Jäqui'ves Corintoĉantyidyes 6 - Tsimane

Tsun yụꞌtac carijtaquity Jenꞌdyes

¹ Tsun nash carijtaquity Jenꞌdyes mọꞌdyes tsun fercheꞌ jéyac miꞌin paj qui jam fibiꞌ seꞌveptinte Jenꞌsiꞌ p̂eyacdyeꞌ muꞌ, mọꞌ p̂eijbites ñịbeꞌjitidyes muꞌ.

² Yiꞌ sánacdyeꞌcheꞌ muꞌ: "Aty ayijyaꞌ tupudyeꞌ yụꞌtyes jiquej yụ, yụ seꞌvebiye cọdacdyeꞌ mi, aty ayijyaꞌ c̣honꞌdyedyes tupudyeꞌ yụ nọ́tyeye", yiꞌ sánacdyeꞌ. Seꞌvaĉamꞌ, q̂uinꞌ aty ayij tupudyeꞌ yụꞌtyes muꞌ Jenꞌ, aty ayij tupudyeꞌ paj qui c̣hoñiꞌ miꞌin.

³ Tsun räjĉan yụꞌtyeꞌ ferdyeꞌ paj qui rụij bäꞌyi tsun muntyisyaꞌ vej muꞌin paj qui jam tyi tupuj ñäñibun carijtacdyeꞌ Jenꞌdyes tsun.

⁴ Räjĉan meꞌ bäꞌyi tsun, paj qui muntyiꞌ in chäyin tsun in anic meꞌ jutactyiꞌ Jenꞌtyiꞌ tsun. Dyichchuti tsun meꞌ tsanꞌ chäcdyis ñịbedyes jịꞌĉojtyeꞌ tsun, meꞌ tsanꞌ jayejjotaqui jedyeꞌ tsun.

⁵ Pạrej siꞌbacdyeꞌ damꞌjeꞌ tsun, judyeyaꞌ ĉärꞌtacdyeꞌ, pạrej siscajcan tsun in aꞌc̣hisyaꞌ dyijyedyeꞌ muꞌin. Chimeꞌdye jiyiꞌ chäcdyis carijtacdyeꞌ jịꞌĉojtyeꞌ tsun, judyeyaꞌ ĉush jịꞌĉojtyeꞌ tsun, judyeyaꞌ dáquischeꞌ bäꞌyi chimeꞌ tsun.

⁶ Mọꞌyaꞌ muntyiꞌ in tupuj chäyin tsun in anic Jenꞌtyiꞌ jutactyiꞌ tsun ĉaĉaij na rụij bäꞌyi tsun muꞌintum in, mọꞌ jam jayej chị́yepte Jenꞌsiꞌ p̂eyacdyeꞌ muꞌ, judyeyaꞌ tyumꞌchutidyeꞌtum bäꞌyi tsun, judyeyaꞌ jämꞌyedyeꞌtum bäꞌyi muntyiꞌtum chimeꞌ tsun. Mọꞌdye Jenꞌsiꞌ Ạꞌedyeꞌ bächän tsun, mạꞌjeyacsity qui bäꞌyi tsun.

⁷ Mọꞌ mọmoꞌ voroꞌtacsi tsun rụijsis p̂eyacdyeꞌ Jenꞌsiꞌ muꞌ, muꞌsiꞌ ferdyeꞌ meꞌchupte tsun, meꞌ bäꞌyi tsun. Tsun rụij bäꞌyi, mọꞌ jeñej buꞌyiꞌ ñutsjitidyes tsundyes. Mọꞌyaꞌ tsun ĉụiꞌ ñutsjiti aꞌc̣hisyaꞌ, mọꞌyaꞌ chimeꞌ chutidyedyes Jenꞌdyes tsun, meꞌ carijtaqui Jenꞌdyes tsun.

⁸ Pạrej tiĉuñin tsun in, pạrej na vaꞌquiĉuñin tsun in, pạrej timaꞌquin tsun in, pạrej na muꞌyaꞌ ñäñin tsun in. Meꞌ tsanꞌ räjĉan rụij p̂eyaqui tsun, jeñej väväjñity ĉun tsun in.

