Jäqui'ves Corintoĉantyidyes 1 - Tsimane

Tashches voryedyeꞌ Pablosiꞌ

¹ Yụ nash Pablo jutactyiꞌ Jesucristoty muꞌ, ĉụiꞌsiꞌyaꞌ dyijyedyeꞌ muꞌ Jenꞌ meꞌ yuꞌtyin yụ. Yiriꞌyaꞌ Timoteotum, muꞌ vojity tsun, yụ sáñeꞌ ọij miꞌindyes ñuruꞌtyitydyes Jenꞌtyiꞌ muꞌ, Corintoĉan bäꞌyity miꞌin, judyeyaꞌ muꞌindyes chimeꞌ in räj anicjetety Jenꞌ in paiꞌ junanaty ĉụiꞌ in Acayaĉan bäꞌyity in, räj muꞌindyes mọꞌ chimeꞌ.

² Tsun cọdyete Jenꞌ, muꞌ Ạvatusinꞌtyiꞌ tsun judyeyaꞌ muꞌ Jesucristo Ayoꞌ tsun paj qui muꞌ ñịbeꞌjitidyes soꞌminac judyeyaꞌ chimeꞌ paj qui soꞌminac maꞌjodyeꞌ ĉojtyiꞌĉandyes miꞌin.

Jenꞌ jiĉun jayuꞌbun muꞌ Pablo

³ Timaꞌqueja muꞌ Jenꞌ, muꞌ Jesucristoty Jenꞌ muꞌ, muꞌ nash tsuntyiꞌ Ayoꞌ, ĉaĉaij na muꞌ Jenꞌ räjĉan där ñịbeꞌ ĉúsinꞌ tsun, judyeyaꞌ jiĉujshaꞌ yuꞌsinꞌ ĉojtyiꞌĉan tsun.

⁴ Jenꞌ jiĉujshaꞌ yuꞌsinꞌ ĉojtyiꞌĉan tsun táredyeꞌyaꞌ, junꞌsiꞌ chuc ñịbedyes jịꞌĉojtyejaꞌyaꞌ tsun, paj qui meꞌ tupuj tsun yoctyiꞌ jiĉun yụꞌtacsebajshaꞌ ĉojtyiꞌĉan muꞌin táredyeꞌĉan bäꞌyity in, junꞌsiꞌ chuc muꞌin joꞌmes jịꞌĉojtyeꞌ ñịbedyes in. Yojdyemꞌ Jenꞌ u jiĉujshaꞌ yuꞌsinꞌ tsun, meꞌdye raꞌ tsun chimeꞌ jiĉun yụꞌtacsebajshaꞌ muꞌin ñịbeꞌ cạvety in.

⁵ Tsun q̂uinꞌ därsiꞌ ñịbedyes jịꞌĉojtyejaꞌ jụijyaꞌ tsun, yojdyemꞌ muꞌ Cristo jịꞌĉojtyeꞌ jiquej u, meꞌdye muꞌ chimeꞌ Jenꞌ Cristoyaꞌ muꞌ anic där jiĉujshaꞌ yuꞌsinꞌ ĉojtyiꞌĉan tsun táredyeꞌyaꞌ tsun.

⁶ Chimeꞌdye q̂uinꞌ tsun, jịꞌĉojtyeꞌ ñịbedyes jụijyaꞌ tsun voroꞌtacdyeꞌyaꞌ miꞌin, meꞌ jịꞌĉojtyeꞌ tsun paj qui tupuj jéyac miꞌin mọꞌ p̂eyacdyeꞌ c̣honꞌdyedyes, paj qui jiĉunve miꞌin. Jenꞌ qui namꞌ jäꞌmij jiĉun yuꞌtyin ĉojtyiꞌĉan tsun paj qui tsun meꞌdye chimeꞌ jiĉunve yụꞌbadyeyac ĉojtyiꞌĉan miꞌin, paj qui miꞌin chimeꞌ tyumꞌchuti ñịbedyesyaꞌ miꞌin. Yódyemꞌ tsun ñịbeꞌ cạvise u, meꞌdye miꞌin chimeꞌ.

⁷ A nash chị́yeyac jam raꞌ peñi miꞌin. Meꞌ raꞌ tsanꞌ jịꞌĉojtiñeꞌ ñịbedyes yojdyemꞌ tsun u, meꞌdye raꞌ chimeꞌ Jenꞌ jiĉun yuꞌbunac ĉojtyiꞌĉan miꞌin táredyeꞌyaꞌ, yojdyemꞌ tsun u jiĉun yuꞌbun ĉojtyiꞌ tsun.

