Tashches Corintoĉantyidyes 2 - Tsimane

P̂eyacdyeꞌ Cristos muꞌ yiꞌ junꞌ chuc ijac croshcheꞌ

¹ Vojity, yoquiꞌdyemꞌ ĉọcyacyaꞌ yụ jiquej u, voroꞌtyecyac yụ mọꞌ rụijsis p̂eyacdyeꞌ Jenꞌsiꞌ muꞌ. Yụ jam jiꞌmaꞌjotacdyes p̂eyacdyeꞌ dạqueꞌ, jam mọꞌ dyijtuiꞌ yụ junꞌ chuc yụ tupuj maꞌjodyeꞌtum yụꞌtacsi räj muntyiꞌ in voroꞌyedyeꞌyaꞌ yụ jiquej.

² Mọmꞌ yiris dyijtuiꞌ yụ, mạꞌjeꞌ jéyac mọꞌ p̂eyacdyeꞌ p̂eijtes muꞌ Jesucristo, dadamꞌ yụ jéyac junꞌ chuc jiquej croshcheꞌ ijac muꞌ.

³ Jam ĉụiꞌsiꞌyaꞌ ferdyeꞌ yụ voroꞌtyeyac miꞌin, noiꞌyedyeꞌtum jiꞌcaviti yụ miꞌindyes, noc̣hoꞌc̣hodyeꞌtum yụ.

⁴ Jiꞌchäyitidyeꞌĉan yụ, yụ jam jiꞌmaꞌjotacdyes dạqueꞌ yụ, jam yụ joꞌmesyaꞌ seꞌ jaꞌyeyac. Jenꞌsiꞌ qui namꞌ Ạꞌedyeꞌ muꞌ, mọꞌ ñútyin yụ ferdyeꞌyaꞌ mọꞌ, mọꞌyaꞌ chat tupuj jụj jaꞌyeyac miꞌin p̂eyacdyeꞌyaꞌ yụ.

⁵ Yụ mạꞌjeꞌ paj qui mọꞌ Jenꞌsiꞌ ferdyeꞌ muꞌ jụj jaꞌyinac miꞌin, paj qui jam mọꞌ p̂eyacdyeꞌ jiꞌmaꞌjotacdyes jụj jaꞌyinac miꞌin.

Dyijyedyeꞌ Jenꞌsiꞌ muꞌ soꞌmisinꞌsiꞌ tsun

⁶ Tsun dyijyedyeꞌtum soꞌmacsi carijsis jiꞌchäyitidyeꞌ muꞌindyes fer buꞌyitydyes Jenꞌdyes in, mọꞌ jam ọ́ches jacches dyijyedyeꞌ, mijam jacchetysiꞌ ayos, muꞌin raꞌ räj mọtsi in.

⁷ Mọꞌ dyijyedyeꞌ jéyacsis tsun mọꞌ Jenꞌsiꞌ muꞌ mijam chị́yeptes urucyaty muntyiꞌ jiquej in. Jambiꞌdyemꞌ jämꞌtacyaꞌ ọij jac jiquej, tạꞌcaty muꞌ meꞌ dyijyaque junꞌ chuc raꞌ muꞌ jiꞌc̣honsinꞌ paj qui muꞌyaꞌ bäꞌjaꞌ tsun, jam qui namꞌ muꞌ jịꞌchiqueyacsi jacchety muntyiꞌ jiquej.

⁸ Jacchety ayoꞌ jiquej in mijam méquiꞌ chị́yepte in Jenꞌsiꞌ dyijyedyeꞌ muꞌ, chäyibuse jiquej jụijyaꞌ in, a vuty jam ijate croshcheꞌ u in muꞌ mạyedyeꞌchety Ayoꞌ tsun.

