Jäqui'ves Corintoĉantyidyes 5 - Tsimane

Aꞌ tsun yocsiꞌ raꞌ yụꞌtac yódyemꞌ ac̣hiꞌjobanꞌsiꞌ acaꞌ o

¹ Tsunsiꞌ aꞌ q̂uinꞌ jeñej buꞌyiꞌ vaꞌcacsiꞌ acaꞌ ọ́ches, meꞌ buꞌyiꞌ mọꞌ aꞌ tsun. Aty chị́jaꞌ tsun säñiꞌ jụijyaꞌ aꞌ tsun, mọꞌyaꞌ raꞌ yocsiꞌ aꞌ tsun mạyedyeꞌchedyes, mọꞌ jam jämꞌtyes muntyiꞌ in, meꞌdye Jenꞌ mọmoꞌ jämꞌtyiyisinꞌsiꞌ tsun, mọꞌ raꞌ jam jụꞌñisĉan mạyedyeꞌ mọtsis.

² Q̂uinꞌ aꞌtum tacaꞌ q̂uinꞌ tsun yoquedyeꞌtum dyijtujijcajaꞌ, ĉaĉaij na fer mạꞌjejaꞌ jịꞌquijaꞌ tsun mụiꞌsisĉan aꞌ tsun mạyedyeꞌches.

³ Tsun mạꞌjejaꞌ jịꞌquijaꞌ mụiꞌsisĉan aꞌ tsun, mọꞌ jeñej buꞌyiꞌ quịꞌsiꞌ, paj qui jam itŝity aꞌ tsun meꞌ shupquejaꞌ tsun.

⁴ Mọꞌdyes q̂uinꞌ tacaꞌ rụiꞌcuꞌĉan tsun, yoquedyeꞌtum bäꞌjaꞌ tsun. Jam mọꞌ mạꞌjejaꞌ sänꞌdyeꞌ aꞌsiꞌ tsun q̂uinꞌ, vatyquej raꞌ itŝiꞌ aꞌ shupquejaꞌ tsun, meꞌdye mọmꞌ dyijtujaꞌ mụiꞌsis, mọꞌ raꞌ jam sänꞌdyes.

⁵ Muꞌdye Jenꞌ yuꞌtyiyisinꞌ tsun, muꞌ raꞌ soꞌmisinꞌ mụiꞌsis aꞌ tsun, judyeyaꞌ muꞌdye aty soꞌmisinꞌ ĉụiꞌsiꞌ Ạꞌedyeꞌ muꞌ, mọꞌ jịꞌĉocdyeꞌ shupquiꞌ meꞌ raꞌ soꞌmisinꞌ tsun räj yoj jisinꞌdyemꞌ q̂uinꞌ u.

⁶ Mọꞌdyes sóñiꞌyedyeꞌtum bäꞌjaꞌ tsun. Chị́jaꞌ tsun tacaꞌdyemꞌ rụiꞌcuꞌĉandyemꞌ úcheꞌ jaccheꞌ tsun, jambiꞌdyemꞌ Ayoꞌyaꞌ bäꞌjaꞌ tsun.

⁷ Meꞌ tsanꞌ jambiꞌ cạvepja Jenꞌsiꞌ jedyeꞌ muꞌ, yejĉojaꞌ qui namꞌ muꞌdyes bäꞌjaꞌ ĉaĉaij na anicjeja tsun.

⁸ Mọꞌdyes tsun maꞌjodyeꞌtum bäꞌjaꞌ. Dadamꞌ jämꞌ ĉọ́jaꞌ tsun farajjeyaĉaꞌ tsun ọ́ches aꞌ tsun q̂uinꞌ paj qui Jenꞌyaꞌ bäꞌbajshaꞌ tsun Ayoꞌtum tsun.

⁹ Yiris mọmoꞌ dyijtujaꞌ tsun paj qui muꞌ Jenꞌ maꞌjotyisinꞌ tsun, meꞌ tsanꞌ taccheꞌdyemꞌ úcheꞌ tsun, meꞌ tsanꞌ jam, mọꞌ qui namꞌ mạꞌjejaꞌ tsun paj qui muꞌ Jenꞌ maꞌjotyisinꞌ tsun.

¹⁰ Tsun raꞌ räj jiꞌcavitiĉaꞌ Cristoyaꞌ, muꞌ raꞌ räj jịꞌcäts yuꞌbusinꞌ dyijyedyeꞌ tsun junꞌ chuc bäꞌjaꞌ úcheꞌ jaccheꞌ jiquej tsun, areꞌ rụij bäꞌjaꞌ jiquej, areꞌ jam, meꞌ buꞌyi raꞌ muꞌ soꞌmisinꞌ.

