Tashches Corintoĉantyidyes 4 - Tsimane

Carijtacdyeꞌ muꞌin jutactyiꞌ Jenꞌtyiꞌ in

¹ Meꞌ raꞌ chäyitiĉaꞌ tsun miꞌin, tsun Cristoty úñity muꞌ, muꞌ nash yuꞌtyin tsun paj qui tsun jéyacsi muntyiꞌ in Jenꞌsiꞌ p̂eyacdyeꞌ muꞌ, jam chị́yeptes jiquej urucyaty muntyiꞌ in.

² Jeshaꞌ, muꞌ yụꞌtactyiꞌ muntyiꞌ jemoñeꞌ chiquepte p̂eyacdyeꞌ muꞌ muꞌsiꞌ jayuꞌtitysiꞌ.

³ Meꞌ raꞌ tsanꞌ pạrej p̂iijbun yụ in carijtacdyeꞌ Jenꞌdyes yụ, vatyquej raꞌ miꞌin chimeꞌ p̂iijbutiĉaꞌ carijtacdyeꞌ yụs miꞌin, jam mọꞌ jedyeꞌ yiꞌ. Mijam yụ ĉụiꞌ jịꞌcäts yụꞌtyeꞌ ĉụiꞌsiꞌ carijtacdyeꞌ yụ.

⁴ Meꞌ tsanꞌ itŝiꞌ juchaj ĉọ́qui yụ, jam qui namꞌ yi yụ: "Yụ nash rụijtyity." Meꞌdye Ayoꞌ mọmoꞌ chäyibun dyijyedyeꞌ yụ, muꞌ raꞌ jịꞌcäts yuꞌtyin yụ.

⁵ Jam raꞌ tashcheꞌ dyijtucsebi miꞌin juchaj muntyis muꞌin jambiꞌdyemꞌ ayij tupudyeꞌ. Muꞌdye raꞌ atsijbanyaꞌ Ayoꞌ tsun, muꞌ raꞌ jịꞌcaveyacseban juchaj muꞌin tojmadyeꞌĉan bäꞌyitysiꞌ in, judyeyaꞌ raꞌ jịꞌĉocsebi ĉojtyiꞌĉansiꞌ dyijyedyeꞌ muꞌin. Muꞌdye raꞌ timaꞌcacsi räj muꞌin junꞌ chuc jämꞌ bäꞌyi jiquej in.

⁶ Vojity, meꞌ sáñeꞌ yụ ọij q̂uinꞌ paj qui chicacsive miꞌin. Yụ ĉụiꞌ jiꞌjicdyi judyeyaꞌ muꞌ Apolos, meꞌ yụ jéyac miꞌin paj qui miꞌin räj chịj junꞌ chuc jemoñeꞌ carijtaqui muꞌin voroꞌyity in, paj qui meꞌ rụij miꞌin cäc̣häꞌchuptinte Jenꞌsiꞌ sánacdyeꞌ muꞌ. Meꞌ jụijyaꞌ miꞌin räj raꞌ cäts cạvacsi miꞌin muꞌin voroꞌtacsity in.

⁷ Pạrej muꞌyaꞌ ĉụiꞌ timaꞌquiti miꞌin, mujuꞌchaꞌ ĉúti miꞌin. Yụ raꞌ jéyac: ¿Tyi adac mujuꞌchaꞌ yuꞌtyinac miꞌin? ¿Jedyeꞌ mọꞌyaꞌ ĉụiꞌsiꞌ u miꞌin, mọꞌ jam soꞌminacsiꞌ Jenꞌ? Mijam jedyeꞌ. Mọꞌdyes jam raꞌ ĉụiꞌ timaꞌquiti miꞌin, ĉaĉaij na q̂uinꞌ meꞌchutiñes miꞌin räj mọꞌ soꞌminac muꞌ Jenꞌ.

⁸ Anic vaꞌbunyi miꞌin, jeñej aty räj meꞌchutiñeꞌ jedyeꞌ, ĉúti u miꞌin, jeñej aty jam yiris jedyeꞌ jayej ĉọ́tiñeꞌ u miꞌin. Jeñej aty ayoꞌbuꞌyi chimeꞌ ĉúti u miꞌin, tsun qui namꞌ jam jeñej ayoꞌbuꞌyi, ĉútiĉaꞌ tsun miꞌin. Faraj vuꞌ caꞌ meꞌ ayoꞌbuꞌyi miꞌin paj qui tsunmun nọ́taquity miꞌintyiꞌ shupqui.

⁹ Jam tsun meꞌ jutactyiꞌ Jenꞌtyiꞌ muꞌ, anic ñịbeꞌ cạveꞌ tsun, joꞌmes jịꞌĉojtyeꞌ tsun. Jenꞌ uyaꞌyaꞌ yuꞌtyin tsun, jeñej yirity muntyiꞌ jiꞌmeꞌtactyiꞌ sänꞌdyeꞌyaꞌ muꞌ, meꞌ shupqui tsun muntyisyaꞌ vej muꞌin judyeyaꞌ anjersiꞌyaꞌ chimeꞌ.

