Tashches Corintoĉantyidyes 6 - Tsimane

Jiꞌmeꞌtity ayoꞌcheꞌ in

¹ Mọꞌyaꞌ jụijyaꞌ carijsis miꞌin anicjetintety Jenꞌ miꞌin, jam jämꞌjiti jụijyaꞌ miꞌin, ¿junꞌ dash meꞌ cavin jiꞌmeꞌti miꞌin jacchetyyaꞌ ayoꞌ in? Jeñejquiyaꞌ itŝij ĉọcsi miꞌin anicjetety Jenꞌ in muꞌyaꞌ muꞌin in tupuj muꞌin jịꞌcäts yuꞌbunac in.

² ¿Jam chịj u miꞌin aty ayijyaꞌ tupudyeꞌ tsun anicjejatyiꞌ Jenꞌ, tsun raꞌ yụꞌtac paj qui jịꞌcäts yụꞌtacsejaꞌ jaccheꞌ bäꞌyity muntyiꞌ in? Yoj na jịꞌcäts yụꞌtacsi raꞌ miꞌin jacchety muntyiꞌ in, ¿junꞌ qui dash jam tupuj miꞌin jịꞌcäts yụꞌbajtiñeꞌ miquis jedyeꞌ q̂uinꞌ?

³ ¿Jam chịj u miꞌin aty ayijyaꞌ tupudyeꞌ, tsun raꞌ yụꞌtac paj qui jịꞌcäts yụꞌtacsejaꞌ anjer chimeꞌ in? Damꞌdye jämꞌ jịꞌcäts yụꞌtacsebijamꞌ q̂uinꞌsis vojitysiꞌ jedyeꞌ miꞌin.

⁴ Mọꞌyaꞌ carijsis jụijyaꞌ miꞌin, ¿jämꞌ buty ĉúti miꞌin paj qui jiꞌmeꞌti miꞌin ayoꞌyaꞌ jam anicjetetyyaꞌ Jenꞌ? Jam junꞌ.

⁵ Anic därsiꞌ mọꞌ tsị́cadyeꞌ shupquiꞌ miꞌindyes. ¿Jam adac ĉaĉaij miꞌinĉan muꞌyaꞌ yirity dyijyedyeꞌtumtyiꞌ, paj qui muꞌ jịꞌcäts yụꞌtacsi carijsisyaꞌ ĉụiꞌtyiꞌ vojity miꞌin?

⁶ Miꞌin na jam meꞌ, ĉụiꞌtyiꞌtum vojity miꞌin jiꞌmeꞌti miꞌin dadamꞌ muꞌincheꞌ in jam anicjetetycheꞌ Jenꞌ in.

⁷ Anic där cäj cạtiñeꞌ dyijyedyeꞌ miꞌin vaj meij jiꞌmeꞌti miꞌin. Aty meꞌ jụijyaꞌ miꞌin därsiꞌ jiꞌpenacdyeꞌ mọꞌ shupquiꞌ. Meꞌ tsanꞌ yoctyiꞌ meꞌtyinac jụijyaꞌ, damꞌdye jämꞌ dyich buꞌyi mọmoꞌ miꞌin. Vojity jụijyaꞌ shiꞌatunac miꞌin damꞌdye jämꞌ jam raꞌ jiꞌmeꞌtinte ayoꞌyaꞌ miꞌin, paj mọꞌyaꞌ mọmoꞌ.

⁸ Miꞌin na jam yi miꞌin, yejĉoij juchatucsi vojity miꞌin, judyeyaꞌ shiꞌatucsi chimeꞌ miꞌin.

⁹ ¿Jam chịj miꞌin, muꞌin ac̣hiꞌyity in jam nash raꞌ Jenꞌyadyety muꞌin in, ayoꞌbuꞌyedyeꞌĉan muꞌ? Jam raꞌ ĉụiꞌ väñätuti miꞌin. Jeshaꞌ, muꞌin voꞌvoijtyiꞌ in judyeyaꞌ muꞌin jämꞌtacdyeꞌcheꞌ cudyitity in, judyeyaꞌ muꞌin vaj sonꞌ meꞌtity in,

¹⁰ judyeyaꞌ muꞌin shiꞌaijtyiꞌ in, judyeyaꞌ muꞌin fer mạꞌjetety querec̣ha in, judyeyaꞌ muꞌin tyeijtyiꞌ in, judyeyaꞌ ñinaquity in, muꞌin joꞌmestum bäꞌyity in jam nash raꞌ Jenꞌyadyety muꞌin in ayoꞌbuꞌyedyeꞌĉan muꞌ.

¹¹ Meꞌ miꞌin chimeꞌ pạrej jiquej bäꞌyi miꞌin, q̂uinꞌ qui namꞌ aty c̣hiconꞌtac ĉojtyiꞌ miꞌin, aty Jenꞌdyety q̂uinꞌ miꞌin ĉaĉaij na Jesucristoyaꞌ muꞌ Jenꞌ rụij yuꞌtyinac miꞌin, muꞌsiꞌyaꞌ Ạꞌedyeꞌ muꞌ.

