Tashches Tesalonicaĉantyidyes 1 - Tsimane

Tashches voryedyeꞌ Pablos Tesalónicaĉantyidyes in

¹ Yụ Pablo, yiriꞌyaꞌ muꞌintum yụ Silvano judyeyaꞌ Timoteo, yụ sáñeꞌ miꞌindyes Tesalónicaĉan bäꞌyitydyes miꞌin anicjetintety Jenꞌ. Miꞌin Jesucristoty muꞌ Ayoꞌ tsun, judyeyaꞌ Jenꞌtyiꞌ chimeꞌ miꞌin, muꞌ Ạvatusinꞌtyiꞌ tsun. Tsun cọdyete Jenꞌ paj qui muꞌ ñịbeꞌjitidyes soꞌminac miꞌin judyeyaꞌ paj qui chimeꞌ soꞌminac maꞌjodyeꞌ ĉojtyiꞌĉandyes miꞌin.

Junꞌ chuc rụij cäc̣häꞌchute Jenꞌ in

² Tsun räjĉan cọdyete Jenꞌ miꞌindyes judyeyaꞌ yoshoropaij jéte tsun räjenꞌdyes miꞌin.

³ Cọdaquiyaꞌ Jenꞌcheꞌ tsun, tsun räjĉan dyijtuyac miꞌin junꞌ chuc anicyedyeꞌyaꞌ miꞌin cäc̣häꞌchutinte Jenꞌ judyeyaꞌ miꞌin chimeꞌ carijtaqui muꞌdyes ĉaĉaij na fer mạꞌjetinte miꞌin. Miꞌindye tyumꞌchutidyeꞌtum bistinte muꞌ Jesucristo Ayoꞌ tsun, mọꞌmun dyijtubiyac dyijyedyeꞌ miꞌin judyeyaꞌ yoshoropaij jéte Jenꞌ tsun miꞌindyes.

⁴ Vojity, miꞌin anic mạꞌjeyacdyety Jenꞌtyiꞌ muꞌ. Tsun chị́yeyac miꞌin junꞌ chuc miꞌin tsimꞌtactyiꞌ Jenꞌtyiꞌ muꞌ paj qui muꞌdyety miꞌin.

⁵ Voroꞌtyeyacyaꞌ jiquej jämꞌsiꞌ p̂eyacdyeꞌ Jenꞌsiꞌ muꞌ, jam p̂eyacdyeꞌyamꞌ jéyac tsun, mọꞌ Jenꞌsiꞌ Ạꞌedyeꞌ muꞌ mọꞌmun jiꞌcaviyinac ferdyeꞌ, paj qui chịjve miꞌin anic rụijsis mọꞌ p̂eyacdyeꞌ seꞌvetiñes miꞌin. Chimeꞌdye chäyitiĉaꞌ miꞌin junꞌ chuc bäꞌyi tsun miꞌintum jiquej, mọmꞌ dyijtuiꞌ tsun mạꞌjeꞌ nọ́tyeyac miꞌin.

⁶ Miꞌin chimeꞌ tsunsiꞌ jämꞌsiꞌ dyijyedyeꞌ cäc̣häꞌchubutiĉaꞌ miꞌin, judyeyaꞌ Ayoꞌsiꞌmun dyijyedyeꞌ cäc̣häꞌchubitinte miꞌin chimeꞌ, meꞌ tsanꞌ jịꞌñibeꞌcac jiquej miꞌin, tiĉuñetiñeꞌ qui namꞌ p̂eyacdyeꞌ muꞌ, judyeyaꞌ maꞌjodyeꞌtum, mọꞌ soꞌminacsiꞌ Jenꞌsiꞌ Ạꞌedyeꞌ muꞌ.

⁷ Meꞌdye muꞌin in anicjetety Jenꞌ in, räj muꞌin Macedoniaĉantyiꞌ in judyeyaꞌ Acayaĉantyiꞌ in cäc̣häꞌchubunac in dyijyedyeꞌ miꞌin junꞌ chuc miꞌin cäc̣häꞌchutinte Jenꞌ.

⁸ Räj muntyiꞌ in miꞌinyaꞌ seꞌvepte in Ayoꞌsiꞌ p̂eyacdyeꞌ muꞌ, jam muꞌin mọmoꞌ Macedoniaĉantyiꞌ in judyeyaꞌ Acayaĉantyiꞌ in seꞌvibunac in anicyedyeꞌ miꞌinsiꞌ, paiꞌ junaty ĉụiꞌ in chimeꞌ seꞌveꞌ in junꞌ chuc miꞌin anicjebitinte Jenꞌsiꞌ p̂eyacdyeꞌ muꞌ, mọꞌdyes tsun aty jam jemoñeꞌ jéyacsi, ĉaĉaij na aty chịj in.

⁹ Muꞌindye jin tsun in aty seꞌveꞌ in junꞌ chuc miꞌin tiĉunꞌtiĉaꞌ jiquej tsun miꞌin, yoquiꞌdyemꞌ voroꞌtyeyacyaꞌ jiquej tsun u. Chimeꞌ muꞌin seꞌvaqui in junꞌ chuc miꞌin yacchutiñeꞌ jiquej jämꞌtacdyeꞌ in, cäc̣häꞌchutinte qui muꞌ anictyity Jenꞌ, muꞌ tsạꞌtyiꞌ

¹⁰ Chimeꞌdye muꞌin seꞌveꞌ in junꞌ chuc miꞌin bisbitinte Jenꞌtyiꞌ Ạvaꞌ muꞌ, muꞌ Jesús, muꞌ jajiꞌtsaꞌibuntyiꞌ Jenꞌ, mạyedyeꞌchety raꞌ jijtuban. Muꞌ Jiꞌc̣honsinꞌtyiꞌ tsun paj qui jam tsuncheꞌ tŝọiꞌ mọꞌ tsäquiꞌsis vaꞌtacdyeꞌ Jenꞌsiꞌ muꞌ, meꞌ meꞌ jin tsun muntyiꞌ in, muꞌin seꞌveptety in Jenꞌsiꞌ p̂eyacdyeꞌ muꞌ.