Tashches Corintoĉantyidyes 7 - Tsimane

Jiꞌchäyitidyeꞌ vämedyes

¹ Q̂uinꞌ raꞌ yụ vorjebiyac cọdacdyes p̂eyacdyeꞌ miꞌin, mọꞌ jítiĉas bajaꞌ miꞌin sánacdyeꞌcheꞌ jiquej miꞌin. Yụ raꞌ jéyac, jämꞌ tsanꞌ paj qui muꞌin sonꞌ in jam jäqueꞌ p̂en in.

² Meꞌ tsanꞌ meꞌ, mọꞌ qui namꞌ ĉaĉaij meꞌtaquiꞌ voꞌvodyeꞌ, mọꞌdyes damꞌdye jämꞌ cäts yirityityij muntyiꞌ in meꞌchuiꞌ ĉụiꞌsiꞌ p̂en muꞌin, judyeyaꞌ mọꞌin p̂en in damꞌdye jämꞌ meꞌchute ĉụiꞌtyiꞌ vämtyiꞌ mọꞌin.

³ Muꞌ vämtyiꞌ judyeyaꞌ mọꞌ p̂en, paj vaj cäts jịꞌcätsipti dyijyedyeꞌ mọꞌin, junꞌ chuc cọdaquiꞌ aꞌ mọꞌin.

⁴ Mọꞌ vämtyiꞌtumsiꞌ p̂en mọꞌsiꞌ aꞌ mọꞌ aty vämtyidyes mọꞌ, judyeyaꞌ mọꞌ vämtyis aꞌ muꞌ aty p̂endyes shupquiꞌ muꞌ.

⁵ Jam raꞌ vaj meꞌ quijatutyiti aꞌ miꞌin, yejĉoij raꞌ meꞌtaqui mọꞌtum miꞌin. Cäts dyijyi jụijyaꞌ miꞌin tupuj farajjetiñeꞌ chum mọꞌ meꞌtacdyeꞌ miꞌin paj qui mọꞌ chum dyijtutiñeꞌ damꞌ cọdacdyeꞌ Jenꞌcheꞌ miꞌin. A raꞌ meꞌsiꞌ, quivij meꞌbun miꞌin, jam raꞌ yejĉoij quijatutyitidyeij aꞌ miꞌin paj qui jam jiꞌpennac Satanás voꞌvodyeꞌyaꞌ miꞌin.

⁶ Jam meꞌ yi yụ paj qui räj miꞌin vämi, meꞌdye mọmoꞌ yi yụ, tyi chuc mạꞌjeꞌ tupuj vämi in.

⁷ Yụ dyijyi tsanꞌ damꞌdye jämꞌ jam vämi miꞌin, yojdyemꞌ yụ u. Jam mọꞌ dyijyedyeꞌ Jenꞌsiꞌ muꞌ, ĉaĉaij na muꞌ Jenꞌ jam cäts soꞌmisinꞌ ferdyeꞌ muꞌ. Pạrej soꞌmisinꞌ dyich buꞌyedyeꞌ muꞌ paj qui jam jemonjaꞌ vämedyeꞌ tsun. Yoctyiꞌ na jam meꞌ soꞌmisinꞌ Jenꞌ.

⁸ Mọꞌdyes yụ jäꞌmiij jéyacsi muꞌin yiritydyemꞌ bäꞌyity in judyeyaꞌ mọꞌin chimeꞌ muñemunsiꞌ in, jämꞌ tsanꞌ paj qui vaj meꞌ bäꞌyi in yojdyemꞌ yụ u.

⁹ Jam qui namꞌ tupuj dyich buꞌyi jụijyaꞌ miꞌin, damꞌdye jämꞌ vämi miꞌin. Jam ĉọjcaqui aꞌ jụijyaꞌ miꞌin, mọꞌ jiyiꞌ fer jụijyaꞌ, damꞌdye jämꞌ vämi miꞌin.

