Jäqui'ves Corintoĉantyidyes 8 - Tsimane

Jemoñeꞌ jämꞌ dyimaĉaꞌ Jenꞌdyes

¹ Vojity tsun, tsun mạꞌjeꞌ jịꞌchiqueyeyac junꞌ chuc muꞌ Jenꞌ ñịbeꞌjitidyesyaꞌ muꞌ nọ́tacsi muꞌin Macedoniaĉantyiꞌ anicjetety Jenꞌ in.

² Meꞌ tsanꞌ därsiꞌ ñịbedyes jịꞌĉojtyeꞌ in, cätssistum qui namꞌ maꞌjodyeꞌ bäꞌyi in, meꞌ tsanꞌ anic där ñịbety in, jämꞌsiꞌ qui namꞌ dyimacdyeꞌ soꞌmete Jenꞌ in.

^3-4 Yụ chị́yacsi anic jämꞌsiꞌ dyimacdyeꞌ soꞌmete in, jam cäts mọmoꞌ soꞌmete in, dadamꞌ cäch jiꞌjiyeyete in dyimacdyeꞌ muꞌin. Ĉụiꞌsiꞌyaꞌ dyijyedyeꞌ muꞌin fer cudyin tsun in paj qui tsun jụjjeyacsebi dyimacdyeꞌ muꞌin. Muꞌinmun chimeꞌ fer mạꞌjeꞌ nọ́tacsi in muꞌin jayejjotaquity jedyeꞌ in Judeaĉantyiꞌ anicjetety Jenꞌ in.

⁵ Chimeꞌdye muꞌin in jam dyimacdyemꞌ dyijtuiꞌ in, yojdyemꞌ dyijyi u tsun, muꞌin dadamꞌ cächjibun tsunsiꞌ dyijyedyeꞌ in, dadamꞌ muꞌin tashcheꞌ Ayoꞌyaꞌ jiꞌsäsdyi in, judyeyaꞌ muꞌin chimeꞌ dyijyi in mạꞌjeꞌ chäquibun tsunsiꞌ p̂eyacdyeꞌ in ĉaĉaij na meꞌ mạꞌjeꞌ muꞌ Jenꞌ.

⁶ Tito aty tiyacchuiꞌ jiꞌchäquiyinac miꞌin, paj qui ñịbeꞌjitidyesyaꞌ yụꞌtiñeꞌ mọꞌ dyimacdyeꞌ muꞌindyes in. Mọꞌdyes tsun fer jéte paj qui muꞌ q̂uinꞌ yejĉoij jiꞌdyijvinac junꞌ quiꞌ chuc mọꞌ jịꞌcätsetiñeꞌ miꞌin.

⁷ Jeshaꞌ miꞌin anic mujuꞌchaꞌ soꞌmac Jenꞌyaꞌ miꞌin, jam jayej anicyedyeꞌ Jenꞌcheꞌ miꞌin, mijam jayej chimeꞌ dyijyedyeꞌ miꞌin, mujuꞌchaꞌ chịj voroꞌtacsi miꞌin, fer carijtaqui Jenꞌdyes miꞌin, judyeyaꞌ chimeꞌ fer mạꞌjitiĉaꞌ tsun miꞌin, meꞌ meꞌ mujuꞌchaꞌ bäꞌyi Jenꞌdyes miꞌin. Mọꞌdyety o jayej miꞌin mọꞌ dyimacdyeꞌ, paj qui anic jämꞌyejoij miꞌin.

⁸ Yụ meꞌ jéyacyaꞌ miꞌin, jam qui namꞌ yụ juteyac miꞌin jeñej yirity ayoꞌ jutacsiyaꞌ. Meꞌdye mọmoꞌ jéyac junꞌ chuc muꞌin in Macedoniaĉantyiꞌ anicjetety Jenꞌ in fer mạꞌjeꞌ dyimaqui in, meꞌ yụ jéyac miꞌin yụ mạꞌjeꞌ paj qui miꞌin chimeꞌ cäc̣häꞌchucsebi dyijyedyeꞌ muꞌin, junꞌ chuc dyijyedyeꞌ muꞌinsiꞌ in. Meꞌ dyimaqui jụijyaꞌ miꞌin chimeꞌ, mọꞌ raꞌ jorojĉanjeꞌ anic mạꞌjeyacsity bäꞌyi miꞌin.