⁹ Cạ̈tsiꞌ qui namꞌ sánacdyeꞌ yiꞌ: "Muꞌ Jenꞌ aty yuꞌtyiyisinꞌ tsun mạꞌjejaty tsun mọꞌ jämꞌsiꞌ dyijyedyeꞌ muꞌ, junꞌ chuc muꞌ mạꞌjeꞌ ñịbeꞌjisinꞌ. Där jämꞌsiꞌ shupquiꞌ mọꞌ, jam jämꞌdyeyaꞌ joꞌmes cạvejaꞌsiꞌ tsun mijam seꞌvejaꞌ chimeꞌ, mijam ọ́yaꞌ tupuj chaꞌshejaꞌ dyijtujaꞌ."

¹⁰ Meꞌ tsanꞌ meꞌ muꞌ Jenꞌ räj qui namꞌ jiꞌchäquiyisinꞌ Ạꞌedyeꞌyaꞌ muꞌ, ĉaĉaij na Ạꞌedyeꞌ muꞌ räj chị́yeꞌ joꞌmes, räj carijsis Jenꞌsiꞌ dyijyedyeꞌ muꞌ jachäyibuti mọꞌ.

¹¹ Jeshaꞌ, yirity muntyiꞌ, ĉụiꞌsiꞌ ạꞌedyeꞌ muꞌ, mọꞌ mọmoꞌ jachäyibuti ĉojtyiꞌĉansiꞌ dyijyedyeꞌ muꞌ. Meꞌ muꞌ chimeꞌ Jenꞌ, mọꞌ mọmoꞌ yiris Ạꞌedyeꞌ muꞌ mọmꞌ jachäyibuti dyijyedyeꞌ muꞌ.

¹² Tsun anicjejaty Jenꞌ jam soꞌmac jacchetysiꞌ dyijyedyeꞌ muꞌin, Jenꞌ soꞌmisinꞌ Ạꞌedyeꞌ muꞌ, mọꞌdyes qui tsun räj chị́yepja muꞌsiꞌ ñịbeꞌyedyes soꞌmisinꞌsiꞌ Jenꞌ.

¹³ Mọꞌdyes tsun jiꞌchäyitidyeꞌĉan jéyacsis tsun, jam muntyistum dyijyedyeꞌ voroꞌtacsi tsun, Jenꞌsiꞌ Ạꞌedyeꞌ muꞌ, mọꞌ soꞌmin tsun p̂eyacdyeꞌ, mọꞌsiꞌ dyijyedyeꞌ mọꞌ tupuj jịꞌchiqueyacsi tsun muꞌin meꞌchuptety in Jenꞌsiꞌ Ạꞌedyeꞌ muꞌ.

¹⁴ Tyi chuc jam meꞌchuptety in Jenꞌsiꞌ Ạꞌedyeꞌ muꞌ, muꞌin äcäijjebiꞌ in dyijyedyeꞌ mọꞌ, fibis ĉọbiꞌ in, ĉaĉaij na jam junꞌ chiqueꞌ in jätäjyiꞌ chuc mọꞌ, mọꞌ mọmoꞌ yiris jịꞌchiqueyacsis.

¹⁵ Tyi chuc meꞌchuptety in Jenꞌsiꞌ Ạꞌedyeꞌ muꞌ, muꞌin räj chị́yacsebi muntyis dyijyedyeꞌ muꞌin, areꞌ jämꞌsiꞌ muꞌin areꞌ jam. Muꞌin na jam meꞌchuptety in Jenꞌsiꞌ Ạꞌedyeꞌ muꞌ jam tupuj chị́yacsebi dyijyedyeꞌ muꞌin, muꞌin meꞌchuptetysiꞌ Jenꞌsiꞌ Ạꞌedyeꞌ in.

¹⁶ Rụijdye yiꞌ sánacdyeꞌ: "¿Tyi ĉaĉaij chị́yepte Ayos dyijyedyeꞌ u muꞌ? ¿Tyi ĉaĉaij tupuj jịꞌchiyete u? Mijam yirity", yiꞌ sánacdyeꞌ. Tsun na meꞌchupja dyijyedyeꞌ muꞌ Cristos, junꞌ chuc muꞌ dyijyi, meꞌdye tsun chimeꞌ.