¹⁰ Chimeꞌdye mọꞌyaꞌ p̂eyacdyeꞌ vämitydyes in, mọꞌ jam yụ́siꞌ p̂eyacdyeꞌ, Ayoꞌsiꞌ muꞌ, mọꞌ yiꞌ paj qui mọꞌ p̂en jam yacchuquiꞌ vämtyiꞌ mọꞌ.

¹¹ Yacchuquiꞌ vämtyiꞌ jụijyaꞌ mọꞌ p̂en, jemoñeꞌ yiris quimꞌ bäꞌbanꞌ, jam na jụijyaꞌ meꞌ, jemoñeꞌ cuvij chimuꞌdye jäĉajte vämtyiꞌ mọꞌ. Chimeꞌdye muꞌ sonꞌ paj jam yacchuqui p̂en muꞌ.

¹² Ọij raꞌ p̂eyacdyeꞌ meꞌ tsanꞌ jam muꞌ jịꞌchiyacsi Ayoꞌ tsun jiquej, yụ qui na ramꞌ jéyac: muꞌ sonꞌ anicjetety Jenꞌ jụijyaꞌ, mọꞌ na p̂en muꞌ jam anicjetes Jenꞌ jụijyaꞌ mọꞌ, mạꞌjeꞌ qui namꞌ yejĉoiꞌ muꞌtum bäꞌyiꞌ jụijyaꞌ, paj muꞌ jam yacchuiꞌ.

¹³ Chimeꞌdye mọꞌyaꞌ jụijyaꞌ yiris p̂en anicjetes Jenꞌ, muꞌ na vämtyiꞌ mọꞌ jam anicjetety Jenꞌ jụijyaꞌ muꞌ, mạꞌjeꞌ mọꞌtum yejĉoij bäꞌyi jụijyaꞌ, paj mọꞌ jam yacchute.

¹⁴ Meꞌ tsanꞌ jam anicjetety Jenꞌ vämtyiꞌ mọꞌ, Jenꞌ qui na ramꞌ jañutyibutiꞌ vämtyiꞌ mọꞌ ĉaĉaij na anicyis Jenꞌcheꞌ p̂en muꞌ. Chimeꞌdye mọꞌyaꞌ yiris p̂en jam anicjetes Jenꞌ jụijyaꞌ mọꞌ, Jenꞌ raꞌ nọ́tyeꞌ ĉaĉaij na anicyity Jenꞌcheꞌ vämtyiꞌ mọꞌ. Vaj meꞌ bäꞌyi jụijyaꞌ in, muꞌin raꞌ ạvaꞌ mọꞌin chị́yepte Jenꞌsiꞌ p̂eyacdyeꞌ in. Yacchutidyeiꞌ jụijyaꞌ in, muꞌin raꞌ ạvaꞌ mọꞌin mijam raꞌ chị́yepte in Jenꞌsiꞌ p̂eyacdyeꞌ muꞌ.

¹⁵ Meꞌ tsanꞌ meꞌ, vämtyiꞌ mọꞌ jam anicjetety Jenꞌ mạꞌjeꞌ yacchuiꞌ jụijyaꞌ muꞌ, paj yacchuiꞌ mọmoꞌ. Meꞌdye chimeꞌ, yiris p̂en jam anicjetes Jenꞌ jụijyaꞌ mọꞌ, mạꞌjeꞌ yacchute vämtyiꞌ jụijyamꞌ, paj yacchute mọmoꞌ. Muꞌin raꞌ anicjetety Jenꞌ in tupuj farajjeyacsi in, jam raꞌ fercheꞌ nọ́csi in, ĉaĉaij na muꞌ Jenꞌ fayinac miꞌin paj qui jam chutidyeꞌtum bäꞌyi miꞌin.