⁹ Miꞌin anic chị́yebitinte Jesucristos mạꞌjitidyes muꞌ, muꞌ Ayoꞌ tsun. Meꞌ tsanꞌ muꞌ meꞌchuiꞌ räj mạyedyeꞌches jiquej, ọ́cheꞌ qui namꞌ mijam jedyeꞌ meꞌchuiꞌ shupqui muꞌ, paj qui meꞌ shupqui miꞌin räj meꞌchutiñeꞌ mạyedyeꞌches jedyeꞌ.

¹⁰ Jiyiꞌsiꞌ yómodyeꞌ miꞌin jämꞌ tashcheꞌ yi miꞌin dyijtutiñeꞌ dyimacdyeꞌ jiquej, ĉụiꞌ mạꞌjeꞌ fer dyimaqui miꞌin. Ọij q̂uinꞌ dyijyedyeꞌ yụs: Jemoñeꞌ jịꞌcätsetiñeꞌ mọꞌ dyijyedyeꞌ jiquej miꞌin junꞌ chuc dyijyaque miꞌin.

¹¹ Q̂uinꞌ chat yódyemꞌ fer dyijtutiñeꞌ dyimacdyeꞌ jiquej u, q̂uinꞌ jịꞌcätsevac. Chimeꞌ jemoñeꞌ jämꞌ yụꞌtinte, juñucsiꞌ chuc meꞌchutinte miꞌin, jemoñeꞌ meꞌ yụꞌtinte miꞌin.

¹² Mạꞌjetiñeꞌ dyimaqui jụijyaꞌ miꞌin ĉụiꞌsiꞌtum dyijyedyeꞌ ĉojtyiꞌĉansiꞌ miꞌin, mọꞌ maꞌjotyeꞌ Jenꞌ, judyeyaꞌ mạꞌjeꞌ juñucsiꞌ chuc muꞌ muntyiꞌ tupuj yụꞌtyeꞌ paj meꞌ yụꞌtyeꞌ. Muꞌ jam cudyisinꞌ jedyeꞌ chuc jam meꞌchujaꞌyaꞌ tsun.

¹³ Meꞌ yíyaꞌ yụ, jam yụ, mọꞌ mạꞌjeꞌ paj qui jayejjotaquive miꞌin jedyeꞌ dyimacdyeꞌyaꞌ yoctyidyes in, jam.

¹⁴ Dyijyedyeꞌ yụ paj qui vaj cäts meꞌchutiñeꞌ chätidyeꞌtum miꞌin. Q̂uinꞌ aty jam jayejjotaqui miꞌin, mọꞌdyes q̂uinꞌ miꞌin tupuj soꞌmacsi miꞌin muꞌin jayejjotaquity in. Yirisĉan raꞌ mạyedyeꞌ meꞌdye raꞌ miꞌin chimeꞌ jayejjotaqui jedyeꞌ miꞌin, muꞌin jayejjotaquity q̂uinꞌ in vatyquej raꞌ muꞌin qui meꞌchubanꞌ jedyeꞌ in jäquiꞌve, muꞌin qui raꞌ tupuj camanꞌ soꞌminac in.

¹⁵ Meꞌ raꞌ cạ̈tsiꞌ mọꞌ sánacdyeꞌ yiꞌ: "Tyi chuc daiꞌ dyimeꞌtyiꞌ in, muꞌin jam jiꞌshucdyi muꞌin, muꞌin na uyaꞌyaꞌ dyimeꞌtyiꞌ in, muꞌinsiꞌ jam jayej muꞌin."

Tito judyeyaꞌ penꞌdyeꞌ muꞌ nọ́tacsi dyimacdyeꞌĉan in

¹⁶ Tsun yoshoropaij jéte Jenꞌ ĉaĉaij na muꞌ jasoꞌmiti dyijyedyeꞌ muꞌ Tito paj qui muꞌ fer dyijtunac miꞌin, yojdyemꞌ yụ dyijtuyac u, meꞌdye muꞌ chimeꞌ dyijtunac.

