Tashches Corintoĉantyidyes 9 - Tsimane

Junꞌ chuc raꞌ bäꞌyi muꞌ cạyacsity Jenꞌsiꞌ p̂eyacdyeꞌ

¹ Miꞌin aty chịj junꞌ chuc aty faraj muntyiꞌyaꞌ yụ, ĉaĉaij na yụ nash anictyity jutactyiꞌ Jenꞌtyiꞌ muꞌ, ĉụiꞌsiꞌyaꞌ vej yụ cạvete yụ muꞌ Jesús Ayoꞌ tsun, judyeyaꞌ yụ́dye jụj jaꞌyeyac miꞌin, mọꞌ jorojĉanyiꞌ yụ anictyity jutactyiꞌ Jenꞌtyiꞌ muꞌ.

² Meꞌ tsanꞌ pạrej muꞌyaꞌ in jam jụjtyin yụ in, jeñej aty jam jutactyiꞌ Jenꞌtyiꞌ ĉun u yụ in, miꞌin qui namꞌ jam meꞌ, miꞌin jụjtiĉaꞌ yụ miꞌin junꞌ chuc Jenꞌ jutin yụ, mọꞌdyes yụ́dye jụj jaꞌyeyac Jenꞌcheꞌ miꞌin, mọꞌ jorojĉanyiꞌ anictyity yụ jutactyiꞌ Jenꞌtyiꞌ muꞌ.

³ Q̂uinꞌ yụ raꞌ vorjeyacsi muꞌin ñäñibuntyiꞌ yụ in jutacdyeꞌ yụ.

⁴ Tupuj yụ paj qui carijtacdyedyes Jenꞌdyes yụ soꞌmac yụ tsạꞌ buꞌyedyes yụ.

⁵ Chimeꞌdye mọꞌyaꞌ jụijyaꞌ p̂en yụ anicjetes Jenꞌ, a vuty tupuj cạqui u yụ cạyacsiyaꞌ yụ Jenꞌsiꞌ p̂eyacdyeꞌ muꞌ, yojdyemꞌ vojity u tsun muꞌin cạyacsity p̂eyacdyeꞌ in, judyeyaꞌ ĉụiꞌtyiꞌ vojity muꞌ Ayoꞌtyiꞌ tsun, judyeyaꞌ Pedro chimeꞌ, muꞌin cạqui p̂en muꞌin.

⁶ Yụ judyeyaꞌ muꞌ Bernabé ¿tsun adac mọmoꞌ meꞌ carijtaqui tsạꞌ buꞌyedyes ĉútiĉaꞌ miꞌin? ¿Tsun adac mọmoꞌ jam tupuj soꞌmac tsạꞌ buꞌyedyes tsun, meꞌ ĉútiĉaꞌ tsun miꞌin, jam jeñej yoctyiꞌ cạyacsity p̂eyacdyeꞌ in? Jam, tsun chimeꞌ tupuj soꞌmac, ĉaĉaij na tsun Jenꞌtyiꞌ jutactyiꞌ chimeꞌ.

⁷ Jeshaꞌ, muꞌin väc̣häꞌtyity in jam ĉụiꞌsiꞌ säcsedyeꞌ yaꞌij in. Meꞌdye muꞌin chimeꞌ quịjoijtyiꞌ in tupuj jebeiꞌ in quịjodyeꞌĉansiꞌ sacacdyeꞌ muꞌin. Chimeꞌdye muꞌin ĉọjcacsity cuꞌdyeꞌ in tupuj tyébiꞌ reche in.

^8-9 Meꞌ yụ jéyac ọij jịꞌĉocdyes p̂eyacdyeꞌ paj qui chịj miꞌin muꞌin carijtaquity Jenꞌdyes in tupuj yaꞌitac in. Ọij jam muntyis mọmoꞌ dyijyedyeꞌ tsun, chimeꞌdye mọꞌdye yiꞌ Jenꞌsiꞌ yụꞌtacdyeꞌ muꞌ, mọꞌ jasoꞌmitis Moisés jiquej, yiꞌ: "Jam raꞌ sapbitinte vóyes chụꞌ muꞌ yútyevaꞌcaquity trivo, paj damꞌjete chimeꞌ", yiꞌ yụꞌtacdyeꞌ. Jenꞌ jam dyijtucsi vóye,

¹⁰ tsun dyijtun Jenꞌ, tsundyes mọmoꞌ ọij sánacdyeꞌ Jenꞌsiꞌ muꞌ, yiꞌ yaꞌitac ca raꞌ tsun carijtaquity Jenꞌdyes tsun, yoj yiꞌdyemꞌ sánacdyeꞌ o: "Muꞌ quịjoijtyiꞌ judyeyaꞌ muꞌ vädaquity vaj meꞌ mọꞌ biseꞌ in sacacdyeꞌ, vaj meꞌ raꞌ soꞌmac in", yiꞌ sánacdyeꞌ.