¹⁶ Mi p̂en, meꞌ tsanꞌ yejĉoiꞌ vämtyiꞌtum bäꞌyi jụijyaꞌ mi, jam qui namꞌ chịꞌ mi vatyquej jụj jaꞌyaquiꞌ vämtyim, vatyquej jam. Mi chimeꞌ sonꞌ, meꞌ tsanꞌ p̂entum yejĉoij bäꞌyi jụijyaꞌ mi, jam qui namꞌ chịj mi vatyquej jụj jaꞌyem Jenꞌcheꞌ mọꞌ p̂en, vatyquej jam.

Yejĉojaꞌ tsun junꞌ chuc tsun jiquej fayisinꞌyaꞌ muꞌ Jenꞌ

¹⁷ Yụ raꞌ jéyac miꞌin, jemoñeꞌ meꞌ yejĉoij bäꞌyi miꞌin junꞌ chuc muꞌ Jenꞌ yuꞌtyiyinac miꞌin judyeyaꞌ junꞌ chuc jiquej miꞌin, yoquiꞌdyemꞌ fayinacyaꞌ Jenꞌ jiquej u, yejĉojamꞌ meꞌ miꞌin.

¹⁸ Muꞌin tạꞌcaty seiꞌtactyiꞌ aꞌ muꞌin, yoquiꞌdyemꞌ fayacsiyaꞌ Jenꞌ jiquej u, paj jam tsị́catyeꞌ mọꞌ seiꞌtacdyeꞌ muꞌin. Muꞌin na jam seiꞌtactyiꞌ aꞌ muꞌin yoquiꞌdyemꞌ fayacsiyaꞌ Jenꞌ jiquej u, paj jam jiꞌseiꞌtaqui aꞌ muꞌin.

¹⁹ Meꞌ tsanꞌ seiꞌtactyiꞌ aꞌ tsun judyeyaꞌ jam seiꞌtactyiꞌ tsun, jam mọꞌ jedyeꞌ yiꞌ Jenꞌsiꞌyaꞌ vej muꞌ, mọmꞌ jemonjaꞌ paj qui chiquepja p̂eyacdyeꞌ Jenꞌsiꞌ muꞌ.

²⁰ Mọꞌdyes yejĉojamꞌ miꞌin junꞌ chuc miꞌin jiquej fayinacyaꞌ jiquej muꞌ Jenꞌ.

²¹ Úñity jụijyaꞌ jiquej mi yoquiꞌdyemꞌ Jenꞌ fayin u, jam raꞌ yoqui mọꞌdyes mi. Tupuj qui namꞌ shupqui úñedyeꞌĉan ĉúti jụijyaꞌ mi, shupjada mọmoꞌ, jam mọꞌ jedyeꞌ yiꞌ.

²² Jeshaꞌ, muꞌin fayactyiꞌ Jenꞌyaꞌ in, meꞌ tsanꞌ úñity bäꞌyi in, jiꞌc̣honactyiꞌ qui namꞌ in Ayoꞌyaꞌ, meꞌ shupqui in, aty muꞌtyiꞌ qui in. Meꞌdye chimeꞌ, muꞌin fayactyiꞌ Jenꞌyaꞌ in, meꞌ tsanꞌ jam úñity bäꞌyi in, Cristoty qui namꞌ úñity buꞌyi in.

²³ Jenꞌ därsiꞌyaꞌ yaꞌidyeꞌ jicnac miꞌin, mọꞌdyes aty raꞌ jam jiꞌsäsdyi miꞌin úñedyeꞌĉan muꞌin.

²⁴ Vojity, yejĉojamꞌ miꞌin junꞌ chuc miꞌin jiquej, yoquiꞌdyemꞌ fayinacyaꞌ muꞌ Jenꞌ u, meꞌ raꞌ cäc̣häꞌchutinte yejĉoij Jenꞌ miꞌin.

