Jäqui'ves Corintoĉantyidyes 4 - Tsimane

P̂eyacdyeꞌ Jenꞌsiꞌ muꞌ mạijchucsi tojmadyeꞌĉan bäꞌyity in

¹ Mọꞌdyes tsun jam shọijtyeꞌ carijtaqui Jenꞌdyes tsun, ĉaĉaij na muꞌdye Jenꞌ jämꞌyedyeꞌyaꞌ muꞌ soꞌmin tsun carijtacdyeꞌ tsun.

² Tsun fạ́queꞌ räj aꞌc̣his dyijyedyeꞌ caminsis mijam väñädyeꞌtum voroꞌyi tsun. Anic rụij jéyacsi tsun Jenꞌsiꞌ p̂eyacdyeꞌ muꞌ, mijam cäj jéyacsi tsun, tsun mạꞌjeꞌ paj qui räj muntyiꞌ chäyibun tsunsiꞌ dyijyedyeꞌ in, junꞌ chuc rụijsis cạiꞌ tsun Jenꞌsiꞌyaꞌ vej muꞌ.

³ Meꞌ tsanꞌ jorojĉan jéyacsi tsun mọꞌ jämꞌsiꞌ p̂eyacdyeꞌ Jenꞌsiꞌ muꞌ, mọꞌ voroꞌtacsis tsun, pạrej qui namꞌ muꞌyaꞌ in jam chiqueꞌ in mọꞌ jätäjyiꞌ chuc, muꞌindyes mọmoꞌ meꞌ in muꞌin tsäquiꞌsisĉandyety in. Caminve buꞌyiꞌ shupquiꞌ muꞌindyes in,

⁴ ĉaĉaij na mọꞌ jacches ayoꞌ tomajjeyacsebiꞌ dyijyedyeꞌ muꞌin jam anicjetety in, paj qui jam mạijchucsebiꞌ ĉojtyiꞌ muꞌin mọꞌ jämꞌsiꞌ mạijquedyeꞌ Cristos muꞌ, muꞌ Jenꞌ buꞌyity, c̣hac yódyeijdyemꞌ muꞌ u.

⁵ Tsun jam ĉụiꞌ timaꞌquiti tsun voroꞌyedyeꞌyaꞌ tsun, muꞌ mọmoꞌ Jesucristo jiꞌjäcte tsun. Meꞌdye jéyacsi tsun, "Muꞌ nash Ayoꞌ tsun." Tsun nash úñi miꞌindyes, soꞌmeyac mọꞌ p̂eyacdyeꞌ, meꞌ buꞌyiꞌ carijtaqui tsun Jesúsdyesiꞌ muꞌ.

⁶ Tashcheꞌdyemꞌ jiquej, yoquiꞌdyemꞌ jämꞌtyeꞌyaꞌ jac jiquej u muꞌ Jenꞌ, meꞌ yi p̂eyaqui paj qui tojmadyeꞌĉansiꞌ shupquiꞌ mọꞌ mạijquedyeꞌ. Muꞌdye Jenꞌ mạijchubusinꞌ ĉojtyiꞌ tsun, paj qui tupuj cạvepja mạijquedyeꞌ Jenꞌsiꞌ muꞌ, mọꞌ cạvepjas tsun Jesucristosyaꞌ vejyaꞌ muꞌ.

Maꞌjodyeꞌtum muꞌ Pablo tyumꞌchuti ñịbedyesyaꞌ muꞌ

⁷ Meꞌ tsanꞌ vaꞌcacsiꞌ aꞌ tsun, mọꞌyaꞌ qui namꞌ mọjoꞌchas jämꞌsiꞌ jedyeꞌ meꞌchupte tsun, tsun jeñej buꞌyi yiris vaꞌcacsiꞌ puñuj meꞌchuiꞌsiꞌ yaꞌiꞌsiꞌ jedyeꞌ, meꞌ buꞌyi tsun. Meꞌ buꞌyi muꞌ Jenꞌ yuꞌtyin tsun paj qui chäyin tsun in mọꞌ ferdyeꞌ meꞌchuiꞌsiꞌ tsun jam ĉụiꞌsiꞌ tsun, Jenꞌsiꞌ nash mọꞌ chäcdyis ferdyeꞌ muꞌ, mọꞌ meꞌchuptes tsun.

⁸ Pucmun därsiꞌ ñịbedyes jịꞌĉojtyeꞌ tsun, mijam qui namꞌ shọijtyejijcaiꞌ tsun. Pạrej itŝiꞌ dyijyedyeꞌ tsun, mijam qui namꞌ tyumꞌyi ĉojtyiꞌ tsun.