¹⁰ Itŝity dyijyedyeꞌ ĉun tsun in cäc̣häꞌchucdyeꞌyaꞌ muꞌ Cristo, miꞌin na Cristoyaty dyijyedyeꞌtumtyiꞌ tsanꞌ ĉúti miꞌin, uts na meꞌ vaꞌbunyi miꞌin. Tsunsiꞌ itŝiꞌ ferdyeꞌ tsun, miꞌin na ferdyeꞌtumtyiꞌ ĉúti. Anic jämꞌjinac muntyiꞌ in, tsun na äcäijjin tsun in.

¹¹ Meꞌdye q̂uinꞌ jayej säcsedyeꞌ tsun judyeyaꞌ jajri bäꞌyi tsun judyeyaꞌ cädädyeꞌ jịꞌĉojtyeꞌ chimeꞌ tsun. Pạrej ñịbeꞌtac tsun, itŝiꞌ ĉụiꞌsiꞌ acaꞌ bäꞌyi tsun.

¹² Fer úñi tsun tsạꞌ buꞌyedyes tsun. Tyi chuc aꞌc̣his p̂eyacdyeꞌ jiꞌshupquiyin tsun in, tsun na jämꞌsiꞌ p̂eyacdyeꞌ jiꞌshupqueyacsi. Tyi chuc ñịbeꞌtyin jụijyaꞌ tsun in, tsun na jam chimeꞌjeyacsidye, dyichchuti mọmoꞌ tsun.

¹³ Ñäñin tsun in, tsun qui namꞌ jämꞌsiꞌ p̂eyacdyeꞌ jéyacsi. Muntyiꞌ uyaꞌyaꞌ ĉun tsun in, judyeyaꞌ äcäijjin tsun in, jeñej vaꞌcacsiꞌ patsacdyeꞌ meꞌjin tsun in, tacaꞌdye q̂uinꞌ ọij mạyedyeꞌ.

¹⁴ Yụ jam mọꞌ jéyac paj qui jam jịꞌtsicayeyac miꞌin, meꞌdye mọmoꞌ mạꞌjeꞌ yụ rụijjebiyac dyijyedyeꞌ miꞌin, ĉaĉaij nash miꞌin mạꞌjeyacdyety ạvaꞌ yụ.

¹⁵ Jeshaꞌ, tashcheꞌ jiquej daiꞌ tsanꞌ jiꞌchäyinac in, yụ qui namꞌ yirity jenꞌ buꞌyity miꞌin ĉaĉaij na yụ́dye mọmoꞌ tashcheꞌ seꞌ jaꞌyeyac miꞌin Jesucristosyaꞌ p̂eyacdyeꞌ muꞌ, yụ́dye anic jaꞌyeyac.

¹⁶ Mọꞌdyes yụ raꞌ fercheꞌ jéyac miꞌin, cäc̣häꞌchubutiĉamꞌ dyijyedyeꞌ yụs miꞌin.

¹⁷ Mọꞌdyes q̂uinꞌ yụ raꞌ jutete miꞌinyaꞌ muꞌ Timoteo, muꞌ jịꞌruij yụꞌtyety p̂eyacdyeꞌ muꞌ mạꞌjeyacdyety yụ, muꞌ jeñej buꞌyi ĉụiꞌtyiꞌ ạvaꞌ yụ, cäc̣häꞌchucdyeꞌyaꞌ Ayoꞌ tsun. Muꞌ raꞌ jiꞌdyijvinac junꞌ chuc yụ bäꞌyi, yojdyemꞌ yụ u cäc̣häꞌchute Cristo. Mọꞌdye jiꞌchäyitidyeꞌ paiꞌ jéyacsi yụ junanaj chuc Cristoty ñuruꞌtyity in.

¹⁸ Pạrej muꞌyaꞌ vaꞌbunnaqui miꞌin, jeñej aty raꞌ jam ĉọcyac ĉúti u miꞌin, chimeꞌdye jeñej aty raꞌ jam cạvebiyac dyijyedyeꞌ aꞌc̣his u miꞌin, meꞌ ĉúti miꞌin.

¹⁹ Ayoꞌ yíyaꞌ cavintum raꞌ yụ ĉọcyac miꞌin, yụ raꞌ cạvacsebi dyijyedyeꞌ muꞌin vaꞌbunyitysiꞌ in, junꞌ a ĉa rụij bäꞌyi in Jenꞌsiꞌyaꞌ ferdyeꞌ muꞌ, areꞌ jam, areꞌ p̂eyacdyeꞌyaꞌ mọmoꞌ yi muꞌin in.

²⁰ Jeshaꞌ, tsun ayotuja Jenꞌ jụijyaꞌ, tupuj rụij bäꞌjaꞌ Jenꞌsiꞌyaꞌ ferdyeꞌ muꞌ, jam raꞌ p̂eyacdyeꞌyaꞌ mọmoꞌ yéjaꞌ, mọꞌ jam yaꞌiꞌ Jenꞌsiꞌyaꞌ vej muꞌ.

²¹ A raꞌ miꞌinyaꞌ jụijyaꞌ tsun, ¿jedyeꞌ a ĉa mạꞌjetiñeꞌ miꞌin? ¿Areꞌ mạꞌjetiñeꞌ paj qui yụ fạraꞌñeyac aꞌc̣hisyaꞌ dyijyedyeꞌ miꞌin? Damꞌdye jämꞌ tashcheꞌ farajjetiñeꞌ mọꞌ aꞌc̣his dyijyedyeꞌ miꞌin paj qui yụ jämꞌyedyeꞌtum jịꞌchiyeyac miꞌin.