P̂eyacdyeꞌ yiꞌ junꞌ chuc jämꞌjibudyiĉaꞌ Jenꞌyaꞌ tsun

¹¹ Tsun chị́yete Ayoꞌ anic tsäquiꞌ muꞌ, mọꞌdyes tsun fercheꞌ dyijyi mạꞌjeꞌ jụj jaꞌyacsi muntyiꞌ in. Muꞌ Jenꞌ chäyin tsun junꞌ chuc rụijsis dyijyedyeꞌ cạiꞌ tsun, faraj vuꞌ caꞌ meꞌ miꞌin chimeꞌ rụij chäyitiĉaꞌ tsun miꞌin ĉojtyiꞌĉan miꞌin.

¹² Tsun jam mạꞌjeꞌ meꞌ ĉụiꞌ timaꞌquiti. Tsun mạꞌjeꞌ jéyac junꞌ chuc meꞌ rụij bäꞌyi tsun paj qui miꞌin tupuj ñutsjityitiĉaꞌ tsun miꞌin muꞌinsiꞌyaꞌ vej muꞌin cäj jịꞌchiyacsityyaꞌ in, muꞌin vaꞌbunyedyeꞌtum ñäñintyiꞌ tsun in. Mọmꞌ chị́yacsebi in jämꞌsiꞌ aꞌ muntyis muꞌin, mọꞌ qui namꞌ ĉojtyiꞌĉansiꞌ dyijyedyeꞌ muꞌin, jam chị́yacsebi in.

¹³ Pạrej aty jeñej shapuij ĉun tsun u in, junꞌ chuc Jenꞌdyes carijtaqui tsun. Tsun qui namꞌ rụijsisyaꞌ dyijyedyeꞌ nọ́tyeyac tsun miꞌin.

¹⁴ Tsun meꞌ, ĉaĉaij na mọꞌ mạꞌjitidyes Cristos muꞌ, mọꞌ bächän tsun paj qui muꞌdyes bäꞌyi tsun, ĉaĉaij na chị́yeja tsun junꞌ chuc muꞌ yirity ijac räjdyes muntyiꞌ in, judyeyaꞌ qui tsun chimeꞌ räj sänjaꞌ muꞌtum.

¹⁵ Räj muntyidyes in säñi muꞌ, paj qui tsun aty jam ĉụiꞌsiꞌ dyijyedyeꞌ cạjaꞌ, paj qui muꞌdyes mọmoꞌ bäꞌjaꞌ, muꞌ säñity tsundyes judyeyaꞌ vañinyebantyiꞌ.

¹⁶ Q̂uinꞌ tsun yocve cạvacsi muntyiꞌ in aty jam jeñej jacchety muntyiꞌ cạvacsi tsun, junꞌ chuc dyijyi Jenꞌ, meꞌ cạvacsi tsun. Tashcheꞌ jiquej tsun chimeꞌ jacches dyijyedyeꞌ cạiꞌ cạveteyaꞌ tsun muꞌ Cristo jiquej, jeñej muntyiꞌ ĉọ́te tsun, q̂uinꞌ aty jam meꞌ cạvete tsun.

¹⁷ Tyi chuc aty Cristoty yụꞌtac, muꞌ mụiꞌtyity shupqui. Mọꞌ tashches dyijyedyemꞌ aty mọtsimꞌ, yedyej qui mụiꞌsis muꞌ.

¹⁸ Jenꞌdye nash meꞌ yuꞌtyiyisinꞌ. Fáquitiĉaꞌdyemꞌ Jenꞌtum jiquej tsun, muꞌ qui Cristo jutete, paj qui muꞌ jämꞌ yuꞌbusinꞌ Jenꞌyaꞌ. Muꞌ qui yuꞌtyin tsun paj qui voroꞌtacsi muntyiꞌ tsun, jéyacsi tsun junꞌ chuc tupuj jämꞌjibun Jenꞌyaꞌ in.

¹⁹ Jéyacsi tsun: "Muꞌ Jenꞌ jutete muꞌ Cristo, yụꞌtacsi qui jacchety muntyiꞌ in paj qui muꞌin jämꞌjibun Jenꞌtum in, muꞌ aty vayacjeyacsebi juchaj muꞌin, judyeyaꞌ yuꞌtyin tsun paj qui muꞌin voroꞌtacsi tsun ọij p̂eyacdyeꞌ muꞌ", jéyacsi tsun.

²⁰ Tsun nash jutactyiꞌ Cristoty muꞌ, p̂eyacdyeꞌ tuiꞌtyiꞌ tsun, muꞌdye Jenꞌ soꞌmin tsun p̂eyacdyeꞌ muntyidyes in. Mọꞌdyes Cristoscheꞌ tịj muꞌ ferdyeꞌtum jéyac tsun miꞌin: "Meꞌ raꞌ jämꞌjibun Jenꞌyaꞌ miꞌin."

²¹ Cristo itŝity juchaj, Jenꞌ qui namꞌ jeñej buꞌyi juchajtumtyiꞌ jacaviti tsundyes paj qui tsun Cristoty tsun rụij yụꞌtac tsun Jenꞌsiꞌyaꞌ vej muꞌ.