⁹ Meꞌ tsanꞌ tsun chị́yactyiꞌ muntyiꞌyaꞌ in, muꞌin qui namꞌ p̂iyin tsun in: "Jam tyi chị́yacsi in", yi in. Meꞌ tsanꞌ aty raꞌ säñi tsun, yejĉoij qui namꞌ tsạꞌ buꞌyi tsun, meꞌ tsanꞌ jịꞌñibeꞌcan tsun in jam qui namꞌ ijac tsun.

¹⁰ Meꞌ tsanꞌ tári, räjĉan qui namꞌ maꞌjodyeꞌtum bäꞌyi tsun. Meꞌ tsanꞌ ñịbety tsun, daiꞌ qui namꞌ muntyiꞌ soꞌmacsi jedyeꞌ tsun. Meꞌ tsanꞌ itŝiꞌ jedyeꞌ meꞌchuiꞌ tsun, mọꞌyaꞌ qui namꞌ räj jedyeꞌ meꞌchuiꞌ tsun.

¹¹ Vojity Corintoĉan bäꞌyity miꞌin, tsun q̂uinꞌ anic jorojĉan jiꞌshupqueyeyac mọꞌ ĉojtyiꞌĉansiꞌ dyijyedyeꞌ tsun, jam jumjetyeyac mọꞌ ĉaĉaij na anic fer mạꞌjeyac tsun.

¹² Tsun jam farajjeꞌ dyijtuyac, yejĉoij mạꞌjeyac miꞌin, miꞌin qui namꞌ farajjitiĉaꞌ tsun miꞌin.

¹³ Miꞌin nash jeñej buꞌyi ĉụiꞌtyiꞌ ạvaꞌ yụ, meꞌ cạveyac yụ. Yụ jéyac q̂uinꞌ, paj qui meꞌdye chimeꞌ miꞌin meꞌ mạꞌjitiĉaꞌ tsun miꞌin.

Acaꞌ buꞌjaꞌ Jenꞌsiꞌ tsun

¹⁴ Jam raꞌ noĉoꞌñiti miꞌin muꞌintum in jam anicjetetytum Jenꞌ in. ¿Jam chịj u miꞌin mọꞌ rụijsis dyijyedyeꞌ jam junꞌ tupuj penꞌdyetutiꞌ aꞌc̣histum dyijyedyeꞌ? Chimeꞌdye mọꞌ mạijquedyeꞌ jam tupuj penꞌdyetutiꞌ tojmastum.

¹⁵ Muꞌ Cristo chimeꞌ jam junꞌ vaj cäts dyijyi Sọyoꞌtum, meꞌdye muꞌin chimeꞌ anicjetety Jenꞌ in jam junꞌ vaj cäts dyijyi in muꞌintum in jam anicjetetytum Jenꞌ in.

¹⁶ Chimeꞌdye Jenꞌsiꞌ acaꞌ muꞌ jam vaj cäts shupquiꞌ mọꞌtum jämꞌtacdyeꞌtum cudyiticheꞌ muntyiꞌ in jam ọ́yaꞌ vaꞌve. Tsun anicjejaty Jenꞌ jeñej buꞌjaꞌ Jenꞌsiꞌ acaꞌ muꞌ, muꞌ tsạꞌtyiꞌ Jenꞌ, ĉaĉaij na muꞌdye yi jiquej: "Yụ raꞌ muꞌintum bäꞌyi, yụ raꞌ jajbuꞌyacsi ĉojtyiꞌĉan muꞌin, yụ raꞌ Jenꞌ muꞌin, muꞌin raꞌ ĉụiꞌtyiꞌ muntyiꞌ yụ in."

¹⁷ Ayoꞌ tsun chimeꞌ yi: "Farajjeyacsejamꞌ muꞌin in, meijyejamꞌ muꞌinyaꞌ in, jam raꞌ jịjcatacsebiban miꞌin aꞌc̣his dyijyedyeꞌ muꞌin, chat raꞌ yụ tiĉuñeyac.

¹⁸ Yụ raꞌ ạvatuyac miꞌin, miꞌin qui raꞌ ạvaꞌ yụ, yi muꞌ ferdyeꞌtumtyiꞌ Jenꞌ."