⁸ Vojity, tsun mạꞌjeꞌ jéyac cuvij junꞌ chuc tsun där ñịbeꞌ cạveꞌ Asiaĉan jiquej. Anic mọjoꞌchaꞌ chäcdyis jịꞌĉojtyeꞌ ñịbedyes tsun, aty jam dyich buꞌyi ĉúti tsun, jeñety raꞌ säñi ĉúti tsun,

⁹ jeñej vaꞌtacdyety sänꞌdyety, meꞌ ĉúti tsun. Ọij chäcdyis ñịbedyes tuyin tsun yiris jiꞌchäyitidyeꞌ mọꞌ dyijyedyeꞌ Jenꞌsiꞌ muꞌ, paj qui jam ĉụiꞌsiꞌcheꞌ ferdyeꞌ ĉúti tsun, paj qui Jenꞌchemꞌ ĉúti tsun, muꞌ vañinjeyacsebantyiꞌ säñity in.

¹⁰ Muꞌ aty jiꞌc̣hoñin tsun därsiꞌyaꞌ tsäquiꞌsis muꞌin, jeñety raꞌ aty ijac ĉúti tsun, judyeyaꞌ raꞌ yejĉoij jiꞌc̣hoñin tsun, ĉaĉaij na muꞌcheꞌ ĉúti tsun. Tsun chị́yete muꞌ, muꞌ raꞌ räjĉan jiꞌc̣hoñin tsun,

¹¹ ĉaĉaij na miꞌin ñútyitiĉaꞌ miꞌin cọdacdyeꞌyaꞌ muꞌ Jenꞌ tsundyesiꞌ. Daiꞌ muꞌyaꞌ muꞌin cọdyetety Jenꞌ tsundyes in, meꞌdye raꞌ chimeꞌ daiꞌ raꞌ yoshoropaij jéte Jenꞌ in, muꞌ jụjjeyacsebiyaꞌ cọdacdyeꞌ muꞌin tsundyesiꞌ.

Junꞌ buty jam Corintoĉan jịjcaij muꞌ Pablo

¹² Mọꞌyaꞌ jedyeꞌ mọꞌ jiꞌmaꞌjotyin tsun, mọꞌ nash anic chịj ĉojtyiꞌĉan tsun junꞌ chuc anic rụij bäꞌyi úcheꞌ jaccheꞌ tsun, anic rụijsis dyijyedyeꞌ cạiꞌ tsun, dadamꞌ miꞌinsiꞌyaꞌ vej rụij bäꞌyi tsun. Tsun meꞌ bäꞌyi jam ĉụiꞌsiꞌyaꞌ dyijyedyeꞌ tsun, Jenꞌ ñútyin tsun ñịbeꞌjitidyesyaꞌ muꞌ, paj qui meꞌ bäꞌyi tsun.

¹³ Ọij sánacdyeꞌ miꞌindyes jam jumĉan jiꞌshupqueyeyac dyijyedyeꞌ tsun, anic jorojĉan yụꞌtyeyeyac, faraj vuꞌ caꞌ meꞌ jämꞌ chäyibutiĉaꞌ dyijyedyeꞌ tsunsiꞌ miꞌin.

¹⁴ Meꞌ tsanꞌ jambiꞌ räj chäquibutiĉaꞌ miꞌin jätäjyiꞌ chuc ọij jiꞌchäyitidyeꞌ sáñeꞌsiꞌ tsun, faraj vuꞌ caꞌ chiquetiñeꞌ räj miꞌin, paj qui ayijbanꞌyaꞌ tupudyeꞌ Jesucristos muꞌ, maꞌjotyitiĉaꞌ tsun miꞌin muꞌsiꞌyaꞌ vej muꞌ, yojdyemꞌ raꞌ tsun maꞌjotyeyac miꞌin u.