¹¹ Tsun aty cäti mọꞌ vej ĉojtyiꞌĉan miꞌin, mọꞌdyes q̂uinꞌ tupuj soꞌmitiĉaꞌ miꞌin damꞌ jedyeꞌ aꞌdyes tsun.

¹² Pạrej muꞌyaꞌ yoctyiꞌ cạyacsity in Jenꞌsiꞌ p̂eyacdyeꞌ muꞌ, muꞌin soꞌmacsi jedyeꞌ miꞌin, dadamꞌdye tsun jemoñeꞌ paj qui soꞌmitiĉaꞌ jedyeꞌ miꞌin. Tupuj tsanꞌ tsun cọdyetyeyac tsạꞌ buꞌyedyes tsun, jam qui namꞌ meꞌ cọdyetyeyac tsun. Meꞌ tsanꞌ ñịbeꞌ bäꞌyi tsun, dyichchuti qui namꞌ tsun paj qui jam cọdyetyeyac miꞌin, paj qui jam yi miꞌin, "Jam raꞌ seꞌvepja tsun jämꞌsiꞌ p̂eyacdyeꞌ Cristos muꞌ tuiꞌsiꞌ muꞌ Pablo, ĉaĉaij na muꞌ mọꞌyaꞌ querec̣haveij", paj jam yi miꞌin.

¹³ ¿Jam chịj u miꞌin junꞌ chuc muꞌin carijtaquity in Jenꞌsiꞌĉan acaꞌ muꞌin tsạꞌ buꞌyi in mọꞌĉansiꞌĉan säcsedyeꞌ? Chimeꞌdye muꞌin yụꞌtactyiꞌ in jiꞌcoꞌshayeꞌtyiꞌ Jenꞌdyes in, chet soꞌmac in mọꞌ shush jiꞌcoꞌshayacdyedyes muꞌin.

¹⁴ Mọꞌdye mọmoꞌ yiꞌ Ayoꞌsiꞌ p̂eyacdyeꞌ muꞌ, yiꞌ: "Muꞌin voroꞌtacsity in p̂eyacdyeꞌ muꞌ, muꞌin raꞌ soꞌmac in tsạꞌ buꞌyedyes in."

¹⁵ Tupuj yụ meꞌ chimeꞌ soꞌmac, jam qui namꞌ meꞌ mạꞌjeꞌ soꞌmac yụ. Chimeꞌdye jam meꞌdyes ọij q̂uinꞌ sánacdyeꞌ miꞌindyes, jam yụ cọdyetyeyac jedyeꞌ miꞌin. Mọꞌdyes jam raꞌ yụ cọdaqui tsạꞌ buꞌyedyes yụ, damꞌdye jämꞌ säñi ĉúti yụ, paj qui jam yi in: "Meꞌ tsanꞌ yi muꞌ Pablo, jam querec̣hayaꞌ voroꞌtacsi muntyiꞌ in, muꞌdye qui namꞌ cọdyetacsi jedyeꞌ", paj qui jam meꞌ yi muntyiꞌ in.

¹⁶ Meꞌ tsanꞌ jämꞌsiꞌ p̂eyacdyeꞌ voroꞌtacsi yụ, jam qui namꞌ mọꞌ vaꞌbunjeꞌ yụ, ĉaĉaij na Jenꞌdye jiquej meꞌ yuꞌtyin yụ paj qui meꞌ voroꞌtacsi yụ. Jam meꞌ chiquete jụijyaꞌ yụ, a vuty tári bäꞌyi u yụ.

¹⁷ Ĉụiꞌ mọmoꞌ jiꞌsäsdyi jụijyaꞌ yụ voroꞌtacsi yụ, a vuty tupuj yaꞌitac u yụ. Jam qui namꞌ ĉụiꞌsiꞌyaꞌ dyijyedyeꞌ siti yụ, Jenꞌdye meꞌ yuꞌtyin yụ paj qui voroꞌtacsi yụ.

¹⁸ ¿Jedyeꞌ buty bijodyeꞌ yụ? Yocsiꞌdye bijodyeꞌ yụ, jam jedyeꞌ cọdaqui yụ voroꞌtacsiyaꞌ yụ jämꞌsiꞌ p̂eyacdyeꞌ Jenꞌsiꞌ muꞌ, mọꞌ nash bijodyedyes yụ shupquiꞌ. Tupuj tsanꞌ cọdaqui yụ tsạꞌ buꞌyedyes yụ, jam qui namꞌ meꞌ cọdaqui yụ.

¹⁹ Anic faraj yụ, jam úñedyeꞌĉan bäꞌyi yụ, meꞌ tsanꞌ meꞌ ĉụiꞌ qui namꞌ yuꞌti yụ paj qui räjdyes úñi yụ. Meꞌ yi yụ paj qui daiꞌ muntyiꞌ jụj jaꞌyacsi yụ.

