Tashches Corintoĉantyidyes 13 - Tsimane

¹ Meꞌ raꞌ tsanꞌ soꞌmac jụijyaꞌ yụ paj qui yocsiꞌĉan p̂eyacdyeꞌ p̂eyaqui yụ, meꞌ raꞌ tsanꞌ anjersiꞌĉan p̂eyacdyeꞌ p̂eyaqui yụ, jam qui namꞌ mạꞌjeyacsi bäꞌyi jụijyaꞌ yụ, fibis raꞌ shupquiꞌ mọꞌ p̂eyacdyeꞌ yụ, jeñej yiris dẹvyiꞌsiꞌ shọijyis, meꞌ buꞌyiꞌ raꞌ shupquiꞌ mọꞌ p̂eyacdyeꞌ yụ.

² Meꞌ raꞌ tsanꞌ soꞌmactyiꞌ yụ Jenꞌsiꞌ p̂eyacdyeꞌ muꞌ, judyeyaꞌ räj soꞌmac yụ caminves chị́dyeꞌ Jenꞌsiꞌ muꞌ, meꞌ raꞌ tsanꞌ yụ fer anicjete Jenꞌ paj qui tupuj meijjete yocyaꞌjete yirity mụcuꞌ yụ, meꞌ tsanꞌ meꞌ jụijyaꞌ yụ, jam qui namꞌ mạꞌjeyacsi bäꞌyi jụijyaꞌ yụ, fibity raꞌ shupqui yụ, jam jedyedyety yụ.

³ Meꞌ raꞌ tsanꞌ yụ ñịbeꞌjeyacsi räj jedyeꞌ yụ muꞌin ñịbety in, judyeyaꞌ aꞌ yụ yụꞌtaqui yụ paj qui jiꞌcoꞌshayac, jam qui namꞌ mạꞌjeyacsi bäꞌyi jụijyaꞌ yụ, mọꞌ raꞌ jam junꞌ ñútyin yụ.

⁴ Mạꞌjeyacsejaꞌ bäꞌjaꞌ jụijyaꞌ tsun, meꞌ raꞌ chat jämꞌjeyacsejaꞌ muntyiꞌ in, judyeyaꞌ chimeꞌ dyich buꞌjaꞌ muꞌincheꞌ in, mijam raꞌ jịꞌfajqueyacsejaꞌ jedyeꞌ in. Mạꞌjeyacsejaꞌ jụijyaꞌ jam raꞌ fibiꞌnaĉaꞌ tsun mijam raꞌ vaꞌbunyejaꞌ,

⁵ mijam raꞌ ĉụiꞌ dyijtutiĉaꞌ tsun mijam raꞌ doroiꞌyejaꞌ muꞌincheꞌ in, mijam raꞌ dyijtucsebijaꞌ juchaj muꞌinsiꞌ in juchatusinꞌtyiꞌ jụijyaꞌ in, jämꞌjeyacsejaꞌ raꞌ mọmoꞌ.

⁶ Mạꞌjeyacsejaꞌ jụijyaꞌ tsun jam raꞌ maꞌjotacsebijaꞌ aꞌc̣his dyijyedyeꞌ muꞌin, mọꞌ raꞌ mọmoꞌ maꞌjotacsebijaꞌ mọꞌ rụijsis dyijyedyeꞌ muꞌin.

⁷ Mạꞌjeyacsejaꞌ jụijyaꞌ tsun, dyich buꞌjaꞌ raꞌ bäꞌjaꞌ, yejĉojaꞌ raꞌ anicyejaꞌ, mijam raꞌ farajjejaꞌ bisacdyeꞌ tsun, judyeyaꞌ yejĉojaꞌ raꞌ dyichchutiĉaꞌ räjdyes tsun.

⁸ Ayij raꞌ tupudyeꞌ jadyic raꞌ soꞌmac tsun p̂eyacdyeꞌ Jenꞌsiꞌ muꞌ paj qui voroꞌtacsejaꞌ, jadyic raꞌ soꞌmac tsun paj qui yocsiꞌĉan p̂eyacdyeꞌ p̂eyaĉaꞌ tsun. Aty jam raꞌ jemonac mọꞌ chị́dyeꞌ Jenꞌsiꞌ muꞌ, meꞌ meꞌ raꞌ jadyic carijtacdyedyes, mọꞌ na mạꞌjitidyes, mọꞌ raꞌ jam junꞌ mọtsiꞌ.

⁹ Q̂uinꞌ meꞌ tsanꞌ soꞌmac chị́dyeꞌ tsun Jenꞌsiꞌ muꞌ, jam qui namꞌ c̣hẹiꞌyaꞌ jayej tsun, anic moch tsun, meꞌ tsanꞌ soꞌmac Jenꞌsiꞌ p̂eyacdyeꞌ tsun, mọꞌ q̂uinꞌ p̂eijbijas tsun, jam qui namꞌ c̣hẹiꞌyaꞌ jayej tsun.

¹⁰ A qui na ramꞌ ayijyaꞌ tupudyeꞌ, räj raꞌ cạ̈tsiꞌ Jenꞌsiꞌ p̂eyacdyeꞌ muꞌ, aty jam raꞌ jemonjajshaꞌ ọij jedyeꞌ in, mijam raꞌ meꞌ soꞌmac Jenꞌyaꞌ tsun.

¹¹ Jeshaꞌ, miquiꞌdyemꞌ jiquej yụ itŝiꞌdyemꞌ dyijyedyeꞌ yụ, mijam dyijyedyeꞌtum p̂eyaqui yụ, yojdyemꞌ miquity u, meꞌ buꞌyiꞌ dyijyedyeꞌ yụ. Q̂uinꞌ chat aty ishoꞌ yụ aty jam meꞌ yụ, aty räj farajjeꞌ yụ junꞌ chuc miquitysiꞌ dyijyedyeꞌ muꞌ.

¹² Q̂uinꞌ jambiꞌ räj chị́yejaꞌ tsun, jeñej yirity muntyiꞌ ĉụiꞌ caviti vejyaꞌ ushnusĉan espejo, meꞌdye q̂uinꞌ chimeꞌ tsun jambiꞌ räj chị́yepja Jenꞌsiꞌ dyijyedyeꞌ muꞌ. Ayij raꞌ tupudyeꞌ chuñem nạijtyejaꞌ mọꞌ. Q̂uinꞌ tacaꞌ jayej chị́yejaꞌ tsun, a qui na ramꞌ ayijyaꞌ tupudyeꞌ, räj raꞌ chị́yejaꞌ tsun, yojdyemꞌ muꞌ Jenꞌ chäyisinꞌ u, meꞌdye raꞌ tsun chị́yejaꞌ chimeꞌ mọꞌ.

¹³ Mọꞌyaꞌ chibin jedyeꞌ in jam mọtsis raꞌ in: Anicyedyeꞌ, bisacdyeꞌ Jenꞌcheꞌ tsun, judyeyaꞌ mạꞌjitidyes. Mọꞌ na mạꞌjitidyes, mọjoꞌchaꞌ buꞌyiꞌ.