²⁵ Q̂uinꞌ raꞌ yụ vorjebiyac p̂eyacdyeꞌ miꞌin, mọꞌ jítiĉas sánacdyeꞌcheꞌ bajaꞌ yụ miꞌin, yiꞌ: ¿Tupuj buty vämi in muꞌin muñety in, yiritydyemꞌ bäꞌyity in? Ọij raꞌ p̂eyacdyeꞌ meꞌ tsanꞌ jam muꞌ jịꞌchiyacsi Ayoꞌ tsun jiquej, yụ qui na ramꞌ jéyac dyijyedyeꞌyaꞌ yụ, anic rụijsis mọꞌ p̂eyacdyeꞌ ĉaĉaij na muꞌ Jenꞌ ñịbeꞌ ĉun yụ judyeyaꞌ ñútyin yụ paj qui rụij p̂eyaqui yụ.

²⁶ Jeshaꞌ q̂uinꞌsis tupudyeꞌ carijsistum bäꞌjaꞌ tsun, mọꞌdyes damꞌdye jämꞌ yi yụ paj qui yejĉoij miꞌin junꞌ chuc miꞌin q̂uinꞌ.

²⁷ Aty p̂enyaꞌ jụijyam, jam raꞌ yacchutidyeꞌ dyijtuiꞌ mi. Jambiꞌ p̂enyaꞌ jụijyam, jam raꞌ dyijyi mi quevaqui p̂en mi.

²⁸ Meꞌ tsanꞌ meꞌ yi yụ, vämi qui namꞌ jụijyam jam mọꞌ juchaj shupquiꞌ. Chimeꞌdye yiris nanas vämiꞌ jụijyaꞌ mọꞌ jam mọꞌ juchaiꞌ. Meꞌ tsanꞌ meꞌ vämi jụijyaꞌ in, carij qui na ramꞌ bäꞌyi in úcheꞌ jaccheꞌ in. Yụ na jam mạꞌjeꞌ meꞌ paj qui jam carij bäꞌyi miꞌin.

²⁹ Vojity, yụ yi, aty c̣hẹiꞌyaꞌ jadyiquisĉan tupudyeꞌ, jemoñeꞌ Jenꞌdyes mọmoꞌ dyijtujaꞌ tsun. Muꞌin p̂enyaty in, paj meꞌ buꞌyi yuꞌbun in jeñej itŝity p̂en in, paj Jenꞌ mọmoꞌ dyijtute in.

³⁰ Tyi chuc tárity in, paj meꞌ buꞌyi yuꞌti in jeñej maꞌjoijtyiꞌ bäꞌyi in, tyi chuc maꞌjoijtyiꞌ in, paj meꞌ buꞌyiꞌ yuꞌti in jeñej tárity bäꞌyi in, tyi chuc yaꞌijtyiꞌ jedyeꞌ in, paj yuꞌti in jeñej qui itŝiꞌ jedyeꞌ jụijyaꞌ muꞌin, jemoñeꞌ Jenꞌ mọmoꞌ dyijtute in.

³¹ Meꞌ tsanꞌ úcheꞌ jaccheꞌ bijoij carijtaqui miꞌin, jam qui na ramꞌ dyijtutiñeꞌ jacches jedyeꞌ, mọtsiꞌ nash raꞌ ọij jac cạvejas q̂uinꞌ.

³² Mọꞌ chat mạꞌjeꞌ yụ paj qui faraj bäꞌyi miꞌin, paj qui jam ọ́ches jedyeꞌ dyijtutiñeꞌ miꞌin. Jeshaꞌ, muꞌin yiritydyemꞌ bäꞌyity in, Ayos mọmoꞌ carijtacdyeꞌ dyijtupte in, paj qui muꞌ Ayoꞌ maꞌjotacsi.