⁹ Pạrej jịꞌñibeꞌcan tsun in, Jenꞌ qui namꞌ jam junꞌ farajjin tsun, pạrej jivaꞌchan tsanꞌ tsun in, jam qui namꞌ ujan tsun in.

¹⁰ Aty junaꞌ jịjcaijyaꞌ tsun, pạrej muꞌyaꞌ mạꞌjeꞌ ijan tsun in, yoj jetedyemꞌ Jesús jiquej u in. Meꞌ tsanꞌ meꞌ muꞌdye qui namꞌ yejĉoij tsạꞌchubun aꞌ tsun, mọꞌ jịꞌĉoyacsi muꞌ chimeꞌ tsạꞌ buꞌyi q̂uinꞌ.

¹¹ Meꞌ tsanꞌ tsạꞌ buꞌyi tsun, räjĉan muꞌyaꞌ mạꞌjeꞌ ujan tsun in cäc̣häꞌchucdyeꞌyaꞌ muꞌ Cristo. Mọꞌyaꞌ chäyin tsun in, muꞌdye Cristo tsạꞌchubun sänꞌdyedyes aꞌ tsun paj qui muꞌdyes bäꞌyi tsun.

¹² Anicdye meꞌ, araj ijac tsun, tsun na tsạꞌchuyac miꞌin p̂eyacdyeꞌyaꞌ muꞌ.

¹³ Yiꞌ yiris sánacdyeꞌ, "Yụ anicjete Jenꞌ, mọꞌdyes qui yụ p̂eijte yụ", yiꞌ sánacdyeꞌ. Meꞌdye tsun chimeꞌ cäc̣häꞌchupte tsun anicyedyeꞌ muꞌ sáñeꞌtyis ọij sánacdyeꞌ jiquej, tsun chimeꞌ anicjete mọꞌdyes qui muꞌ p̂eijte voroꞌyedyeꞌyaꞌ tsun.

¹⁴ Tsun chịj junꞌ chuc muꞌ Jenꞌ vañinjajibun muꞌ Jesús Ayoꞌ tsun, meꞌdye raꞌ muꞌ chimeꞌ vañinjibusinꞌ tsun yojdyemꞌ vañinjajibun Jesús jiquej u. Chat qui raꞌ muꞌ Jenꞌ räjtumdye raꞌ casinꞌ yiriꞌyaꞌ miꞌintum in paj qui muꞌsiꞌyaꞌ vej jịjcajaꞌ tsun.

¹⁵ Yojyodyemꞌ jịꞌĉojtyes u tsun q̂uinꞌ, miꞌindyes nash mọꞌ jịꞌĉojtyeꞌ tsun, paj qui tupuj miꞌin seꞌveptinte Jenꞌsiꞌ p̂eyacdyeꞌ muꞌ. Aty dayi jụijyaꞌ in muꞌin jiꞌc̣honacsity Jenꞌ ñịbeꞌjitidyesyaꞌ muꞌ, dadamꞌ raꞌ daiꞌ yoshoropaij jétety in cọdacdyeꞌĉan muꞌin, judyeyaꞌ raꞌ timaꞌquete chimeꞌ in.

¹⁶ Mọꞌdyes jam raꞌ shọijtyejijcajaꞌ. Meꞌ tsanꞌ ọij aꞌ tsun meijquejĉoiꞌ ishoyejĉoiꞌ, mọꞌ qui namꞌ ạꞌedyeꞌ tsun meij mụiꞌsisquejĉoiꞌ yuꞌbusinꞌ muꞌ Jenꞌ räjĉan mạyedyeꞌ.

¹⁷ Ọij q̂uinꞌ ñịbedyes jịꞌĉojtyejas tsun q̂uinꞌ ọyaꞌyas nash mọꞌ, cavin jiyiꞌ. Meꞌ tsanꞌ meꞌ räj ọij jịꞌĉojtyejas tsun, soꞌmac raꞌ tsun dadamꞌ mọjoꞌchas chäcdyis jämꞌsiꞌ Jenꞌyaꞌ, mọꞌ raꞌ jam jụꞌñisĉan mạyedyeꞌ mọtsiꞌ.

¹⁸ Mọꞌdyes tsun jam dyijtujaꞌ ọij jacches jedyeꞌ cạvejas q̂uinꞌ, mọꞌ raꞌ dyijtujaꞌ yódyesdyemꞌ jam cạvejas u, ĉaĉaij na mọꞌ jorojĉansiꞌ jedyeꞌ cạvejas q̂uinꞌ mọꞌ raꞌ cavin mọtsiꞌ. Mọꞌ qui namꞌ jam jorojĉansiꞌ jedyeꞌ, mọꞌ raꞌ räjĉan buꞌyiꞌ, mijam raꞌ jụꞌñisĉan mạyedyeꞌ mọtsiꞌ muꞌ.