Tashches Corintoĉantyidyes 3 - Tsimane

Carijtaquity Jenꞌdyes in

¹ Vojity, yoquiꞌdyemꞌ yụ voroꞌtyeyacyaꞌ jiquej u, mọꞌdyety jam jéyac mọꞌ mọjoꞌchas jiꞌchäyitidyeꞌ Jenꞌsiꞌ muꞌ, jeñej jambiꞌ meꞌchubitintety Jenꞌsiꞌ Ạꞌedyeꞌ muꞌ, meꞌ buꞌyi jịꞌchiyeyac jiquej, ĉaĉaij na jambiꞌ p̂añi Jenꞌdyes jiquej miꞌin.

² Tashches jiꞌchäyitidyeꞌ jam carijsis, mọꞌ jịꞌchiyeyac yụ, ĉaĉaij na jambiꞌ seꞌvetiñeꞌ mọꞌ carijsis jiꞌchäyitidyeꞌ, jeñej buꞌyi yirity joijnoꞌ tsiꞌyity tacaꞌ, meꞌdyemꞌ miꞌin, mijam junꞌ säcsedyeꞌ chañes jebetiñeꞌ ĉaĉaij na jambiꞌ jämꞌjoij miꞌin.

³ Aꞌsimꞌ dyijyedyeꞌ cạtiñeꞌ miꞌin, ĉaĉaij na fáquitidyeꞌtum mọmoꞌ bäꞌyi miꞌin, judyeyaꞌ jiꞌmeꞌtyiyitidyeij jedyeꞌ miꞌin, mijam junꞌ cäts dyijyi miꞌin. Anic jorojĉan miꞌin tacaꞌ yejĉoij mọmoꞌ aꞌsimꞌ aꞌc̣his dyijtutiñeꞌ miꞌin, muntyis mọmoꞌ dyijyedyeꞌ cäc̣häꞌchucsebi miꞌin, jam na Jenꞌsiꞌ muꞌ.

⁴ Chimeꞌdye pạrej yi miꞌin: "Yụ cäc̣häꞌchutety Pablo", yi miꞌin, pạrej na yi miꞌin: "Yụ cäc̣häꞌchute Apolos", yi miꞌin. Anic jorojĉan mọꞌ yi miꞌin aꞌsimꞌ aꞌc̣his dyijyedyeꞌ meꞌchutiñeꞌ miꞌin.

⁵ Jeshaꞌ, ¿tyi ĉaĉaij yụ u? ¿Tyi ĉaĉaij muꞌ Apolos u? Tsun nash Jenꞌtyiꞌ mọmoꞌ úñity muꞌ, muꞌ jutin tsun paj qui tsun anic jaꞌyeyac miꞌin p̂eyacdyeꞌyaꞌ. Tsun úñi Ayodyes mọmoꞌ, junꞌ junꞌ chuc muꞌ yuꞌtyin tsun, meꞌ meꞌdye carijtaqui tsun.

⁶ Jenꞌ yuꞌtyin yụ cätity yụ mọꞌ p̂eyacdyeꞌ miꞌindyes, muꞌ qui Apolos chojoꞌdyety jayuꞌti, muꞌ qui namꞌ Jenꞌ jịꞌchibeꞌtyiꞌ mọꞌ cätidyeꞌ.

⁷ Jeshaꞌ, muꞌ quịiꞌtyiꞌ judyeyaꞌ muꞌ chojoꞌdyety, muꞌin jam jịꞌchibeꞌ in, meꞌdye Jenꞌ mọmoꞌ jịꞌchibeꞌ mọꞌ cätidyeꞌ.

⁸ Muꞌ quịiꞌtyiꞌ judyeyaꞌ muꞌ chojoꞌdyety vaj cäts mọꞌ shupquiꞌ Jenꞌsiꞌyaꞌ vej muꞌ, junꞌ junꞌ chuc carijtaqui Jenꞌdyes in, muꞌin raꞌ bijoij in.

⁹ Tsun vaj meꞌ carijtaqui Jenꞌdyes, miꞌin jeñej buꞌyi Jenꞌsiꞌ quịjodyeꞌ muꞌ, meꞌ buꞌyi miꞌin. Chimeꞌdye jeñej buꞌyi miꞌin mọꞌ acaꞌ jämꞌtyevaꞌques muꞌ Jenꞌ.

¹⁰ Muꞌ Jenꞌ ñịbeꞌjin yụ yuꞌtyin yụ paj qui meꞌ carijtaqui yụ muꞌdyes, dyijyedyeꞌtum acaij yụ, jämꞌbiꞌ yụ jämꞌchuquis acas mọꞌ. Yụ nash tashcheꞌ voroꞌtyeyac miꞌin, mọꞌ tashches voroꞌyedyeꞌ yụ jeñej buꞌyiꞌ jämꞌchuquis acas mọꞌ. Yoctyiꞌ na jäquiꞌve voroꞌtyinac miꞌin, muꞌin jeñej buꞌyi acaijtyiꞌ in, jämꞌchuquischeꞌ buꞌyiꞌ cächjeꞌ carijtyeꞌ in. Meꞌdye muꞌin chimeꞌ in carijtaquity Jenꞌdyes in, jemoñeꞌ rụij carijtaqui in.

¹¹ Meꞌ tsanꞌ meꞌ, yiris qui namꞌ jämꞌchuquis acas mọꞌyamꞌ, muꞌ Jesucristo mumꞌ yirity jeñej buꞌyi jämꞌchuquissiꞌ acas mọꞌ, mumꞌ yirity anicjejaty tsun.