³³ Muꞌin na p̂enyaty in, yoc muꞌin dyijyi in, jacches jedyeꞌ dyijtuiꞌ in, jedyeꞌ chuc jemoñeꞌ p̂en muꞌin,

³⁴ mọꞌdyes päräꞌ cạiꞌ dyijyedyeꞌ muꞌin, Jenꞌdyes judyeyaꞌ p̂endyes muꞌin. Meꞌdye chimeꞌ mọꞌin p̂en in, yirisdyemꞌ bäꞌyis in, Ayos mọmoꞌ carijtacdyeꞌ dyijtupte in, junꞌ chuc tupuj Jenꞌdyes yuꞌtiꞌ in, räj aꞌ mọꞌin judyeyaꞌ ạꞌedyeꞌ chimeꞌ mọꞌin. Mọꞌin na aty vämtyiꞌyas in, yoc mọꞌin atsvun dyijyiꞌ in, jacches jedyeꞌ dyijtuiꞌ in jedyeꞌ chuc jemoñeꞌ vämtyiꞌ mọꞌin.

³⁵ Mọꞌ mạꞌjeꞌ yụ jéyac nọ́tyeyac miꞌin, paj qui mumꞌ dyijtutinte Ayoꞌ tsun, jam mọꞌ mạꞌjeꞌ nọ́biyac dyijyedyeꞌ miꞌin, mạꞌjeꞌ vämi jụijyaꞌ miꞌin.

³⁶ Muꞌyaꞌ yirity muntyiꞌ jụijyaꞌ aty mọꞌyaꞌ p̂eyeyac p̂endyes jụijyaꞌ muꞌ, judyeyaꞌ mọꞌ nanas aty chaꞌsheꞌ jụijyaꞌ p̂anꞌdyeꞌ mọꞌ vämedyedyes mọꞌ, muꞌ sonꞌ fer mạꞌjeꞌ vämi jụijyaꞌ, paj jicdyiꞌ mọmoꞌ in, jam mọꞌ juchaj shupquiꞌ.

³⁷ Jam na vämi jụijyaꞌ, fer buꞌyi ĉojtyiꞌĉan jụijyaꞌ muꞌ, jämꞌ ĉụiꞌ ĉọjcaqui aꞌ jụijyaꞌ muꞌ, judyeyaꞌ dyijyi ĉojtyiꞌĉan muꞌ jam raꞌ vämi muꞌ, muꞌ meꞌ dyijyity, muꞌsiꞌ yaꞌiꞌ dyijyedyeꞌ muꞌ.

³⁸ Mọꞌdyes tyi chuc vämi p̂eyeyaccheꞌ p̂en jụijyaꞌ muꞌ, jämꞌsiꞌ dyijyedyeꞌ muꞌ, muꞌin na dyich buꞌyity in jam vämi jụijyaꞌ in, muꞌsiꞌ dyijyedyeꞌ muꞌin dadamꞌ yaꞌiꞌ muꞌin.

³⁹ Mọꞌ p̂en jam junꞌ tupuj yacchute vämtyiꞌ mọꞌ tsạꞌdyemꞌ jụijyaꞌ muꞌ. Säñi na jụijyaꞌ muꞌ q̂uinꞌdyemꞌ faraj buꞌbanꞌ mọꞌ, q̂uinꞌ chat tupuj yoctyiꞌcheꞌ vämebanꞌ mạꞌjeꞌ jụijyaꞌ mọꞌ, jemoñeꞌ qui na ramꞌ anicjetetycheꞌ Jenꞌ vämebanꞌ.

⁴⁰ Jam tyi jäĉajte jụijyaꞌ mọꞌ, dadamꞌ ramꞌ maꞌjodyeꞌtum bäꞌyiꞌ mọꞌ p̂en säntaquis vämtyiꞌ. Mọꞌ dyijyedyeꞌ yụ, chimeꞌdye jadac meꞌ yiꞌ Jenꞌsiꞌ Ạꞌedyeꞌ muꞌ, mọꞌ meꞌchuiꞌsiꞌ q̂uinꞌ yụ.