^15-16 Yụ nash chịj miꞌin chäyibutiĉaꞌ dyijyedyeꞌ yụs miꞌin mọꞌdyes dyijyi tsanꞌ yụ jiquej päräꞌ quiꞌ tsanꞌ mạꞌjeꞌ cạvecyac. Mạꞌjeꞌ tsanꞌ miꞌin tashcheꞌ ĉọmcayac Macedoniaĉan jịjcaijyaꞌ yụ, judyeyaꞌ chimeꞌ caꞌñibunyaꞌ meij raꞌ yụ tänꞌjemtubadyeyac. Meꞌ tupuj ñútyitiĉaꞌ yụ miꞌin miꞌedyedyes raꞌ yụ, caꞌñibunyaꞌ yụ Judeaĉan jijtuban yụ. Mọꞌ tsanꞌ dyijyedyeꞌ yụ mạꞌjeꞌ tsanꞌ yụ paj qui päräꞌ quiꞌ nọ́tyeyac Jenꞌdyes.

¹⁷ Mọꞌdyes qui jịꞌchuꞌitiĉaꞌ yụ miꞌin, jeñej aty yụ jam anicjetety Jenꞌ u, meꞌ ĉútiĉaꞌ miꞌin. Yi miꞌin: "Muꞌ Pablo jam jịꞌcätseꞌ p̂eyacdyeꞌ, meꞌ tsanꞌ yi muꞌ: Meꞌ raꞌ yụ, ĉojtyiꞌĉan qui namꞌ yi muꞌ: Jam raꞌ meꞌ yụ", meꞌ yi miꞌin.

¹⁸ Yụ jéyac, jam na meꞌ tsun, yojdyemꞌ muꞌ Jenꞌ u rụij p̂eyaqui, meꞌdye tsun chimeꞌ jịꞌcätseꞌ p̂eyacdyeꞌ tsun, jam yocve dyijyi ĉojtyiꞌĉan tsun, junꞌ chuc dyijyi ĉojtyiꞌĉan tsun, mọmꞌ p̂eyeꞌ tsun.

¹⁹ Yụ yiriꞌyaꞌ Silvanotum judyeyaꞌ Timoteotum voroꞌtyeyacyaꞌ miꞌin, jiꞌjäcte tsun Jesucristo, Jenꞌtyiꞌ Ạvaꞌ muꞌ, muꞌ jam päräꞌ yuꞌtyiyisinꞌ p̂eyacdyeꞌ, muꞌ nash anic rụijtyity muꞌ

²⁰ ĉaĉaij na muꞌ räj jịꞌcätseptety Jenꞌsiꞌ p̂eyacdyeꞌ muꞌ soꞌmisinꞌsiꞌ tsun. Mọꞌdyes tsun timaꞌquejayaꞌ muꞌ, jéja tsun Jesucristoscheꞌ tịj muꞌ, "Paj meꞌ."

²¹ Muꞌdye fer buꞌyi yuꞌsinꞌ tsun, ĉaĉaij na vaj cäts Cristoty tsun. Chimeꞌdye muꞌ Jenꞌ tsimꞌsinꞌ tsun,

²² judyeyaꞌ muꞌ soꞌmisinꞌ ĉụiꞌsiꞌ Ạꞌedyeꞌ muꞌ, mọꞌ cac̣htacdyeꞌ buꞌyiꞌ Jenꞌsiꞌ muꞌ, mọꞌ jịꞌĉocdyeꞌ shupquiꞌ aty Jenꞌtyiꞌ tsun, mọꞌ yacchutis ñịbeꞌyedyeꞌ mọꞌ jorojĉanyiꞌ räj raꞌ ñịbeꞌjisinꞌ.

²³ Yụ raꞌ jéyac fercheꞌ Jenꞌsiꞌyaꞌ vej muꞌ, muꞌ chäyibuntyiꞌ ĉojtyiꞌ yụ, yi yụ: meꞌ buꞌyiꞌ dyijyedyeꞌ jiquej yụ, yụ jambiꞌ ĉọcyac Corintoĉantyiꞌ miꞌin ĉaĉaij na jam mạꞌjeꞌ yụ jịꞌchuꞌeyac aꞌc̣hisyaꞌ dyijyedyeꞌ miꞌin.

²⁴ Jam mạꞌjeꞌ sonꞌ buꞌyi yuꞌti tsun miꞌindyes anicjetintedyes Jenꞌ miꞌin, ĉaĉaij na aty fer buꞌyi miꞌin anicjetinte Jenꞌ. Mọmꞌ dyijtuiꞌ tsun mạꞌjeꞌ paj qui quivij nọ́tyeyac miꞌin paj qui maꞌjodyeꞌtum bäꞌyi miꞌin.