Cristos aꞌ muꞌ meꞌ buꞌjaꞌ tsun

¹² Pạrej muꞌyaꞌ yi miꞌin: "Aty q̂uinꞌ faraj yụ, jam yiris jedyeꞌ tapchun yụ, junꞌ chuc mạꞌjeꞌ ĉụiꞌ jụijyaꞌ yụ, tupuj meꞌ jämꞌtaqui yụ", yi pạrej miꞌin. Anic tsanꞌ meꞌ aty faraj tsun. Meꞌ tsanꞌ meꞌ, meꞌ qui namꞌ bäꞌjaꞌ jụijyaꞌ tsun, jam mọꞌ ñútyisinꞌ Jenꞌdyes. Meꞌ tsanꞌ jam yiris jedyeꞌ tapchun yụ, areꞌĉa yiris jedyeꞌ bächän yụ.

¹³ Yi pạrej muꞌyaꞌ in: "Tupuj jụꞌñis ĉụiꞌ mọmoꞌ säcsedyeꞌ jebejaꞌ ĉaĉaij na meꞌdyes voꞌco tsun", yi in. Anic tsanꞌ meꞌ Jenꞌ qui na ramꞌ jịꞌmotseꞌ mọꞌ säcsedyeꞌ judyeyaꞌ voꞌco tsun chimeꞌ. Chimeꞌdye yi in: "Mọꞌ aꞌ tsun meꞌtacdyes mọmoꞌ, tupuj tyi ĉụiꞌ mọmoꞌ jäcjaꞌ", yi pạrej muꞌyaꞌ in. Jam nash meꞌdyety tsun, aꞌ tsun Ayodyes, muꞌ bächäbusinꞌ judyeyaꞌ ĉujcasinꞌ.

¹⁴ Muꞌdye raꞌ Jenꞌ jiꞌtsaꞌibubujsinꞌ aꞌ tsun ferdyeꞌyaꞌ muꞌ, yoj jibusinꞌdyemꞌ jiꞌtsaꞌibubujsinꞌ Ayoꞌ u tsun jiquej.

¹⁵ ¿Jam chịj u miꞌin, yojdyemꞌ Cristos aꞌ u muꞌ, meꞌ buꞌyiꞌ aꞌ miꞌin? Mọꞌdyes jam junꞌ tupuj p̂en jäcjaꞌ tsun meꞌtaquis, meꞌ jụijyaꞌ tsun jeñej cafon buꞌyiꞌ Cristostum aꞌ muꞌ meꞌ yụꞌbija, meꞌ buꞌyiꞌ shupquiꞌ mọꞌ.

¹⁶ ¿Jam chịj u miꞌin, yirity muntyiꞌ jäqueꞌ p̂en meꞌsis jụijyaꞌ, mọꞌtum yiris mọmoꞌ shupquiꞌ aꞌ muꞌ. Ĉaĉaij na meꞌdye yiꞌ sánacdyeꞌ: "Aty qui jam päräꞌ muntyiꞌ shupqui in, yirity buꞌyi quimꞌ cạvacsi muꞌ Jenꞌ."

¹⁷ Meꞌdye muꞌin chimeꞌ Cristoty in, yirity muꞌtum shupqui in ạꞌedyeꞌyaꞌ muꞌin.

¹⁸ Ĉaꞌjoyevac mọꞌ voꞌvodyeꞌ, ĉaĉaij na mọꞌin yocsiꞌ juchaj in jam jaꞌac̣hiꞌbuti aꞌ muntyis muꞌ, voꞌvoij na jụijyaꞌ muꞌ, mọꞌ chat jaꞌac̣hiꞌbuti aꞌ muꞌ.

¹⁹ ¿Jam chịj u miꞌin mọꞌ aꞌ miꞌin mọꞌ nash acaꞌ Jenꞌsiꞌ muꞌ? Meꞌ buꞌyiꞌ mọꞌ ĉaĉaij na mọꞌĉan bäꞌyiꞌ mọꞌ Jenꞌsiꞌ Ạꞌedyeꞌ muꞌ, mọꞌ soꞌminacsiꞌ Jenꞌ. Q̂uinꞌ aty jam ĉụiꞌsiꞌ aꞌ miꞌin,

²⁰ Jenꞌtyiꞌ qui miꞌin, därsiꞌyaꞌ yaꞌidyeꞌ jicnac. Mọꞌdyes Jenꞌdyes bäꞌjamꞌ miꞌin räjtumdye aꞌ miꞌin, jam raꞌ yocve bäꞌyi miꞌin, paj qui muꞌin cavinactyiꞌ in timaꞌquete Jenꞌ in miꞌindyes.