²⁰ Meꞌ jajbuꞌyacsi yụ judío in, cäc̣häꞌchucsebi yụ yicdyeꞌ muꞌinsiꞌ in, paj qui meꞌ jụj jaꞌyacsi yụ. Meꞌ tsanꞌ mọꞌ yụꞌtacdyeꞌ aty jam bächän yụ, jajbuꞌyacsi qui namꞌ yụ judío in, yụ́mun tacaꞌ chimeꞌ chiqueꞌ mọꞌ yụꞌtacdyeꞌ paj qui meꞌ jụj jaꞌyacsi yụ.

²¹ Muꞌin qui jajbuꞌyacsity yụ muꞌin jam judío in jam meꞌchuptety yụꞌtacdyeꞌ in, meꞌ buꞌyidye yụ chimeꞌ yuꞌti jeꞌñeiꞌtyi jam meꞌchuiꞌtyiꞌ yụꞌtacdyeꞌ yụ, meꞌ buꞌyi yuꞌti yụ paj qui muꞌin jụj jaꞌyacsi yụ. Mijam qui namꞌ méquiꞌ mọꞌ farajjeꞌ yụ Jenꞌsiꞌ p̂eyacdyeꞌ muꞌ, yejĉoiꞌ mọmoꞌ mọꞌ bächän yụ Cristos p̂eyacdyeꞌ muꞌ.

²² Muꞌin qui jajbuꞌyacsi yụ muꞌin jambiꞌ fer buꞌyity Jenꞌcheꞌ in, chimeꞌ buꞌyidye yuꞌti bäꞌyi yụ, paj qui jam jịꞌfajcacsi yụ, meꞌĉandye jụj jaꞌyacsi yụ. Yojyojdyemꞌ muꞌin u in, meꞌ meꞌ jịjcatacsi yụ, paj qui meꞌ jụj jaꞌyacsi yụ, tupuj jụijyaꞌ yụ.

²³ Voroꞌyedyes p̂eyacdyeꞌ meꞌ bäꞌyi yụ, paj qui yụ tupuj räj jiꞌseꞌveyacsi jämꞌsiꞌ p̂eyacdyeꞌ Jenꞌsiꞌ muꞌ.

²⁴ ¿Jam chịj u miꞌin majmaij jụijyaꞌ muntyiꞌ in, meꞌ tsanꞌ räj p̂iqui in, muꞌyaꞌ qui namꞌ yirity chụiꞌtyiꞌ mọꞌ bijodyeꞌ? Meꞌdye raꞌ miꞌin chimeꞌ, fer buꞌyi bäꞌyi Jenꞌdyes jụijyaꞌ miꞌin, yojdyemꞌ muꞌin majmaijtyiꞌ u in shuj tyeij in, meꞌdye raꞌ miꞌin chimeꞌ, paj qui chutiñeꞌve miꞌin mọꞌ bijodyeꞌ.

²⁵ Jeshaꞌ, muꞌin majmaijtyiꞌ in anic jämꞌ ĉujcati in judyeyaꞌ jiꞌfercaqui aꞌ muꞌin paj qui tupuj bijoij in. Mọꞌ bijodyeꞌ muꞌin ĉästacdyeꞌ q̂uebeꞌnacsiꞌ shan, mọꞌ cavin mọtsis. Tsunsiꞌ na raꞌ bijodyeꞌ, mọꞌ soꞌmisinꞌsiꞌ raꞌ muꞌ Jenꞌ yocsiꞌdye, mọꞌ raꞌ jam yirisĉan mạyedyeꞌ mọtsiꞌ.

²⁶ Meꞌ buꞌyi yụ Jenꞌdyes, yojdyemꞌ p̂iquity muntyiꞌ u in, jam yocsiꞌ jedyeꞌ dyijtuiꞌ yụ, chimeꞌdye jeñej majmadyeꞌ ĉaꞌtitidyeꞌ muntyis muꞌin jam fibiꞌ ĉaꞌtiti in, paj qui bijoij in, meꞌdye yụ chimeꞌ, jam yocve dyijyi yụ, jam fibiꞌ bäꞌyi yụ, muꞌdyes mọmoꞌ fer carijtaqui yụ.

²⁷ Fer ĉọjcaqui ĉụiꞌsiꞌ aꞌ yụ, jiꞌferdyiyiti yụ paj qui rụij cäc̣häꞌchute Jenꞌ yụ. Jam jụijyaꞌ meꞌ yụ, a vuty jam soꞌmac bijodyeꞌ u yụ. Meꞌ tsanꞌ yụ yoctyiꞌ jịꞌchiyacsi yụ vatyquej raꞌ jam junꞌ soꞌmac bijodyeꞌ yụ voroꞌtacdyeꞌyas yụ.