¹⁷ Aty yụ cọdyeteyaꞌ jiquej paj qui ĉucnac miꞌin, muꞌ jụjyi. Mạꞌjeꞌ ĉụiꞌsiꞌyaꞌ dyijyedyeꞌ chimeꞌ paj qui muꞌve jịjcaij ĉucnac miꞌin sóbinac.

¹⁸ Titotum raꞌ jutete tsun yoctyiꞌ vojity tsun, paj qui muꞌ penꞌdyetute. Uts vojity tsun anic maꞌjotyetety in räj anicjetety Jenꞌ in, junanaj ĉụiꞌ bäꞌyity in, ĉaĉaij na muꞌ fer carijtaqui voroꞌtacsi jämꞌsiꞌ p̂eyacdyeꞌ Jenꞌsiꞌ muꞌ.

¹⁹ Chimeꞌdye muꞌ tsimꞌte in anicjetety Jenꞌ in paj qui penꞌdyetun tsun in judyeyaꞌ muꞌmun qui raꞌ ñútyityin tsun, jiquiqueꞌyaꞌ raꞌ tsun mọꞌ dyimacdyeꞌ jayejjotaquitydyes in vojitydyes atsvun. Mọꞌyaꞌ raꞌ timaꞌquete Ayoꞌ in, dyimacdyeꞌyaꞌ tsun, mọꞌ raꞌ jịꞌcaveyacsi tsun, tsun mạꞌjeꞌ nọ́tacsi muꞌin jayejjotaquity vojity tsun in.

²⁰ Tsun jämꞌ dyijyi paj qui rụijsisyaꞌ dyijyedyeꞌ cạte tsun muꞌ daiꞌtyiꞌ querec̣ha, paj qui jam tupuj ñäñin tsun in muꞌdyes querec̣hadyes.

²¹ Tsun mạꞌjeꞌ paj qui räj cavin tsun in rụijsisyaꞌ dyijyedyeꞌ tsun, paj qui rụij mọꞌ shupquiꞌ tsun Jenꞌsiꞌyaꞌ vej muꞌ judyeyaꞌ muntyisyaꞌ chimeꞌ in.

²² Chimeꞌdye raꞌ tsun jutete Titotum yoctyiꞌ vojity tsun chibinyity, muꞌ raꞌ chimeꞌ jịjcate Tito judyeyaꞌ penꞌdyeꞌ muꞌ. Uts chị́yete tsun, muꞌ nash nọ́tacsity muntyiꞌ dạcte tsun, q̂uinꞌ muꞌ fer mạꞌjeꞌ nọ́taqui ọijyaꞌ dyimacdyeꞌyaꞌ, ĉaĉaij na muꞌ aty seꞌvaqui junꞌ chuc miꞌin aty mạꞌjetiñeꞌ dyimacdyeꞌ.

²³ Chimeꞌdye yụ jéyac, Tito nash penꞌdyeꞌ yụ, muꞌ carijtaquity yụ́tum yiriꞌyaꞌ miꞌindyes. Muꞌin na yoctyiꞌ in penꞌdyetutety raꞌ Tito in, muꞌin chimeꞌ jutactyiꞌ in anicjetety Jenꞌ in, judyeyaꞌ muꞌindyes chimeꞌ muntyiꞌ in timaꞌquete Cristo in ĉaĉaij na rụij bäꞌyi in.

²⁴ Jemoñeꞌ miꞌin jịꞌcaveyacsi mạꞌjitidyes miꞌin penꞌdyeꞌtumdye Tito. Meꞌ jụijyaꞌ miꞌin muꞌin anicjetety Jenꞌ in jutacsity in cavibunac raꞌ in mạꞌjitidyes miꞌin, chäyinac raꞌ in jam mọꞌ fibis shupquiꞌ timaꞌcacdyeꞌ tsunsiꞌ timaꞌqueyacyaꞌ miꞌin Corintoĉantyiꞌ miꞌin muꞌinsiꞌyaꞌ vej jiquej muꞌin.