¹² Ọijcheꞌ jämꞌchuquischeꞌ jam cäts acaij in. Pạrej oro carijte in, judyeyaꞌ plata judyeyaꞌ yaꞌijtyiꞌ mij. Pạrej na carijtyeꞌ in, tajñiꞌ mọmoꞌ judyeyaꞌ siꞌ judyeyaꞌ son, meꞌ meꞌ carijtyeꞌ in.

¹³ A na raꞌ ayijyaꞌ mọꞌ tupudyeꞌ, jiꞌcavitiĉaꞌ Cristoyaꞌ tsun, muꞌ raꞌ cavibusinꞌ räj carijtacdyeꞌ tsun, areꞌ jämꞌ areꞌ jam, tŝijyaꞌ raꞌ cavibusinꞌ carijtacdyeꞌ tsun. Jämꞌ jụijyaꞌ mọꞌ carijtacdyeꞌ tsun jam raꞌ coꞌshaiꞌ mọꞌ, jam na meꞌ jämꞌ jụijyaꞌ, räj raꞌ p̂udaij coꞌshaiꞌ carijtacdyeꞌ tsun, fibis raꞌ shupquiꞌ.

¹⁴ Tyi chuc jam coꞌshayetaquity jụijyaꞌ jämꞌchuquischeꞌ carijtacdyeꞌ muꞌ, muꞌ raꞌ soꞌmac bijodyeꞌ.

¹⁵ Muꞌ na raꞌ räj p̂udaij coꞌshayetaquity carijtacdyeꞌ, mus raꞌ itŝiꞌ bijodyedyes muꞌ. Meꞌ tsanꞌ meꞌ c̣hoñi qui na ramꞌ muꞌ, itŝiꞌ qui na ramꞌ jedyeꞌ cạiꞌ muꞌ bijodyes muꞌ.

¹⁶ ¿Jam adac chịj miꞌin, miꞌin jeñej buꞌyi Jenꞌsiꞌ acaꞌ muꞌ? Miꞌinĉan bäꞌyiꞌ Jenꞌsiꞌ Ạꞌedyeꞌ muꞌ.

¹⁷ Tyi chuc ac̣hiꞌbite Jenꞌsiꞌ acaꞌ muꞌ, muꞌ raꞌ jaꞌac̣hiꞌti muꞌ Jenꞌ vaꞌtacdyeꞌyaꞌ muꞌ, ĉaĉaij na Jenꞌsiꞌ acaꞌ muꞌ muꞌdyes mọmoꞌ. Miꞌin nash jeñej buꞌyi Jenꞌsiꞌ acaꞌ muꞌ meꞌ buꞌyi nash miꞌin.

¹⁸ Jam raꞌ ĉụiꞌ väñätuti miꞌin, mijam raꞌ yi miꞌin: "Yụ dyijyedyeꞌtumtyiꞌ, räj jacches jedyeꞌ chị́yeꞌ yụ." Damꞌdye jämꞌ yi miꞌin: "Jam dyijyedyeꞌtum yụ", meꞌ raꞌ chat tupuj meꞌchuptinte anicsis dyijyedyeꞌ Jenꞌsiꞌ muꞌ.

¹⁹ Mọꞌ dyijyedyeꞌ úchetysiꞌ muntyis in muꞌinsiꞌ dyijyedyeꞌtumtyis ĉútity in, anic fibis mọꞌ shupquiꞌ Jenꞌtum, rụijdye yiꞌ sánacdyeꞌ: "Ĉụiꞌsiꞌ dyijyedyeꞌ muꞌin dyijyedyeꞌtumtyis in, muꞌ Jenꞌ yụꞌtacsebi jeñej jibej quepyis meꞌ shupquiꞌ, ĉaĉaij na ĉụiꞌsiꞌyaꞌ dyijyedyeꞌ muꞌin jịꞌĉoqui juchaj muꞌin", yiꞌ sánacdyeꞌ.

²⁰ Mọꞌdye quivij yiꞌ sánacdyeꞌ: "Muꞌ Ayoꞌ tsun chị́yacsebi dyijyedyeꞌ muꞌin úchetysiꞌ in dyijyedyeꞌtumtyis in, fibis qui namꞌ muꞌin", yiꞌ sánacdyeꞌ.

²¹ Mọꞌdyes jam tupuj muntyiꞌ cäc̣häꞌchucsi miꞌin, mijam raꞌ timaꞌcacsi miꞌin, ĉaĉaij na q̂uinꞌ aty räj voroꞌyity in yụꞌtac in paj qui ñútyinac miꞌin.

²² Jenꞌ yuꞌtyiyinac miꞌin paj qui tsun jịꞌchiyeyac miꞌin, yụ Pablo judyeyaꞌ muꞌ Apolos, judyeyaꞌ muꞌ Pedro, tsun meꞌchutiĉaꞌ miꞌin. Chimeꞌdye ọij jacches jedyeꞌ räj meꞌchutiñeꞌ miꞌin, räj jịꞌĉojtiñeꞌ, meꞌ tsanꞌ tsạꞌ buꞌyi miꞌin, meꞌ tsanꞌ säñi miꞌin, mọꞌ q̂uinꞌsis jedyeꞌ, judyeyaꞌ mọꞌ jábiyadyes chimeꞌ, räj mọꞌ soꞌminac Jenꞌ mọꞌ jịꞌĉojtiñes miꞌin,

²³ ĉaĉaij na miꞌin Cristoty miꞌin, muꞌ na Cristo Jenꞌtyiꞌ muꞌ.