Tashches Corintoĉantyidyes 8 - Tsimane

Shush jämꞌtacdyeꞌyaꞌ jadyiquis

¹ Q̂uinꞌ raꞌ yụ vorjebiyac ọij p̂eyacdyeꞌ miꞌin, mọꞌ jítiĉas sánacdyeꞌcheꞌ bajaꞌ jiquej miꞌin, jítiĉaꞌ bajaꞌ jiquej yụ miꞌin tupuj buty jebejaꞌ shush jämꞌtacdyeꞌyaꞌ jadyiquis. Pạrej yéjaꞌ tsun: "Tsun räj dyijyedyeꞌtumtyiꞌ tsun", yéjaꞌ. Meꞌ yéjaꞌ jụijyaꞌ tsun anic där vaꞌbunyedyeꞌtum yéjaꞌ tsun. Tsun na mạꞌjeyacsejaty jụijyaꞌ, mọꞌ yuꞌsinꞌ paj qui fer buꞌjaꞌ Jenꞌdyes.

² Tyi chuc vaꞌbunyi dyijyedyeꞌtumtyiꞌ ĉúti jụijyaꞌ muꞌ, muꞌ jam méquiꞌ dyijyedyeꞌtumtyiꞌ shupqui, jam muꞌ úyaꞌ jayej.

³ Muꞌin na mạꞌjetety Jenꞌ in, Jenꞌ chị́yacsi.

⁴ Yụ raꞌ q̂uinꞌ jéyac junꞌ chuc mọꞌ shush mọꞌyaꞌ jadyiquis jämꞌtacdyeꞌyaꞌ. Chị́jaꞌ tsun mọꞌin jämꞌtacdyeꞌ in mijam méquiꞌ jenꞌ buꞌyiꞌ in, mijam méquiꞌ ferdyeꞌ meꞌchuiꞌ in, meꞌdye Jenꞌ mọmoꞌ yirity muꞌyaꞌ.

⁵ Pạrej muntyiꞌ muꞌyaꞌ cäj cạiꞌ dyijyedyeꞌ muꞌin, yi in: "Daiꞌ muꞌyaꞌ jenꞌ in, judyeyaꞌ ayoꞌ in, mạyedyeꞌchety in judyeyaꞌ jacchety chimeꞌ in", yi in.

⁶ Tsun qui namꞌ chị́jaꞌ muꞌyaꞌ yirity mọmoꞌ Jenꞌ, muꞌ Ạvatusinꞌtyiꞌ tsun, jämꞌtyety räj jedyeꞌ, meꞌdyes bäꞌjaꞌ muꞌdyes. Chimeꞌdye muꞌyaꞌ yirity mọmoꞌ Ayoꞌ tsun, muꞌ Jesucristo muꞌ tsạꞌchusinꞌtyiꞌ tsun, muꞌtum muꞌ Jenꞌ räj jämꞌtyeꞌ jedyeꞌ jiquej in q̂uinꞌ cạvejas tsun, judyeyaꞌ tsun chimeꞌ jämꞌsinꞌ.

⁷ Jam qui namꞌ räj ọij chị́yeꞌ in, pạrej muꞌyaꞌ yiqui cudyitity jämꞌtacdyeꞌcheꞌ jiquej in, jebeiꞌyaꞌ in mọꞌ shush jämꞌtacdyeꞌyaꞌ jadyiquis, dyijyi in aty juchaij ĉúti in ĉaĉaij na mọꞌ aty jiꞌdyijvacseban quivij jämꞌtacdyeꞌ. Yi in: "Ọij shush ac̣hiꞌbusinꞌ ĉojtyiꞌ tsun", yi in, ĉaĉaij na jambiꞌ fer buꞌyi dyijyedyeꞌĉan muꞌin.

⁸ Vojity, mọꞌ shush jebejas jam mọꞌ méquiꞌ ñútyisinꞌ Jenꞌsiꞌyaꞌ vej muꞌ. Jebejaꞌ jụijyaꞌ mọꞌ, mijam mọꞌ tupuj jämꞌ yuꞌsinꞌ Jenꞌsiꞌyaꞌ vej muꞌ, jam na jebejaꞌ jụijyaꞌ mọꞌ, meꞌdye mọmoꞌ shupquiꞌ, jam ac̣hiꞌsinꞌ Jenꞌsiꞌyaꞌ vej muꞌ.

⁹ Meꞌ tsanꞌ jam ñucchunac mọꞌ jämꞌtacdyes dyijyedyeꞌ mọꞌ, meꞌ tsanꞌ chịj miꞌin jam juchaj shupquiꞌ jebetiñeꞌ jụijyaꞌ miꞌin mọꞌ jämꞌtacdyeꞌyaꞌ jadyiquis, areꞌĉa miꞌin jiꞌpenacsi muꞌin jambiꞌ fer buꞌyity in dyijyedyeꞌĉan muꞌin, ĉaĉaij na jambiꞌ junꞌ chịj muꞌin in.

¹⁰ Miꞌin aty chịj meꞌ tsanꞌ jebetiñeꞌ mọꞌ, jam juchaj shupquiꞌ miꞌintum. Meꞌ tsanꞌ meꞌ, vátyequej yirity anicjetety Jenꞌ, jambiꞌ fer buꞌyity, cavinacyaꞌ säcsevaꞌjoij miꞌin muꞌĉan jämꞌtacdyesĉansiꞌ acaꞌ mọꞌ, vatyquej muꞌ cäc̣henꞌyejoijyaꞌ jebeiꞌ mọꞌ jämꞌtacdyeꞌyaꞌ jadyiquis shush, vatyquej raꞌ muꞌ dyijyi ĉojtyiꞌĉan muꞌ aty juchaij, joꞌmesyaꞌ raꞌ jiꞌpentinte miꞌin.

¹¹ Miꞌin chịj jam mọꞌ jedyeꞌ yiꞌ jebacyaꞌ, meꞌ tsanꞌ meꞌ, cäc̣henꞌ jaꞌyetinteyaꞌ miꞌin muꞌ jambiꞌ fer buꞌyity, joꞌmesyaꞌ qui namꞌ jiꞌpentinte miꞌin. Chataty, meꞌ tsanꞌ Cristo säñi muꞌindyes chimeꞌ in jambiꞌ fer buꞌyitydyes in, miꞌin qui namꞌ chijämꞌ jiꞌpenacsi joꞌmesyaꞌ.

¹² Meꞌ jụijyaꞌ miꞌin, jiꞌpenacsi muꞌin jambiꞌ fer buꞌyity Jenꞌdyes in, jam muꞌin mọmoꞌ soꞌmacsi juchaj miꞌin, Cristomun chimeꞌ soꞌmetinte juchaj.

¹³ Meꞌ jụijyaꞌ yụ jebeiꞌyaꞌ mọꞌ shush jämꞌtacdyeꞌyaꞌ jadyiquis, vatyquej jiꞌpente ĉụiꞌtyiꞌ vojity yụ, damꞌdye jämꞌ jam yirisĉan mạyedyeꞌ jebeiꞌ yụ, paj qui jam jiꞌpente ĉụiꞌtyiꞌ vojity yụ.