoñeꞌ jäꞌmiiꞌtyiꞌ jiꞌbisaqui dyimacdyeꞌ miꞌin, meꞌ qui venjoijyaꞌ in jam qui fibiꞌ shupquiꞌ p̂eyacdyeꞌ tsun, tsun yi jiquej junꞌ chuc aty mạꞌjeꞌ dyimaqui miꞌin.

⁴ Jäquiꞌvesyaꞌ qui na ramꞌ ĉọcyac tsun Macedoniaĉantyiꞌtum in. Junꞌ a ĉa venjoijyaꞌ tsun, dạquicyac miꞌin, junꞌ bu raꞌ mọꞌ dyimacdyeꞌ miꞌin. Meꞌ jụijyaꞌ itŝiꞌ miꞌin, chäcdyis raꞌ mọꞌ tsị́cadyeꞌ shupquiꞌ tsundyes, ĉaĉaij na tsun aty jéyacsi jiquej muꞌin Macedoniaĉantyiꞌ in junꞌ chuc miꞌin fer mạꞌjeꞌ dyimaqui miꞌin. Itŝiꞌ jụijyaꞌ mọꞌ dyimacdyeꞌ miꞌin dadamꞌ raꞌ mujuꞌchaꞌ tsị́cadyeꞌtum shupqui miꞌin.

⁵ Jämꞌ ĉọiꞌ yụ tashcheꞌ juteyeyac uts chibintyity vojity in paj qui muꞌin jäꞌmij vajmuꞌyaꞌte in, meꞌ qui tsanꞌ ventyecyacyaꞌ yụ, aty raꞌ mọꞌ jäꞌmiiꞌtyiꞌ dyimacdyeꞌ miꞌin, judyeyaꞌ raꞌ chịj in mọꞌ shupquiꞌ ĉojtyiꞌĉansiꞌ miꞌin, mijam damꞌ carij ĉọ́tiñeꞌ miꞌin mọꞌ dyimacdyeꞌ, meꞌ raꞌ cavinac in.

⁶ Aty raꞌ yụꞌtaqui jụijyaꞌ miꞌin, jemoñeꞌ dyijtubajtiñeꞌ p̂eyacdyeꞌ yiꞌ: Tyi chuc damꞌ cäti jụijyaꞌ, chidamꞌdye raꞌ jäĉanꞌ, tyi chuc daiꞌ cäti jụijyaꞌ chidaiꞌdye raꞌ jäĉanꞌ, meꞌ buꞌyiꞌ raꞌ cạ̈tsiꞌ miꞌindyes dyimacdyeꞌ.

⁷ Cäts yirity jịjcaij miꞌin jemoñeꞌ dyimaqui miꞌin junꞌ quiꞌ chuc dyijyi ĉojtyiꞌĉan miꞌin. Jam raꞌ carij ĉọ́tiñeꞌ mọꞌ dyimacdyeꞌ, mijam raꞌ yoquedyeꞌtum yụꞌtiñeꞌ ĉaĉaij na muꞌ Jenꞌ maꞌjotacsi muꞌin maꞌjodyeꞌtum soꞌmetety in.

⁸ Muꞌ qui raꞌ Jenꞌ där raꞌ mujuꞌchaꞌ ñịbeꞌjinac miꞌin räj jedyeꞌ chuc jemontiñes miꞌin, muꞌ raꞌ dadamꞌ fajcheꞌ cächjiyinac miꞌin paj qui jam jedyeꞌ jayejjotaqui miꞌin, judyeyaꞌ raꞌ chimeꞌ paj qui tupuj yoctyiꞌ jiꞌjiyeyacsi miꞌin.

⁹ Mọꞌdye p̂eyeꞌ sánacdyeꞌ yiꞌ: "Tyi chuc ñịbeꞌyity jämꞌyedyeꞌtum soꞌmacsi ñịbety in, mọꞌ bijodyeꞌ muꞌin jam raꞌ yirisĉan mạyedyeꞌ mọtsiꞌ muꞌin."

¹⁰ Muꞌdye Jenꞌ soꞌmacsi cätidyedyes, muꞌdye chimeꞌ soꞌmacsi jibitidyes säcsedyedyes muꞌin. Meꞌdye raꞌ muꞌ Jenꞌ daiꞌ raꞌ soꞌminac jedyeꞌ chuc jemontiñeꞌ miꞌin, paj qui mọꞌyaꞌ yejĉoiꞌ jämꞌyedyeꞌ miꞌin, paj qui tupuj yoctyiꞌ in jiꞌjiyeyacsi miꞌin mọꞌ soꞌminacsiꞌ Jenꞌ. Mọꞌ raꞌ jeñej buꞌyiꞌ Jenꞌ yojdyemꞌ soꞌminac daiꞌ vej u, paj qui daiꞌ shupquiꞌ vädacdyeꞌ miꞌin.

¹¹ Meꞌ raꞌ muꞌ soꞌminac räj jedyeꞌ, miꞌindye raꞌ tupuj jiꞌjiyeyacsi dyimacdyeꞌ miꞌin. Chat qui raꞌ tsun soꞌmacsi mọꞌ dyimacdyeꞌ miꞌin muꞌin jayejjotaquity in, chat qui muꞌin in yoshoropaij jéte raꞌ Jenꞌ in.

¹² Mọꞌ dyimacdyeꞌ soꞌmacsis raꞌ miꞌin muꞌin anicjetety Jenꞌ in, jam raꞌ mọꞌ mọmoꞌ nọ́tacsi muꞌin jayejjotaquity jedyeꞌ in, chimeꞌdye raꞌ daiꞌ raꞌ yoshoropaij jéte Jenꞌ in, mọꞌ chụiꞌyaꞌ dyimacdyeꞌ in,

¹³ judyeyaꞌ raꞌ timaꞌquete Jenꞌ in miꞌindyesiꞌ. Mọꞌyaꞌ raꞌ chịj in miꞌin anic cäc̣häꞌchuptinte mọꞌ jämꞌsiꞌ p̂eyacdyeꞌ Cristos muꞌ. Muꞌin raꞌ timaꞌquete Jenꞌ in miꞌindyes ĉaĉaij na miꞌin daiꞌ soꞌmacsi jedyeꞌ miꞌin judyeyaꞌ yoctyiꞌ chimeꞌ soꞌmacsi miꞌin.

¹⁴ Meꞌ raꞌ muꞌin anic mạꞌjinac in judyeyaꞌ cọdyete Jenꞌ in miꞌindyes, ĉaĉaij na aty cavityinac in miꞌincheꞌ buꞌyiꞌ mạꞌjitidyes Jenꞌsiꞌ muꞌ.

¹⁵ Mọꞌdyes yoshoropaij jéja Jenꞌ, muꞌ yuꞌtyiyisinꞌtyiꞌ muꞌ Cristo, muꞌ jeñej buꞌyi ñịbeꞌyedyes tsundyes, anic chäcdyis ñịbeꞌyedyes jämꞌsiꞌ soꞌmisinꞌ tsun, mijam ọ́yaꞌ mọꞌ paj qui tupuj chaꞌshejaꞌ p̂eijjaꞌyaꞌ mọꞌ.